Kompania spanjolle e energjisë elektrike, Red Electrica de Espana (REE), ka përjashtuar mundësinë e një sulmi kibernetik si shkak të ndërprerjes masive të energjisë që preku të gjithë Gadishullin Iberik. Kjo deklaratë përputhet me qëndrimin e kryeministrit portugez, Luis Montenegro, i cili një ditë më parë tha se nuk ka indikacione që pas incidentit të fshihet një sulm i tillë.

Ndërprerja e energjisë elektrike ndodhi të hënën dhe shkaktoi kaos në transportin publik në Spanjë dhe Portugali, me ndërprerje trenash, pezullim të metrosë, semaforë jashtë funksionit dhe vonesa të mëdha në trafikun rrugor e ajror. Gjithashtu, një pjesë e Francës verilindore, pranë kufirit me Spanjën, u prek përkohësisht.

Në Spanjë, qindra njerëz u detyruan të evakuoheshin nga ndërtesat e zyrave, ndërsa dëshmitarët raportuan një prani të shtuar të forcave të rendit në rrugët e Madridit, përfshirë drejtimin manual të trafikut. Një nga katër kullat kryesore të Madridit, ku ndodhet edhe Ambasada Britanike, u evakuua si masë sigurie.

Mediat spanjolle raportuan se disa njerëz mbetën të bllokuar në ashensorë dhe në vagonët e metrosë, ndërkohë që një stacion i rëndësishëm si Legazpi u mbyll plotësisht.

Edhe në Portugali situata ishte e rëndë. Metroja në Lisbonë dhe Porto u ndërpre, ndërsa autobusët u tejmbushën nga pasagjerët që kërkonin mënyra alternative për të udhëtuar. Autoritetet konfirmuan se semaforët në të gjithë vendin kishin dalë jashtë funksionit. Kompania ajrore TAP raportoi se aeroporti i Lisbonës operonte me gjeneratorë rezervë, ndërsa AENA, operatori i aeroporteve në Spanjë, bëri të ditur se vonesat ishin të pranishme në të gjithë vendin.

Edhe turneu i tenisit “Madrid Open” u prek nga ndërprerja, duke detyruar pezullimin e ndeshjeve. Tenisti Grigor Dimitrov dhe kundërshtari i tij britanik, Jacob Fearnley, u larguan nga fusha pasi tabela elektronike dhe kamerat dolën jashtë funksionit.

Të paktën 22 persona u humbën jetën, ndërsa tre prej tyre u plagosën në një zjarr që shpërtheu sot në një restorant në qytetin Liaoyang, në provincën Liaoning në Kinën verilindore, sipas mediave shtetërore kineze.

Zjarri shpërtheu rreth orës 14:00 sipas kohës lokale. Presidenti kinez Xi Jinping bëri thirrje që të bëhen të gjitha përpjekjet për të ndihmuar njerëzit e plagosur në zjarr, raporton Xinhua.

Presidenti ukrainas Volodymyr Zelensky propozoi një armëpushim të menjëhershëm të hënën në përgjigje të një thirrjeje nga Presidenti rus Vladimir Putin për një armëpushim të përkohshëm nga 8 maji deri më 10 maj për të shënuar festën e Ditës së Fitores në Rusi.

Zelensky e hodhi poshtë propozimin e Putinit dhe e quajti “një përpjekje tjetër për manipulim”, duke vënë në dyshim pse një armëpushim duhet të vonohet për më shumë se një javë vetëm për t’i “siguruar Putinit heshtje për paradën e tij”.

“Ne i vlerësojmë jetët njerëzore, jo paradat. Kjo është arsyeja pse ne besojmë dhe bota beson se nuk ka arsye për të pritur deri më 8 maj. Armëpushimi nuk duhet të jetë vetëm për disa ditë, vetëm për t’u rikthyer më pas te vrasjet. Ai duhet të jetë i menjëhershëm, i plotë dhe pa kushte — për të paktën 30 ditë për t’u siguruar që është i sigurt dhe i garantuar. Ky është themeli që mund të çojë në diplomaci të vërtetë”.

Më parë, më 28 prill, Kremlini njoftoi një armëpushim të njëanshëm për të shënuar 80-vjetorin e fitores sovjetike në Luftën e Dytë Botërore. Armëpushimi, sipas Moskës, do të zgjaste nga mesnata e 8 majit deri në mesnatën e 11 majit.

Presidenti i Shteteve të Bashkuara, Donald Trump, në një intervistë ekskluzive për revistën The Atlantic, ndau reflektimet e tij mbi ndryshimin mes dy mandateve presidenciale, duke e përshkruar mandatin aktual si një periudhë me ndikim global dhe autoritet më të konsoliduar.

“Po argëtohem shumë, duke marrë parasysh seriozitetin e punës që bëj,” deklaroi ai. “Herën e parë, kisha dy sfida, të drejtoja vendin dhe të mbijetoja. Tani, po drejtoj vendin dhe gjithë botën. Askush nuk mund të më ndalojë,” deklaroi Trump.

Trump u shpreh se përballja me atë që ai e quajti “një sistem të korruptuar” karakterizoi mandatin e tij të parë, ndërsa tashmë ndihet më i lirë për të ushtruar ndikimin e tij politik dhe ndërkombëtar.

Që nga rikthimi në Shtëpinë e Bardhë në janar, Presidenti Trump ka ndërmarrë një sërë veprimesh ekzekutive, veçanërisht në fushën e emigracionit dhe tregtisë. Politikat e tij mbi tregtinë, përfshirë vendosjen e tarifave të reja ndaj vendeve partnere, kanë shkaktuar tronditje në tregjet globale dhe reagime të ashpra nga udhëheqësit ndërkombëtarë. Disa prej këtyre tarifave janë pezulluar përkohësisht deri në muajin korrik.

Lëvizjet e fundit të administratës, përfshirë komentet rreth Groenlandës dhe sugjerimet për një “bashkim” hipotetik me Kanadanë, kanë rritur tensionet me aleatët tradicionalë të SHBA-së. Në të njëjtën kohë, Trump ka përqendruar përpjekjet e tij diplomatike në ndërmjetësimin e një armëpushimi mes Rusisë dhe Ukrainës.

Në intervistë, presidenti komentoi gjithashtu spekulimet rreth një kandidature të mundshme për një mandat të tretë, një ide e pazakontë në kontekstin e kufizimeve kushtetuese.

“Nuk është diçka që po e kërkoj të ndodhë. Do të ishte jashtëzakonisht e vështirë për t’u realizuar,” tha ai.

Intervista u zhvillua me kryeredaktorin e The Atlantic, Jeffrey Goldberg, i cili së fundmi ishte përfshirë në një bisedë konfidenciale mes zyrtarëve të lartë amerikanë mbi një operacion të mundshëm ushtarak ndaj militantëve Houthi.

Ndërkohë, Presidenti Trump pritet të vizitojë sot shtetin e Michiganit për të mbajtur një tubim elektoral, ku do të përkujtojë 100 ditët e para të mandatit të tij të dytë.

“Presidenti Trump është i emocionuar që të kthehet në shtetin e madh të Michiganit për të festuar 100 DITËT E PARA!” shkroi zëdhënësja e Shtëpisë së Bardhë, Karoline Leavitt, në një postim në platformën X.