Presidenti i Shteteve të Bashkuara të Amerikës, Donald Trump, ka kërcënuar Spanjën me sanksione tregtare, përfshirë tarifat, duke thënë se është i pakënaqur me refuzimin spanjoll për rritjen e shpenzimeve të mbrojtjes në 5 % dhe duke e quajtur këtë veprim mungesë respekti ndaj NATO-s.

“Jam shumë i pakënaqur me Spanjën. Është i vetmi vend që nuk e rriti numrin deri në 5 % … kështu që nuk jam i kënaqur me Spanjën. Po mendoja t’u jepja atyre ndëshkime tregtare përmes tarifave për shkak të asaj që bënë, dhe mendoj se mund ta bëj këtë”, u ka thënë Trump gazetarëve në Shtëpinë e Bardhë.

Trump i ka shtyrë vazhdimisht anëtarët e NATO-s të shpenzojnë më shumë për mbrojtjen dhe ka ngritur dyshime mbi gatishmërinë e Uashingtonit që t’iu dalë zot anëtarëve që nuk shpenzojnë mjaftueshëm.

Ai ka deklaruar javën e kaluar, ndërsa takoi presidentin e Finlandës, se NATO-ja duhet të ketë parasysh përjashtimin e Spanjës nga aleanca për shkak të refuzimit për planet e reja për shpenzime.

Duke përmendur kërcënimin e madh që paraqet Rusia që nga pushtimi i Ukrainës në vitin 2022, anëtarët e NATO-s kanë argumentuar se zotimi i mëparshëm i shpenzimeve prej 2 % të PBB-së më nuk është i mjaftueshëm.

Kryeministri spanjoll, Pedro Sánchez, kishte siguruar një përjashtim në minutën e fundit atëherë, duke thënë se Spanja do të shpenzonte vetëm deri në 2.1 për qind, të cilën do ta quante të mjaftueshme dhe realiste.

Madridi, i cili iu bashkua Organizatës së Traktatit të Atlantikut të Veriut në vitin 1982, ka argumentuar se kompenson shpenzimet më të ulëta me kontribute të forta trupash në misionet e NATO-s, duke përfshirë vendosjet në Letoni, Sllovaki, Rumani, Bullgari dhe Turqi./S.K/EO/

Izraeli ka vendosur të hapë kalimin kufitar Rafah mes Gazës dhe Egjiptit, duke lejuar kalimin e ndihmave humanitare për civilët palestinezë në Rripin e Gazës.

Vendimi vjen pas kthimit të trupave të katër pengjeve izraelite, raportoi transmetuesi publik izraelit Kan.

Po ashtu, autoritetet izraelite anuluan një masë të planifikuar ndaj Hamasit, e cila parashikonte përgjysmimin e numrit të kamionëve me ndihma që lejoheshin të hynin në territorin e rrethuar.

Fotot e publikuara nga agjencia Reuters tregojnë kamionë me ndihma që kalojnë kufirin nga Egjipti drejt Gazës, pas hyrjes në fuqi të një armëpushimi mes Izraelit dhe Hamasit më 12 tetor./S.K/Reuters/UBTNews/

Të paktën 16 persona kanë humbur jetën pasi një zjarr i madh shpërtheu në një fabrikë veshjesh në Bangladesh, ndërsa zyrtarët paralajmërojnë se numri i viktimave mund të rritet.

Gjashtëmbëdhjetë trupa janë gjetur, por janë djegur përtej njohjes, tha shërbimi zjarrfikës, shkruan BBC.

Zjarri, i cili shpërtheu në fabrikë dje rreth mesditës, u shua pas tre orësh, por një depo kimike ngjitur vazhdoi të digjej, thanë autoritetet./S.K/EO/BBC/

Ndërprerja e punës së disa agjencive qeveritare në Shtetet e Bashkuara ka ndalur publikimin e të dhënave zyrtare ekonomike, duke krijuar shqetësim edhe jashtë vendit, veçanërisht në vende si Japonia dhe të tjera që varen nga informacionet amerikane për vendimmarrjet e tyre ekonomike.

Ndërprerja e punës po e vështirëson gjykimin e politikëbërësve jashtë SHBA-së, pasi mungesa e të dhënave mbi ekonominë amerikane ndikon në parashikimet për valutën, tregtinë dhe inflacionin në vendet e tyre.

Ekspertët thonë se ajo që ndodh në Amerikë, nuk mbetet vetëm aty, pasi mungesa e informacionit po vë në rrezik besueshmërinë institucionale dhe po komplikon vendimet ekonomike në një kohë kur vendet po përballen me ndryshime në tregtinë globale.

Banka Botërore dhe Fondi Monetar Ndërkombëtar kanë paralajmëruar se mungesa e transparencës dhe të dhënave mund të çojë në gabime të rëndësishme në politika, duke theksuar pasojat që kjo mund të ketë për ekonominë globale./S.K/EO/