Policia e Kosovës ka njoftuar se dje në fshatin Bubë në Zubin Potok, në një veturë të braktisur kishte mall që dyshohet se ishte i kontrabanduar.

Sipas policisë njësiti i KFOR-it kishte has në veturën e cila më pas së bashku me mallin është dërguar në terminalin doganor.

“Njësiti i KFOR-it ka hasur në një veturë të cilën e kishte braktisur një i dyshuar i cili kishte ikur nga vendi i ngjarjes. Vetura kishte të ngarkuar mall (birra) që dyshohet se janë të kontrabanduara. Vetura e dyshuar së bashku me mallin është dërguar në terminalin doganor”, thuhet në njoftimin e policisë.

Presidentja e Parlamentit Evropian, Roberta Metsola, ka njoftuar për takimin që ka zhvilluar një ditë më parë me Presidenten e Kosovës, Vjosa Osmani, në kuadër të Samitit të Komunitetit Politik Evropian që po mbahet në Budapest.

Metsola tha se me Osmanin kanë diskutuar për përpjekjet e Kosovës për një të ardhme evropiane, duke theksuar se angazhimi në në dialog duhet të çojë në përparim.

Ajo ka theksuar edhe angazhimin e Kosovës ndaj Planit të Rritjes dhe për tregun e përbashkët të Bashkimit Evropian.

“Me Presidenten Vjosa Osmani, diskutova për përpjekjet e Kosovës për një të ardhme evropiane. Përshëndeta angazhimin e vendit ndaj Planit të Rritjes së Ballkanit Perëndimor dhe integrimit gradual në tregun e përbashkët të BE-së. Angazhimi në dialogun Prishtinë-Beograd duhet të çojë në përparim ”, ka shkruar Metsola në llogarinë e saj në platformën “X”.

Kryeministri i Shqipërisë, Edi Rama mori pjesë një ditë më parë në Budapest, Hungari, në takimin e pestë të Komunitetit politik Europian, së bashku me 47 kryetarë shtetesh e qeverish nga e gjithë Evropa.

Liderët pjesëmarrës diskutuan mbi sfidat e sigurisë me të cilat përballet Evropa, në seancën plenare, e cila u pasua nga katër sesione kryesore mbi temat e migracionit dhe sigurisë ekonomike.

Kryeministri Rama ndau foto nga takimet e mbajtura, teksa Shqipëria sipas Ramës mori stafetën e mikpritësit të Komunitetit Politik Evropian në gjysmën e parë të 2025.

“Fotoalbumi i një tjetër dite domethënëse të Shqipërisë në arenën ndërkombëtare, ku vendi ynë mori stafetën e mikpritësit të Komunitetit Politik Europian në gjysmën e parë të 2025”, u shpreh Rama.

Presidentja e Kosovës, Vjosa Osmani është takuar me kryeministrin e ri të Estonisë, Kristen Michal.

Osmani tha se në Kuadër të Samitit të Komunitetit Politik Evropian, kanë diskutuar për anëtarësimin e Kosovës në Këshillin e Evropës e poashtu edhe për heqjen e masave të BE-së ndaj Kosovës.

“Ishte kënaqësi të takoj Kryeministrin e ri të Estonisë, z.Kristen Michal. Në kuadër të samitit të Komunitetit Politik Evropian, diskutuam për anëtarësimin e Kosovës në Këshillin e Evropës, heqjen e masave të BE-së ndaj Kosovës, si dhe për shtyrjen përpara të aplikacionit të Kosovës për anëtarësim në BE. Falënderuese për mbështetjen e fuqishme të Estonisë!”, ka shkruar Osmani.