Drama më e re kriminale e Netflixit, “Adolescence”, prin në listën e serialeve më të shikuara gjashtë ditë pasi u lansua (13 mars).

“Adolescence”, seri me katër episode që u prodhua në Britani të Madhe, ka arritur 24.3 milionë shikime në katër ditët e para të lansimit – duke e bërë serinë më të shkuar në Netflix për javën 10-16 mars.

Në serial bëhet fjalë për një 13-vjeçar që ther për vdekjen shoqen e klasës.

Megjithatë, seriali shkon përtej thjesht historisë së vrasjes së një të miture. Ai trajton problemet me të cilat përballen të rinjtë në Britani, veçanërisht si pasojë e ndikimit të internetit, si dhe sfidat e prindërve për të ruajtur një lidhje të shëndetshme me fëmijët e tyre.

Aktorja argjentinase Laura Vignatti ka ndarë historinë e saj tronditëse të dhunës në familje, dy vite pas arratisjes nga ish-partneri abuzues. Në një postim në rrjetet sociale, ajo u bëri thirrje grave të denoncojnë dhunën dhe të gjejnë forcën për të shpëtuar nga “ferri” që përjetojnë.

“Kanë kaluar 2 vjet, 2 muaj dhe 14 ditë që kur u largova nga ai makth. Isha e dhunuar fizikisht, psikologjikisht dhe ekonomikisht. E privuar nga liria, me hundë të thyer, brinjë të çara dhe trup të dobësuar nga humbja e mbi 12 kg. Ndihesha si një zombi…”, rrëfeu ajo.

Me këtë rrëfim të dhimbshëm, Vignatti synon të japë forcë dhe shpresë për gratë që kalojnë situata të ngjashme, duke i inkurajuar të kthejnë horrorin e tyre në një histori mbijetese.

Pas suksesit në edicionin e 2025-ës, Conan O’Brien do të rikthehet për të drejtuar ceremoninë e 98-të të Çmimeve të Akademisë më 15 mars 2026, në Teatrin Dolby, Hollywood.

O’Brien, 61 vjeç, e konfirmoi lajmin me humor, duke thënë: “E vetmja arsye që po rikthehem është për të dëgjuar Adrien Brody të përfundojë fjalimin e tij.” CEO i Akademisë, Bill Kramer, dhe presidentja Janet Yang e quajtën atë “nikoqirin e përsosur”, ndërsa edicioni i këtij viti theu rekorde pesëvjeçare në shikueshmëri me 19.69 milionë ndjekës.

Producentët Raj Kapoor dhe Katy Mullan do të rikthehen për të tretin vit radhazi, ndërsa Jeff Ross dhe Mike Sweeney do të jenë pjesë e ekipit organizues. ‘Oscars’ 2026 pritet të sjellë një tjetër spektakël të mbushur me humorin e veçantë të O’Brien.

Michael Lohan është arrestuar përsëri në Palm Beach, Florida, për shkelje të dënimit me kusht.

Babai i aktores Lindsay Lohan, është arrestuar përsëri në Palm Beach, Florida, për shkelje të dënimit me kusht, vetëm disa javë pasi u lëshua një urdhër arresti për sulm të dyshuar ndaj ish-bashkëshortes së tij, Kate Major.

64-vjeçari u arrestua në Spring, Teksas, pas një incidenti me Major, e cila raportoi në polici se ai e kishte rrëzuar nga karriga disa ditë më parë. Autoritetet thanë se ajo kishte mavijosje në trup dhe ndjente dhimbje pas sulmit.

Lohan u ndalua pa rezistencë dhe u mbajt nën akuzën e dhunës së vazhdueshme në familje, me garanci 30,000 dollarësh (27,500 euro).

Ky nuk është problemi i tij i parë me ligjin. Më 2022, u dënua në Florida për një skemë mashtrimi që përfshinte ndërmjetësimin e pacientëve në qendra rehabilitimi, për të cilën ishte në periudhë prove. Lohan dhe Kate Major, të cilët u martuan në 2014 dhe u ndanë në 2018, kanë dy djem së bashku, ndërsa ai ka edhe katër fëmijë nga martesa e tij e parë me Dina Lohan, përfshirë Lindsay.