Një shpërthim ka ndodhur pranë Konsullatës së Përgjithshme Ruse në Marsejë.

Sipas lajmeve në shtypin francez, një shpërthim është dëgjuar në orët e mëngjesit pranë Konsullatës së Përgjithshme Ruse në Marsejë, që ndodhet në rajonin 8 të qytetit të Marsejës.

Në vendin e ngjarjes u dërguan ekipet e zjarrfikëses dhe të policisë. Rreth godinës së konsullatës u morën masa sigurie, ndërkohë ende nuk është dhënë asnjë shpjegim për shkakun e shpërthimit.

Nga ana tjetër theksohet se nga shpërthimi nuk ka pasur humbje jete.

Konsulli i Përgjithshëm rus në Marsejë, Stanislav Oranskiy tha për gazetën “La Marseillaise” se shpërthimi ndodhi brenda kufijve të konsullatës dhe se ekipet e zjarrfikëses kanë bërë ndërhyrje.

Ministri i Jashtëm i Turqisë, Hakan Fidan, ka deklaruar se duhet të ketë një qasje realiste lidhur me anëtarësimin e mundshëm të Ukrainës në NATO. Gjatë një interviste për televizionin amerikan Bloomberg, Fidan komentoi zhvillimet aktuale dhe qëndrimin e Ankarasë mbi këtë çështje.

“Duhet të jemi shumë realistë lidhur me dëshirën e tyre për t’u bërë anëtare e NATO-s”, tha Fidan.

I pyetur nëse Trump do ta ndryshojë apo jo qasjen e ShBA-së për anëtarësimin e Ukrainës në NATO, Fidan deklaroi: “Nuk jam i sigurt nëse edhe administrata e mëparshme ishte apo jo në favor të anëtarësimit të Ukrainës në NATO. Kështu që, nuk mendoj se ka një politikë të re për këtë çështje”.

Fidan tha se këtë çështje e kanë diskutuar me partnerët evropianë dhe miqtë ukrainas dhe se duhet të kuptohet se Ukraina e kërkon këtë jo vetëm për hir të anëtarësimit në NATO, por edhe për të garantuar sigurinë e vendit të saj.

“Ne nuk themi gjë për dëshirën e tyre për t’u bërë anëtare e NATO-s, por duhet të jemi shumë realistë. Ky është qëndrimi ynë zyrtar të cilin e ka shpallur edhe presidenti ynë,” tha ai.

Në përvjetorin e tretë të nisjes së pushtimit rus në Ukrainë, liderët e lartë politikë në Mbretërinë e Bashkuar kanë rikonfirmuar mbështetjen e tyre ndaj Kievit.

Kryeministri, Sir Keir Starmer, deklaroi se Mbretëria e Bashkuar do të vazhdojë të qëndrojë përkrah Ukrainës për ta ndihmuar në përpjekjet e saj për një paqe të drejtë dhe të qëndrueshme.

Përmes një postimi në rrjetet sociale, ai e përfundoi mesazhin e tij me fjalët “Slava Ukraini” (Lavdi Ukrainës), duke treguar mbështetjen e tij të qartë ndaj popullit ukrainas.

“Tre vjet pas pushtimit barbar në shkallë të plotë të Putinit në Ukrainë, ne përballemi me një moment kërcënimi për sigurinë dhe vlerat tona kolektive. Ne vazhdojmë të qëndrojmë me Ukrainën për një paqe të drejtë dhe të qëndrueshme. Slava Ukraina”, shkroi Starmer.

Nga ana tjetër, Kemi Badenoch, udhëheqësja e opozitës, theksoi unitetin politik në Britani përballë kësaj lufte, duke shtuar se parlamenti britanik ka qëndruar i bashkuar në vendosmërinë për të mbështetur Ukrainën.

Ndërkohë, ish-kryeministri Boris Johnson përshëndeti “heroizmin e vazhdueshëm të popullit ukrainas”, duke theksuar qëndrimin e tij kundër “të pavërtetave të çuditshme” që qarkullojnë mbi origjinën e luftës – një referencë e dukshme ndaj deklaratave të fundit të Donald Trump.

Mbështetja e Mbretërisë së Bashkuar për Ukrainën mbetet e palëkundur, ndërsa liderët britanikë bëjnë thirrje për forcimin e përpjekjeve ndërkombëtare për të garantuar stabilitetin në Evropë.