Kancelari i Gjermanisë, Olaf Scholz, e ka humbur votëbesimin në Parlamentin e vendit të hënën, me çfarë i ka hapur vendit rrugën për mbajtjen e zgjedhjeve të parakohshme në fund të shkurtit.

Scholzi e fitoi besimin e 207 ligjvënësve në Bundestag, por 394 të tjerë votuan kundër tij, ndërsa 116 abstenuan.

Atij i nevojitej një shumicë prej 367 votash për ta fituar votëbesimin.

Scholzi udhëheq një qeveri pakicë, pasi koalicioni i tij qeverisës trepartiak dështoi më 6 nëntor, për shkak të mosmarrëveshjeve për mënyrën se si ta ringjallin ekonominë e ngecur të vendit.

Liderët e disa partive të mëdha u pajtuan që zgjedhjet parlamentare të mbahen më 23 shkurt, shtatë muaj më herët se koha e zgjedhjeve të rregullta.

Votëbesimi ishte i nevojshëm sepse Kushtetuta e Gjermanisë nuk e lejon Parlamentin të shpërbehet vetvetiu.

Tani i takon presidentit Frank-Walter Steinmeier të vendosë për shpërbërjen apo jo të Bundestagut dhe për të thirrur zgjedhje të reja.

Ai ka 21 ditë kohë për ta marrë atë vendim, dhe sapo të shpërbëhet Parlamenti, zgjedhjet duhet të mbahen brenda 60 ditëve.

Sondazhet tregojnë se partia e Scholzit është mbrapa partisë kryesore opozitare, blloku i Unionit i Friedrich Merzit. Nënpresidenti Robert Habeck, të Gjelbërit e të cilit ngelin edhe më mbrapa, do të garojë për kancelar gjithashtu.

Partia e ekstremit të djathtë, Alternativa për Gjermaninë, e cila po shënon rritje në sondazhe, e ka nominuar Alice Weidelin për kancelare, por ajo nuk ka gjasa për këtë post sepse partitë e tjera nuk duan të bashkëpunojnë me këtë parti.

Bashkimi Evropian e ka miratuar pakon e 15-të të sanksioneve ndaj Rusisë për pushtimin e Ukrainës, që përfshin masa më të ashpra ndaj entiteteve kineze dhe anijeve nga e ashtuquajtura flotës “hije” të Moskës, tha Komisioni Evropian në një deklaratë të hënën.

Pakoja e re e sanksioneve shton 52 anije nga flota që përpiqet të shmangë kufizimet perëndimore për të transportuar naftë, armë dhe grurë. Kjo e çon numrin total të anijeve të listuara në 79.

BE-ja filloi të shtojë në listë këto anije më herët gjatë këtij viti si përgjigje ndaj një rritjeje të numrit të anijeve që transportojnë ngarkesa të cilat nuk sigurohen nga ofruesit e zakonshëm perëndimorë. Lista përfshinte edhe anijet që dorëzuan municione koreano-veriore në Rusi.

Kufizimet e reja shtojnë 84 individë dhe entitete të reja, përfshirë shtatë persona dhe entitete kineze, si dhe entitete ruse në Serbi.

“Një individ dhe dy entitete që lehtësojnë shmangien e sanksioneve të BE-së, dhe katër entitete që furnizojnë komponentë të ndjeshëm për dronë dhe komponentë mikroelektronikë për ushtrinë ruse”, thuhet në deklaratë, në pjesën ku iu referohet entiteteve kineze.

Kjo do të jetë hera e parë që entitete kineze përballen me sanksione të tilla për ndalimin e udhëtimeve dhe ngrirjen e aseteve.

“Hapi drejt sanksioneve të mirëfillta jep një sinjal të rëndësishëm për kinezët. Ne e marrim këtë shumë seriozisht”, tha një diplomat i BE-së.

Shefi i sanksioneve të BE-së, David O’Sullivan, dhe zyrtarë ukrainas kanë fajësuar Kinën për shitjen e teknologjisë së huaj në Rusi.

Diplomatët thanë se listimet e mëparshme kineze në pakon e sanksioneve ruse përfshinin vetëm kontrollin e eksporteve, në vend të një sanksioni të përgjithshëm.

Lista tani përfshin drejtues të lartë në sektorin energjetik të Rusisë, dy zyrtarë të lartë koreano-veriorë, si dhe 20 kompani dhe entitete ruse në Indi, Iran, Serbi dhe Emiratet e Bashkuara Arabe.

Komisioni po përgatit një pako të 16-të sanksionesh për janar, e cila mund të përfshijë masa më të gjera si ndaj gazit natyror të lëngshëm rus dhe kufizime të eksporteve për filialet e kompanive të BE-së në vendet e treta, thanë burime për Reuters./REL/

Dymbëdhjetë persona kanë vdekur nga helmimi me monoksid karboni në një resort skijimi në Gjeorgji.

“Trupat e 11 të huajve dhe një shtetasi gjeorgjian u gjetën në një zonë mbi një restorant në Gudauri, vendpushimi më i madh dhe më i lartë i skive në ish-shtetin sovjetik”, shkruan BBC.

Sipas raportimeve, testet nuk kanë treguar ndonjë gjurmë dhune në trupa duke lënë të nënkuptohet se ishte një aksident.

Autoritetet gjeorgjiane kanë hapur një hetim për ngjarjen dhe identiteti i viktimave nuk është bërë ende i ditur.

Ndryshe, Gudauri është një destinacion popullor turistik për të apasionuarit pas skijimit, me një sërë aktivitetesh sportive dimërore për vizitorët.

Inteligjenca ukrainase tha se të paktën 30 ushtarë koreano-veriorë që luftonin për Rusinë janë vrarë ose plagosur në rajonin perëndimor rus të Kurskut.

Kjo është hera e parë që Kievi jep një raport kaq të detajuar mbi humbjet e Koresë së Veriut që kur Pheniani nisi të dërgonte trupa për ta ndihmuar Moskën.

Drejtoria Kryesore e Inteligjencës e ushtrisë ukrainase (GUR) tha në një deklaratë më 16 dhjetor se njësitë koreano-veriore kishin pësuar “humbje të konsiderueshme” pranë fshatrave Martinovka, Plehovo dhe Vorozhba.

Më 15 dhjetor, Skemat, njësiti hulumtues i shërbimit ukrainas të Radios Evropa e Lirë, mori foto nga burime ushtarake ukrainase që supozohet se tregonin trupat e ushtarëve të vrarë në Kursk, duke përfshirë trupa që thuhej se ishin të luftëtarëve koreano-veriorë.

REL-i nuk ka arritur ta verifikojë në mënyrë të pavarur këtë pretendim, që Rusia nuk e ka komentuar deri më tani.

Trupat ukrainase filluan një inkursion në rajonin e Kurskut në gusht dhe ende i kontrollojnë disa zona në këtë rajon. Rusia filloi të vendosë mijëra trupa koreano-veriore në Kursk në tetor.

Presidenti ukrainas, Volodymyr Zelensky, tha më 14 dhjetor se Moska kishte filluar të përfshinte më shumë trupa koreano-veriore në një përpjekje për të zmbrapsur forcat ukrainase në Kursk.

Me disa analistë që vlerësojnë se humbjet ruse tejkalojnë shifrën prej 600.000 ushtarëve dhe me presidentin Vladimir Putin që kërkon ta shmangë një mobilizim të dytë masiv politikisht të papëlqyeshëm, raportet sugjerojnë se më shumë se 11.000 ushtarë koreano-veriorë janë vendosur në Rusinë jugperëndimore.

Në një zhvillim tjetër, një burim nga Shërbimi i Sigurisë të Ukrainës (SBU) i tha Shërbimit Ukrainas të REL-it se Kievi përdori dronë javën e kaluar për të shënjestruar dhe shkatërruar një depo municionesh ruse në fshatin Markyne në rajonin e pushtuar nga Rusia, Donjeck, në Ukrainën lindore./REL/