Gjatë një përplasjeje në Zyrën Ovale, Presidenti amerikan, Donald Trump, i tha homologut të tij ukrainas, Volodymyr Zelensky, se Ukraina nuk ka “letrat” për të negociuar.

Kjo pas bisedave të fundit që u përqendruan në perceptimin e pozicionit të dobët të Ukrainës përballë përparimeve të Rusisë dhe dëshirës së Shtëpisë së Bardhë për të përfunduar luftën trevjeçare.

Tani, ndërsa Zelensky viziton Arabinë Saudite, ku ekipi ukrainas do të zhvillojë bisedime me zyrtarët amerikanë më 11 mars, për të diskutuar mundësitë për një marrëveshje paqeje, situata ka ndryshuar. Michael Froman, president i Këshillit për Marrëdhënie të Jashtme, theksoi se Ukraina ka “letrat më të dobëta” në tavolinë, duke shtuar se Uashingtoni nuk është i gatshëm të mbështesë pafundësisht Kievin.

Për më tepër, pas takimit të tensionuar të fund-shkurtit, SHBA ka rritur presionin ndaj Ukrainës duke pezulluar ndihmën ushtarake dhe ndarjen e informacioneve të inteligjencës. Gjithashtu, një marrëveshje e rëndësishme për mineralet mes SHBA dhe Ukrainës ka mbetur e papërfunduar.

Në kuadër të kësaj, Zelensky ka shprehur shpresë për përparim në bisedimet e ardhshme, ndërsa një rund i ri i bisedimeve po zhvillohet në Arabinë Saudite. Bisedimet do të përfshijnë edhe takime me princin saudit të kurorës, Mohammed bin Salman, dhe delegacionin amerikan të udhëhequr nga sekretari i Shtetit, Marco Rubio.

Ushtria izraelite ka sulmuar me mjete ajrore pa pilot (dronë) kampin e refugjatëve Bureij në pjesën qendrore të Rripit të Gazës dhe thuhet se si pasojë ka të vdekur dhe të plagosur.

Sipas informacioneve të siguruara nga burimet shëndetësore në rajon, dronët izraelitë vunë në shënjestër palestinezët që u mblodhën në kampin Bureij.

Raportohet se ambulancat që u dërguan në rajon pas sulmit i transportuan të vdekurit dhe të plagosurit në spitale, por nuk u nda asnjë informacion i qartë në lidhje me numrin e viktimave dhe të plagosurve.

Sulmi shkaktoi shqetësim të madh te popullata vendase dhe pak para incidentit u njoftua se një palestinez u plagos si pasojë e zjarrit të hapur nga ushtria izraelite në qytetin Rafah në jug të Rripit të Gazës.

Pavarësisht armëpushimit të arritur mes Izraelit dhe Hamasit më 19 janar, ushtria izraelite vazhdon shkeljet e saj në pjesë të ndryshme të Rripit të Gazës.

Në sulmet që Izraeli filloi në Rripin e Gazës më 7 tetor të vitit 2023, jetën e kanë humbur 48.467 palestinezë, përfshirë rreth 17.881 fëmijë dhe 12.316 gra, ndërsa janë plagosur 111.913 njerëz.

Nën rrënoja ende ka mijëra të vdekur ndërsa është shkatërruar edhe infrastruktura civile duke synuar spitalet dhe institucionet arsimore ku janë strehuar njerëzit.

Një aktivist pro-palestinez, i cili luajti një rol të rëndësishëm në protestat e Universitetit të Kolumbias kundër luftës Izrael-Hamas në Gaza, u arrestua në Nju Jork të shtunën në mbrëmje, tha avokati i tij.

Arrestimi i Mahmoud Khalil shënon një zhvillim të madh në premtimin e administratës Trump për të arrestuar dhe dëbuar studentë ndërkombëtarë të përfshirë në ato që i quan demonstrata antisemite kampus kundër Izraelit.

Agjentët e Emigracionit dhe Zbatimit të Doganave (ICE) arrestuan Khalilin në banesën e tij në pronësi të universitetit në Nju Jork të shtunën në mbrëmje, sipas avokates së tij Amy Greer, e cila tha se, që nga e diela në mbrëmje, ajo nuk e dinte se ku po ndalohej klienti i saj.

Zyrtarët e ICE kërcënuan se do të arrestonin gruan e Khalilit, e cila është tetë muajshe shtatzënë, shtoi Greer.

Në një telefonatë që pati me një nga agjentët gjatë arrestimit, Greer tha se i ishte thënë se Departamenti i Shtetit po kërkonte të anulonte vizën studentore të Khalilit.

Pasi ajo i informoi ata se Khalil në fakt jetonte në SHBA me rezidencë të përhershme të Kartës së Gjelbër, zyrtari tha se ata do të përpiqeshin ta revokonin atë në vend të kësaj, shtoi Greer.

“Nuk kemi mundur të marrim më shumë detaje se pse ai po ndalohet. Ky është një përshkallëzim i qartë. Administrata po ndjek kërcënimet e saj”, tha avokati.

Arrestimi i Khalil u konfirmua të dielën nga Tricia McLaughlin, një zëdhënëse e Departamentit të Sigurisë Kombëtare, e cila tha se ai u krye “në mbështetje të urdhrave ekzekutivë të Presidentit (Donald) Trump që ndalojnë antisemitizmin”.

McLaughlin pretendoi se Khalil, një shtetas algjerian me origjinë palestineze, kishte “udhëhequr aktivitete të lidhura me Hamasin, një organizatë e caktuar terroriste”. Ajo nuk ka ofruar asnjë provë për të mbështetur pretendimet.

Duke iu përgjigjur arrestimit të tij, Sekretari Amerikan i Shtetit Marco Rubio shkoi në X për të thënë se ndalimi i Khalilit ishte vetëm fillimi.

“Ne do të revokojmë vizat ose kartat jeshile të mbështetësve të Hamasit në Amerikë, në mënyrë që ata të mund të deportohen”, tha ai të dielën, pa dhënë asnjë provë kundër Khalilit.

Ndërkohë, kritikët thanë se administrata Trump po vepronte për interesa vetjake.

“Kjo ka pamjen e një veprimi hakmarrës kundër dikujt që shprehu një mendim që administrata Trump nuk i pëlqente,” tha Camille Mackler, themeluese e Immigrant ARC, një koalicion i ofruesve të shërbimeve ligjore në Nju Jork.

Khalil, i cili kohët e fundit u diplomua në Universitetin e Kolumbisë me një master në çështjet ndërkombëtare, shërbeu si negociator për studentët në bisedimet e tyre me zyrtarët e universitetit gjatë protestave në Kolumbia.

Një nga kërkesat e demonstruesve ishte që universiteti të largohej nga kompanitë e lidhura me Izraelin.

Si rezultat i rolit të dukshëm të Khalilit, aktivistët pro-izraelitë kanë kërkuar javët e fundit që administrata Trump të ndërmarrë veprime kundër tij.

Që nga fillimi i mandatit të tij të dytë presidencial, Trump ka premtuar se do të ndjekë njerëzit e përfshirë në ato që ai i quan “protesta të paligjshme” kundër Izraelit.

“Agjitatorët do të burgosen/ose do të kthehen përgjithmonë në vendin nga kanë ardhur. Studentët amerikanë do të dëbohen përgjithmonë ose, në varësi të krimit, do të arrestohen”, tha ai në faqen e tij të mediave sociale Truth Social të martën e kaluar.

Të premten, qeveria amerikane tha se po shkurtonte 400 milionë dollarë (368.7 milionë euro) në grantet dhe kontratat federale për Universitetin e Kolumbisë për shkak të protestave të kampusit të tij kundër luftës në Gaza.

I dërguari i administratës Trump si negociator për lirimin e pengjeve i cilësoi si “të dobishme” takimet e tij të fundit me përfaqësuesit e Hamasit, grupit që është përcaktuar si terrorist nga Shtetet e Bashkuara.

Diskutimet u përqëndruan në lirimin e një pengu amerikano-izraelit që po mbahet nga Hamasi.

Siç njofton korrespondenti i Zërit të Amerikës, Arash Arabasadi, Izraeli po planifikon dërgimin në Katar të një delegacioni për të diskutuar mbi armëpushimin.

Këtë fundjavë mijëra izraelitë u mblodhën jashtë Ministrisë së Mbrojtjes në Tel Aviv. Protestuesit kërkuan nga qeveria izraelite arritjen e një marrëveshjeje me Hamasin për lirimin e pengjeve.

Javën e kaluar në Uashington, Presidenti Donald Trump konfirmoi se administrata e tij zhvilloi për herë të parë bisedime të drejpërdrejta me Hamasin, një ndryshim i politikës së kahershme amerikane për të mos negociuar me terroristët.

“Po diskutojmë me Hamasin. Jemi duke ndihmuar Izraelin në diskutime, sepse po flasim për pengjet izraelite. Ne nuk po bëjmë asgjë në lidhje me Hamasin. Nuk po japim para. Në fakt, unë sigurova lirimin e 59 pengjeve pa dhënë asgjë”, thotë Presidenti Trump.

Të dielën në mëngjes, mbështetësit dhe familjarët e pengjeve u zgjuan në tenda jashtë Ministrisë izraelite të Mbrojtjes.

Mesazhi i tyre ishte i qartë: jo konflikte të reja me Hamasin dhe sigurimi i një marrëveshjeje për lirimin e pengjeve.

“Ka dhjetëra njerëz që u bashkuan në thirrjen tonë për qeverinë që lufta të ndalohet dhe të gjitha pengjet të kthehen në shtëpi”, thotë Ayala Metzger, familjare e një pengu të vrarë.

Ditëve të fundit, një negociator i administratës Trump u takua me Hamasin për të diskutuar një marrëveshje për lirimin e pengjeve, një takim që ai e quajti “shumë të dobishëm”.

“Mendoj se brenda disa javësh mund të shohim rezultate. Besoj se ka hapësirë për të vepruar midis asaj që Hamasi dëshiron dhe asaj që ata do të pranonin dhe asaj që Izraeli dëshiron dhe që është e pranueshme për ta. Mendoj se mund të arrihet një marrëveshje për lirimin e të gjithë të burgosurve, jo vetëm atyre amerikanë”, thotë Adam Boehler, i dërguar amerikan për pengjet.

Ndërkohë, palestinezët në Khan Younis të Gazës po përballen me mungesë të gjërave thelbësore.

Izraeli vendosi një bllokadë totale për të gjitha mallrat në enklavë – duke përfshirë ushqimin, karburantin dhe ilaçet, deri në lirimin e 59 pengjeve, që po vazhdojnë të mbahen në Gazë nga Hamasi.

Paletinezët thonë se po presin me orë të tëra për të marrë një bukë, për shkak të mungesës së energjisë elektrike dhe drurit të zjarrit për gatim.

Izraeli thotë se të hënën do të dërgojë në Katar një delegacion për të vazhduar negociatat me ndërmjetësuesit nga Egjipti dhe Katari.