Milani nuk shiste, por blinte. Kjo ishte ideja e Silvio Berlusconit që në fillim, në mesin e viteve ’80, kur u fut me forcë në sistemin e futbollit.

I qëndroi besnik kësaj motoje, duke shitur vetëm Ricardo Kakà, por edhe atëherë kur karriera ishte në zbritje e ndjesia ishte se epoka e madhe kishte mbaruar. Yonghong Li shpenzoi, por nuk shiti. Ende nuk dihet mirë me çfarë parash, por kjo është histori tjetër.

Më pas erdhi “Elliott”, që vendosi të investojë, të shlyejë borxhet e të krijojë një klub të shëndetshëm financiarisht. Kështu, çdo vit pati shitje të rëndësishme, ose pothuajse. Në 10 vitet e fundit u ndoq një politikë kursimi te kuqezinjtë, edhe kur erdhi Covid-19 dhe shitjet ishin të pakta: 5.1 milionë euro në sezonin 2021-2022; 11.1 milionë euro në 2022-2023.

Igli Tare është pra shitësi i madh i parë i Milanit në këto 40 vite, deri tani janë 200 milionë euro, duke llogaritur edhe bonuset, çka e bën qartësisht “tregtarin më të mirë” kuqezi në këtë aspekt. Edhe pa përfshirë Reijnders, drejtori sportiv shqiptar do të ishte mbi vendin e dytë në renditjen historike.

Largimet e Okafor për 21 milionë e Thiaw për 35 milionë ndikojnë pak në formacionin titullar. Për Theo mund të bëhej më shumë, por me një vit nga skadenca e kontratës, marrja e 25 milionëve është fitim i arsyeshëm.

Siç raporton “Corriere dello Sport”, që nga momenti kur firmosi për Milanin më 26 maj, ish-drejtori i Lazios nuk është ndalur për asnjë sekondë, duke riformuar skuadrën kuqezi dhe madje zgjidhur disa transferime të vështira, përcjell Tema.

Njeriu i ri i merkatos së “Djallit” ka bërë revolucion: nga emërimi i Massimiliano Allegrit te shtatë afrimet e zyrtarizuara, pritet raundi i fundit i merkatos së verës. Pikërisht në merkaton dalëse është vënë re ndikimi i drejtorit sportiv shqiptar, i cili ka arritur të shesë lojtarë për shuma të paimagjinueshme.

Mjafton të thuhet se Milani shiti Malick Thiaw te Newcastle për 40 milionë euro (me bonuset e përfshira), shumë mbi vlerën reale të merkatos (duke marrë parasysh edhe kontratën 2-vjeçare që i mbetej), duke gjeneruar një “plusvalencë” gjigante.

Përveç shitjes me profil të lartë të Tijjani Reijnders, shqiptari gjeti zgjidhje edhe për emra si Camarda, Bondo, Terracciano, Liberali, Pobega, Colombo dhe shumë lojtarë të tjerë që kishin nevojë të luanin diku tjetër.

Shitja përfundimtare e Emerson Royal te Flamengo për 10 milionë euro ishte një marrëveshje e shkëlqyer.

Tashmë duket se do të marrë mbi 20 milionë euro, me bonuset e përfshira, nga Leeds United për Noah Okafor, një tjetër “plusvalencë” e madhe.

Shuma e siguruar, duke përfshirë huazimet me pagesë, është 165.5 milionë euro, që me bonuset dhe klauzolat e blerjeve arrin në 200 milionë euro (madje 220 milionë me shitjen e Okafor). Para të freskëta, që kanë vendosur rregull në financat kuqezi.

Drejtori i ri sportiv është dashur të merret me çështjet e komplikuara të Theo Hernandez dhe Mike Maignan. I pari u shit tek Al-Hilal i Simone Inzaghit për 25 milionë euro, duke zgjidhur kështu një problem të brendshëm, që nuk mund të shtyhej më. Ai ka qenë i jashtëzakonshëm në sektorin e shitjeve.

Shifrat e shitjeve te Milani (në milionë euro):

2025-26 → 200 milionë euro

2024-25 → 51.3

2023-24 → 71.4

2022-23 → 11.1

2021-22 → 5.1

2020-21 → 51.7

2019-20 → 59.2

2018-19 → 88.1

2017-18 → 39.7

Mesfushori i Kombëtares së Shqipërisë, Kristjan Asllani, duket se është një hap më pranë transferimit te Torino, pasi në këtë fazë të merkatos ka shprehur preferencën e tij për t’iu bashkuar “Granatave” përpara Bolognës.

Sipas raportimeve të Fabrizio Romano, aktualisht janë duke u zhvilluar negociata mes palëve, ku krahas Interit po diskutohen edhe kushtet personale të lojtarit me klubin torinez.

Asllani, i cili është pjesë e Interit, ka pasur interesim nga disa skuadra të Serie A, por Torino shihet si destinacioni më i mundshëm, duke qenë se vetë lojtari e sheh si hapin ideal për vazhdimin e karrierës.

Negociatat do të vazhdojnë në ditët në vijim, me Torinon që shpreson të mbyllë sa më shpejt marrëveshjen për të siguruar shërbimet e mesfushorit kuqezi.

Jasir Asani është zyrtarisht lojtar i klubit legjendar iranian Esteghlal.

Sulmuesi shqiptar kalon nga Gwang-ju për një shifër që raportohet të jetë rreth 1 milion euro, duke nisur kështu një kapitull të ri në karrierën e tij ndërkombëtare.

Ndryshe nga plani fillestar që e parashikonte bashkimin me ekipin në janar, marrëveshja u përshpejtua e klubi e ka sulmuesin në dispozicion menjëherë, duke lënë të kënaqura të gjitha palët e përfshira.

Esteghlal konsiderohet një nga klubet më të njohura e të mbështetura në Iran, tifozët kanë treguar entuziazmin e tyre duke uruar Asanin në rrjet. Pas aventurës së tij në Korenë e Jugut, sulmuesi nis një eksperiencë të re, ndërsa të gjithë sytë janë tek performanca e tij në kampionatin iranian, transmeton tch.

Pas muajsh spekulimesh dhe ndryshimesh të datave, historia e transferimit të Asanit te Esteghlal duket se ka gjetur fundin e saj, duke i dhënë këtij kapitulli të merkatos një përfundim të ngjashëm me një telenovelë për futbollin shqiptar.

Mirlind Daku ishte bërë objektiv i fyerjeve të tifozëve të Zenit St. Petersburgut derisa skuadra e tij, Rubin Kazan e zhvilloi ndeshjen e Kupës së Rusisë me vendësit në Shën Petersburg më 12 gusht.

Komiteti i Kontrollit dhe i Disiplinës i Federatës Ruse të Futbollit ka vendosur që ta gjobisë klubin e njohur rus me një shumë modeste prej 213 eurosh.

Për ironi të fatit, përfaqësuesi shqiptar gjatë kësaj vere ishte pranë transferimit pikërisht tek Zeniti, por në fund gjithçka dështoi dhe futbollisti nga Kosova qëndroi në Kazan tek Rubini.

Tifozët e Zenitit njihen si pro serbë, prandaj edhe e kanë shfaqur urrejtjen ndaj tij. Futbollisti gjilanas po shkëlqen në futbollin rus, ndërsa i ka realizuar 5 gola në 7 ndeshje sa i ka zhvilluar deri tash.

Ndonëse spekulohej se mund të përfundonte në Turqi, Daku vendosi të qëndrojë në Rubin Kazan, me të cilin e vazhdoi së fundmi kontratën me një përmirësim të ndjeshëm të rrogës.