Ministri i Financave, Punëve dhe Transfereve, Hekuran Murati deklaroi se sot gjatë ditës do të bëhet ekzekutimi i shtesave prej 100 eurosh për fëmijët nga mosha 0 deri në 16 vjeç dhe të gjitha kategoritë e pensionistëve.

Murati njoftoi po ashtu se gjatë ditës së premte do të ekzekutohen edhe pagat për punëtorët e sektorit publik.

“Jemi duke bërë përgatitjet, listat janë përgatitur në mënyrë që të provojmë gjatë ditës sot të bëhet edhe ekzekutimi i këtyre shtesave. Pra, përveç se pagat të cilat gjithashtu sot priten të ekzekutohen për sektorin publik. Pritet që gjatë ditës të bëhet edhe ekzekutimi për fëmijët dhe pensionistë, pra shtesat e njëhershme”, thotë ai.

Ministri i Financave, Punëve dhe Transfereve, Hekuran Murati njoftoi po ashtu se rreth 60 persona kanë hequr dorë nga shtesat e njëhershme në shumën prej 100 eurosh.

“Ka qenë si rrjedhojë dhe nevojë e kërkesave apo edhe ankesave që kemi pas që disa kanë thënë pse t’i marr unë nëse nuk kanë nevojë. Gjithsesi listat janë automatike të gjithë ata që kanë përfituar nga shtesat e fëmijëve apo që përfitojnë nga shtesat pensionale pa pasur nevojë të aplikojnë në mënyrë automatike gjenerohen listat…..Përgjatë kohës sa ka qenë formulari i hapur me sa kam informacion kanë qenë gjithsej 60 aplikime të pranuara, por jo të gjitha janë përfitues ka edhe të tilla që nuk gjenden fare në listat e aplikimeve”, u shpreh Murati.

Gjatë kësaj konference për medie, ministri Murati, tha se pas shumë raste që kanë rezultuar që nuk janë banorë rezident në Kosovë, por i kanë marr shtesat.

Sipas tij llogaritë e këtyre rasteve janë suspenduar.

“Nuk di që janë më tepër sesa që janë të regjistruar, gjithsesi ne çfarë kemi bërë kemi marrë disa hapa sa i përket verifikimit për verifikime shtesë për ato raste të cilat kemi pasur indikacione që mund të mos jeni duke jetuar si rezident në Kosovës dhe ka një numër sosh që iu shkua njoftua, disa mund të kenë qenë gabim që mund të jetojnë në Kosovë por indikaiconet kanë qenë të tilla… Ka edhe shumë raste të tjera që kanë rezultuar që kanë qenë duke jetuar dhe normalisht që ato llogari janë suspenduar”, thotë ai.

Ministri i Financave, Hekuran Murati beson se shpejti do të ketë vendimmarrje edhe për emërimin e drejtorit të ri të Administratës Tatimore të Kosovës.

Ambasadori amerikan, Jeffrey Hovenier tha se Shtetet e Bashkuara janë të përkushtuara ndaj partneritetit me Kosovën.

Pas takimit lamtumirës me presidenten e vendit, Vjosa Osmani, tha se duan ta shohin Kosovën të përparojë.

Bashkë me Osmanin, ata kanë bërë homazhe të shtatorja e ish-presidentit historik, Ibrahim Rugova.

“Dua të falënderoj popullin e Kosovës. Ka qenë detyra e ëndrrave të mia të shërbej si Ambasador i SHBA-së këtu për këto tre vite dhe të kem këtë mundësi të punoj së bashku me popullin e Kosovës për të ndihmuar avancimin e vendit. Shtetet e Bashkuara janë të përkushtuara ndaj partneritetit tonë. Duam ta shohim Kosovën të ketë sukses dhe të përparojë. Kur mendoj se si ishte ky vend kur fillova të punoja për të në fund të viteve ’90, kur mendoj se si ishte në kohën e pavarësisë dhe kur mendoj se si është tani, nuk ka asnjë dyshim për përparimin dhe për kapacitetin e njerëzve të Kosovës, për qëndrueshmërinë e tyre për të realizuar vizionin e tyre për një shtet sovran, të pavarur, demokratik, shumetnik, të begatë dhe të suksesshëm. Ka qenë kënaqësia dhe nderi im të luaj një rol të vogël në mbështetjen e këtij procesi. Së bashku me popullin amerikan, ju uroj të gjithëve çdo sukses. Do të largohem si një mik edhe më i fortë i Kosovës sesa isha kur mbërrita”, tha Hovenier.

Hovenier pas homazheve pranë shtatores së presidentit Ibrahim Rugova, vlerësoi këmbënguljen e tij për një shtet sovran, demokratik dhe shumë etnik.

“E bëj këtë në kujtim të Presidentit Rugova dhe asaj për çka ai qëndronte, këmbënguljes së tij për të drejtat e të gjithë njerëzve të Kosovës, këmbënguljes së tij për një shtet sovran, demokratik, shumetnik dhe të begatë, këmbënguljes së tij për të ndjekur këto qëllime në përputhje me vlerat më të larta të komunitetit ndërkombëtar”, u shpreh Hovenier.

Ndërkaq, presidentja Vjosa Osmani tha se angazhimi i Hovenierit për lirinë dhe pavarësinë e Kosovës, ka qenë i pandalshëm.

Osmani theksoi se miqësia me SHBA-të bënë që shteti i Kosovës të ecën përpara në mbrojtjen e plotë të integritetit territorial.

“Një diplomat karriera e të cilit është lidhur në jo vetëm një rast me Republikën e Kosovës. Angazhimi i tij për lirinë dhe pavarësinë tonë ka qenë i pa ndalshëm qysh para 25 vitesh si një diplomat që merrej me Kosovën dhe kontribuonte për lirinë tonë, për të vërtetën, në veçanti për mbrojtjen e së vërtetë. Pastaj si një diplomat i angazhuar në ekipen e presidentit Ahtisari kur edhe u propozua pavarësia për Republikën tonë dhe në gjithë procesin e shtetndërtimit deri tek misioni i tij këtu në Kosovë si ambasador. Ka qenë kënaqësi e veçantë që të bashkëpunojmë në këto tri vite. Që të punojmë shumë afër në interes të qytetarëve të Republikës së Kosovës dhe qytetarëve të SHBA-ve dhe mbi të gjitha në mbrojtjen e themeleve të kësaj aleance ekzistenciale për popullin tonë…Po e përfundojmë sot këtë takim lamtumirës me po të njëjtin veprim duke nderuar presidentin Rugova, atin themeltar të Republikës tonë. Dëshmoj se kur ke miq të fuqishëm pranë, kur ke miqësi që janë të bazuara në vlera, atëherë edhe populli i Kosovës edhe shteti i Kosovës, shteti sovran në mbrojtje të plotë të integritetit territorial ecën përpara”, tha Osmani.

Gjykata Themelore në Pejë e ka dënuar me burgim të përjetshëm Edmond Lajçin për vrasjen e bashkëshortes së tij, Gjyljeta Ukella.

Aktgjykimi është shpallur të premten dhe sipas tij ai dënohet për veprën penale “Vrasje e rëndë”.

Laçi e ka pranuar fajësinë në seancën fillestare të mbajtur më 24 dhjetor në Gjykatën Themelore në Pejë.

Familjarët e Ukellës e kanë mirëpritur vendimin.

Qeveria e Kosovës ka marrë vendim për ndarjen e shtesave të njëhershme në vlerë prej 100 euro për fëmijët nën moshën 16 vjeçare dhe pensionmarrësit.

Ministri i Financave, Hekuran Murati tha se ka ky vendim do të përfitojnë rreth 700 mijë persona.

Krahas kësaj, ekzekutivi miratoi edhe rregulloren për organizimin dhe funksionimin e Zyrës së koordinatorit kombëtar për mbrojtjen nga dhuna në familje, dhunën ndaj grave dhe dhunën në baza gjinore.