Ndonëse tash e dy vjet nuk ka trajner dhe as vend të përhershëm për trajnim, Filip Paviq nga Novobërda, komunë kjo e banuar me shumicë serbe, është shpallur tenisti më i mirë në Kosovë për vitin 2020, në kategorinë deri në 14 vjeç.
Filipi, 14-vjeçar, ka marrë këtë çmim, por edhe shumë çmime të tjera nga Federata e Tenisit e Kosovës dhe që nga ky vit, ai garon në kategorinë deri në 16 vjeç. Ai tashmë është pozicionuar në vendin e katërt të tenistëve më të mirë të Kosovës në atë kategori.
Gjithashtu, Filip Paviq, aktualisht është serbi i vetëm i cili garon në kuadër të Federatës së Tenisit të Kosovës, në kategorinë prej 12 deri në 18 vjeç. Dëshira e tij është që një ditë të luajë për përfaqësuese, por tash për tash, nuk e ka marrë ftesë as nga Kosova e as nga Serbia.
“Kam nisur që të godas topin në mur dhe i kam kërkuar babait që të më gjejë një trajner”, rrëfen Filipi për Radion Evropa e Lirë. Në vitin 2016, ai është regjistruar në shkollën e tenisit në Graçanicë, një komunë me shumicë serbe në afërsi të Prishtinës.
Që atëherë, ai ka shënuar vetëm suksese dhe deri më tash ka fituar mbi 30 turne.
“Sukseset kanë domethënie të madhe për mua dhe kjo më shtyn që të përgatitem edhe më shumë dhe të bëhem dikush dhe diçka, të bëhem më i miri, për të fituar në Grand Slam”, thotë Filipi, i cili që nga viti 2018 nuk ka trajner, ndërkaq që ushtrimet i praktikon në mënyra të ndryshme.
Shoku i tij, Dasar Ymeri nga Prishtina, e ka terrenin e tij privat, kështu që Filipi, tash e dy vjet shkon te ai tre herë në javë, në mënyrë që ta ruaj kondicionin dhe teknikat e luajtjes së tenisit.
“Kjo na ndihmon të dyve. Unë dhe Filipi jemi të njëjtë dhe kënaqem të luaj me të”, tha Dasari për Radion Evropa e Lirë.
Dasari dhe Filipi janë njohur në një turne, pesë vjet më parë dhe që nga atëherë, falë dashurisë për tenisin, janë në kontakt të vazhdueshëm.
Babai i Filipit, Goran Paviq, thotë që tenisi si sport individual, kërkon shumë sakrifica dhe ka shpenzime financiare që mezi përballohen.
“Pra, që nga shpenzimet e rrugës, hotelit… nuk di çfarë t’ju them. Ne vetë paraqitemi në turne dhe pjesëmarrja është kryesisht në Kosovë, sepse për të shkuar diku tjetër, nevojiten para. Turnetë që mbahen jashtë, zgjasin nga gjashtë deri tetë ditë, prandaj ne heqim dorë nga ato”, tha Paviq.
Ai shtoi se ka kërkuar ndihmë nga të gjithë, duke nisur që nga komuna, përmes institucioneve të Kosovës e deri te Zyra për Kosovën e Qeverisë së Serbisë.
Por, sipas tij, përveç premtimeve të shumta Paviq nuk ka marrë asnjë mbështetje, ndërkaq që babai i tij ka drojën që ai mund të heqë dorë për shkak të kushteve të vështira për trajnim, ose për shkak se “askush nuk e sheh talentin e tij”.
Kryetari i Komunës së Novobërdës është Svetislav Ivanoviq nga radhët e Listës Serbe, nuk ka dashur që t’i përgjigjet pyetjes së Radios Evropa e Lirë, se a ka mundësi komuna që ta ndihmojë tenistin e ri.
Porosia e Federatës së Tenisit e Kosovës
Kryetari i Federatës së Tenisit të Kosovës (FTK), Jeton Hadërgjonaj thotë se i ndidhmojnë të gjithë sportistët, “e sidomos ata më të mirët”. Ai shtoi që për Filip Paviqin, janë gjithmonë dyert e hapura në këtë federatë.
Në një deklaratë për Radion Evropa e Lirë, Hadërgjonaj ka sqaruar që FTK-ja nuk e ka ftuar Filip Paviqin që t’i bashkohet përfaqësueses së Kosovës, vetëm për shkak që të mos e vë në pozitë të vështirë. Ai ka përkujtuar “shembullin e keq nga viti 2016, kur një e re serbe, për shkak të presionit politik kishte hequr dorë që të jetë pjesë e përfaqësueses së Kosovës në tenis”.
“Por, nëse Filip Paviq, në të ardhmen ka guximin dhe vullnetin që të luaj për Federatën e Tenisit të Kosovës, ne këtë do ta pranojmë me të dy duart dhe natyrisht që do ta ndihmojmë”, ka thënë Hadërgjonaj.
Ai ka shtuar se nuk është i informuar për faktin që Filipi nuk ka trajner dhe që shpeshherë nuk ka ku të ushtrojë.
“Në Graçanicë ekzistojnë dy terrene. Unë do ta verifikojë se pse ai nuk mund të luaj atje”, ka thënë kryetari i Federatës së Tenisit të Kosovës, i cili ka shtuar se edhe shqiptarët janë duke u përballur me infrastrukturë të keqe të tenisit, për shkak se ky sport, “ka nisur që të zhvillohet relativisht vonë në Kosovë”.
Si sportist i ri i suksesshëm nga Kosova, Filip Paviq, në muajin gusht të vitit të kaluar, është pranuar edhe në takim nga presidenti i Serbisë, Aleksandar Vuçiq, i cili atëherë ia dhuroi një reket dhe pati thënë “është mrekulli e madhe që dikush nga Novobërda të fitojë gjithkah në tenis”.
Me këtë kishte përfunduar edhe mbështetja për tenistin e ri.
Cilët sportistë serbë i janë nënshtruar presionit?
Për sportistët e rinj nga komuniteti serb në Kosovë, marrja me sport në mënyrë serioze mund të ketë pasoja negative.
Ngjashëm, në fillim të vitit të kaluar, Ilija Iviq nga Graçanica, ishte ballafaquar me presione, vetëm pse kishte pranuar që të luaj për përfaqësuesen e të rinjve të Kosovës U19. Asokohe, nëna e Ilijas ishte larguar nga puna në Qendrën për kulturë dhe arsim në Graçanicë, institucion ky që financohet nga Beogradi zyrtar.
Arsyetimi për largimin e saj ishte se ajo është “tepricë teknologjike”, gjë që ajo nuk e pranoi si arsye të vërtetë.
Gjithashtu, në prag të pjesëmarrjes së Kosovës në Lojërat Olimpike në Rio de Janeiro, më 2016, një çiklisti serb i është ofruar bashkëpunimi, bursa dhe ndihma për pjesëmarrje në gara. Prindërit e tij, pas bisedave “me të birin dhe me disa në Serbi”, ishin përgjigjur negativisht.
Përvoja të ngjashme ka edhe tenistja Marija Gjorgjeviq nga Graçanica, e cila në vitin 2016, kishte refuzuar ftesën që të përfaqësojë Kosovën në Fed Cup. Pas presionit negativ të medieve, ajo gjithashtu hoqi dorë nga ndërtimi i karrierës së saj në ekipin kombëtar të Kosovës./REL
Agjencia për mbrojtje civile në Gazë tha se sulmet ajrore izraelite kanë vrarë të paktën dhjetë persona më 5 qershor, teksa ushtria izraelite po vazhdon ofensivën në territorin palestinez.
Zëdhënësi i kësaj agjencie, Mahmud Bassal, tha për AFP-në se sulmet vdekjeprurëse shënjestruan një zonë ku po strehohen personat e zhvendosur në Han Junis, disa shtëpi në Qytetin e Gazës dhe në Deir el-Balah.
Ushtria izraelite ende nuk ka komentuar për këto raportime.
Izraeli ka intensifikuar ofensivën e tij, duke thënë se synon të mposhtë Hamasin – grupin palestinez të shpallur organizatë terroriste nga Shtetet e Bashkuara dhe Bashkimi Evropian – i cili sulmoi Izraelin më 7 tetor 2023, sulm që nxiti luftën në Gazë.
Sulmi i paprecedent i Hamasit la të vrarë afër 1.200 persona, shumica civilë, dhe grupi palestinez rrëmbeu edhe afër 250 të tjerë.
Ndërkaq, sipas Ministrisë së Shëndetësisë në Gazën e udhëhequr nga Hamasi, të paktën 4.335 persona janë vrarë që kur Izraeli rinisi ofensivën më 18 mars. Numri i përgjithshëm i viktimave që nga nisja e luftës, sipas kësaj ministrie, ka arritur në 54.607. Kjo ministri thotë se shumica e viktimave ishin civilë./REL/
Presidenti amerikan, Donald Trump, ka nënshkruar një vendim që ua ndalon hyrjen në Shtetet e Bashkuara të qytetarëve nga 12 shtete, përfshirë nga Afganistani dhe Irani.
Një ndalesë të tillë udhëtimi, Trump e kishte ndërmarrë edhe gjatë mandatit të parë presidencial.
Presidenti amerikan tha se ndalesa e udhëtimit është e nevojshme për të mbrojtur amerikanët nga sulmet terroriste, sikurse sulmi që ndodhi më 1 qershor në Kolorado. Autoritetet kanë thënë se një grup personash që protestonin në mbështetje të pengjeve izraelite që mbahen nga Hamasi – grupi palestinez i shpallur organizatë terroriste nga SHBA-ja dhe Bashkimi Evropian – u sulmuan nga një shtetas egjiptian.
“Sulmi i fundit terrorist në Kolorado ka vënë në pah rreziqet ekstreme që i kanosen vendit tonë nga hyrja e shtetasve të huaj që nuk kanë kaluar nëpër kontrolle siç duhet, si dhe nga ata që vijnë këtu si vizitorë të përkohshëm dhe qëndrojnë më gjatë sesa lejohet me vizat që posedojnë. Ne nuk i duam ata”, tha Trump përmes një video-mesazhi.
Sipas policisë, i dyshuari për sulmin në Kolorado, Mohammed Sabry Soliman, hodhi mjete plasëse dhe spërkati grupin me benzinë të ndezur. Pesëmbëdhjetë persona u plagosën. Zyrtarët e sigurisë kombëtare të SHBA-së thanë se Soliman gjendej në SHBA në mënyrë të paligjshme, pasi ai kishte tejkaluar afatin e qëndrimit të vizës së tij turistike.
Trump e krahasoi ndalesën e re të udhëtimit me “kufizimet e ashpra të udhëtimit” që ai vendosi ndaj një numri shtetesh, kryesisht myslimane më 2017, pak pasi nisi mandatin e parë presidencial. Ai tha se ai vendim ishte një nga politikat më të suksesshme të mandatit të tij të parë dhe ishte pjesë e rëndësishme e parandalimit të sulmeve të mëdha terroriste nga jashtë në SHBA, duke përmendur sulmet terroriste që kanë ndodhur në Evropë në vitet e fundit.
“Nuk do të lejojmë që ajo që ndodhi në Evropë të ndodhë në Amerikë”, tha Trump. “Ne nuk mund të kemi një migrim të hapur nga asnjë vend prej nga nuk mund të bëjmë një verifikim të sigurt dhe të besueshëm”.
Përveç Afganistanit dhe Iranit, shtetet që përfshihen në ndalesën e re janë: Burma, Çadi, Republika e Kongos, Guinea Ekuatoriale, Eritrea, Haiti, Libia, Somalia, Sudani dhe Jemeni. Ndalesa e udhëtimit do të hyjë në fuqi më 9 qershor.
Edhe pse kufizimi nuk prek udhëtarët nga Egjipti, Trump tha se “në dritë të ngjarjeve të fundit”, ai ka urdhëruar sekretarin e Shtetit që ta informojë lidhur me rishikimin e praktikave dhe procedurave të Egjiptit “për të konfirmuar nëse kapacitetet e tyre aktuale të kontrollit dhe verifikimit janë të mjaftueshme”.
Përveç ndalimit të udhëtimit do të ketë edhe kufizime shtesë për vizitorët nga Burundi, Kuba, Laosi, Sierra Leone, Togo, Turkmenistani dhe Venezuela, thuhet në vendimin e nënshkruar nga presidenti Trump.
Trump tha se mbetet “i përkushtuar për t’u angazhuar me shtetet që janë të gatshëm të bashkëpunojnë në përmirësimin e këmbimit të informacioneve dhe për procedurat për menaxhimin e identitetit, si dhe për të adresuar rreziqet që lidhen me terrorizmin dhe sigurinë publike”.
Ndalesa e udhëtimit, e vendosur gjatë mandatit të parë të Trumpit, ua ndalonte shtetasve nga shtatë shtete, kryesisht myslimane – Irak, Siri, Iran, Sudan, Libi, Somali dhe Jemen – që të udhëtonin në SHBA. Ai vendim kishte shkaktuar kaos dhe paqartësi në aeroportet e këtyre shteteve dhe në aeroportet amerikane, pasi udhëtarëve ose iu ndalua hipja në avion për në SHBA ose ata u ndaluan sapo arritën në tokën amerikane.
Udhëtarët e prekur nga vendimi përfshinin studentë dhe staf akademik, si dhe biznesmenë, turistë dhe persona që vizitonin miqtë dhe të afërmit e tyre.
Trump e mbrojti vendimin duke u thirrur në çështje të sigurisë kombëtare dhe duke argumentuar se vendimi nuk bazohej në paragjykime kundër myslimanëve. Vendimi i rishikua gjatë betejave ligjore, teksa një version i vendimit u mbështet nga Gjykata Supreme më 2018.
Ndalesa e re e udhëtimit vjen pas një vendimi ekzekutiv të lëshuar nga Trumpi në janar, i cili kërkonte nga Departamenti i Shtetit, nga ai i Sigurisë Kombëtare si dhe nga drejtori i Inteligjencës Kombëtare, që të përgatisnin një raport mbi “qëndrimet armiqësore” ndaj SHBA-së. Urdhri ekzekutiv kërkonte edhe një vlerësim nëse hyrja e qytetarëve nga disa vende përbënte rrezik për sigurinë kombëtare./REL/
Komisioni Evropian i ka dhënë dritën jeshile Bullgarisë për t’u anëtarësuar në eurozonë më 1 janar 2026, duke shënuar hapin e dytë të rëndësishëm të shtetit brenda një viti në rrugën drejt integrimit të plotë në Bashkimin Evropian.
KE-ja, e cila u mblodh më 4 qershor për të marrë një vendim lidhur me këtë çështje, tha se Bullgaria i përmbush katër kriteret nominale të konvergjencës që përdoren për të vlerësuar nëse një vend është i gatshëm të adoptojë euron.
“Euroja është një simbol i prekshëm i forcës dhe unitetit evropian”, tha presidentja e Komisionit Evropian, Ursula von der Leyen.
Banka Qendrore Evropiane pritet po ashtu që të publikojë mendimin e saj më 4 qershor, dhe zyrtarët bullgarë kanë thënë se presin një vlerësim pozitiv edhe nga ky institucion.
Këshilli i Bashkimit Evropian do të marrë vendimin përfundimtar për pranimin e Bullgarisë në eurozonë, duke u bazuar në opinionet e KE-së dhe Bankës Qendrore Evropiane, si dhe në diskutimet me Eurogrupin dhe Këshillin Evropian.
Edhe pse pranimi i euros ishte një nga kushtet për anëtarësimin në BE, dështimet legjislative – përfshirë reformat për luftimin e pastrimit të parave, shqetësimet për inflacionin dhe bllokadat politike (Bullgaria ka mbajtur shtatë procese zgjedhore në katër vjetët e fundit) – e kanë bërë këtë rrugëtim të vështirë për Sofjen.
Një vendim në favor të adoptimit të euros është hapi i dytë i madh i Bullgarisë brenda një viti në rrugën e shtetit drejt integrimit në BE.
Në janar, Sofja u bë anëtare me të drejta të plota e zonës Shengen dhe kufijtë e Bullgarisë me Greqinë dhe Rumaninë tani janë plotësisht të hapur.
Qeveria e Mbretërisë së Bashkuar ka deklaruar se po punon “me ritëm të shpejtë” për të zbatuar marrëveshjen tregtare me SHBA-në, pas vendimit të Presidentit Donald Trump për të dyfishuar tarifat e çelikut dhe aluminit në 50%.
Megjithatë, Mbretëria e Bashkuar është përjashtuar përkohësisht nga rritja e tarifave, ndërsa një taksë mbetet në 25%.
Eksportuesit britanikë mund të përballen me një normë më të lartë tarifash nëse marrëveshja për heqjen e tarifave të çelikut dhe aluminit midis Britanisë dhe SHBA-së nuk hyn në fuqi. Kancelarja Rachel Reeves e ka mirëpritur përjashtimin e përkohshëm nga tarifat më të larta, ndërsa përfaqësuesit e industrisë kanë theksuar se bizneset britanike përballen me pasiguri të madhe për të ardhmen.
Pjesa më e madhe e çelikut global, i cili ishte destinuar fillimisht për SHBA-në, mund të devijohet në tregun e Mbretërisë së Bashkuar për shkak të tarifave të larta që do të ndikojnë në eksportet amerikane. Ky fenomen është tashmë duke ndodhur, dhe prodhuesit e çelikut në Britani kërkojnë veprime nga qeveria për të kufizuar importet e çelikut, të cilat po ulën çmimet dhe po dëmtojnë bizneset e tyre lokale.
Gareth Stace, drejtor ekzekutiv i UK Steel, tha se “importet po vërshojnë tregun e Mbretërisë së Bashkuar, duke ulur çmimet e çelikut dhe duke marrë pjesë të tregut”. Ai shtoi se është e rëndësishme që Britania të ruajë stabilitetin e tregut të brendshëm, ndërsa lufton për të stabilizuar eksportet e saj drejt SHBA-së.
