Shtetet e Bashkuara të Amerikës kanë ritheksuar thirrjen ndaj udhëheqësve politikë të Kosovës që të bashkëpunojnë për formimin e institucioneve, në përputhje me Kushtetutën dhe vendimet e Gjykatës Kushtetuese.

Në një përgjigje për Radion Evropa e Lirë, një zëdhënës i Departamentit amerikan të Shtetit ka thënë se udhëheqësit politikë duhet të punojnë së bashku për tejkalimin e ngërçit institucional.

“Ky ngërç i vazhdueshëm politik po rezulton në mundësi të humbura për Kosovën. Është koha që udhëheqësit t’i japin përparësi progresit dhe stabilitetit, në të mirë të të gjithë qytetarëve”, tha zëdhënësi.

Kjo është thirrja e dytë e ngjashme e bërë nga pala amerikane brenda pak kohësh, pasi kërkesë të ngjashme për bashkëpunim kishte shprehur edhe Ambasada e Shteteve të Bashkuara në Prishtinë më 12 gusht.

Thirrja e re amerikane vjen në kohën kur Kuvendi i Kosovës ende nuk është konstituuar pas zgjedhjeve të 7 qershorit.

Seanca konstituive e legjislaturës së re nisi më 6 gusht. Deputetët bënë betimin, por procesi nuk kaloi në fazën e zgjedhjes së kryetarit të Kuvendit.

Albin Kurti, në cilësinë e kreut të Lëvizjes Vetëvendosje, kërkoi kohë shtesë për konsultime me partitë, duke thënë se ende nuk kishte marrëveshje për formimin e institucioneve. Seanca u ndërpre dhe u caktua të vazhdonte më 8 gusht.

Vala e sulmeve masive ruse me raketa gjatë natës së të enjtes ka lënë të paktën tetë të vdekur dhe 33 të plagosur në Kiev dhe në rajonin përreth. Sipas Shërbimit Shtetëror të Emergjencave të Ukrainës (DSNS), goditjet kanë dëmtuar pallate banimi, magazina, një spital pediatrik dhe një shkollë. Ekipet e shpëtimit po punojnë me urgjencë për të nxjerrë njerëzit e bllokuar nën rrënoja, nga ku deri tani janë shpëtuar dy të mbijetuar.

Ndërkohë, alarmi ajror është zgjeruar edhe te fqinjët e Ukrainës. Ministria e Mbrojtjes e Rumanisë njoftoi se në orët e para të së enjtes “një dron hyri në hapësirën ajrore kombëtare rumune, afërsisht 13 kilometra në lindje të qytetit Galați”. Droni është rrëzuar në “një zonë të pabanuar”, duke shkaktuar një zjarr të vogël që u shua menjëherë. Ministria shtoi se “nuk u raportuan viktima apo dëme materiale”. Paralelisht, ushtria polake aktivizoi “operacione mbrojtëse ajrore” për të siguruar kufirin e saj me Ukrainën.

Në kryeqytetin ukrainas, banorët u strehuan nën tokë gjatë rënies së sirenave. Kryetari i bashkisë së Kievit, Vitaly Klitschko, bëri me dije se sulmet dëmtuan një spital pediatrik, thyen dritare, dogjën automjete pranë tij dhe dëmtuan një institucion arsimor, përveç goditjes së një qendre industriale në distriktin Solomyanskyi. Po ashtu, një sulm në distriktin Brovary i mori jetën një burri dhe plagosi një tjetër, siç njoftoi guvernatori rajonal Tymur Tkachenko. /BBC/

Pavarësisht se presidenti Donald Trump dërgoi mijëra trupa të Gardës Kombëtare në Uashington për të luftuar krimin, një hulumtim i agjencisë së lajmeve Reuters zbuloi se ushtarët pothuajse nuk përfshihen fare në zbatimin e ligjit.

Që nga gushti i kaluar, rreth 4,500 ushtarët e dislokuar janë përmendur në vetëm 1.3% të rasteve penale në kryeqytet, ku në shumicën e herëve ata figurojnë si viktima të krimit dhe jo si persona që kryejnë arrestime. Netët e fundit, ushtarakët janë parë duke patrulluar kryesisht në zona turistike dhe lagje të pasura, ndërsa nuk kanë ndërhyrë as në incidente të dhunshme fizike që kanë ndodhur pranë tyre.

Prania e ushtarëve në kryeqytet i kushton buxhetit rreth 1.65 milionë dollarë në ditë — më shumë se i gjithë buxheti i policisë së qytetit — ndërsa administrata planifikon ta vazhdojë këtë mision deri në vitin 2029 me një kosto totale prej 1.4 miliardë dollarësh. /Reuters/

Ish-ministri i Mbrojtjes i Ukrainës, Mykhailo Fedorov, ka bërë thirrje për mbajtjen e zgjedhjeve në kohë lufe, në atë që shumë e shohin si sfidën më të madhe ndaj presidencës së Volodymyr Zelensky-t që nga shpërthimi i luftës me Rusinë në shkurt 2022.

“Demokracia nuk mund të mbahet peng nga Rusia,” tha Fedorov, 35 vjeç, në një video të postuar në YouTube të martën, duke shtuar se Ukraina po lufton “pikerisht sepse dëshirojmë të mbetemi një shtet i lirë evropian”.

Që nga pushtimi i plotë i Rusisë në vitin 2022, Ukraina ka qenë nën ligjin ushtarak, gjë që do të thotë se zgjedhjet janë pezulluar.

Fedorov, i cili nuk e përmendi Zelensky-n me emër në video, u shkarkua papritur nga detyra e tij si ministër i Mbrojtjes në fund të korrikut, vetëm gjashtë muaj pas emërimit të tij.

Zelensky ende nuk i është përgjigjur videos së Fedorov-it, reagimi i të cilit nxiti protesta në të gjithë vendin.

Gjatë mandatit të tij si ministër i Mbrojtjes, Fedorov u vlerësua për gjallërimin e ministrisë, udhëheqjen e një fushate kundër korrupsionit dhe përdorimin e të dhënave për të analizuar dhe përpjekur për të përmirësuar performancën në linjën e frontit.

Shkarkimi i tij pranohet gjerësisht se ka pasur lidhje me tensionet mes tij dhe komandantit të përgjithshëm të ushtrisë, Oleksandr Syrskyi. Syrskyi po ashtu u zëvendësua disa javë më vonë, pasi javë të tëra protestash ushtruan presion mbi presidentin ukrainas.

Fedorov nuk dha asnjë tregues për planin e tij politik në videon e YouTube, por në vend të kësaj u përqendrua në nevojën për një “mekanizëm ligjor, të sigurt dhe real që do t’i lejojë Ukrainës të rikthejë një proces të plotë demokratik madje edhe mes një lufe të zgjatur”. /BBC/