Komisioni Qendror i Zgjedhjeve (KQZ) ka miratuar disa vendime që lidhen me përgatitjet për raundin e dytë të zgjedhjeve për Kryetarë të Komunave, që do të mbahet më 9 nëntor 2025. Në këtë mbledhje, ndër pikat kryesore të rendit të ditës ishte procesi i akreditimit dhe konfirmimit të vëzhguesve të subjekteve politike, organizatave vendore e ndërkombëtare, si dhe përfaqësuesve të mediave që do të monitorojnë balotazhin.

Në fillim të mbledhjes, KQZ mori vendim për akreditimin dhe konfirmimin e 8,049 vëzhguesve të shtatë subjekteve politike të certifikuara, të cilat garojnë në raundin e dytë të zgjedhjeve për Kryetarë të Komunave. Këta vëzhgues do të jenë të angazhuar në qendrat e votimit në të gjitha komunat ku do të zhvillohet procesi zgjedhor.

Në vazhdim, KQZ miratoi gjithashtu akreditimin e vëzhguesve të organizatave të ndryshme joqeveritare dhe përfaqësive diplomatike, të cilat do të kenë mandat për të monitoruar mbarëvajtjen e procesit zgjedhor gjatë balotazhit të 9 nëntorit.

Në pikën e fundit të rendit të ditës, Komisioni vendosi edhe për akreditimin e përfaqësuesve të mediave vendore dhe ndërkombëtare, që do të raportojnë drejtpërdrejt nga qendrat e votimit dhe do të ndjekin zhvillimet gjatë ditës së zgjedhjeve.

Gjatë mbledhjes, anëtari i KQZ-së nga Lëvizja Vetëvendosje, Sami Kurteshi, ngriti një shqetësim në lidhje me vonesat e fletëvotimeve që po raportohen nga disa qytetarë të Kosovës që jetojnë në vendet skandinave, kryesisht në Norvegji.

“Ka shumë persona, sidomos në Norvegji, që nuk e kanë marrë postën me kohë. Dua ta ngrit si çështje, sepse është shqetësim i disa qytetarëve që ende nuk u ka arritur zarfi me fletvotim. Afati është deri nesër apo pasnesër dhe nuk kanë mundur të votojnë. A ekziston mundësia që të shtyhet ky afat?”, tha Kurteshi.

Në lidhje me këtë çështje, anëtari tjetër i KQZ-së nga LVV, Alban Krasniqi, u bashkua me shqetësimin, duke kërkuar një raport të detajuar për situatën dhe mundësinë e shtyrjes së afatit për pranimin e fletvotimeve në rastet ku ka pasur vonesa të postës.

“Divizioni përkatës duhet ta shqyrtojë këtë problem dhe të raportojë nëse ka pasur vonesa në dërgimin e fletvotimeve. Nëse po, duhet të diskutohet mundësia e shtyrjes së afatit. Kam marrë telefonata edhe nga Gjermania, por sidomos nga vendet skandinave. Ka gjasa që një pjesë e zarfeve të dërguara të premten të na dorëzohen të martën, prandaj duhet të shohim ku qëndron problemi,” tha Krasniqi./EO

Banka Qendror e Kosovës (BQK) mirëpret vlerësimet pozitive të Komisionit Evropian i cili konfirmon se sektori financiar ka ruajtur qëndrueshmëri të lartë, kapitalizim të mjaftueshëm dhe avancim të dukshëm në harmonizimin me standardet e Bashkimit Evropian.

Raporti thekson se bankat në Kosovë operojnë me nivele të larta kapitali dhe likuiditeti, ndërsa kreditë jo performuese mbeten në nivel minimal historik. Vlerësohet gjithashtu miratimi i rregullores për shtesat makroprudenciale të kapitalit dhe planit për zbatimin e SREP, në përputhje me udhëzimet e EBA-s.

Në fushën e pagesave, Raporti i Progresit nënvizon miratimin e Ligjit për Shërbimet e Pagesave, anëtarësimin e BQK-së në EACHA dhe rritjen e ndjeshme të pagesave elektronike, si dhe zgjerimin e shërbimeve financiare në komunat veriore.

Komisioni vlerëson masat e ndërmarra kundër falsifikimit të euros, progresin në digjitalizim dhe financa të qëndrueshme, forcimin e qasjes në financim për NVM-të përmes FKGK, si dhe përparimet në kornizën AML/CFT dhe ligjin për Kripto-Asetet, duke kaluar në mbikëqyrje të bazuar në rrezik.

Raporti njeh gjithashtu forcimin e qeverisjes së brendshme të BQK-së, përfshirë riorganizimin institucional, politikat e avancuara të burimeve njerëzore dhe krijimin e divizionit të sigurisë kibernetike.

Krahas vlerësimeve pozitive, KE rekomandon avancimin e mbledhjes së të dhënave financiare, zhvillimin e kornizës për rimëkëmbjen bankare dhe përmirësimin e infrastrukturës së tregut financiar.

BQK riafirmon përkushtimin për të vazhduar reformat dhe përafrimin e plotë me acquis të BE-së, duke falënderuar Komisionin Evropian për vlerësimin dhe bashkëpunimin./KP

Kryetari i Lidhjes Demokratike të Kosovës, Lumir Abdixhiku, ka thënë se zgjidhja e vetme për krizën politike në Kosovë janë zgjedhjet e reja. 

Sipas tij, në Kosovë s’mund të ketë qeveri të pakicës. Lideri i LDK-së në konferencë për media të mërkurën tha se mandatimi i Glauk Konjufcës për kryeministër vetëm sa e zvarrit krizën politike, derisa i kërkoi atij që ta pranojë se s’ka shumicë parlamentare.

“Çdo zvarritje e tillë e qëllimshme e institucioneve përbën zgjatje të krizës. Dëm për buxhetin e Republikës dhe rrezik për stabilitetin institucional dhe demokratik të vendit”, tha ai./KP

Kryeministri në detyrë i Kosovës, Albin Kurti, ka kujtuar sot pesëvjetorin e dërgimit në paraburgim të ish-udhëheqësve të UÇK-së në Hagë, duke theksuar se qëndrimi i tyre pas hekurave nuk ka më as arsye ligjore e as morale.

Në një postim në Facebook, Kurti tha se më 5 nëntor 2020, menjëherë pasi kishte vendosur lule të freskëta te varri i Astrit Deharit, Rexhep Selimin e kishin dërguar në burgun e Hagës, ku ndodhet ende sot.

“Përveç tij, edhe Hashim Thaçi, Kadri Veseli dhe Jakup Krasniqi po ndodhen në paraburgim tash e pesë vjet. Pesë vite pritje, pesë vite pas hekurave ndërkohë që arsyeja e njëjtë përsëritet në çdo vendim për refuzimin e lirimit: “rreziku i ndikimit mbi dëshmitarët”. Por Prokuroria e ka përfunduar rastin e saj. Dëshmitarë më nuk ka. Nuk ka as arsye ligjore, as morale që të mbahen edhe më tej në paraburgim”, ka shkruar Kurti.

Madje Kurti sot në një postim në Facebook ka publikuar për herë të parë letrën dërguar kryetares e Gjykatës Speciale, Ekaterina Trendafilova për lirimin e çlirimitarëve nga Haga.

Ai shtoi se si kryeministër dhe si kryetar i Lëvizjes Vetëvendosje, ka kërkuar lirimin e tyre që nga fillimi i procesit, ndërsa bëri publike një letër të dërguar në shtator të vitit 2022 kryetares së Dhomave të Specializuara, Ekaterina Trendafilova.

“E bëj publike sot për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre dhe ta mbrojnë në liri luftën e drejtë çlirimtare të Kosovës”, theksoi Kurti, duke shtuar se përgjigjja e marrë nga Trendafilova “nuk ndryshoi asgjë”.

Sipas tij, kërkesat për lirimin e tyre mbeten të vlefshme dhe Kosova ofron të gjitha garancitë për një vendim pozitiv.

“Së bashku me të, edhe Hashim Thaçi, Kadri Veseli e Jakup Krasniqi po mbahen tash e pesë vite në paraburgim. Arsyetimi për refuzimin e lirimit të tyre është i njëjtë në çdo vendim – ‘rreziku i ndikimit mbi dëshmitarët’. Por Prokuroria e ka përfunduar rastin e saj. Dëshmitarë më nuk ka”, shkruan Kurti.

Hashim Thaçi, Kadri Veseli, Rexhep Selimi e Jakup Krasniqi po mbahen në paraburgim në Hagë nga nëntori i vitit 2020. Në paraqitjet e tyre të para në Dhomat e Specializuara në Hagë ata janë deklaruar të pafajshëm./KP