Aktori i njohur Kelsey Grammer, i famshëm për rolin e tij në serialin “Frasier”, ka mirëpritur fëmijën e tij të tetë. Ai dhe gruaja e tij, Kayte Walsh, kanë sjellë në jetë një djalë të cilin e kanë quajtur Christopher.

Lajmin Grammer e bëri të ditur gjatë një paraqitjeje në podcast-in Pod Meets World, duke i surprizuar prezantuesit dhe dëgjuesit.

“Ndodhi tre ditë më parë. Christopher sapo u bashkua me familjen tonë,” tha aktori 70-vjeçar me një buzëqeshje.

Ky është fëmija i katërt i çiftit Grammer-Walsh. Ata tashmë kanë tre fëmijë: Faith (13 vjeç), Gabriel (11 vjeç) dhe James (8 vjeç).

Grammer u bë baba për herë të parë më 1983 me vajzën Spencer, nga martesa me Doreen Alderman. Pas divorcit më 1990, ai pati një tjetër vajzë, Greer, me të dashurën e atëhershme, Barrie Buckner.

Gjatë martesës me Camille, Grammer filloi një lidhje me ish-asistenten e tij, Kayte Walsh, me të cilën u martua në shkurt të vitit 2011 në New York.

Lajmi për shtatzëninë e saj u përhap në qershor të këtij viti, kur paparacët e fotografuan Kayte-n në Londër me barkun e rrumbullakosur, duke mbajtur një fustan të gjatë blu dhe një triko të ndezur. /A.Z/UBT News/

Aktorja e dashur amerikane Julia Roberts, e lindur më 28 tetor 1967 në qytetin Smyrna të shtetit Georgia, feston sot 58-vjetorin e lindjes.

E njohur për buzëqeshjen e veçantë dhe talentin në ekran, Roberts është bërë një nga figurat më të ndritshme dhe më të respektuara të kinemasë botërore.

Roberts fitoi famë ndërkombëtare me rolin kryesor në “Pretty Woman” (1990), një film që u bë fenomen kulturor dhe e ktheu atë menjëherë në një prej aktoreve më të kërkuara të Hollivudit.

Ky sukses i hapi rrugën një karriere të gjatë dhe të larmishme në film, duke dëshmuar se ajo mund të interpretojë me të njëjtën lehtësi komedi romantike, dramë dhe film aksioni. Më 2001, Roberts fitoi Çmimin Oscar për aktoren më të mirë për rolin në “Erin Brockovich”, ku interpretoi një grua të guximshme dhe të vendosur që lufton për drejtësi mjedisore.

Ky triumf e konsolidoi si një nga aktoret më të respektuara të industrisë, duke treguar se talenti i saj shkon përtej komedisë romantike.

Gjatë karrierës, ajo ka luajtur në një sërë filmash të suksesshëm përfshirë “Notting Hill”, “My Best Friend’s Wedding”, “Ocean’s Eleven”, “Runaway Bride”, e “August: Osage County”. Performancat e saj janë vlerësuar për autenticitetin, intensitetin emocional dhe aftësinë për të krijuar lidhje të forta me audiencën.

Përveç suksesit në ekran, Julia Roberts është e njohur për modestinë dhe angazhimin humanitar. Ajo ka mbështetur organizata si UNICEF dhe është përfshirë në projekte që promovojnë edukimin dhe të drejtat e grave dhe fëmijëve.

Privatësia dhe përkushtimi ndaj familjes janë pjesë e jetës së saj, ku aktorja është nënë e tre fëmijëve dhe bashkëshorte e producentit Daniel Moder.

Julia Roberts mbetet një figurë që mishëron elegancën, forcën dhe autenticitetin e gruas moderne në kinemanë amerikane, duke u bërë një shembull frymëzues për të rinjtë dhe një ikonë të paharrueshme të Hollivudit. /A.Z/UBT News/

Pas muajsh thashethemesh për një lidhje të mundshme mes tyre, Helen Skelton dhe Gethin Jones shfaqën për herë të parë publikisht pranë njëri-tjetrit në “Pride of Britain Awards”.

Buzëqeshjet dhe afrimiteti i tyre nuk kaluan pa u vënë re nga mediat dhe ndjekësit e showbiz-it.

Megjithatë, largimi i tyre u bë në mënyrë të veçantë, pak minuta larg njëri-tjetrit, duke nxitur pyetje për natyrën e marrëdhënies së tyre: a fshehin diçka, apo është thjesht rastësi?

Burime pranë çiftit thanë se ata janë “thjesht miq të mirë”, por dëshmitarët në vendngjarje vunë re “kimia të dukshme” mes tyre, pasi kaluan pjesën më të madhe të mbrëmjes duke biseduar dhe qeshur bashkë.

Ky ishte eventi i parë ku Helen dhe Gethin shfaqen bashkë që nga nisja e spekulimeve për një romancë.

A do ta bëjnë lidhjen publike së shpejti, apo do të vazhdojnë të luajnë “lojën e heshtjes”? /A.Z/UBT News/

Filmi i ri i Netflix, “A House of Dynamite”, me regji nga Kathryn Bigelow, ka shkaktuar reagime të përziera nga publiku pas premierës në platformë, dhe madje ka tërhequr vëmendjen e Pentagonit.

Ngjarjet e filmit zhvillohen 18 minuta pas hedhjes së një rakete bërthamore ndaj Shteteve të Bashkuara dhe paraqiten nga tre perspektiva: Shtëpia e Bardhë, Komanda Strategjike e SHBA-ve dhe vetë presidenti, i luajtur nga Idris Elba.

Megjithatë, fundi i filmit ka shkaktuar debat të madh në rrjetet sociale. Disa nga komentet e përdoruesve ishin: “Askush nuk dëshiron ta shohë të njëjtën histori tri herë dhe të përfundojë pa përgjigje.” “Isha i ngjitur pas televizorit dhe me atë fund u luta që të më godiste një bombë bërthamore.”

“Më zemëroi, pse nuk mbaroi?” “Nuk ka zgjidhje në fund, filmi thjesht mbaron.”

Pavarësisht kritikave të përziera, filmi ka marrë një vlerësim pozitiv prej 79% në Rotten Tomatoes.

Edhe Pentagoni reagoi ndaj filmit, duke shprehur “shqetësim për pasaktësitë e treguara në film”, gjë që e ka shtuar diskutimin publik.

Regjisori Kathryn Bigelow theksoi se qëllimi i filmit është të nxisë një debat global rreth kërcënimit bërthamor dhe sistemeve që mundësojnë vendime të tilla. /A.Z/UBT News/