Sot është Dita Ndërkombëtare e Kërcimit. Kjo datë u vendos që në vitin 1982 nga Komiteti i Vallëzimit i ITI (International Theatre Institute), në ditëlindjen e Jean-Georges Noverre, krijuesi i baletit modern.

Synimi i kësaj feste është të kremtojë kërcimin, të kënaqet me universalitetin e kësaj forme arti, të kalojë të gjitha barrierat politike, kulturore dhe etnike dhe t’i bashkojë njerëzit me një gjuhë të përbashkët – kërcimin.

Çdo vit një mesazh nga një koreograf apo balerin i shquar qarkullon në të gjithë botën. Për 2025-ën, mesazhin e dha balerini dhe koreografi Mikhail Baryshnikov, nga më të vlerësuarit botërisht, i konsideruar si një nga kërcimtarët më të mëdhenj të kohës sonë.

“Vallëzimi mund të zgjojë ndjeshmëri, të frymëzojë mirësi dhe të ndezë një dëshirë për të shëruar dhe jo për të dëmtuar. Sidomos tani, ndërsa qindra-mijëra durojnë luftën, drejtojnë trazirat politike dhe ngrihen në protestë kundër padrejtësisë, reflektimi i ndershëm është jetësor. Megjithatë, arti është ende mënyra më e mirë për t’i dhënë formë të pathënës, dhe ne mund të fillojmë duke pyetur veten: Ku është e vërteta ime? Si e nderoj veten dhe komunitetin tim? Kujt t’i përgjigjem?”, shkruan Baryshnikov në mesazhin drejtuar artdashësve.

Në një karrierë që përfshin më shumë se 50 vjet në kërcim, teatër, televizion dhe film, Baryshnikov ka punuar me koreografë dhe regjisorë të shquar. Pas një fillimi spektakolar me Baletin “Kirov” në Leningrad, ai erdhi në Perëndim në 1974 dhe ishte balerin kryesor me Teatrin e Baletit Amerikan (ABT). Në vitin 1980 ai ishte drejtor artistik i ABT ku, për dekadën e ardhshme, ai prezantoi një brez të ri kërcimtarësh dhe koreografësh. Në vitin 2005, ai lançoi Baryshnikov Arts në qytetin e Nju-Jorkut, një hapësirë ​​krijuese që mbështet artistë multidisiplinarë nga e gjithë bota./ATSH/

Sezoni i pestë i serialit të njohur të Netflix-it, “You”, me protagonist Penn Badgley, filloi transmetimin më 24 prill.

Ashtu si çdo sezon i mëparshëm, ky u bë shpejt më i shikuari në shumë vende. Reagimet e para nga kritikët janë pozitive e fundi i serialit ka ngjallur kuriozitet të madh tek publiku dhe ka ndarë opinionet. Sezoni i fundit i serialit zhvillohet afërsisht tre vjet pas ngjarjeve në fund të sezonit të katërt.

Joe Goldberg jeton një jetë të qëndrueshme në martesë me Kate Lockwood, me të cilën po rrit djalin e tij Henry, të cilin e kishte me ish-partneren e tij Love.

Në sezonin e pestë, zbulohet se Joe nuk ka vrarë askënd që nga hera e fundit që shikuesit e panë atë. Joe gëzon një reputacion të patëmetë dhe ka një shumë të konsiderueshme parash. Errësira e brendshme, e kombinuar me histori dhune në të kaluarën, kërcënon të shkatërrojë gjithçka që ka arritur ndërsa seriali i afrohet finales së tij spektakolare dhe të tensionuar.

Në sezonin e fundit, Penn Badgley i bashkohet Charlotte Ritchie, Anna Camp, Griffin Matthews, Pete Ploszek dhe Madeline Brewer.

Edhe pse sezoni i pestë i serialit u publikua së fundmi, ai ka marrë një numër të madh komentesh dhe vlerësimesh.

Sipas rishikimeve të para të kritikëve në Rotten Tomatoes, sezoni k vlerësim prej 81 për qind. Audienca i jep vlerësim më të ulët prej 56 për qind.

Jo të gjithë ishin të kënaqur me sezonin e fundit. Disa mendojnë se personazhi i Joe është bërë i mërzitshëm, të tjerë pretendojnë se prisnin një fund më të mirë. Megjithatë, ka edhe nga ata që besojnë se sezoni i pestë është më i mirë se ai i mëparshmi.

Edhe pse sot është një nga yjet më të mëdha të muzikës botërore, Beyoncé ka qenë natyrë e qetë dhe e rezervuar, ka thënë nëna e saj, Tina Knowles, sipas të cilës ajo nuk ka ndryshuar as me kalimin e viteve.

Në një intervistë për The Guardian, Knowles ka treguar se Beyoncé ishte një fëmijë i turpshëm që u transformua falë kërcimit.

“Performanca i ndryshoi jetën. Edhe kur ishte e turpshme, kur kërcente dhe bënte shfaqje, ajo ndriçonte. Prandaj e regjistruam në kurse kërcimi. Kur kërcente, nuk kishte më turp”, ka thënë Knowles.

Megjithatë, pavarësisht suksesit të jashtëzakonshëm, Beyoncé, sot 43 vjeçe, mbetet një person i mbyllur.

“Ajo ka qenë dhe gjithmonë do të mbetet e rezervuar. Nuk është ai lloj personi që hyn në dhomë e thotë ‘Ja ku jam!’. Kjo nuk ka ndryshuar. Thjesht, në skenë ajo aktivizon një tjetër personalitet”, ka shtuar ajo.

Knowles ka ndarë disa kujtime për marrëdhënien mes Beyoncés dhe motrës së saj më të vogël, Solange, sot 38 vjeçe. Ajo ka kujtuar periudhën kur Beyoncé ishte rreth 10-11 vjeç dhe nisi të dallonte një distancë midis vajzave.

Beyonce dhe Solange si fëmijë

“U tremba kur Beyoncé mbushi rreth 10 vjeç. Ishte pjesë e një grupi muzikor dhe fëmijët i thoshin Solanges çdo ditë ‘Hesht, Solange’, sepse ajo përpiqej të bënte koreografi apo të merrte pjesë. Ajo kishte dëshirë të ishte pjesë e gjithçkaje, por nuk e pranonin”, ka thënë Knowles në një intervistë për CNN.

Beyoncé madje filloi të kërkonte që Solange të largohej gjatë provave, gjë që e shqetësoi nënën e tyre.

“Më duhej t’i kujtoja Beyoncés se kjo ishte shtëpia e Solanges dhe ajo duhej trajtuar me dashuri. Por ndjeva se nuk po më dëgjonin më, dhe pashë një mur duke u ndërtuar mes tyre, prandaj vendosa t’i çoj në terapi”, ka treguar tutje Knowles.

Edhe pse terapia për fëmijët ishte tabu e bashkëshorti i atëhershëm, Matthew Knowles, mendonte se vajzat ishin të vogla për atë gjë, Knowles këmbënguli.

“S’po kërkoja leje. E dija që duhej bërë diçka e gjetëm një terapist të mrekullueshëm”, tha ajo. Solange e adhuronte terapinë, Beyoncé nuk ishte entuziaste.

“Është interesante, sepse terapisti i tha Beyoncés të njëjtat gjëra që i kisha thënë unë, por nga ai ajo i pranoi, edhe pse e urrente terapinë. Solange, përkundrazi, e donte, e adhuronte të shprehej dhe të fliste”, ka treguar nëna e yjeve.

Sot, ajo ka thënë se falë asaj ndërhyrjeje në kohë, Beyoncé dhe Solange kanë një marrëdhënie shumë të afërt.

“Rezultati ishte i mrekullueshëm. Ato janë shumë të lidhura që atëherë”, ka thënë ndër të tjera Knowles.

Beteja e gjatë e Brad Pitt për kujdestarinë me Angelina Jolie ka marrë tjetër kthesë shqetësuese. Ylli i Hollivudit thuhet se po bëhet gjithnjë e më i shqetësuar se Jolie po ndikon tek fëmijët e tyre kundër tij, duke krijuar atë që e sheh si mur emocional mes tij dhe familjes.

Burime pranë Pitt-it pohojnë se aktori ndihet “zemërthyer” dhe “i pafuqishëm” teksa shikon se marrëdhëniet me fëmijët dobësohen.

Kanë kaluar vite që nga divorci i rrëmujshëm i vitit 2016, por beteja për fëmijët, Maddox, Pax, Zahara, Shiloh, Knox dhe Vivienne – mbetet e pazgjidhur.

Pitt dyshohet se beson se ndikimi i Jolie po i shtyn fëmijët më larg, deri në pikën ku pajtimi duket pothuajse i pamundur. Edhe pse Pitt është përpjekur të ruajë lidhjet me fëmijët përmes takimeve e këshillimeve private, të brendshëm thonë se ai ndihet i mbingarkuar.

Çdo hap i vogël drejt rindërtimit të besimit duket se minohet, duke e lënë atë gjithnjë e më të izoluar. Miqtë e aktorit e përshkruajnë si të shkatërruar nga distanca e dukshme emocionale që zhvillohet mes tij dhe fëmijëve të vegjël.

Disa raporte madje sugjerojnë se Pitt ka frikë se disa nga fëmijët janë inkurajuar ta shohin atë në një këndvështrim negativ, duke dëmtuar lidhjen në mënyra që mund të duhen vite për t’u riparuar, nëse ndonjëherë. Angelina Jolie ka mbajtur një profil relativisht të ulët publik në lidhje me specifikat e betejës për kujdestari, por shumë besojnë se veprimet e saj flasin më shumë se fjalët.