Aktualitet

UBT Radio Campus me skemë të pasur programore

Published

5 years ago

April 26, 2021

Betim Gashi

UBT Radio Campus është radio e cila operon në kuadër të veprimtarisë së UBT-së. E licencuar më 25 mars 2015 nga Komisioni i Pavarur i Mediave, UBT Radio Campus ka filluar me transmetimin e programeve në gjashtë muajt e fundit.

Njëra nga ish-studentet e drejtimit Media dhe Komunikim të UBT-së, Saranda Krasniqi, e cila tani është e punësuar në Radio Campus, tregoi për transmetimin që bënë radio gjatë ditës.

“UBT Radio Campus transmeton muzikë për 24 orë. Ka programin e mëngjesit, programin e pasdites dhe katër edicione të lajmeve blic. Në programin e mëngjesit publiku mund të informohet për më të rejat nga politika, shëndetësia, arsimi, madje edhe për ushqime e dieta si dhe kuriozitete, ndërsa në atë të pasdites për showbizz dhe teknologji”, tha ajo.

Tutje Krasniqi tregoi për orarin e transmetimeve të emisioneve dhe të edicioneve të lajmeve.

“Emisioni i mëngjesit Campus AM fillon në ora 08:00 dhe mbaron në orën 10:00, kurse programi i pasdites ”Java me ju” nis transmetimin në orën 14:00 dhe mbaron në 16:00. Edicionet e lajmeve blic transmetohen katër herë në ditë, njëri duke filluar nga ora 10:00, edicioni i dytë në 12:00, pastaj në orën 14:00 dhe i fundit në orën 16:00”, shtoi ajo.

Lajmet dhe zhvillimet që transmetohen nga kjo radio janë në përputhje me kodin e etikës, si dhe në përputhje me standardet e parapara nga Komisioni i Pavarur për Media (KPM). Radio ka prioritet objektivitetin, shpejtësinë, saktësinë dhe të jetë një media e balancuar.

Radio Campus zbaton një standard të avancuar të programeve informative duke zhvilluar biseda nga tereni, intervista në studio, mysafirë nga fusha të ndryshme, si: Arsim, Inovacion, Ekonomi, Ndërmarrësi, Kulturë, Politikë, Sport etj.

Udhëhiqet nga një staf profesional dhe është i hapur për të gjithë kategoritë e shoqërisë. Krasniqi tregoi se stafi i radios përbëhet nga pesë persona, ku tri janë studente të cilat kanë diplomuar në Media dhe Komunikim në UBT, dhe që tani udhëheqin disa prej emisioneve të radios.

“Pjesë e stafit janë edhe një teknik së bashku me drejtorin gjeneral të radios, Pëparim Namani”, deklaroi Krasniqi.

UBT Radio Campus ka dëgjues në shumë qytete të Kosovës, e që synon që dita-ditës të fuqizohet edhe më tej.

“Dëgjohet në Prishtinë, Lipjan, Ferizaj e në qytete të tjera. Duke u bazuar në mesazhe e komente, ka dëgjueshmëri e cila dita ditës po rritet”, përfundoi Krasniqi.

Në radio involvohen direkt edhe studentët e UBT-së të Media dhe Komunikimit, të cilët i zhvillojnë njohuritë e tyre dhe punën praktike.

(Autore e tekstit është Margarita Llausha, studente e vitit të parë në Media dhe Komunikim në UBT)

Lajmet

30 për qind bursë për ish-studentët e UBT-së në programet më inovative Master – regjistrohu sot!

Published

6 hours ago

August 12, 2026

ubtnews

UBT po u ofron të gjithë të diplomuarve të tij një mundësi të veçantë për të vazhduar rrugëtimin akademik dhe profesional, duke përfituar 30% bursë për studimet Master në UBT.

Në një treg pune që po ndryshon me shpejtësi, avancimi i vazhdueshëm profesional po bëhet gjithnjë e më i rëndësishëm. Për këtë arsye, ish-studentët e UBT-së kanë mundësinë të rikthehen në universitet për të thelluar njohuritë, fituar specializime të reja dhe zhvilluar kompetenca të avancuara, tashmë me një përfitim të veçantë prej 30% bursë.

Kjo mundësi vlen për programet Master të UBT-së, të cilat përfshijnë disa nga fushat më të kërkuara dhe inovative të tregut bashkëkohor, duke u dhënë të diplomuarve mundësinë të zgjedhin një program që përputhet me profesionin, interesat dhe objektivat e tyre të karrierës.

Programet Master në UBT përfshijnë:

Menaxhment, Biznes dhe Ekonomi
FinTech dhe Menaxhimi i Inovacionit
Shkenca Kompjuterike dhe Inxhinieri
Sistemet e Informacionit dhe Menaxhment
Inxhinieri e Mekatronikës
Inxhinieri e Ndërtimit dhe Infrastrukturë
Inxhinieri e Trafikut dhe Transportit
Inxhinieri e Energjisë dhe Mjedisi
Arkitekturë dhe Planifikim Hapësinor
E Drejta Penale
E Drejta Civile dhe Pronës
E Drejta Komerciale
Gjuhë, Media dhe Komunikim
Politika Publike dhe Menaxhim
Shkenca Politike
Studime të Sigurisë
Psikologji
Shkencat dhe Teknologjia e Ushqimit
Shëndet Publik dhe Menaxhim
Biokimi
Shkencat Paramjekësore
Agrikulturë dhe Mjedis
Shëndet dhe Aktivitet Fizik

Përmes programeve të orientuara drejt inovacionit dhe nevojave të tregut, UBT synon që studentët Master të fitojnë jo vetëm njohuri të avancuara akademike, por edhe kompetenca profesionale të aplikueshme në praktikë.

Për ish-studentët e UBT-së, kjo është mundësia për ta vazhduar aty ku e nisën – duke e kthyer përvojën universitare në një nivel të ri profesional.

Regjistrohu sot dhe përfito 30% bursë!

Aktualitet

Ronaldo i shpreh ngushëllime Messit për humbjen e babait

Published

6 hours ago

August 12, 2026

UBTNews

Cristiano Ronaldo i ka dërguar një mesazh të ndjerë ngushëllimi rivalit të tij të hershëm, Lionel Messi, pas vdekjes së babait të tij, Jorge Messi, në moshën 68-vjeçare pas një sëmundjeje të gjatë.

Duke lënë mënjanë rivalitetin sportive në fushë, ylli portugez reagoi në postimin e Messit me fjalët:

“Përqafime për ty dhe të dashurit në këtë moment të vështirë, Leo. Qëndro i fortë”.

Vendi

PDK paralajmëron veprime jashtë Kuvendit pas refuzimit të kërkesës për seancë

Published

6 hours ago

August 12, 2026

UBTNews

Sekretarja e Përgjithshme e Partisë Demokratike të Kosovës ka deklaruar se refuzimi për thirrjen e seancës më 12 gusht është një model i sjelljes politike nga Lëvizja Vetëvendosje dhe kryesuesi Avni Dehari, e jo thjesht një incident procedural. Sipas saj, shkelja e afatit 30-ditor dhe shpërfillja e rregullit për vazhdimin e seancës çdo 48 orë përbëjnë zbatim selektiv të Kushtetutës dhe bllokim të mandatit të deputetëve të zgjedhur më 7 qershor.

Ajo i bëri thirrje Albin Kurtit që ta kthejë vendin në binarë kushtetues, duke theksuar se PDK-ja nuk kërkon pushtet apo marrëveshje partiake, por funksionalizimin e shtetit. Gjithashtu, ajo bëri me dije se PDK-ja do të dorëzojë sërish kërkesë zyrtare për seancë pas 48 orësh dhe do të jetë çdo ditë në Kuvend.

Paralelisht me punën në Kuvend, ajo paralajmëroi zhvendosjen e aktivitetit politik edhe jashtë tij, përmes bashkëbisedimeve me qytetarë dhe grupe të ndryshme shoqërore. Në fund, ajo denoncoi edhe cënimin e integritetit fizik të disa deputetëve të PDK-së nga mbrojtja e afërt, duke njoftuar se për këtë rast do t’i drejtohen Inspektoratit Policor të Kosovës. /E.A/

Aktualitet

Shpëtohet e gjallë 32-vjeçarja pas 36 orësh nën rrënoja nga tërmeti në Kolumbi

Published

7 hours ago

August 12, 2026

UBTNews

Një 32-vjeçare është shpëtuar e gjallë pasi mbeti e bllokuar për 36 orë nën rrënoja, si pasojë e tërmetit të fuqishëm prej 7.4 ballësh që goditi Kolumbinë perëndimore.

Daniela Largo u nxor nga gërmadhat e një ndërtese të shembur në qytetin Pereira, pas një operacioni kompleks që zgjati 10 orë. Zjarrfikësit dhe ekipet e emergjencës arritën te ajo përmes një tuneli të hapur poshtë katër pllakave të rënda të betonit. Vendndodhja e saj u lokalizua falë një kamere të vogël, pasi një banor vendas dëgjoi thirrjet për ndihmë. Përmes një tuneli të parë të hapur nga lart ekipet i siguruan oksigjen, ndërsa përmes tunelit të dytë nga poshtë realizuan nxjerrjen e saj.

Shpëtimin e saj e ka përshëndetur edhe presidenti kolumbian, Abelardo de la Espriella, i cili e cilësoi ngjarjen si një “lajm që na mbush me shpresë”. Pas shpëtimit, Largo u shpreh e lehtësuar duke thënë se në shtëpi po e pret djali i saj 12-vjeçar.

Sipas të dhënave zyrtare, tërmeti tragjik ka lënë të paktën 188 të vdekur dhe qindra të tjerë të zhdukur. Bilancin më të rëndë e shënojnë qytetet Cali me 95 viktimë dhe Pereira me 79 të vdekur. Ekipet e kërkim-shpëtimit po vazhdojnë punën në terren për gjetjen e të mbijetuarve të tjerë. /BBC/