Lajmet

Seanca të jashtëzakonshme për përfitime politike

Haxhiu: Debatet po ndodhin, mirëpo nuk po shohim një rezultat konkret.

Published

3 years ago

January 25, 2022

Betim Gashi

Dy seanca të jashtëzakonshme ka mbajtur Kuvendi i Kosovës deri më tash në janar – njërën të thirrur nga Qeveria, tjetrën nga opozita – ndërsa të tretën e ka paralajmëruar për datën 27 të këtij muaji.

Me rregulloren e Kuvendit, seanca e jashtëzakonshme mund të thirret nga Kryesia e Kuvendit për të shqyrtuar një çështje të ngutshme.

Sipas organizatave që monitorojnë punën e Kuvendit, seancat e tilla janë kryesisht joefikase dhe, në shumicën e rasteve, përfundojnë me miratimin e ndonjë rezolute.

Rezolutat përkufizohen si shprehje e vullnetit politik të Kuvendit për çështje të caktuara, por nuk kanë karakter obligues.

Të hënën, Kuvendi i Kosovës ka mbajtur seancë të jashtëzakonshme për shtrenjtimin e pritshëm të energjisë elektrike, me kërkesë të opozitës.

Më 15 janar, me kërkesë të Qeverisë, është mbajtur seancë e jashtëzakonshme për planet e atëhershme të Serbisë, për të mbajtur një referendum në territorin e Republikës së Kosovës.

Seanca e së hënës ka përfunduar pa kuorumin e nevojshëm për të votuar draft-rezolutën e propozuar nga partitë opozitare kundër rritjes së çmimeve të faturave të rrymës, ndërsa debati i 15 janarit ka përfunduar me miratimin e një rezolute jodetyruese, që kundërshtonte referendumin e Serbisë në Kosovë.

Të enjten, në seancë të jashtëzakonshme pritet të diskutohet për luftën kundër pandemisë së koronavirusit.

Arton Demhasaj, nga Organizata për Demokraci, Anti-korrupsion dhe Dinjitet ”Çohu”, thotë se temat e diskutimit në seanca të jashtëzakonshme janë të rëndësishme, por, siç shton ai, tendencat që seancat e tilla të përfundojnë me rezolutë, janë të kota, pasi rezolutat janë joobliguese.

“Këto seanca mendoj se deputetët i mbajnë më shumë për përfitime politike në publik, sesa për qëllime financiare apo diçka të tillë”, thotë Demhasaj për Radion Evropa e Lirë.

Agnesa Haxhiu, hulumtuese në Institutin Demokratik të Kosovës (KDI), thotë se thirrja e seancave të jashtëzakonshme nuk është problematike në vetvete, por problemi, sipas saj, qëndron në atë se çka prodhojnë këto seanca.

“Debatet po ndodhin, mirëpo nuk po shohim një rezultat konkret. Të gjitha mocionet përmbajtjesore, që zakonisht propozohen në këto raste, nuk marrin mbështetje të plotë nga grupet parlamentare. Nëse propozohen nga shumica parlamentare, [ato] nuk i mbështet opozita, dhe anasjelltas”, thotë Haxhiu për Radion Evropa e Lirë.

Sipas Albert Krasniqit, nga Organizata Demokraci Plus (D+), praktika e thirrjes së seancave të jashtëzakonshme duhet të ndryshojë.

“Të mos keqpërdoren si instrument vetëm sa për të konsumuar debatin publik, por vërtet të kenë një qëllim të qartë dhe t’i parashohin masat që deputetët mendojnë se janë të duhura që të ndërmerren prej organeve të tjera”, thotë Krasniqi.

“Ka pasur raste kur janë keqpërdorur seancat e jashtëzakonshme prej partive të ndryshme, qoftë në pushtet apo opozitë, dhe janë mbajtur vetëm për hir të debatit dhe jo me një qëllim të qartë për ta zgjidhur atë problem për të cilin është thirrur seanca”, thotë Krasniqi, duke mos specifikuar më shumë.

Gjatë legjislaturës aktuale, e cila është konstituuar më 22 mars të vitit 2021 dhe udhëhiqet nga Lëvizja Vetëvendosje, janë mbajtur gjithsej 36 seanca, prej të cilave: 27 plenare, nëntë të jashtëzakonshme dhe dy solemne.

Që nga konstituimi e deri në fund të dhjetorit, 2021, Kuvendi ka miratuar 23 ligje, ndërsa 86 i kanë mbetur në procedurë. Mungesa e kuorimit është përmendur shpesh si pengesë për moskalimin e ligjeve.

Kërkesën për seancë të jashtëzakonshme në Kuvendin e Kosovës mund ta bëjë presidentja e Republikës, kryeministri, një ose më shumë grupe parlamentare që përfaqësojnë jo më pak se një të tretën e deputetëve, dhe pastaj e thërret Kryesia e Kuvendit.

Kërkesa për mbledhje të jashtëzakonshme duhet të përmbajë çështjen që do të shqyrtohet dhe arsyetimin së përse është e ngutshme dhe e rëndësishme.

Deputetët e Kuvendit të Kosovës, përveç pagës bazë, paguhen edhe për pjesëmarrje në seanca dhe komisione parlamentare.

Paga bazë e një deputeti në Kosovë është 1,547 euro në muaj ose 18,564 euro në vit.RFE

Bota

Trump kërcënon me tarifa shtesë për vendet që mbështesin BRICS-in

Published

17 minutes ago

July 7, 2025

UBTNews

Presidenti i SHBA-së, Donald Trump, ka paralajmëruar se vendet që mbështesin politikat e aleancës BRICS që shkojnë kundër interesave të SHBA-së do të goditen me një tarifë shtesë prej 10%.

Trump e ka kritikuar prej kohësh BRICS-in, një organizatë anëtarët e së cilës përfshijnë Kinën, Rusinë dhe Indinë, e cila është krijuar për të rritur pozicionin ndërkombëtar të vendeve dhe për të sfiduar SHBA-në dhe Evropën Perëndimore, shkruan BBC.

“Çdo vend që përputhet me politikat anti-amerikane të BRICS-it, do t’i ngarkohet një tarifë SHTESË prej 10%. Nuk do të ketë përjashtime nga kjo politikë”, shkroi Trump në mediat sociale.

Një afat për vendet që të bien dakord për një marrëveshje tarifore me SHBA-në ishte caktuar për 9 korrik, por zyrtarët amerikanë tani thonë se ato do të fillojnë më 1 gusht.

Deri më tani, SHBA-të kanë arritur marrëveshje tregtare vetëm me Mbretërinë e Bashkuar dhe Vietnamin. Megjithatë, Britania dhe Amerika ende nuk kanë arritur një marrëveshje mbi taksat për çelikun britanik të importuar nga SHBA-të.

Që nga marrja e detyrës në janar, Trump ka njoftuar një sërë taksash importi për mallrat nga vendet e tjera – duke argumentuar se ato do të nxisin prodhimin amerikan dhe do të mbrojnë vendet e punës.

Në prill, në atë që ai e quajti “Dita e Çlirimit”, ai njoftoi një valë taksash të reja për mallrat nga vendet e botës, megjithëse shpejt pezulloi planet e tij më agresive për të lejuar tre muaj bisedime deri më 9 korrik.

I pyetur nëse taksat do të ndryshonin më 9 korrik apo 1 gusht, Trump tha të dielën: “Do të jenë tarifa, tarifat do të jenë tarifa.”

Ai shtoi se midis 10 dhe 15 letra do t’u dërgoheshin vendeve të hënën duke i këshilluar ato se cila do të jetë norma e re e tarifave nëse nuk do të ishte arritur një marrëveshje.

Sekretari i Tregtisë i SHBA-së, Howard Lutnick, sqaroi se taksat do të hyjnë në fuqi më 1 gusht.

Të dielën, Sekretari i Thesarit Scott Bessent i tha CNN: “Presidenti Trump do t’u dërgojë letra disa prej partnerëve tanë tregtarë duke u thënë se nëse nuk i lëvizni gjërat përpara, atëherë më 1 gusht do të ktheheni në nivelin tuaj tarifor të 2 prillit”.

Kërcënimi i Trump ndaj vendeve që punojnë me vendet e BRICS u shfaq pasi anëtarët kritikuan politikat tarifore të SHBA-së, si dhe propozuan reforma për Fondin Monetar Ndërkombëtar (FMN) dhe mënyrën se si vlerësohen valutat kryesore.

Vitin e kaluar, lista e anëtarëve të BRICS u zgjerua përtej Brazilit, Rusisë, Indisë, Kinës dhe Afrikës së Jugut për të përfshirë Egjiptin, Etiopinë, Indonezinë, Iranin, Arabinë Saudite dhe Emiratet e Bashkuara Arabe.

Vendet në bllok përbëjnë më shumë se gjysmën e popullsisë së botës./kosovapress/

Lajmet

Sulmoi tre persona, arrestohet i dyshuari në kryeqytet

Published

32 minutes ago

July 7, 2025

UBTNews

Një person është arrestuar dje në Prishtinë nën dyshimin se pas një mosmarrëveshje ka sulmuar tre qytetarë.

Sipas policisë së Kosovës, për këtë rast me vendim të prokurorit, i dyshuari është dërguar në mbajtje.

“Prishtinë / 06.07.2025 – 00:50. Është arrestuar i dyshuari mashkull kosovar pasi që i njëjti pas një mosmarrëveshje dyshohet se ka sulmuar tre viktimat meshkuj kosovarë. Nuk raportohet për të lënduar, ndërsa me vendim të prokurorit i dyshuari është dërguar në mbajtje”, thuhet në raportin 24 orësh të policisë.

Një rast tjetër sipas raportit të fundit të policisë, në Podujevë është arrestuar një i dyshuari për shkak se tek i njëjti gjatë kontrollit është gjetur dhe sekuestruar një sasi prej 2.5 gramë substancë e dyshuar narkotike marihuanë dhe një cigare e mbushur me narkotik të gatshme për shitje.

Ndërsa, me vendim të prokurorit i dyshuari është dërguar në mbajtje.

Lajmet

Qarkullim i lehtë në kufi – pa pritje të gjata

Published

36 minutes ago

July 7, 2025

UBTNews

Me fillimin e pushimeve verore, bashkatdhetarët kanë nisur të kthehen në Kosovë, duke shkaktuar një rritje të lehtë të qarkullimit në pikat kufitare.

Sipas të dhënave nga Qendra për Menaxhim Kufitar, deri mëngjesin e së dielës nuk është shënuar ndonjë fluks i madh të automjeteve në hyrje apo dalje të vendit. Në orën 06:55, pritjet në të gjitha pikat kufitare ishin të vogla – nga 3 deri në 5 minuta.

Autoritetet nuk raportojnë për kolona të gjata, por presin që fluksi të rritet në ditët në vazhdim me intensifikimin e ardhjeve nga diaspora. Qytetarët këshillohen të ndjekin informatat zyrtare për të udhëtuar më lirshëm dhe pa vonesa.