Mes ofertave të Suedisë dhe Finlandës për NATO-n, Turqia të martën theksoi se këto dy vende duhet të bëjnë ndryshime në ligjet e tyre kundër terrorizmit.

Duke folur në tavolinën e redaktorëve të Anadolu Agency në selinë e agjencisë në kryeqytetin Ankara, ministri i Jashtëm Mevlüt Çavuşoğlu tha se ekzistojnë disa kushte që të dyja vendet duhet të plotësojnë.

“Para luftës në Ukrainë, ne gjithmonë kemi mbështetur zgjerimin e NATO-s në të gjitha takimet e ministrave të jashtëm. Në mënyrë të ngjashme, ne e kemi mbështetur këtë politikë në rastin e vendeve të tilla si Maqedonia e Veriut dhe Mali i Zi, por tani po abstenojmë për shkak të mbështetjes së dhënë për terrorizmin nga dy vendet që duan të bëhen anëtarë të NATO-s”, tha ai.

Ai shtoi se Turqia mban një dialog me Suedinë dhe Finlandën në përputhje me direktivat e presidentit Rexhep Tajip Erdogan.

Duke cituar një takim konsultimi të zhvilluar ndërmjet delegacioneve të Turqisë, Suedisë dhe Finlandës, Çavuşoğlu tha se Ankaraja i dorëzoi një letër ku shprehej qartë pritshmëritë e saj nga të dy vendet që synojnë t’i bashkohen aleancës ushtarake.

“Edhe në kohën kur konsultimet (mes Turqisë, Suedisë dhe Finlandës) janë në vazhdim, këto grupe terroriste po demonstrojnë kundër Turqisë me leckat e tyre. Nga ana tjetër, FETÖ (Organizata terroriste Fetullah) është aktive në këto vende“, shtoi ai.

Çavuşoğlu kujtoi gjithashtu sanksionet e Suedisë dhe Finlandës për eksportet e armëve dhe produkteve të industrisë së mbrojtjes në Turqi, të cilat u vendosën pasi Ankaraja nisi operacionet kundër terroristëve të YPG/PKK-së në Sirinë veriore.
Suedia dhe Finlanda duhet të kuptojnë shqetësimet e sigurisë së Turqisë, theksoi Çavuşoğlu.

Duke theksuar se këto dy vende duhet të bëjnë ndryshime në ligjet e tyre kundër terrorizmit, ai theksoi se qëndrimi i Turqisë nuk do të ndryshojë nëse nuk bëhen amendamente.

“Ne i kemi dhënë dokumentet në formë të shkruar (në Suedi dhe Finlandë). Qeveritë mund të ndryshojnë, dhe qeveritë e tjera mund të vijnë më vonë dhe të thonë: “Ne nuk e dinim për këtë”. Pasi të bëhen anëtarë, qëndrimet e tyre mund të ndryshojnë. Prandaj ne i kemi dhënë të gjitha në formë të shkruar, ne e duam në formë të shkruar”, tha ai.

Duke shtuar se Sekretari i Përgjithshëm i NATO-s, Jens Stoltenberg, shpesh shpreh nevojën për të përmbushur shqetësimet e sigurisë së Turqisë, Çavuşoğlu, tha më tej se kreu i aleancës ofroi një takim trepalësh të ministrave të jashtëm me pjesëmarrjen e NATO-s.

Suedia dhe Finlanda aplikuan zyrtarisht për t’u bashkuar me NATO-n së fundmi. Një vendim i nxitur nga lufta e Rusisë kundër Ukrainës, e cila filloi më 24 shkurt.

Por Turqia, një anëtare prej kohësh e aleancës, ka shprehur kundërshtime ndaj ofertave për anëtarësim, duke kritikuar vendet për tolerimin dhe madje mbështetjen e grupeve terroriste.

Në fushatën e saj terroriste më shumë se 35-vjeçare kundër Turqisë, PKK e listuar si një organizatë terroriste nga Turqia, SHBA-ja dhe BE-ja ka qenë përgjegjëse për vdekjen e mbi 40 mijë njerëzve. YPG/PYD është degë siriane e PKK-së. /UBTNews/