Ndërsa liderët botërorë dhe aktivistët e klimës po negociojnë se si të shpëtojnë planetin nga ndryshimet katastrofike klimatike në COP26 këtë javë, “shkalla tronditëse” e dezinformatave klimatike në Facebook është zbuluar në një raport të ri, përcjell UBT News.

“Stop Funding Heat”, një grup i fushatës klimatike, tha se viti 2021 ka qenë viti më i keq deri më tash për dezinformimin e klimës në rrjetin social, me një rritje prej 76.7 për qind të postimeve që përmbajnë informacion të rremë rreth mjedisit.

Grupi thotë se “asgjë nuk është bërë” për këtë çështje, për të cilën ata thonë se është ngritur më shumë se një vit më parë.

Facebook, tani pjesë e kompanisë mëmë Meta, ka qenë i pranishëm në samitin e klimës COP26 në Glasgow, duke bërë më shumë premtime për të forcuar kredencialet e tij klimatike.

Megjithatë në raportin e tij të fundit, grupi “Stop Finding Heat” zbuloi se miliona njerëz po shohin informacione për klimën çdo javë dhe një pjesë e vogël e kësaj përmbajtje po kontrollohet nga moderatorët.

Raporti, i titulluar “In Denial: Facebook’s Growing Friendship with Climate Misinformation”, zbuloi se kishte rreth 818,000 deri në 1.36 milionë shikime ditore të dezinformatave të klimës në Facebook. Për të mbledhur të dhënat, ata përdorën 195 faqe dhe grupe dhe 48,700 postime.

Raporti theksoi gjithashtu 113 reklama të dezinformatave të klimës në Bibliotekën e Reklamave të Facebook nga janari deri në tetor 2021.

Facebook hodhi poshtë pohimet e bëra në raport, me një zëdhënës të Metës që tha për Euronews: “Ky raport përdor numra të sajuar dhe një metodologji të gabuar për të sugjeruar se përmbajtja në Facebook është keqinformim kur në të vërtetë janë thjesht postime me të cilat këto grupe nuk pajtohen politikisht. Në fakt, atje ishin mbi 140 milionë ndërveprime me përmbajtjen e ndryshimeve klimatike në përgjithësi gjatë të njëjtit hark kohor – më shumë se 14 herë më shumë se ndërveprimet që pretendon ky raport”, transmeton UBT News.

“Ne jemi të fokusuar në zvogëlimin e dezinformatave aktuale të klimës në platformën tonë, kjo është arsyeja pse ne jemi partnerë me një rrjet global kontrolluesish të fakteve dhe reduktojmë shpërndarjen e çdo gjëje që ata e vlerësojnë si të rreme ose mashtruese”, shtuan ata.

Por kritikët, të tillë si Real Facebook Oversight Board, thonë se Facebook ka “mbjellur konfuzion dhe dyshim për ndryshimet klimatike në bisedën globale”.

Sean Buchan, kreu hulumtues në “Stop Funding Heat”, tha se të dhënat tregojnë se Facebook “është ndër furnizuesit më të mëdhenj në botë të dezinformatave klimatike”.

“Stop Funding Heat” i ka bërë thirrje Facebook-ut të miratojë një përkufizim të dezinformatave klimatike që ndjek shkencën dhe të zbulojë kërkimin e tij se si po përhapet keqinformimi në platformën e tij.

Grupi gjithashtu dëshiron që Facebook të prodhojë një plan për të reduktuar përhapjen e informacionit të rremë mbi ndryshimet klimatike./UBTNews/