Administrata e Presidentit Donald Trump i ka bërë apel Izraelit që të mos ndërhyjë në Siri teksa kjo pritet të jetë një nga temat kryesore gjatë vizitës së kryeministrit Benjamin Netanyahu në Shtëpinë e Bardhë, e cila do të mbahet këtë muaj.

Në një postim në rrjetet sociale, Trumpi paralajmëron Izraelin të mos ndërhyjë në Siri dhe ky qëndrim i Trumpit vjen disa ditë pasi trupat izraelite u sulmuan gjatë një operacioni arrestimesh në Siri, duke shkaktuar përleshje në të cilat u vranë 13 persona, sipas raporteve siriane.

Rrjeti “Channel 12” citon një zyrtar amerikan që thotë se Siria nuk dëshiron probleme me Izraelin, dhe se situata nuk është si Liban, por paralajmëron se Netanyahu duhet të ndryshojë kursin përpara se të kthejë regjimin e ri në Siri në një armik të Izraelit.

Zyra e Netanyahut njoftoi vizitën e ardhshme, një ditë pasi ai kërkoi falje në gjyqin e tij për korrupsion nga presidenti Herzog, një lëvizje që Trump e mbështet gjithashtu.

Në fund të këtij viti pas rrëzimit të regjimit të Bashar al-Assad-it në dhjetor 2024, administrata Trump ka hequr sanksionet ndaj Sirisë dhe po përpiqet të integrojë udhëheqësin e ri, Ahmed al-Sharaa, në një koalicion pro-perëndimor, duke synuar paqe rajonale dhe zgjerimin e Marrëveshjeve të Abrahamit, transmeton RTSH.

Izraeli, nga ana tjetër, ka vazhduar bombardimet dhe operacionet në Siri për të parandaluar kërcënimet, duke shkaktuar frikë se po destabilizon qeverinë e re siriane./S.K/KP/

Të paktën 12 persona kanë vdekur dhe rreth 50 të tjerë rezultojnë të zhdukur pasi një rrëshqitje dheu goditi dy anije të ankoruara në një port lumor në rajonin e pyjeve tropikale të Amazonës në Peru.

Rrëshqitja e tokës fundosi një traget dhe dëmtoi rëndë një tjetër anije pasagjerësh që kishte dhjetëra njerëz në bord, sipas një raporti policor të cituar nga agjencia e lajmeve Andina, shkruan BBC.

Ngjarja ndodhi rreth orës 05:00 sipas orës lokale, ndërsa pasagjerët po përgatiteshin të zbrisnin në Iparia, në rajonin qendror Ucayali të vendit të hënën.

Të plagosurit janë dërguar në spital, ndërsa policia kombëtare dhe Marina Peruviane kërkojnë të mbijetuar të tjerë. Frikësohet se midis të zhdukurve ka edhe fëmijë./S.K/EO/UNN/

Shefja e politikës së jashtme të BE-së, Kaja Kallas, deklaroi se kjo mund të jetë një javë vendimtare për diplomacinë në Ukrainë.

Ajo shtoi se Rusia nuk dëshiron paqe, ndaj aleatët e Ukrainës duhet të kontribuojnë që ajo të jetë e përgatitur dhe të mbrojë veten në këtë kohë të vështirë.

“Është e qartë se Rusia nuk dëshiron paqe, dhe për këtë arsye ne duhet ta bëjmë Ukrainën sa më të fortë të jetë e mundur në mënyrë që ta përgatisim atë që të jetë gati të mbrojë veten në këtë kohë shumë, shumë të vështirë. Mund të jetë një javë vendimtare për diplomacinë, dëgjuam se bisedimet në Amerikë ishin të vështira, por produktive”, tha Kaja Kallas.

Deklarata e saj u bë para mbledhjes së ministrave të Mbrojtjes së Bashkimit Evropian në Bruksel, ku në fokus është mbështetja për Ukrainën.

Sipas burimeve të CNN, negociatorët në Florida kanë diskutuar një skenar të mundshëm në të cilin Ukrainës do t’i ndalohet t’i bashkohet NATO-s. Sipas kësaj, marrëveshjet e ardhshme do të duhet të negociohen ndërmjet Uashingtonit dhe Moskës.

Ndërkohë, Kremlini ka njoftuar se presidenti rus, Vladimir Putin, do të takohet të martën me të dërguarin e presidentit të SHBA-së, Donald Trump, Steve Witkoff, në Moskë./EO

Bisedimet në Florida midis zyrtarëve të lartë amerikanë dhe një delegacioni ukrainas që synojnë t’i japin fund luftës në Ukrainë janë të vështira, por shumë konstruktive thotë CNN.

Po ashtu u tha se takimi ka përfshirë diskutimin e disa prej çështjeve më të ndjeshme për zgjidhjen e luftës.

Ndërkohë, zëvendësministri i parë i Jashtëm ukrainas, Sergiy Kyslytsya, ndau një vlerësim optimist të bisedimeve.

“Ka qenë një fillim i mirë i takimit në vazhdim. Shumë tërheqës dhe deri tani konstruktiv. Atmosferë e ngrohtë, e favorshme për një rezultat të mundshëm progresiv”, shkroi Kyslytsya në rrjetin social X.

Ndërsa një delegacion nga Kievi takohet me zyrtarë të administratës Trump në Florida, presidenti ukrainas Volodymyr Zelensky ka kontaktuar sot me aleatë të tjerë, përfshirë sekretarin e përgjithshëm të NATO-s Mark Rutte.

“Këto janë ditë të rëndësishme dhe shumë gjëra mund të ndryshojnë”, tha Zelensky në një postim në rrjetet sociale në lidhje me telefonatën e tij me Rutte.

“Ne po koordinohemi ngushtë dhe në përpjekjet tona – dhe në përpjekjet e të gjithë partnerëve tanë – janë masat tona të përbashkëta dhe qëndrimet e përbashkëta që do të jenë jashtëzakonisht efektive.”

Kujtojmë se Moska nisi një breshëri masive dronësh dhe raketash në Ukrainë gjatë natës së premtes deri të shtunën, duke vrarë të paktën tre persona dhe duke lënë pjesë të mëdha të Kievit pa energji./S.K/KP/