Lajmet

Si të jeni bindës, sipas Melinda Gates

Published

4 years ago

August 25, 2021

UBT news

Melinda Gates ka zhvilluar aftësitë e saj si tregimtare, pasi e njeh sekretin thelbësor të bindjes: Statistikat nuk frymëzojnë, tregimet po.

Libri i saj i ri “The Moment of Lift”, mund t’ju bëjë një folës më bindës në çdo temë, por nuk ka të bëjë me komunikimin. Libri ka të bëjë me fuqizimin e grave për të ndryshuar botën.

Për shembull, gjatë një vizite në Indi, Gates u takua me një grup grash fermere dhe kombinoi aftësitë e tyre për të mësuar strategji të reja. Një grua tha se nuk ishte e lejuar të jetonte në të njëjtën shtëpi si vjehrra e saj.

Ajo nuk kishte para të mjaftueshme për të blerë sapun, ndaj lahej me hi dhe baltë.

Pasi u takua rregullisht me “grupin vetëndihmues” të grave fermere, ajo mësoi të blinte fara të reja, të mbillte më shumë kultura dhe të merrte prodhime më të mira. Fermerja bëri aq para sa t’i blinte djalit të saj një biçikletë dhe u kthye në shtëpi.

“Dëshiron të flasësh për respektimin e vjehrrës? Bliji djalit tënd një biçikletë”, shkruan Gates.

Historia e fermeres është vetëm një nga dyzinat e tregimeve që të thyejnë zemrën e njëkohësisht janë frymëzuese, të cilat mbushin faqet e librit të Gates. Kjo është një histori që nuk mund të thuhet me skema dhe grafikë.

Gates është një komunikuese e jashtëzakonshme sepse balancon tregimet dhe statistikat. Përvetësimi i qasjes së saj do t’ju bëjë më bindës për çdo temë që ju nxit, veçanërisht nëse jeni duke u përpjekur t’i bindni të tjerët që të ndërmarrin veprime.

Tregimet i nxisin dëgjuesit tuaj për të vepruar

Ju do të gjeni shumë të dhëna në librin e Gates. Për shembull, 750 milionë njerëz jetojnë ende në varfëri të skajshme. Gates argumenton se largimi i tyre nga varfëria do të thotë së pari të fuqizosh gratë. Por, 750 milionë është thjesht një numër shumë i madh për ne që të mbyllim mendjet tona përreth. Ne mendojmë kur dëgjojmë numra të mëdhenj e lëmë mënjanë historinë.

Pasi Bill Gates, bashkëshorti i Melindës dhe bashkëpunëtori i Fondacionit Bill & Melinda Gates, kishte lexuar librin e përfunduar, ai shkroi në blogun e tij: “Ajo që është me të vërtetë mbresëlënëse për librin është mënyra se si Melinda kombinon zotërimin e saj të të dhënave me aftësinë e saj për të sjellë tregime të fuqishme për gra të veçanta që ka takuar”. Ai ka të drejtë.

Dëgjimi me vite i historive të grave me vuajtje ekstreme i dhanë Melindës një pasqyrë të thellë të kushteve që çojnë në pabarazi, ashtu si edhe kushtet e nevojshme për të ndihmuar në fuqizimin e grave. “Kjo është fuqia e tregimeve”, shkroi Melinda Gates në një postim në Instagram në 2016-ën. “Ato hapin një vend të ri në zemrat tona, i cili hap mendjen tonë, çka shpesh na çon në veprim”.

Në The Moment of Lift, statistikat e para nuk shfaqen deri në faqen 17, edhe pasi keni dëgjuar tregime për gratë e Malaui, që ecin mbi 10 kilomentra në vapë për të vaksinuar fëmijët e tyre. Ishte “një ditë e vështirë për gratë, jetët e të cilëve ishin tashmë të vështira”, shkruan Gates.

Nëse po dorëzoni një prezantim ose shkruani një dokument që ka për qëllim të frymëzojë njerëzit për veprim, mos filloni me statistika. Të dhënat ndjekin një histori. Të dhënat mbështesin një argument. Historia vjen së pari.

Trego historinë për të çliruar “molekulën morale”

Neuroshkencëtarët si, Dr. Paul Zak, kanë zbuluar se tregimet ndryshojnë trurin tuaj – në një mënyrë të mirë. Historitë na lidhin së bashku. Hulumtimi i Zak fokusohet në oksitocinë, përbërësi neurokimik përgjegjës për ndjeshmërinë. Zak e quan oksitocinën “molekulën morale”, sepse një rritje e ndjeshme e saj në gjak i bën njerëzit më bujarë, bamirës dhe të dhembshur.

Në eksperimentet laboratorike Zak gjeti se mënyra më e mirë për të rritur oksitocinën tek një person tjetër, është t’u tregoni atyre një histori në veprim.

Kjo nuk është surprizë. Antropologët besojnë se tregimi ishte një moment i rëndësishëm në zhvillimin njerëzor. Përmes ndarjes së tregimeve edukoheshin anëtarë të tjerë të fisit. Tregimet i lidhnin ata për të vepruar së bashku në grup.

Melinda Gates është një tregtimtare e shkëlqyer dhe grumbulluese e historive gjithashtu. Ajo jeton në fshatrat dhe shtëpitë e grave që përshkruan. Dëgjon me vëmendje dhe sjell historitë e tyre për të edukuar ato, jetët e të cilave janë shumë larg vështirësive që këto gra përjetojnë çdo ditë.

Në librin e Gates ka më shumë tregim se statistika. Është bërë qëllimisht. Nëse doni të keni një audiencë që tregon interes, ndarja e historive të vërteta të njerëzve të vërtetë do të ketë një ndikim shumë të madh.

Lajmet

Ekstradohet nga Hungaria i dënuari me katër vjet burg

Published

9 minutes ago

December 4, 2025

UBTnews

Sot është realizuar me sukses ekstradimi nga Hungaria në Kosovë i shtetasit S.T. (49), nga fshati Gjonaj i Prizrenit, i cili kërkohej me urdhër-arrest ndërkombëtar të lëshuar nga Gjykata Themelore në Prizren.

Sipas autoriteteve, ai ishte dënuar për disa vepra penale, përfshirë blerjen, posedimin, shpërndarjen dhe shitjen e paautorizuar të narkotikëve, kultivimin e bimëve narkotike si dhe posedimin e paautorizuar të armëve. Ndaj tij ishte shqiptuar dënimi prej tre vjet e 10 muaj burgim dhe një gjobë prej 4 mijë eurosh, të cilit i ishte shmangur.

Lajmet

Superkompjuteri parashikon fituesin e Kupës së Botës

Published

27 minutes ago

December 4, 2025

UBT News

Superkompjuteri i Opta-s ka analizuar mijëra skenarë për Kupën e Botës 2026 dhe në krye të favoritëve del Spanja e Luis de la Fuentes.

Kampionët e Evropës shfaqen me një probabilitet 17 për qind për të fituar trofeun dhe modeli statistikor i vendos ata qartë përpara rivalëve.

Pas tyre vjen Franca me 14.1 për qind, e cila kërkon të shkruajë histori duke synuar finalen e tretë radhazi, një arritje që deri tani i përket vetëm Gjermanisë dhe Brazilit.

Në vendin e tretë qëndron Anglia me një shans 11.8 për qind, një ekip i fortë statistikisht por i penguar prej dekadash nga mungesa e trofeve të mëdha.

Argjentina, kampionia aktuale e botës, ka vetëm 8.7 për qind për të përsëritur suksesin e vitit 2022, megjithatë mbetet kombi jo-evropian me shanset më të mira. Ndërkohë Portugalia, me 6.6 për qind, shihet si ekipi më premtues që nuk ka fituar kurrë një Kupë Bote dhe kërkon të shfrytëzojë momentin e mirë pas triumfit në Ligën e Kombeve.

Sa i përket mikpritësve, vetëm Meksika ka një shans të matshëm me 1.3 për qind, ndërsa Shtetet e Bashkuara dhe Kanadaja mbeten shumë larg garës për titull. Nga Afrika, Maroku ruan statusin e ekipit më konkurrues, me 1.1 për qind, duke u mbështetur në ecurinë historike të vitit 2022.

Superkompjuteri ka dhënë verdiktin e tij dhe nëse statistikat dalin të sakta, Spanja duhet të fillojë të përgatisë hapësirën për një trofe të ri në muzeun e saj./S.K/KP/

Lajmet

Veteranit të UÇK-së i caktohen 30 ditë paraburgim në Serbi

Published

1 hour ago

December 4, 2025

UBTnews

Autoritetet gjyqësore të Serbisë i kanë caktuar masën e paraburgimit prej 30 ditësh shtetasit të Kosovës, Avni Qenaj, nën pretendimet për përfshirje në krime lufte gjatë vitit 1999.

Lajmin e ka konfirmuar Ministria e Punëve të Jashtme dhe Diasporës, duke theksuar se ky veprim përbën vazhdimësi të ndjekjes politike ndaj qytetarëve të Kosovës përmes akuzave të pabazuara dhe të motivuara politikisht.

“Autoritetet gjyqësore të Serbisë kanë iniciuar procedurë penale ndaj Qenajt dhe i kanë shqiptuar masën e paraburgimit prej 30 ditësh, me pretendime për krime lufte të vitit 1999. MPJD thekson se ky veprim vazhdon praktikat e ndjekjes politike ndaj qytetarëve të Kosovës”, thuhet në njoftim.

Ministria ka bërë të ditur se përmes Zyrës Ndërlidhëse në Serbi do të vazhdohet monitorimi i rastit dhe do të ndërmerren të gjitha veprimet diplomatike për mbrojtjen e të drejtave të Qenajt. Në kuadër të këtij angazhimi, ambasadori i Kosovës në Serbi, Jetish Jashari, e vizitoi një ditë më parë Qenajn në Qendrën e Paraburgimit të Gjykatës së Lartë për Krime të Luftës në Beograd, duke i ofruar mbështetjen institucionale të qeverisë.

Qenaj ka deklaruar se gjatë qëndrimit në arrest policor ka përjetuar presion psikologjik, por pa keqtrajtim fizik, dhe aktualisht nuk po i nënshtrohet dhunës në paraburgim. Ai gjithashtu ka bërë të ditur se ende nuk është vizituar nga familjarët, të cilët kanë angazhuar katër avokatë për përfaqësimin e tij ligjor.

Shtetasi kosovar u arrestua më 26 nëntor 2025 në pikëkalimin kufitar në Merdarë, gjatë udhëtimit drejt Bosnjë-Hercegovinës, ku familja e tij zhvillon aktivitet biznesor. Pas arrestimit, ai qëndroi 48 orë në Prokuplje dhe më pas u transferua në Beograd, ku më 28 nëntor iu bë njoftimi për nisjen e procedurës penale dhe caktimin e paraburgimit.

Lajmet

Hashim Thaçit i vazhdohet paraburgimi nga Specialja

Published

2 hours ago

December 4, 2025

UBTnews

Gjykata Speciale njofton se rastin “Thaçi dhe të tjerët” të administrimit të drejtësisë, Hashim Thaçit dhe të tjerëve u është vazhduar paraburgimi.

“Në vendimin mbi rishikimin e paraburgimit më 3 dhjetor 2025, Gjykatësi i Vetëm urdhëroi vazhdimin e paraburgimit të Hashim Thaçit, Bashkim Smakajt dhe Fadil Fazliut. Gjykatësi Gosnell konstatoi se ekziston rreziku real që të akuzuarit, nëse do të liroheshin, mund të pengojnë ecurinë e procesit dhe të kryejnë vepra penale të tjera”, njofton Specialja.

Ky është vendimi i gjashtë i tillë në këtë çështje; të gjitha vendimet mbi rishikimin e paraburgimit mund t’i gjeni këtu.

Aktakuza kundër të akuzuarve u konfirmua më 29 nëntor dhe u bë publike më 6 dhjetor 2024. Më 3 prill 2025, Paneli i Gjykatës së Apelit miratoi pjesërisht apelin e ZPS-së kundër vendimit të Gjykatëses së Procedurës Paraprake të datës 29 nëntor 2024 për konfirmimin e aktakuzës.

ZPS-ja kundërshtoi interpretimin e Gjykatëses të nenit 32(3) të Kodit Penal të Kosovës (KPK), me argumentin se ajo gaboi që përjashtoi përgjegjësinë penale të Hashim Thaçit për nxitje bazuar në një keqinterpretim të kritereve të dënimit. Me vendim të shumicës – gjykatësja Jorgensen ishte në mospajtim – Paneli u pajtua se neni 32(3) zbatohet për vepra penale për të cilat shkallëzimi i dënimeve përfshin pesë vjet ose më shumë se pesë vjet, edhe nëse jo dënim minimal. Paneli ia ktheu çështjen Gjykatëses së Procedurës Paraprake për shqyrtim të mëtejshëm.

Më 14 prill 2025, Gjykatësja e Procedurës Paraprake ndryshoi vendimin e saj duke konfirmuar një formë përgjegjësie penale shtesë për Thaçin në bazë të nenit 32(3) të KPK në akuzat e paraqitura në Pikat 1, 2, dhe 3 të aktakuzës. Ajo urdhëroi ZPS-në të dorëzojë aktakuzën e re të konfirmuar, e cila u dorëzua më 16 prill 2025.

Sipas Aktakuzës së konfirmuar, së paku midis 12 prillit 2023 dhe 2 nëntorit 2023, gjatë vizitave jo të privilegjuara në objektin e paraburgimit, Hashim Thaçi u dha Smakajt, Kilajt, Fazliut dhe Kuçit informacion konfidencial në lidhje me dëshmitarë të ZPS-së, udhëzime për të ndikuar në dëshmitë e dëshmitarëve të ZPS-së dhe hollësi se si duhej ta bënin këtë.

Në aktakuzë më tej pretendohet se Thaçi bashkërendoi tri grupe të veçanta, të formuara me Smakajn, me Fazliun dhe me Kilajn, dhe persona të tjerë kundër të cilëve nuk janë ngritur akuza, si dhe me Kuçin, me synimin për të ndikuar në dëshmitë e dëshmitarëve të ZPS-së në kontekstin e gjykimit aktual për krime lufte Thaçi dhe të tjerët.

Isni Kilaj u arrestua më 2 nëntor 2023 në Kosovë dhe u transferua në njësinë e paraburgimit të DHSK-së më 3 nëntor 2023. Seanca e paraqitjes së parë të Kilajt, si i dyshuar, para Gjykatësit të Vetëm, u mbajt më 4 nëntor 2023, në bazë të nenit 41 të Ligjit dhe rregullës 55 të Rregullores. Në maj 2024, për shkak të vonesave të konsiderueshme të afatit të procedurave, Gjykatësi i Vetëm përcaktoi se zgjatja e paraburgimit të tij do të ishte e paarsyeshme dhe urdhëroi lirimin e Kilajt në Kosovë me kushte të rrepta. Vendimi i Gjykatësit të Vetëm u konfirmua në vijim nga Gjykata e Apelit e DHSK-së. Gjatë gjithë kësaj periudhe ai u konsiderua vetëm si i dyshuar.

Pas konfirmimit të Aktakuzës kundër pesë të akuzuarve, Isni Kilaj, Bashkim Smakaj dhe Fadil Fazliu u arrestuan nga ZPS-ja më 5 dhjetor dhe u transferuan në objektin e paraburgimit të Dhomave të Specializuara të Kosovës (DHSK) në Hagë më 6 dhjetor 2024. Hashim Thaçit iu dorëzua fletarrestimi në objektin e paraburgimit të DHSK-së më 5 dhjetor, ndërsa Hajredin Kuçit iu dorëzua fletëthirrja për paraqitjen e parë.

Në paraqitjen e tyre të parë më 8 dhjetor 2023, Thaçi dhe Smakaj nuk u deklaruan në lidhje me fajësinë ose pafajësinë, ndërsa Fazliu u vetëdeklarua i pafajshëm për të gjitha pikat e aktakuzës. Një ditë më vonë, më 9 dhjetor, Kuçi dhe Kilaj u vetëdeklaruan të pafajshëm për të gjitha pikat e aktakuzës.Pasi Thaçi dhe Smakaj vendosën të mos deklarohen lidhur me fajësinë gjatë seancës së 17 dhjetorit 2024, gjykatësja e procedurës paraprake kërkoi që ata të deklarohen në formë të shkruar deri më 7 janar 2025. Më 6 janar 2025, Thaçi dorëzoi njoftimin përmes të cilit u vetëdeklarua i pafajshëm. Vetëdeklarimi i pafajësisë së Bashkim Smakajt u dorëzua më 3 janar ndërsa u bë publike më 14 janar 2025.

Më 19 shtator 2025, ZPS-ja dorëzoi, si konfidenciale, dosjen e vet paraprake. Më 7 tetor 2025, ZPS-ja e dorëzoi versionin e redaktuar publik të dosjes paraprake të korrigjuar. Më 20 dhe 23 tetor 2025, Fadil Fazliu dhe Hashim Thaçi dorëzuan versionet e redaktuara publike të dosjeve të tyre paraprake.

Më 11 nëntor 2025, Gjykatësja e Procedurës Paraprake njoftoi Kryetaren se dosja e çështjes do të jetë gati për t’iu kaluar një trupi gjykues më 12 nëntor 2025. Rrjedhimisht, Kryetarja e DHSK-së caktoi gjykatësin e vetëm në gjykimin e kësaj çështjeje. Më 12 nëntor 2025, Gjykatësja e Procedurës Paraprake ia kaloi dosjen e çështjes gjykatësit të vetëm.

Konferencat për përgatitjen e gjykimit u mbajtën më 28 nëntor 2025./EO