Lajm i përditësuar:

11:30

Ka dështuar sërish zgjedhja e kandidates së Lëvizjes Vetëvendosje, Albulena Haxhiu, për kryetare të Kuvendit të Kosovës, ku në seancë nga 116 deputetë të pranishëm, 57 votuan për, 56 kundër dhe 3 abstenime.

11:25

Kryetari i Nismes Fatmir Limaj tha se partia e parë Vetëvendosje duhet të gjeje rrugë për të ndërtuar këto kapacitete të një shumice parlamentare.

“Ne e kemi dhënë një mundësi, mundësitë janë të hapura. Dëshira dhe angazhimi ynë është për t’i ofruar Kosovës mundësi për institucione. Tash edhe me dy aktgjykime të gjykatës tregon edhe një herë gjykata se interesi publik i Kosovës është të gjenden rrugë për të ndërtuar kapacitete qeverisëse. Partia e parë duhet të gjeje rrugë për të ndërtuar këto kapacitete të një shumice parlamentare. Nisma nëse këtu veprohet sipas udhëzimit të Gjykatës Kushtetuese derisa nuk ka një marrëveshje politike votimi ynë është ai që ka qenë para se me hy në komision e fshehtë. Ne nuk kemi votë pa një marrëveshje politike, e cila prodhon ndërtimin e institucioneve”, tha Limaj.

Ndërkaq, ministri në detyrë, Elbert Krasniqi, ka deklaruar para gazetarëve se do të votojë pro për çdo kandidaturë që propozohet nga Lëvizja Vetëvendosje në seancën konstituive të Kuvendit të Kosovës.

“Si në çdo seancë tjetër edhe në këtë seancë, kandidati që propozohet votohet pro dhe kështu do të vazhdojmë. Nuk kam nevojë të bëj analiza hipotetike, çdo propozim që vjen prej VV-së unë e votoj,” tha ai.

11:10

Kryetari i AAK-së Ramush Haradiniaj para seancës së Kuvendit tha se aktgjykimi i Gjykatës Kushtetuese ka sqaruar disa pika, por që prapë se prapë nuk kanë votë për Albulena Haxhiun por, kanë votë për ndonjë kandidat tjetër nga LVV-ja.

“Do të kthehemi në parlament pas vendimit të Gjykatës, tashmë dihet është sqaruar se duhet të jetë votim i hapur dhe njëkohësisht është sqaruar se një kandidat që nuk merr votën s’mund të kandidojë mbi tri herë , po ashtu është edhe afati 30 ditor edhe njëherë”, deklaroi Haradinaj.

Edhe deputeti i PDK-së Jakup Nura, para vazhdimit të seancës konstituive të Kuvendit të Kosovës, tha se
se Vetëvendosje ka pasur kohë të reflektojë dhe të shoh dëmet që i ka shkaktuar.

“Shpresoj dhe besoj që do të nxjerrë një figurë që është më unifikuese. Ashtu siç edhe e kemi thënë edhe më herët, Partia Demokratike e Kosovës, në qoftë se është një figurë që s’ka qenë i implikuar në krim dhe korrupsion do ta votojmë”, theksoi Nura.

09:50

Pas aktgjykimit të Gjykatës Kushtetuese i cili u publikua të hënën si i plotë, vazhdimi i seancës konstituive është thirrur sot në ora 11:00, ku deputetët e legjislaturës së nëntë do të mblidhen sërish në tentimin e radhës për konstituim të Kuvendit.

Aktgjykimi i Gjykatës Kushtetuese thotë se deputetët duhet të zgjedhin me votim të hapur kryeparlamentarin, si dhe një kandidat për kryeparlamentar mund të votohet vetëm deri në tre herë.

Konstituimi i Kuvendit të Kosovës po konsiderohet si urgjencë shtetërore edhe nga presidenca e cila përmes një përgjigjje për KosovaPress tha se duhet të ketë sa më parë institucionet në periudhën sfiduese globale dhe rajonale.

“Presidenca e konsideron urgjencë shtetërore konstituimin sa më të shpejtë të institucioneve të dala nga vullneti i popullit. Në këtë periudhë të zhvillimeve dinamike në kontinent dhe sfidave globale që e prekin edhe rajonin tonë, krijimi sa më i shpejtë i institucioneve të reja në përputhje me procedurat e parapara në aktgjykimin e Gjykatës Kushtetuese është jetik për stabilitetin, përfaqësimin demokratik dhe për adresimin e interesave të qytetarëve”, kanë thënë nga Presidenca.

Kujtojmë që deri para aktgjykimit të fundit të Gjykatës Kushtetuese, Kuvendi i Kosovës dështoi konstituimin në 54 tentativa.

Seanca e fundit konstituive ishte e datës 26 korrik datë kjo që shënoi edhe fundin e rrjedhjes së afatit të konstituimit nga Kushtetuesja. Pas kësaj Gjykata Kushtetuese caktoi masë të përkohshme me të cilën nga datat 27 korrik deri 8 gusht deputetëve iu pamundësua thirrja e një seance tjetër në Kuvendin e Kosovës.