Aktualitet

Tërnava uron Kurban Bajramin – kërkon respektimin e masave, lutet për ata që pësuan nga vërshimet

Published

4 years ago

on

Myftiut të Kosovës, Naim Tërnava me rastin e Festës së Kurban Bajramit tha se festat fetare në vazhdimësi kanë kultivuar begatitë shpirtërore para atyre materiale, urtësinë para euforisë, drejtësinë para zullumit, paqen para konfliktit e dhunës dhe solidaritetin e bamirësinë para koprracisë.

Ai ka shtuar se Festa e Kurban Bajramit është një ndër momentet më të rëndësishme të vitit për besimtarët myslimanë, që karakterizon therja e kurbanit dhe kryerja e haxhit.

“Kjo qëndron edhe te festa e Kurban-Bajramit, ngase në themelet e saj ka sakrificën, barazinë, solidaritetin dhe mirësinë, vlera këto që si askush tjetër, kjo festë i sjellë për besimtarët dhe për njerëzimin. Festa e Kurban Bajramit është një ndër momentet më të rëndësishme të vitit për besimtarët myslimanë, të cilën e karakterizon therja e kurbanit që është ibadet i rëndësishëm për besimtarët, si dhe kryerja e haxhit si kusht i Islamit”.

Ai më tej ka shtuar se lirimi i masave anti-Covid dhe ardhja e bashkatdhetarëve e bëjnë edhe më madhështore këtë fetës duke kërkuar edhe më tutje respektim të masave.

“Edhe më madhështore festën e Kurban Bajramit të sivjemë e bën lirimi i masave anti-Covid, e në veçanti prania e mërgatës sonë që e begaton festën dhe e forcon institucionin e familjes. Ju ftoj të gjithëve që ta festojmë Bajramin, të shijomë nimetet e kësaj feste, por njëkohësisht të kemi kujdes që të respektojmë masat anti-covid, sepse virusi është ende në mesin tonë”.

“Në këtë ditë feste, edhe njëherë e lusim Zotin që t’i mëshirojë të gjithë ata që pësuan nga Covidi, të prekurve t’u japë shërim të shpejtë me shpresë te Zoti se jemi në prag të kalimit të kësaj sfide globale”.

Fjalimi i plotë:

Të nderuar besimtarë!

Vëllezër e motra!

Të nderuar qytetarë të Kosovës!

Kam nderin dhe kënaqësinë, që sot, në këtë ditë të madhe për besimtarët myslimanë, në Ditën e Arafatit, kur prej festës së Kurban Bajramit na ndajnë edhe pak orë, në emrin e Bashkësisë Islame të Kosovës, institucioneve të saja dhe në emrin tim, t’ju drejtohem me këtë mesazh urimi të gjithë besimtarëve myslimanë, me urimet dhe përgëzimet më të ngrohta e më të sinqerta, duke e lutur Zotin e Madhërishëm që ta përjetojmë Mëshirën e Ditës së Arafatit, dhe kënaqësinë e festës së Kurban-Bajramit.

Vëllezër të nderuar,

Festat e Bajramit si për nga karakteri ashtu edhe për nga ndikimi, janë festat më popullore te besimtarët myslimanë, ngase në këto festa besimtarët si në asnjë rast tjetër, përjetojnë shpirtërisht e emocionalisht afërsinë me Krijuesin, ngrohtësinë e familjes e farefisit, respektin e mirëkuptimin për tjetrin, ndihmën dhe përkrahjen për vëllain, e për atë që ka nevojë.

Festat fetare te populli ynë, në vazhdimësi kanë kultivuar begatitë shpirtërore para atyre materiale, urtësinë para euforisë, drejtësinë para zullumit, paqen para konfliktit e dhunës, dhe solidaritetin e bamirësinë para koprracisë.

Kjo qëndron edhe te festa e Kurban-Bajramit, ngase në themelet e saj ka sakrificën, barazinë, solidaritetin dhe mirësinë, vlera këto që si askush tjetër, kjo festë i sjellë për besimtarët dhe për njerëzimin.

Festa e Kurban Bajramit është një ndër momentet më të rëndësishme të vitit për besimtarët myslimanë, të cilën e karakterizon therja e kurbanit që është ibadet i rëndësishëm për besimtarët, si dhe kryerja e haxhit si kusht i Islamit.

Zoti xh.sh. në Kuran thotë:

“Andaj, ti falu për hir të Zotit tënd dhe prej kurban”

Përmes therjes së kurbanit, besimtarët myslimanë vazhdojnë traditën e pejgamberit Ibrahim a.s., derisa Haxhi reflekton bazat e drejtësisë, si në tavaf, në Arafat, në Muzdelife, në namaz në Qabe, në veshje e në lutje, ngase të gjithë janë të barabartë. Këtu nuk ka dallim ndërmjet të pasurit e të varfërit, në moshë a gjini, dallim në etni a gjuhë, por të gjithë janë në një mision të përbashkët për të fituar mirësitë e Krijuesit Fuqiplotë përmes lutjeve, ibadeteve e pendimit të sinqertë.

Fatkeqësisht, edhe këtë vit, besimtarëve tanë për shkak të gjendjes pandemike nuk u është mundësuar që të udhëtojnë drejt vendeve të bekuara të Mekës e Medinës, mirëpo shpirtërisht e ndiejmë aromën e atyre vendeve dhe mbetemi me shpresë që vitin tjetër të jemi atje për t’ju lutur Krijuesit të gjithësisë.

Vëllezër të nderuar,

Nimet i rëndësishëm i kësaj feste është edhe Sofra e bajramit e cila na bashkon me më të dashurit tanë, na bën të reflektojmë për familjen e të afërmit tonë, dhe na ndërgjegjëson për ata që kanë nevojë për kujdesin e përkrahjen tonë.

T’i shijojmë nimetet e sofrës së bajramit me dashuri e respekt, pranë familjeve tona, pranë farefisit tonë, sepse s’ka gjë më të rëndësishme në këtë dynja sesa ruajtja e familjes dhe edukimi i drejtë i saj. E kemi për obligim fetar po edhe traditë kombëtare që ta ruajmë familjen, ta kultivojmë, kujdesemi, ta mbrojmë e të sakrifikojmë për të.

Në këtë ditë të madhe kujtojmë sakrificën e nënave dhe baballarëve tanë që kanë bërë për ruajtjen e familjes së shëndoshë. Çdo pretendim për të cenuar familjen është në kundërshtim me natyrën e njeriut, në kundërshtim me mësimet hyjnore dhe traditën pozitive të popullit tonë. Familja është e shenjtë dhe duhet ta ruajmë atë.

Edhe më madhështore festën e Kurban Bajramit të sivjemë e bën lirimi i masave anti-covid, e në veçanti prania e mërgatës sonë që e begaton festën dhe e forcon institucionin e familjes.

Vëllezër të nderuar,

Më lejoni që në prag të festës së Kurban-Bajramit, në Ditën e Arafatit, të shpreh dhembshurinë time të thellë për viktimat që humbën jetën nga përmbytjet në shtetet mike: Gjermani, Belgjikë, Austri e Turqi, si dhe solidaritetin tonë me familjarët e tyre, duke lutur Zotin e Madhërishëm që sa më parë të stabilizohet gjendja e krijuar.

Ju ftoj të gjithëve që ta festojmë Bajramin, të shijomë nimetet e kësaj feste, por njëkohësisht të kemi kujdes që të respektojmë masat anti-covid, sepse virusi është ende në mesin tonë.

Në këtë ditë feste, edhe njëherë e lusim Zotin që t’i mëshirojë të gjithë ata që pësuan nga Covidi, të prekurve t’u japë shërim të shpejtë me shpresë te Zoti se jemi në prag të kalimit të kësaj sfide globale.

Vëllezër e motra

Duke ju uruar për festën e madhe të Bajramit, lus Zotin për shëndet, mbarësi, begati, dashuri e harmoni në familjet tuaja.

Me hajr e mbarësi festa e Kurban-Bajramit!

Related Topics:
Continue Reading

Aktualitet

Profesoresha e UBT-së, Jeta Kiseri-Kubati bashkautore në një artikull shkencor me studiues nga Meksika

Published

2 minutes ago

on

July 22, 2025

By

Profesoresha e UBT-së, Jeta Kiseri – Kubati, në bashkëpunim me një ekip studiuesish nga Meksika, ka publikuar një artikull shkencor të rëndësishëm në revistën prestigjioze ndërkombëtare Cureus.

Ky studim përfaqëson një kontribut të rëndësishëm në fushën e kërkimeve dentare dhe mjekësore, duke theksuar rolin e shkencës ndërkombëtare dhe fuqinë e bashkëpunimit akademik ndërkufitar.

Artikulli me titullin:“Predictability of a Mandibular Corpus Length Multivariate Model Integrating Björk-Jarabak Measurements and the Cephalometric Norm”, është publikuar
në revistën ndërkombëtare Cureus, një platformë me qasje të hapur që inkurajon vlerësimin dhe shpërndarjen e gjetjeve shkencore në nivel global.

Ky punim fokusohet në parashikueshmërinë e gjatësisë së korpusit mandibular përmes një modeli të avancuar multivariat, që integron matjet Björk-Jarabak dhe normat cefalometrike – një temë me rëndësi të madhe për fushën e ortodoncisë dhe stomatologjisë moderne.

Në këtë projekt morën pjesë edhe studiuesit e shquar nga Meksika:

  • Luis Pablo Cruz Hervert (UNAM, Mexico City)
  • Valentina Garcia Lee (UNAM)
  • Silvia Paulina Martínez-Contreras (Universidad Cuauhtémoc, San Luis Potosí)
  • José David Ortiz-Sánchez (Escuela Nacional de Estudios Superiores, León)
  • Jacqueline Adelina Rodríguez-Chávez (Universidad de Guadalajara)
  • Maria E. Jimenez (UNAM, Mexico City)
  • Gisel Garcia-Garcia (UNAM, Mexico City)
  • Sergio A. Sanchez (Instituto Mexicano del Seguro Social)

Artikulli është i disponueshëm publikisht dhe mund të lexohet dhe vlerësohet nga kolegët e fushës përmes platformës Cureus me SIQ™ rating system.

Continue Reading

Aktualitet

Refugjatët ndajnë përvojat e tyre jetësore me studentët e UBT-së në kuadër të Akademisë Verore të Shkencave Politike dhe Studimeve të Sigurisë

Published

27 minutes ago

on

July 22, 2025

By

Në kuadër të Akademisë Verore të Shkencave Politike dhe Studimeve të Sigurisë, UBT mirëpriti një aktivitet të veçantë, në të cilin studentët dhe stafi akademik patën mundësinë të dëgjojnë rrëfime autentike nga persona që kanë përjetuar realitetin e të qenurit refugjatë.

Të ftuarit, të cilët ishin pjesë e programit mbështetës të organizatës JRS (Jesuit Refugee Service), ndanë historitë e tyre personale – duke folur për vendet prej nga vijnë, për sfidat dhe vështirësitë me të cilat janë përballur gjatë rrugëtimit të tyre për të gjetur siguri, si dhe për përvojën e tyre me JRS që nga momentet e para të largimit nga vendlindja.

Takimi u zhvillua në një atmosferë të hapur, të ngrohtë dhe miqësore, ku zërat e refugjatëve u dëgjuan me vëmendje, ndjeshmëri dhe respekt të thellë nga ana e studentëve dhe stafit të UBT-së. Përmes këtij dialogu të drejtpërdrejtë, pjesëmarrësit patën mundësinë të kuptojnë më thellë aspektet humanitare, psikologjike dhe sociale të krizave të migrimit dhe sigurisë globale.

Ky aktivitet kontribuoi në ndërtimin e empatisë, ndërgjegjësimit ndërkulturor dhe edukimit qytetar, duke shërbyer si një platformë e fuqishme për të nxitur reflektim mbi përgjegjësinë kolektive për të mbështetur të drejtat dhe dinjitetin e çdo individi.

Fotografitë e huazuara nga: JRS Kosovo 

Continue Reading

Aktualitet

Procesi për Banjskën: Dëshmojnë Behramaj e Nedelkoviq

Published

2 hours ago

on

July 22, 2025

By

Ka dëshmuar dëshmitari i Prokurorisë Speciale, Halim Behramaj në rastin “Banjska”, i cili është edhe polic hetues në njësinë e trafikut në Mitrovicë.

Dëshmitari i Prokurorisë Speciale ka treguar se rreth orës 02:00 përmes radiolidhjes janë njoftuar se në fshatin Banjskë është vendosur një barrikadë.

Në pyetjet e prokurorit special, Naim Abazi, Behramaj tha se në 21 vite përvojë pune në Polici të Kosovës, sulm të tillë nuk ka hasur.

Behramaj: “Shpërthim e të shtëna kuptuam se përballë kishim një grup të organizuar.Menjëherë kemi kuptuar që nuk kemi të bëjmë me një grup të thjeshtë kriminal, pasi pozita prej ku qëllonin dhe armët na bënin të kuptojmë që është një grup i organizuar. E kam vërejtur që rreshteri Afrim Bunjaku ishte i shtrirë në rrugë. Ne ishin diku rreth 30 metra larg dhe e kishin të pamundur të afroheshim”, tha ai.

“Në bazë të armëve të përdorura të cilat nga zhurma ke mujt me kuptu qe janë të kalibrave të ndryshëm, po ashtu ka pasur gjuajtje e armë edhe më të rënda. Pozita ku kanë qenë të vendosura, errësira qe ka qenë në fshat na ka bërë të kuptojmë qe është një grup i organizuar. Që qëllim ka pasur që të bëjë dëm sa më të madh”, shtoi më tej ai.

Në pyetjen e prokurorit, Naim Abazi, se “a e ndjen vetën të dëmtuar në këtë rast”, dëshmitari Behramaj tha se ndjehet i dëmtuar me vrasjen e rreshterit Afrim Bunjaku.

Në anën tjetër nën masa të larta të sigurisë janë sjell në gjykatore të akuzuarit Bllagoje Spasojeviq, Vladimir Toliq dhe Dushan Maksimoviq.

Në Gjykatën Themelore po dëgjohet edhe dëshmitari i Prokurorisë Speciale, Rade Nedelkoviq në rastin “Banjska”.

Ai para trupit gjykues tha se tash e 60 vjet jeton në fshatin Banjskë të Zveçanit dhe se natën kur ka ndodhur sulmi terrorist ka qenë roje e hotelit “Ranska Banja”, dhe se kanë dëgjuar zhurma, ku tha se edhe mysafirët nëpër dhoma kishin qëndruar afër dritareve.

Nedelkoviq: “Gjithë ata që kanë qenë në dhoma janë sjell rreth dritareve dhe ju kam thënë largohuni nga dritaret sepse dikush mund të ju gjuaj nga dritaret. Ashtu që ata më kanë dëgjuar dhe ata janë ulur… Kam dëgjuar gjuajtje me armë, asgjë tjetër. Kam thirrur në shtëpi, vajzën time sepse ajo ka katër fëmijë se në çfarë gjendje janë, dhe e kam thirrur gruan se ajo ka qenë vetë në shtëpi. Unë nuk jam frikësuar shumë nga këto gjuajtje, sepse një herë vdes njeri”, tha ai.

Avokati Naim Abazi ka pasur vërejtje në dëshminë e tij, duke thënë se i njëjti po iu ikë pyetjeve të prokurorit por edhe të tij.

Prokuroria Speciale e Kosovës më 11 shtator 2024 ka ngritur aktakuzë kundër Milan Radoiçiq dhe 44 të tjerëve për sulmin terrorist të 24 shtatorit 2023 në Banjska të Zveçanit, ku mbeti i vrarë rreshteri policor Afrim Bunjaku.

Të pandehurit ngarkohen për veprat penale kryerja e veprës terroriste, veprat e rënda kundër rendit kushtetues dhe sigurisë së Republikës së Kosovës, lehtësimi dhe financimi në kryerjen e terrorizmit dhe shpëlarja e parave.

Continue Reading

Aktualitet

Pesëmbëdhjetë vjet nga vendimi i Gjykatës Ndërkombëtare për pavarësinë e Kosovës

Published

5 hours ago

on

July 22, 2025

By

Sot mbushen pesëmbëdhjetë vjet prej kur Gjykata Ndërkombëtare e Drejtësisë në Hagë ka shpallur vendimin këshillëdhënës, sipas të cilit Deklarata e shpalljes së Pavarësisë së Kosovës nuk ka shkelur të drejtën ndërkombëtare.

Me dhjetë vota pro dhe katër kundër, anëtarët e Gjykatës Ndërkombëtare të Hagës më 22 korrik 2010 kishin vendosur në favor të Kosovës, duke refuzuar kështu kërkesën e Serbisë për shkelje të së drejtës ndërkombëtare.

Vendimi ishte lexuar nga presidenti i Gjykatës Ndërkombëtare të Drejtësisë në atë kohë, Hiasashio Ovada.

Kosova shpalli pavarësinë më 17 shkurt 2008 dhe deri më tash vendi ynë është njohur nga 119-të shtete të botës.

Continue Reading

Të kërkuara