Kanë dalë para gjykatës disa nga të dyshuarit e arrestuar gjatë operacionit të gjerë policor të së mërkurës, i cili goditi një rrjet të krimit të organizuar të përfshirë në realizimin e transaksioneve fiktive me derivate të naftës. Prokuroria Speciale e Republikës së Kosovës ka kërkuar zyrtarisht masën e paraburgimit për të nëntë personat e ndaluar.

Operacioni i koduar u realizua më 1 korrik dhe u udhëhoq nga Prokuroria Speciale në bashkëpunim me Drejtorinë për Hetimin e Krimeve të Rënda dhe Krimit të Organizuar të Policisë së Kosovës, si dhe me asistencën e Doganës dhe Administratës Tatimore të Kosovës (ATK).

Nga hetimet e kryera, autoritetet ranë në gjurmët e personave të përfshirë, duke prangosur shtetasit me inicialet F.M., F.M., M.M., S.K., N.B., D.M., A.M., N.M., dhe G.Q. Mbi ta rëndojnë akuza të rënda për pjesëmarrje ose organizim të grupit kriminal të organizuar, shpëlarje të parave, kontrabandim të mallrave në bashkëkryerje, si dhe për shmangie nga tatimi dhe hartim të dokumenteve të rrejshme lidhur me tatimin.

Gjatë bastisjeve dhe kontrolleve në terren, policia ka sekuestruar një sasi të konsiderueshme provash materiale që shërbejnë për zbardhjen e plotë të rastit. Në mesin e sendeve të konfiskuara janë 15,000 euro kesh, si dhe 301 euro në kartëmonedha dy-euroshe që dyshohet se janë të falsifikuara. Gjithashtu, janë sekuestruar 5 vetura dhe 5 autobotë të përdorur për transportin e derivateve të naftës, 2 armë zjarri me 54 fishekë, si dhe pajisje elektronike e dokumente të ndryshme relevante për rastin. Të dyshuarit tashmë ndodhen në proces gjyqësor, ku pritet të merret vendimi lidhur me kërkesën e prokurorisë për caktimin e masës së paraburgimit. /Ekonomia online/ /E.A/

Kombëtarja e Spanjës ka shënuar një fitore bindëse 3-0 ndaj Austrisë, duke siguruar me meritë kalimin për në 1/8 e finales të Kupës së Botës. Me këtë triumf, “La Roja” konfirmon formën e saj të lartë dhe përgatitet për një super-sfidë në fazën tjetër, ku do të përballet me Portugalinë, e cila më herët eliminoi Kroacinë.

Ndeshja nisi me dominimin e spanjollëve, të cilëve fillimisht iu anulua një gol spektakolar me volej nga Marc Cucurella për shkak të një faulli në sulm. Megjithatë, epërsia u zhbllokua në minutën e 36-të, kur Mikel Oyarzabal shënoi pas një asistimi të saktë nga po i njëjti Cucurella.

Në pjesën e dytë, Spanja e rriti presionin dhe në minutën e 66-të dyfishoi shifrat me anë të Pedro Porros, i shërbyer bukur nga Alex Baena. Austria u përpoq të reagonte, madje David Alaba shpëtoi një gol të sigurt mbi vijën e portës pas një goditjeje të Lamine Yamal. Krejt në fund të takimit, në minutën e 89-të, Oyarzabal shënoi golin e tij të dytë personal dhe të tretin për Spanjën, pas një tjetër asistimi nga Cucurella, duke vulosur rezultatin përfundimtar 3-0.

Ky sukses e dërgon Spanjën drejt një prej dueleve më të pritura të turneut, ku në fazën e 1/8-ave do të masë forcat në një derbi iberik kundër Portugalisë së Cristiano Ronaldos. /E.A/

Një hetim i thelluar i “BBC Eye” ka zbuluar një skandal në platformën Instagram në Indi, ku reklama të paguara dhe të miratuara nga sistemi i moderimit të Meta-s promovonin hapur materiale të abuzimit seksual me fëmijët.

Reklamat përdornin terma të drejtpërdrejtë dhe përmbanin lidhje që i dërgonin përdoruesit në kanale të aplikacionit Telegram, ku këto materiale shiteshin për më pak se një dollar.

Gjatë këtij hetimi, BBC raportoi një nga këto reklama tronditëse, por Instagram u përgjigj fillimisht se postimi nuk shkelte rregullat e komunitetit. Vetëm pasi mediat kërkuan komente zyrtare, kompania Meta ndërhyri duke bllokuar llogaritë dhe duke deklaruar se asnjë sistem nuk është i përsosur, ndërsa premtoi rritjen e përdorimit të inteligjencës artificiale për të shmangur gabime të tilla.

Ky rast ka ngritur alarm të madh te autoritetet dhe ekspertët ligjorë në Indi, të cilët kanë kërkuar ndërhyrjen e menjëhershme të Gjykatës Supreme. Ata theksojnë se rrjetet sociale nuk mund t’i shmangen përgjegjësisë penale kur përfitojnë financiarisht nga aktivitete të tilla kriminale. Të gjitha gjetjet e këtij hetimi tashmë u janë dorëzuar autoriteteve indiane për ndjekje të mëtejshme. /BBC/ /E.A/

Breel Embolo dhe Dan Ndoye shënuan nga një gol në fitoren 2:0 të Zvicrës ndaj Algjerisë, në ndeshjen e luajtur në orët e hershme të mëngjesit të së premtes, duke siguruar kualifikimin për në 1/8 e finales të Kupës së Botës.

Granit Xhaka udhëhoqi sërish Zvicrën si kapiten në fushë, duke e çuar përfaqësuesen drejt një tjetër suksesi në skenën më të madhe të futbollit botëror.

Zviceranët e nisën ndeshjen me vrull dhe kaluan në avantazh që në minutën e 10-të falë golit të Embolo-s, rezultat me të cilin u mbyll edhe pjesa e parë.

Me të filluar pjesa e dytë, Ndoye dyfishoi shifrat në 2:0, rezultat që mbeti i pandryshuar deri në fishkëllimën e fundit të arbitrit.

Me këtë kalim grupi, Zvicra përsërit suksesin e tre Botërorëve të kaluar ku arriti në 1/8 e finales, por këtë herë synon të thyejë tabunë dhe të avancojë edhe më tej në turne./E.A/