Keith Kellogg, një gjeneral i pensionuar i ushtrisë amerikane dhe ish-pjesë e ekipit të Trumpit si shef i stafit të Këshillit të Sigurisë Kombëtare, është emëruar nga Donald Trump si i dërguari i posaçëm për luftën Ukrainë-Rusi. Sipas analistëve ish-gjenerali konsiderohet si një figurë kyçe për implementimin e një strategjie që synon të ndalë luftën.

Propozimi i planit të paqes së propozuar prej tij ka tërhequr vëmendjen e publikut.

Plani i Kelloggit, i botuar në një dokument nga grupi i mendimit pro-Trump, “America First”, ka të ngjarë të shërbejë si një bazë për strategjinë e administratës së ardhshme amerikane për trajtimin e krizës në Ukrainë.

Kellogg ka shprehur shqetësimin se bota po përballet me një moment shumë të rrezikshëm dhe mund të ndodhemi shumë afër një lufte globale. Ai thekson se është urgjente të merren masa të shpejta dhe të forta për të parandaluar përshkallëzimin e konfliktit, një pikë që duket se do të jetë pjesë e fokusit të politikës së jashtme të Trumpit.

Megjithëse shumë detaje të planit janë ende të panjohura, dokumenti i Kelloggit dhe Fred Fleitz po tërheq vëmendje në nivele ndërkombëtare. Fleitz argumenton se lufta mund të ishte shmangur, duke e akuzuar administratën e Joe Biden për “politika të paafta” që kanë përfshirë Amerikën në një konflikt të pafund. Ai thekson se një udhëheqje e fuqishme, që vendos interesat amerikane në prioritet, është e nevojshme për të përfunduar luftën dhe kritikon vazhdimin e dërgimit të armëve në Ukrainë, duke e quajtur këtë një “veprim të kushtueshëm dhe të papërgjegjshëm” që nuk çon në një zgjidhje afatgjatë për paqen.

Donald Trumpit premtoi gjatë fushatës se do të ndalë luftën që në ditën e parë të mandatit të tij të dytë. Megjithatë, ai ende nuk ka dhënë detaje të qarta mbi mënyrën se si do të realizohet kjo.

Ekonomia gjermane është në prag të recesionit edhe sivjet – industria është veçanërisht e prekur nga kriza. Pesimizmi dominon në kompanitë më të mëdha. “Ato po vuajnë më së shumti për shkak të rënies së aftësisë gjermane të konkurrencës në tregun botëror,” beson Ulrich Kater, kryeekonomist i Dekabanka.

Dobësia e ekonomisë gjermane ka pasoja shumë konkrete. “Kriza industriale dhe rënia ekonomike afatgjatë po lënë gjurmë në tregun e punës”, thotë Enzo Weber nga Instituti për Kërkimin e Tregut të Punës (IAB). Sipas vlerësimeve të studiuesve, papunësia pritet të vazhdojë të rritet. Deri në pranverë, thonë ata, në Gjermani “nuk pritet ndonjë ndryshim i trendit”.

Disa kompani të mëdha gjermane kanë njoftuar pushime masive nga puna në javët dhe muajt e fundit. Këto janë kompanitë e prekura.

Schaeffler

Kompania Schaeffler, e cila prodhon pjesë për industrinë e automobilave, ka njoftuar pushime nga puna dhe mbyllje të fabrikave. Për shkak të problemeve të vazhdueshme në sektorin industrial dhe kërkesës së dobët në tregun e automjeteve, Schaeffler planifikon të shkurtojë gjithsej 4.700 vende pune, nga të cilat 2.800 janë në Gjermani. Gjithashtu, nga një fabrikë në Austri dhe Britani të Madhe do të mbyllen. Kompania njoftoi gjithashtu pezullimin e prodhimit të disa produkteve në Berndorf, Austri, si dhe përfundimin e disa prodhimeve në Sheffield, Angli.

Continental

Furnizuesi i automjeteve Continental planifikon gjithashtu pushime masive për shkak të shitjeve më të dobëta në BMW, Mercedes dhe koncerne të tjerë, si dhe problemet në sektorin e makinave elektrike.

Sipas kompanisë, nga mesi i vitit 2023, tashmë janë eliminuar 5000 vende pune në zhvillim, prodhim dhe administrim. Deri në vitin 2028, ata planifikojnë të shkurtojnë gjithsej 7.150 vende pune, nga të cilat më shumë se një e treta i përket Gjermanisë.

Volkswagen

Prodhuesi më i madh gjerman i makinave (Volkswagen, i cili përfshin markat VW, Audi, Porsche, Seat, Skoda, Cupra, Lamborghini, Bentley dhe Ducati) po përballet me një krizë serioze. Sipas përfaqësuesve të sindikatës, tre fabrika të VW janë aktualisht në rrezik, ndërsa nga shkurtimi rrezikohen dhjetëra mijëra vende pune. Kompanisë i mungojnë blerësit për më shumë se 500.000 automjete, tha Dirk Große-Loheide, anëtar i bordit drejtues të markës VW. “Nëse nuk ka kërkesë, ne duhet t’i përshtatim kapacitetet prodhuese me situatën aktuale”, shtoi ai.

Edhe drejtori i markës Volkswagen, Thomas Schäfer theksoi se masat aktuale, si pensioni i parakohshëm, puna me orar të shkurtuar dhe shkurtimet e tjera nuk janë të mjaftueshme për të ulur shpenzimet. Momentalisht janë duke u zhvilluar negociatat me sindikatat IG Metall, por nuk është arritur asnjë marrëveshje deri tani. Negociatat do të vazhdojnë me 9 dhjetor, por tani për tani parashikohen të shkurtohen dhjetëra mijëra vende pune.

Bosch

Bosch, një tjetër furnizues i madh me pjesë të makinave, planifikon të shkurtojë deri në 5.550 vende pune – prej tyre 3.800 në Gjermani. Shifrat e sakta do të darkodohen në negociata me përfaqësuesit e punëtorëve. I prekur veçanërisht është sektori “Cross-Domain Computing Solutions”, i cili merret me zhvillimin e sistemeve për asistencën në drejtimin e automjeteve dhe në drejtimin autonom.

Bosch planifikon të prezantojë reduktimin e orëve të punës për shumë punonjës në Gjermani, gjë që do të rezultojë edhe me paga më të ulëta. Në total, do të preken rreth 10.000 punëtorë në nëntë lokacione në Gjermani. Kompania përmend krizën në industrinë e automobilave dhe kërkesën më të dobët si arsye, ndërsa rezultatet në sektorin e teknologjive të reja, siç është drejtimi i automatizuar, janë nën pritshmëritë e mëparshme.

ZF Friedrichshafen

Furnizuesi i pjesëve të automjeteve ZF Friedrichshafen planifikon të shkurtojë deri në 14.000 nga 54.000 vende pune sa ka në Gjermani. Vetëm në Saarbrücken, 1.800 punëtorë do të pushohen nga puna deri në fund të vitit 2025. Nëse situata e vështirë me porositë vazhdon, gjithsej 4.500 vende pune mund të shkurtohen deri në fund të vitit 2028. Kompania nuk e përjashton as mundësinë e mbylljes së ndonjë fabrike.

ZF ka probleme edhe me borxhe të mëdha për shkak të blerjeve të mëdha (marrje/blerje kompanish), ndërkohë që rezultatet e shitjeve janë shumë më të ulëta sesa është pritur. “Sipas të dhënave të fundit, në fund të vitit do të na mungojnë tre miliardë euro të ardhura”, tha kryetari i Këshillit të Punëtorëve, Achim Dietrich. Për më tepër, borxhet e mëdha vijnë si pasojë e blerjeve të korporatave të tjera.

Ford

Prodhuesi amerikan i makinave Ford planifikon të shkurtojë 2.900 vende pune në Gjermani deri në vitin 2027, shumica e tyre në fabrikën në Këln. Në total, rreth 4.000 vende pune do të shkurtohen në Evropë. Edhe pse kompania investoi dy miliardë euro gjatë viteve 2023 dhe 2024 në modernizimin e fabrikës në Këln, për prodhimin e automjeteve elektrike, pritshmëritë e shitjeve nuk u përmbushën.

Thyssenkrupp

Prodhuesi më i madh i çelikut në Gjermani, Thyssenkrupp Steel planifikon të shkurtojë rreth 11.000 vende pune gjatë gjashtë viteve të ardhshme. Deri në fund të vitit 2030, numri i të punësuarve do të bjerë nga 27.000 në 16.000. Kompania synon të reduktojë kapacitetin prodhues dhe të rrisë investimet në teknologjitë miqësore ndaj mjedisit, të cilat kërkojnë miliarda investime. Përveç kësaj, importi i çelikut të lirë nga Azia dhe kriza në industrinë e automobilave paraqesin një sfidë të madhe.

BASF

Në vitin 2022, BASF ka shpallur një program kursimi për shkak të rritjes së çmimit të gazit dhe kushteve të vështira të biznesit në Evropë. Një plan shtesë shtrëngimi u prezantua në fillim të këtij viti, duke përfshirë shkurtimet e vendeve të punës në Ludwigshafen. Deri në vitin 2026, BASF planifikon të ulë kostot me një miliard euro në vit. Deri në fund të vitit 2024, kompania do të shkurtojë 3.300 vende pune globalisht, duke përfshirë 2.500 në Ludwigshafen.

Gjithashtu u njoftua edhe mbyllja e tre fabrikave në Ludwigshafen, duke përfshirë prodhimin e acidit adipik – një përbërës kyç për plastikën. Këto masa edhe pse të kuptueshme në situatën aktuale ekonomike, do të lënë pa punë mijëra punëtorë dhe do të përkeqësojnë më tej situatën në tregun e punës.

Ukraina tha të premten se i ka goditur një depo të naftës dhe një stacioni radari të mbrojtjes ajrore brenda Rusisë.

Shtabi i Përgjithshëm i Ushtrisë së Ukrainës tha se sulmi ndaj depos së naftës Atlas në rajonin Rostov të Rusisë, shkaktoi zjarr në objekt. Kjo rafineri ishte goditur nga një sulm i ngjashëm më herët gjatë këtij viti.

“Atlasi është pjesë e kompleksit ushtarako-industrial të Rusisë, i cili e furnizon me produkte të naftës ushtrinë e Federatës Ruse”, tha ky shtab në një komunikatë në rrjetet sociale.

Në njoftim thuhet se një stacion radari, i cili kishte sistem kundërajror rus Buk-M3, u shkatërrua nga një sulm tjetër në zonën e kontrolluar nga Rusia në juglindje të rajonit Zaporizhja të Ukrainës.

Yury Slyusar, guvernatori në detyrë i rajonit të Rostovit, e pranoi se shpërtheu një zjarr në një “kompleks industrial” në zonën ku ndodhet rafineria, duke thënë se më shumë se 100 zjarrfikës po luftonin për ta shuar atë.

Për muaj me radhë, Rusia i ka bombarduar qytetet ukrainase me sulme gjithnjë e më të rënda me dronë, raketa dhe bomba, duke shkaktuar viktima dhe dëme në infrastrukturën energjetike.

Ukraina ka kryer disa kundërsulme prej kur administrata e presidentit amerikan, Joe Biden dhe aleatët evropianë të Kievit i dhanë leje asaj t’i përdorë raketat me rreze të gjatë veprimi kundër objektivave brenda Rusisë.

Gjatë fushatës presidenciale të vitit 2024, presidenti i zgjedhur amerikan, Donald Trump, e kritikoi Bidenin për derdhjen e miliarda dollarëve në Ukrainë për ta ndihmuar atë të luftojë. Trump, i cili do ta marrë detyrën në janar, ka thënë gjithashtu se mund t’i japë fund luftës brenda 24 orëve. Deklaratë e tij është interpretuar si një sugjerim se Ukraina mund të detyrohet të dorëzojë territorin që aktualisht kontrollohet nga Rusia.

Kjo duket se i ka nxitur si Moskën ashtu edhe Kievin që të përpiqen t’i forcojnë pozicionet gjeografike para se Trump ta marrë detyrën në janar.

Sulmet e intensifikuara të Rusisë kanë pasur në shënjestër infrastrukturën energjetike, duke çuar në ndërprerje emergjente të energjisë elektrike në shumë rajone, përfshirë Kievin, Odesën, Dnipropetrovskin dhe Donjeckun.

Raportohet se Kievi është detyruar gjithashtu t‘i shkëpusë nga rrjeti elektrik disa njësi të centraleve bërthamore gjatë sulmeve. Ukraina e prodhon më shumë se gjysmën e energjisë elektrike nga centralet bërthamore.

Sulmi ndodhi në një ditë kur temperatura në të gjithë Ukrainën kanë rënë nën zero gradë./REL/

Ministri gjerman i Mbrojtjes Boris Pistorius synon të blejë katër nëndetëse, me vlerë 4.7 miliardë euro, të cilat më parë duhet të miratohen nga Komisioni Parlamentar i Shpenzimeve, shkruan sot “Der Spiegel”.

Në kërkesën e dorëzuar në Komisionin e Ndarjeve, Ministria e Mbrojtjes thekson se nëndetëset po prokurohen me kërkesë të NATO-s.

Blerja e nëndetëseve është e nevojshme në mënyrë që Gjermania të përmbushë kërkesat e NATO-s për mbrojtje më të mirë të krahut verior të Aleancës, shkruan gazeta gjermane, bazuar në një inspektim të dokumentit të paraqitur.