Lajmet

Udhëheqësit e BE-së me mendime të ndryshme sa i përket pranimit të shpejtë të Ukrainës në bllok

Liderët thjesht “pranuan aspiratat evropiane dhe zgjedhjen evropiane të Ukrainës”.

Published

on

Udhëheqësit e BE-së kanë pasur mendime të ndara rreth thirrjeve të Kievit për një pranim të shpejtë që do ta bënte Ukrainën t’i bashkohej bllokut në kohë rekord, përcjell UBT News.

Që kur shpërtheu lufta, presidenti i Ukrainës, Volodymyr Zelenskyy, dhe zyrtarët e tij të lartë kanë përsëritur thirrjet për një hyrje të përshpejtuar, një opsion i padëgjuar që sfidon negociatat tradicionalisht komplekse dhe të gjata.

Duke u takuar në Versajë për një samit joformal të BE-së, 27 liderët thjesht “pranuan aspiratat evropiane dhe zgjedhjen evropiane të Ukrainës” dhe morën parasysh aplikimin që Zelenskyy nënshkroi më 28 shkurt.

Shtetet anëtare kanë ngarkuar tashmë Komisionin Evropian për hartimin e një “opinioni” në lidhje me këtë kërkesë. Dokumenti pritet të arrijë në javët në vijim, megjithëse nuk është dhënë një afat specifik.

“Në pritje të këtij [opinioni] dhe pa u vonuar, ne do të forcojmë më tej lidhjet tona dhe do të thellojmë partneritetin tonë për të mbështetur Ukrainën në ndjekjen e rrugës së saj evropiane. Ukraina i përket familjes sonë evropiane”, shkruajtën udhëheqësit në deklaratën e tyre të përbashkët të Versajës.

Pasi Komisioni Evropian të publikojë opinionin e tij, liderët supozohet të votojnë nëse do t’i jepet statusi “kandidat” Ukrainës. Hapi duhet të miratohet me unanimitet dhe nuk garanton se oferta do të jetë përfundimisht e suksesshme. Pas kësaj mund të fillojnë negociatat e mundimshme dhe zbatimi i reformave.

Uji i ftohtë i derdhur mbi ambiciet e Kievit pasqyron një ndarje Perëndim-Lindje brenda bllokut.

Në fillim të këtij muaji, një grup shtetesh anëtare lindore (Bullgaria, Republika Çeke, Estonia, Letonia, Lituania, Polonia, Sllovakia dhe Sllovenia) shkruan një letër duke kërkuar që Ukrainës t’i jepej “menjëherë” statusi i kandidatit.

Por Evropa Perëndimore ka qenë më pak e prirur.

“A mund të hapim sot një procedurë pranimi me një vend në luftë? Nuk mendoj kështu”, tha presidenti francez Emmanuel Macron në Versajë. “A duhet ta mbyllim derën dhe të themi ‘kurrë’? Kjo do të ishte e padrejtë”.

Kryeministri spanjoll Pedro Sánchez kishte thënë më parë në një intervistë se pranimi ishte një proces “i gjatë” me “kërkesa dhe reforma” që duheshin përmbushur.

Homologu i tij holandez, Mark Rutte, ishte edhe më i qartë përpara takimit.

“Le të mos ketë asnjë dyshim për faktin se Holanda dhe Ukraina qëndrojnë krah për krah”, u tha Rutte gazetarëve. “Por nuk ka një gjë të tillë si një proces i shpejtë i pranimit. Nuk ekziston”.

Kryeministri polak Mateusz Morawiecki më vonë akuzoi disa vende se duan të “ngadalësojnë” procesin, “si Holanda”.

Megjithatë, vendet baltike festuan shpalljen e samitit si një “dritë jeshile” për aspiratat e Kievit.

Marrëdhëniet BE-Ukrainë drejtohen aktualisht nga një Marrëveshje Asociimi që thellon bashkëpunimin politik dhe ekonomik, një kornizë që liderët duan të përdorin për të përforcuar partneritetin ekzistues.

Sipas marrëveshjes, Kievi angazhohet të zbatojë një seri reformash për ta sjellë vendin më pranë standardeve të BE-së. Vendi, megjithatë, vazhdon të shënojë dobët në indekset ndërkombëtare: Freedom House e quan atë “pjesërisht të lirë” ndërsa The Economist e përshkruan atë si një “regjim hibrid”. Reporterët pa Kufij thonë se kontrolli i oligarkëve në media është ende shumë “i ngushtë”.

Deklarata e Versajës përfshinte gjithashtu një zotim për të rindërtuar Ukrainën pasi lufta kundër forcave pushtuese ruse të përfundojë./UBTNews/

Rajoni

Në UBT Ferizaj u organizua sesioni informues për bursën prestigjioze Chevening Scholarship

Published

on

UBT Ferizaj ishte mikpritës i një sesioni të veçantë informues për bursën prestigjioze Chevening Scholarship, me pjesëmarrjen e përfaqësuesve të Ambasadës Britanike në Kosovë, në bashkëpunim me Chevening Alumni Foundation in Kosovo.

Gjatë këtij aktiviteti, studentët e UBT-së në Ferizaj u njohën me procesin e aplikimit, kriteret e përzgjedhjes dhe afatet e rëndësishme, si dhe morën këshilla praktike për një aplikim të suksesshëm.

Ky aktivitet synoi të nxisë interesimin e studentëve për të aplikuar në bursën Chevening dhe të ofronte njohuri të thelluara mbi mundësitë që kjo bursë ofron pas përfundimit të studimeve, si zhvillimi i aftësive profesionale dhe krijimi i perspektivave të reja karrierike.

Continue Reading

Lajmet

Kosova e Turqia vazhdojnë bashkëpunimin në fushën e mbrojtjes

Published

on

By

Komandanti i Forcës së Sigurisë së Kosovës, gjenerallejtënant Bashkim Jashari, ka pritur sot në takim shefin e Mbrojtjes së Turqisë, gjeneral Selçuk Bayraktaroğlu, me të cilin ka biseduar për zgjerimin e bashkëpunimit në fushat e trajnimeve, edukimit dhe mbështetjes në ngritjen e kapaciteteve ushtarake të FSK-së.

Jashari me këtë rast falënderoi Bayraktaroğlu për mbështetjen e vazhdueshme që Turqia i ka dhënë FSK-së në ngritjen e kapaciteteve profesionale, raporton KosovaPress.

Ndërsa, shefi i Mbrojtjes së Turqisë ri-konfirmoi përkushtimin e vendit të tij për të vazhduar dhe thelluar bashkëpunimin me FSK-në, duke vlerësuar lart zhvillimin dhe profesionalizmin e ushtrisë së Kosovës.

Të dy gjeneralët u pajtuan për vazhdimin e zgjerimit të mëtutjeshëm të bashkëpunimit bilateral në fushën e mbrojtjes, thuhet në njoftimin e FSK-së./D.B/KP

Continue Reading

Rajoni

UBT dhe AMIK nisin projektin “Inkuadrimi i Vajzave në Ndërmarrësi” me trajnimin e parë

Published

on

Në ambientet e Parkut Shkencor, Inovativ dhe Teknologjik të UBT-së u zhvillua hapja e projektit “Inkuadrimi i Vajzave në Ndërmarrësi”, një iniciativë e organizuar nga UBT në bashkëpunim me AMIK – Asociacioni i Institucioneve Mikrofinanciare të Kosovës.

Ky aktivitet ka për qëllim fuqizimin e vajzave dhe grave të reja përmes ofrimit të njohurive praktike, mentorimit dhe krijimit të mundësive të reja për angazhim në botën e ndërmarrësisë. Pjesëmarrëset do të pajisen me shkathtësi të rëndësishme për të ndërmarrë iniciativa profesionale dhe për të kontribuar në zhvillimin ekonomik dhe social të vendit, duke rritur mundësitë e tyre për punësim, krijim të bizneseve të vogla dhe inovacion.

Në hapje të aktivitetit, u theksua rëndësia e partneritetit mes institucioneve akademike dhe sektorit financiar për mbështetjen e gjeneratës së re të sipërmarrësve.

Rektori i UBT-së, Prof. Dr. Edmond Hajrizi, vuri në pah se projektet e tilla janë të nevojshme për të krijuar një platformë të qëndrueshme për ndërmarrësi dhe zhvillim ekonomik në nivel vendi, dhe se bashkëpunimi me sektorin financiar dhe organizatat që mbështesin inovacionin është kyç për suksesin e vajzave të reja.

Zëvendësguvernatorja e Bankës Qendrore të Kosovës, Nesrin Shileku-Shala, i inkurajoi pjesëmarrëset duke theksuar rëndësinë e edukimit financiar, planifikimit dhe guximit për të ndërmarrë iniciativa të reja, duke u bërë modele suksesi për komunitetet e tyre.

Drejtori i Bordit të AMIK, Adrian Alo, theksoi se fuqizimi i vajzave përmes projekteve të ndërmarrësisë kontribuon në stabilitetin ekonomik dhe përfshirjen sociale, duke nxitur edhe zhvillimin e sektorit mikrofinanciar dhe inovacionin në vend.

Përfaqësuesi i AMIK, Prof. Shpresim Vranovci, nënvizoi rëndësinë e mentorimit dhe krijimit të rrjetit të kontakteve për pjesëmarrëset, si një element kyç për arritjen e suksesit profesional dhe zhvillimin e projekteve të reja sipërmarrëse.

Ndërsa, Drejtori i Departamentit për Edukim dhe Zhvillim Profesional në UBT, Prof. Dr. Besnik Skenderi, theksoi se institucioni mbetet i përkushtuar të ofrojë platforma praktike për zhvillimin e studentëve dhe të rinjve, duke i lidhur ata me sektorët strategjikë të ekonomisë dhe aktorë që kontribuojnë drejtpërdrejt në krijimin e mundësive të reja për punësim, ndërmarrësi dhe inovacion.

Ky projekt shënon një hap të rëndësishëm drejt përfshirjes së vajzave dhe grave në ekonominë inovative dhe ndërmarrëse të vendit, duke nxitur një kulturë të barazisë, sipërmarrësisë dhe zhvillimit të qëndrueshëm ekonomik dhe social.

Continue Reading

Rajoni

​Shqipëria dorëzon në Komisionin Evropian dokumentacionin e plotë për Kapitullin e Doganave

Published

on

By

Administrata Doganore e Shqipërisë ka dorëzuar zyrtarisht pranë Komisionit Evropian paketën e plotë të dokumentacionit për përmbushjen e kushteve përmbyllëse në kuadër të Kapitullit 29 “Bashkimi doganor”, duke shënuar një hap të rëndësishëm drejt aderimit të vendit në familjen e madhe evropiane.

Administrata Doganore përgatiti dhe dorëzoi kalendarin legjislativ dhe tabelat e konformitetit me acquis të BE-së; strategjitë kryesore të administratës në fushat e biznesit, burimeve njerëzore dhe trajnimit; masat për rritjen e integritetit dhe performancës së strukturës doganore; planin kombëtar shumëvjeçar për sistemet IT dhe masat për ndërveprimin me sistemet e BE-së; informacion mbi ratifikimin e Protokollit të Konventës Kuadër për Kontrollin e Duhanit; raportin vjetor “Libri Jeshil-Dogana 2024 dhe Prioritetet 2025”, i botuar për të katërtin vit radhazi.

Administrata Doganore thotë se mbetet e angazhuar për të vijuar përmbushjen e të gjitha detyrimeve të Kapitullit 29, duke garantuar përafrimin legjislativ, forcimin e kapaciteteve administrative, avancimin e sistemeve digjitale doganore dhe thellimin e bashkëpunimit me BE në luftën kundër tregtisë së paligjshme.

“Ky është një moment historik që i shërben jo vetëm integrimit të Shqipërisë në BE, por edhe ndërtimit të një administrate moderne, të besueshme dhe në shërbim të qytetarëve e biznesit”, thuhet në postimin e ADSH-së në Facebook./D.B/KP

Continue Reading

Të kërkuara