Ambasadori i Bashkimit Evropian në Kosovë, Aivo Orav, ka thënë se për synim kanë ofrimin e Kosovës sa më shpejt drejt BE-së. Këtë zotim e ka bërë pas takimit me kryetarin e Komunës së Prishtinës, Përparim Rama.

Ambasadori Orav, ka shtuar se janë takuar me kryetarin Rama për të diskutuar për problemet dhe sfidat e kryeqytetit.

“Ishte e mirëpritur të bisedoja me Kryetarin e Komunës dhe gjithashtu me ekipin e tij, për të mësuar më shumë rreth Prishtinës, rreth problemeve, rreth sfidave dhe për të mësuar gjithashtu se si BE-ja dhe komuna mund të punojnë më ngushtë së bashku. Sepse synimi është ta afrojmë Kosovën më pranë Bashkimit Evropian sa më shpejt të jetë e mundur. Dhe nuk është vetëm qeveria me të cilën po punojmë, por po punojmë edhe me të gjitha komunat. BE-ja është donatori më i madh këtu në Kosovë. Ka shumë projekte të BE-së që janë duke u zhvilluar. Ka shumë projekte edhe në plan dhe shpresoj shumë që të mund të vazhdojmë punën tonë në fusha si arsimi, shëndetësia, menaxhimi i mbeturinave, bashkëpunimi me të rinjtë, me ndihmën e BE-së”, ka thënë ai.

Kryetari Rama ka thënë se komuna ka bërë hapa në përmirësimin e infrastrukturës, arsimit shëndetësi e sektorë e tjerë në kryeqytet.

Ai ka shtuar se kanë bërë hapa për ti përmbushur të gjitha detyrat të cilat na janë dhenë nga komuniteti Evropian.

“Diskutuam mbi sfidat që i kemi si kryeqytet dhe mundësit për bashkëpunim dhe investime tash ne muzeun, sallën koncentrale, pra mënyra se si mund ti tejkalojmë problemet e tanishme. Në mënyrë që të krijojmë hapësira të mirëfillta edhe të komunitete të artit, kulturës, për arsim, shëndetësi edhe për sfera të ndryshme në kryeqytet. I tregova se kemi bërë hapa të mëdhenj në arsim, shëndetësi, infrastrukturë e po ashtu edhe në investime në qytetin e mençur. Ne kemi bërë hapa për t’i përmbushur të gjitha detyrat të cilat na janë dhënë nga komuniteti evropian”, ka thënë ai.

Ndonëse Kosova po konsiderohet si shembull për luftimin e terrorizmit, ende e pret shumë punë për luftimin e kësaj dukurie sidomos në këtë periudhë kur është e sfiduar nga ekstremi i djathtë. Kështu u tha me rastin e publikimit të raportit që paraqet angazhimin e Kosovës në parandalimin dhe luftimin e terrorizmit, i realizuar nga Rrjeti Ballkanik për Gazetari Hulumtuese (BIRN).

Ministri i Punëve të Brendshme, Xhelal Sveçla u shpreh se për dallim prej ekstremizmit të dhunshëm dhe terrorizmit religjioz tashmë po ballafaqohemi edhe me ekstremizma të djathta.

Duke i përmendur sulmin terrorist në Banjskë dhe atë në kanalin e Iber-Lepencit, Sveçla u shpreh se si qeveri ka reaguar me kohë karshi kësaj dukurie.

“Ne kemi pas në vazhdimësi sulme të ndryshme ndaj institucioneve tona, zyrtarëve tanë, personelin ndërkombëtarë, gazetarëve dhe qytetarëve në katër komunat veriore të Kosovës….Për dallim prej ekstremizmit të dhunshëm dhe terrorizmit religjioz tashmë po ballafaqohemi edhe me ekstremizma të djathta dhe entonacionalizma. Si qeveri kemi ndërmarrë masa në kohë në identifikimin dhe shpalljen e dy formacioneve ilegale si organizata terroriste pra Mbrojtjes Civile dhe Brigadës së Veriut dhe të gjithë ju e dini që në vazhdimësi dhe me mjete ligjore i kemi luftuar dhe po i luftojmë ato, siç e monitorojmë dhe po punojmë në parandalimin e të gjitha aktiviteteve të tyre. Këto dy sulme kanë vë në pah nevojën që zhvillimi i ekstremizmit të djathtë të elaburohet dhe të trajtohet me prioritet nga të gjithë jo vetëm në vendin tonë, por edhe në rajon dhe globalisht”, u shpreh ministri Sveçla.

Ministri i Punëve të Brendshme, Xhelal Sveçla u shpreh se si institucionet kanë punuar seriozisht në aspektin strategjik dhe operativ në luftimin e terrorizmit.

Ai thotë se Kosova në këtë aspekt është storie suksesi.

“Ne kemi punuar seriozisht dhe me përkushtim si në aspektin strategjik ashtu edhe atë operativ në luftimin e terrorizmit….Duke qenë të vetëdijshëm mbi rreziqet që mund të sjell ekstremizmi i dhunshëm dhe terrorizmi Republika jonë menjëherë dhe në kohë është bërë pjesë e koalicioneve globale në luftim të këtij fenomeni të rrezikshëm. Nga ajo kohë vendi ynë ka dëshmuar se është palë aktive e këtij koalicioni duke marrë përsipër si rikthimin e personave nga zonat e luftës në Siri, ashtu edhe procesin e rehabilitimit dhe riintegrimit në shoqëri. Kudo në botë që flitet për përpjekje në luftën ndaj këtij fenomeni qëndron në radhët e para si storie suksesi Republika jonë”, thotë Sveçla.

Drejtori i përgjithshëm i Fondit të Angazhimit dhe Ripërtëritjes së Komunitetit Global, Khalid Koser u shpreh se luftimi i terrorizmit duhet të bëhet në mënyrë të zhdërvjelltë.

Sipas tij duhet të identifikohen nxitësit e radikalizmit të cilët janë kryesisht lokal.

“Këto sfida po përballemi me to në baza të ndryshme dhe ne duhet t’i monitorojmë dhe të merremi me to në mënyrë të zhdërvjelltë. Raporti me sa duket ka rekomandime shumë specifike të cilat duhet t’i arri shumë seriozisht këtu në Kosovë. Së pari tregon nevojën për studime empirike që duhet të bëhen, identifikim të grupeve, nxitësve të radikalizimit dhe të cilët janë kryesisht lokal. Duket të kuptojmë se çka ndodh, si ndodh në nivelin lokal dhe zgjidhjet t’i gjejmë në nivel lokal”, u shpreh ai.

Ndërsa, të gjeturat e raportit i shpalosi, Labinot Leposhtica i cili tha se ka mangësi në komunikimin në mes nivelit qendror dhe lokal.

Gjetja tjetër sipas tij thotë se institucionet janë në fazën fillestare në hartimin e dokumenteve në bazë shkencore për luftimin e terrorizmit.

Analiza monitoruese “Sfidat e mekanizmave të parandalimit të terrorizmit në Kosovë” është financuar nga GCERF, dhe implementuar nga organizatat ATRC, BIRN, CBN dhe Rin’On.

Kryeministri Kosovës Albin Kurti ka thënë se 88 për qind e grave ndërmarrëse kanë hapur biznese vetëfinancuese pa ndonjë hua apo mbështetje të jashtme.

Këtë deklarim kryeministri e bëri në tryezën për fuqizim ekonomik të grave të komuniteteve jo shumicë. Ai shtoi se përgjegjësitë e grave janë shumë më të mëdha sesa të burrave, pasi sipas tij, 6.2 orë më shumë gratë i kalojnë në përkujdesje pa pagesë.

“Këtu jemi për të biseduar së bashku për sfidat e veçanta dhe fuqizimin urgjent ekonomik të femrave, nga komunitete jo shumicë në vendin tonë…1:56 Niveli i pronës është i njëjtë, në të gjitha grupet në Kosovë, janë përgjithësisht më të ulëta dhe familje me statuse më të ulëta socio ekonomike, gjithsesi në Kosovë, 88 për qind të femrave ndërmarrëse, kanë hapur bizneset vetë financuese, pa ndonjë hua apo mbështetje të jashtme. Përkujdesja e femrave dhe përgjegjësit janë shumë më të mëdha se sa të burrave, 6.2 orë më shumë kalojnë femrat në përkujdese pa pagesë”, tha Kurti.

Ndërsa, ministri për Komunitete dhe Kthim Nenad Rashiq, vijoi se të gjitha këto subvencione janë me qëllim që të përmirësojnë kushtet në fuqizimin e grave për integrimin socio ekonomik të komuniteteve të ndryshme.

“Gjitha këto programe dhe subvencione janë me qëllim që të përmirësojnë kushtet për ata që kanë më së shumti nevojë, me fokus më të madh në fuqizimin e femrave, gjithashtu për integrimin socio ekonomik të komuniteteve të ndryshme. Ne, kemi ngritur mjete e kapacitete në ministri, duke hapur programin e ri, i cili është shumë pragmatik, ku kanë qenë 3 milion euro. Tani kemi hapur një thirrje të re..15:27 Kemi pasur thirrje për bujqësi nga 58 përfitues 12 kanë qenë femra. Thirrjet publike për biznes janë një interes i rritur në pjesëmarrjen në procesin e ekonomisë nga 59, kemi 15 femra që janë në programet tona. Subvencionet individuale, 40 janë femra”, vijoi ai.

Kjo tryezë u organizua së bashku me donatorë ndërkombëtarë.

Kryeministrja e Italisë, Giorgia Meloni, i kërkoi të martën Gjykatës Evropiane të Drejtësisë (GJED) të hedhë poshtë kundërshtimet ndaj planit kryesor të qeverisë së saj për të dërguar emigrantë detarë në Shqipëri.

Gjyqtarëve të BE-së u është kërkuar të peshojnë mbi marrëveshjen nga gjykatat italiane, të cilat kanë zemëruar Melonin duke bllokuar transferimin e emigrantëve në qendrat e paraburgimit të drejtuara nga italianët në Shqipëri, duke thënë se ishte kundër ligjit të BE-së.

Duke folur në dhomën e ulët të parlamentit përpara një samiti të liderëve të BE-së, Meloni tha se duhej qartësi “për një çështje që ka qenë objekt i masave të fundit gjyqësore me një aromë ideologjike”.

Nëse GJED do të konfirmonte këto masa, “kjo do të rrezikonte të kompromentonte…politikat e riatdhesimit të të gjitha shteteve anëtare”, të paktën derisa rregullat e bllokut të ri të azilit të zbatohen plotësisht në vitin 2026, tha ajo.

“(Kjo është) një perspektivë shqetësuese dhe e papranueshme që duhet të parandalohet me vendosmëri,” tha Meloni.

Sipas planit italian, vetëm burrat e rritur dhe jo të cenueshëm nga një listë vendesh që konsiderohen “të sigurta” nga autoritetet e Romës kanë të drejtë për ndalim në Shqipëri dhe riatdhesim të shpejtë nëse kërkesat e tyre për azil refuzohen.

Skema ka tërhequr interesin e vendeve të tjera evropiane të cilat po kërkojnë mënyra për të reduktuar migrimin e paautorizuar.

Gjyqtarët italianë vunë në pikëpyetje marrëveshjen, duke thënë se sipas një vendimi të GJED-së nga tetori që nuk lidhej në mënyrë specifike me Italinë, asnjë komb i origjinës nuk mund të konsiderohet “i sigurt” nëse edhe vetëm një pjesë e tij ishte e rrezikshme.

Një vendim i dytë i GJED-së duhet të zgjidhë mosmarrëveshjen midis gjyqtarëve të Italisë dhe qeverisë së saj, por një vendim nuk pritet së shpejti.

Ndërkohë, Italia ka ndaluar dërgimin e emigrantëve në Shqipëri dhe ambientet e paraburgimit janë bosh.

Megjithatë, Meloni ka thënë vazhdimisht se është e bindur se plani i saj përfundimisht do të funksionojë pavarësisht pretendimeve të opozitës se ka qenë një humbje parash.

Marrëveshja pesëvjeçare është thënë se do t’i kushtojë Italisë 160 milionë euro në vit.

Sipas marrëveshjes, procedurat për emigrantët do të kryhen në dy qendra.

Qendra e parë në Shëngjin do të përdoret për procedura të identifikimit të emigrantëve, ndërsa qendra e dytë, në Gjadër, rreth 20 kilometra larg portit, do të shërbejë për strehim të emigrantëve derisa të procesohen kërkesat për azil.

Qendrat do të funksionojnë sipas ligjit italian, me staf italian të sigurisë, ndërsa gjyqtarët do t’i mbajnë seancat përmes video-lidhjes nga Roma./REL/