Kreu i Lidhjes Demokratike të Kosovës (LDK), Lumir Abdixhiku, ka njoftuar për takimet që ka zhvilluar këtë javë me ambasadorët e huaj në Kosovë, pas zhvillimeve të fundit zgjedhore.

Abdixhiku tha se është diskutuar për procesin zgjedhor dhe se partia e tij do të respektojë vullnetin e qytetarëve, duke theksuar se LDK nuk do të anashkalojë dhe do të veprojë sipas këtij vullneti.

“Gjatë kësaj jave, prita në takim ambasadorët e SHBA-ve, Britanisë së Madhe, Bashkimit Evropian, Francës e Italisë. Me të gjithë, diskutuam mbi procesin zgjedhor, rezultatet e deritanishme, e domosdoshmërinë për pritjen e numërimit të secilës votë, përfshirë dhe ato të mërgatës. Siç kam deklaruar në vazhdimësi, LDK e respekton vullnetin qytetar në plotni. As nuk dëshiron e as nuk pretendon ta anashkalojë. LDK do të sillet konform këtij vullneti me plot përgjegjësi; siç dhe do të përfaqësojë denjësisht zërin e votuesit tonë” tha Abdixhiku.

Kreu i LDK-së gjithashtu shprehu mirënjohjen për mbështetjen e vazhdueshme nga aleatët ndërkombëtarë.

“Falënderime të pafundme për mbështetjen e aleatëve tanë në çdo sfidë të Republikës,” tha Abdixhiku, duke theksuar rëndësinë e partneriteteve ndërkombëtare për zhvillimin e vendit.

Zëvendëskryeministri i parë i Maqedonisë së Veriut, Izet Mexhiti, së bashku me ministrin e Punëve të Brendshme, Pançe Toshkovski, dhe ministrin e Punëve të Brendshme të Kosovës, Xhelal Sveçla, zhvilluan një takim në pikën kufitare Bllacë për të shqyrtuar përparimin e përgatitjeve për zbatimin e sistemit One Stop Shop.

Sipas një njoftimi të Qeverisë së Maqedonisë së Veriut, në takim mori pjesë edhe ambasadori i Kosovës në Maqedoninë e Veriut, Florian Qehaja.

Ky sistem, i cili pritet të lëshohet së shpejti në përdorim, do të thjeshtojë procedurat kufitare, duke reduktuar kohën e pritjes dhe lehtësuar lëvizjen e qytetarëve. Mexhiti e cilësoi këtë si një hap të rëndësishëm në forcimin e marrëdhënieve mes dy vendeve dhe në përmirësimin e përvojës së qytetarëve gjatë kalimit të kufirit.

“Nga ky bashkëpunim përfitojnë drejtpërdrejt qytetarët tanë, veçanërisht shqiptarët e Kosovës dhe Maqedonisë së Veriut, të cilët janë të lidhur ngushtësisht në nivel kulturor, gjuhësor dhe familjar. Ky sistem do të sjellë lehtësira të mëdha në lëvizjen dhe komunikimin ndërkufitar,” deklaroi Mexhiti, duke nënvizuar rëndësinë e këtij hapi për afrimin e mëtejshëm të dy shteteve.

Ai shtoi se kjo është një arritje e përbashkët e qeverive të Maqedonisë së Veriut dhe Kosovës, e dakorduar në takimin e fundit ndërqeveritar në Prishtinë, që do të ketë ndikim të drejtpërdrejtë në jetën e qytetarëve dhe në forcimin e bashkëpunimit rajonal.

Kostoja totale për financimin e strategjive që do të mbështesin procesin e anëtarësimit të Shqipërisë në Bashkimin Europian deri në vitin 2028 vlerësohet në rreth 7.6 miliardë euro.

Shifra del ne dokumentin e politikave prioritare 2026-2028, të botuar në Fletoren Zyrtare.

Ky dokument do të orientojë hartimin e buxhetit afatmesëm dhe alokimin e burimeve financiare, duke u fokusuar në përmbushjen e prioriteteve të përcaktuara.

Ndërkohë, disbursimi i mbështetjes nga Bashkimi Europian, do të varet nga përparimi konkret në zbatimin e reformave të përcaktuara.

Përveç kësaj, stabiliteti makrofinanciar, menaxhimi i qëndrueshëm i financave publike, transparenca dhe mbikëqyrja e buxhetit janë kushte të përgjithshme që duhet të përmbushen për të siguruar pagesat dhe çlirimin e fondeve.

Në periudhën nga viti 2024 deri në 2027, Shqipëria pritet të përfitojë një fond total prej 922 milionë eurosh në formën e granteve dhe kredive, me kushtin e zbatimit të reformave kyçe të përcaktuara në Agjendën Kombëtare të Reformave. Alokimet financiare do të mbështesin sektorë të rëndësishëm si përmirësimi i klimës së biznesit, zhvillimi i kapitalit njerëzor, avancimi i aftësive dixhitale, energjia dhe tranzicioni i gjelbër, si dhe forcimi i shtetit të së drejtës.

Deputetët bullgarë miratuan sot deklaratën për mospjesëmarrjen e Forcave të Armatosura bullgare në aksionet ushtarake në territorin e Ukrainës.

Gjithsej 166 deputetë votuan pro, 27 ishin kundër dhe 11 abstenuan.

Deklarata u mbështet nga GERB – UDF, Vazhdo ndryshimin – Bullgaria Demokratike (CC-DB), MRF- Fillimi i Ri, BSP – E majta e bashkuar, Demokracia, të Drejtat dhe Liritë – DRF dhe Ka një popull të tillë. Vazrazhdane votoi kundër, ndërsa MECh dhe një deputet i CC-DB abstenuan.

Deklarata bën thirrje për një paqe të qëndrueshme dhe të drejtë në Ukrainë dhe një proces negocimi që përfshin të gjitha vendet e prekura drejtpërdrejt dhe të interesuara për vendosjen dhe ruajtjen e sigurisë dhe stabilitetit në Evropë, duke përfshirë Bullgarinë.

Parlamenti gjithashtu i bën thirrje Këshillit të Ministrave që të vazhdojë politikën e Bullgarisë për zgjidhjen paqësore të konflikteve ndërkombëtare me mjete diplomatike dhe të promovojë iniciativa që synojnë zbutjen e konflikteve dhe gjetjen e zgjidhjeve të qëndrueshme paqësore.