Takimi, i cili synonte ofrimin e një përvoje më të thelluar në lidhje me aplikimin praktik të tatimeve dhe kontabilitetit, u pasurua me prezantimet e dy ekspertëve të fushës: Florina Kadriu Vitija, Drejtoreshë e Auditimit të Brendshëm në kompaninë GNTC Gorenje, dhe Lirim Gashi, Drejtor Financiar në të njëjtën kompani.

Ligjërata kishte si temë “Këstet e tatimeve, streha e sigurt dhe detyrat përmes softuerit të kontabilitetit.” Qëllimi kryesor i këtij aktiviteti ishte të krijohej një lidhje e ngushtë midis teorisë dhe praktikës për studentët, duke i njohur ata me parimet e përgjithshme të kontabilitetit tatimor dhe me metodat që përdoren në industrinë reale për menaxhimin e detyrimeve tatimore.

Me një përvojë të pasur profesionale, Kadriu Vitija dhe Gashi theksuan rëndësinë e tatimeve për çdo kompani dhe menaxhimin financiar të saj. Ata diskutuan aspekte kyçe të TVSH-së, tatimit mbi qiranë dhe llojeve të tjera të tatimeve, përfshirë bilancin vërtetues, si dhe procesin e deklaratës për tatimin mbi fitimin. Gjithashtu, ata nënvizuan rolin e kontabilitetit dhe tatimeve për shëndetin financiar të një kompanie, duke ofruar një pasqyrë të thelluar për përdorimin e softuerëve të avancuar të kontabilitetit në menaxhimin e këtyre proceseve.

Ligjërata u prit me shumë interes nga studentët, të cilët u angazhuan në diskutim dhe kontribuan me pyetje të shumta lidhur me temat e trajtuara. Në përfundim, ata u shprehën të kënaqur me mënyrën e paraqitjes dhe eksperiencën praktike që fituan, duke e konsideruar këtë mundësi si një hap të rëndësishëm për lidhjen e njohurive teorike me praktikën profesionale, një mundësi që do t’i ndihmojë ata në zhvillimin e karrierës së tyre në fushën e kontabilitetit dhe financave./UBTNews/

Nora Gjakova, një prej xhudisteve më të shquara të Kosovës dhe kampione olimpike, ka arritur një tjetër sukses të jashtëzakonshëm në karrierën e saj sportive. Ajo ishte pjesë e ekipit të xhudos për femra të Galatasaray, skuadra turke që arriti të fitojë titullin e kampiones së Superligës së Kampionëve në Turqi.

Turneu, i zhvilluar në Ankara në datat 11-13 dhjetor 2024, e pa ekipin e Galatasaray-it të triumfojë ndaj rivalëve të fortë si Komuna Bahçelievler SK, Ankara Ego SK, Administrata Speciale e Batman SK, Komuna Metropolitane e Izmirit SK, Komuna Metropolitane e Stambollit SK dhe Aksaray Çağlayan SK. Nora dhe ekipi i saj triumfuan me rezultat të thellë në të gjitha ndeshjet e grupeve, duke siguruar një fitore të pamposhtur në këtë turne prestigjioz.

Kjo arritje dhe përkushtim i Norës në sportin e xhudos, e pozicionon atë si një lider të padiskutueshëm në arenën ndërkombëtare. Përveç sukseseve të saj në xhudo, Nora është gjithashtu një studente në UBT, ku ndjek programin master në Shëndet dhe Aktivitet Fizik.

Ky kombinim i karrierës akademike dhe asaj profesionale tregon angazhimin e saj për të përmirësuar veten si sportiste dhe individ, duke u bërë një model frymëzimi për shumë të rinj.

Federata Turke e Xhudos dhe klubi Galatasaray kanë lavdëruar Norën për këtë sukses të jashtëzakonshëm, duke i dhënë meritat për punën e palodhur dhe angazhimin e saj të vazhdueshëm. Po ashtu, trajneri i ekipit, Ercan Çakıroğlu, është lavdëruar për udhëheqjen dhe strategjitë që çuan ekipin drejt këtij triumfi. Ky sukses i Norës është një përkujtesë e forcës dhe disiplinës që kërkon sporti i xhudos dhe një moment krenarie për Kosovën dhe komunitetin ndërkombëtar të xhudos./UBTNews/d.e.

Java e Edukimit në UBT mblodhi mësimdhënësit e Fakultetit të Gjuhës Angleze në një atmosferë bashkëpunimi dhe inovacioni, duke ofruar mundësi të pasura për zhvillim profesional dhe përmirësim të metodave mësimdhënëse.

Gjatë kësaj jave, u organizuan punëtori dhe trajnime interaktive që lehtësuan shkëmbimin e njohurive dhe praktikave të mira midis profesorëve dhe studentëve. Këto aktivitete synuan të freskojnë metodat e mësimdhënies, të eksplorojnë qasje të reja dhe të përforcojnë procesin e mësimnxënies.

Java e Edukimit nuk ishte vetëm një platformë për zhvillimin profesional të mësimdhënësve, por edhe një hapësirë frymëzuese ku studentët kontribuuan aktivisht në diskutime dhe u përfshinë në aktivitete praktike, duke dhënë një dimension të ri bashkëpunimit akademik.