Botë

Rusia liron një të burgosur amerikan, një hap drejt fundit të luftës në Ukrainë

Published

on

Marc Fogel, një mësues amerikan i konsideruar nga Uashingtoni si i ndaluar pa të drejtë nga Moska, është liruar, veprim të cilin Shtëpia e Bardhë e cilësoi si përpjekje diplomatike që mund të çojë përpara bisedimet për t’i dhënë fund luftës në Ukrainë.

Zhvillimi vjen ndërsa Presidenti Trump po kërkon të hedhë bazat për negociata paqeje mes Moskës dhe Kievit për t’i dhënë fund luftës në Ukrainë.

“Presidenti Trump, Steve Witkoff dhe këshilltarët e presidentit negociuan një shkëmbim që shërben si një shfaqje e mirëbesimit nga ana e rusëve dhe një shenjë se po lëvizim në drejtimin e duhur për t’i dhënë fund luftës brutale dhe të tmerrshme në Ukrainë”, tha këshilltari për Sigurisë Kombëtare i Shtëpisë së Bardhë, Mike Waltz.

I dërguari special i Presidentit Donald Trump, Steve Witkoff u largua nga Rusia me amerikanin Marc Fogel, mësues historie nga Pensilvania. Ai pritet t’i bashkohet familjes së tij mbrëmjen e së hënës. I arrestuar në gushtin e vitit 2021, zoti Fogel po vuante një dënim me 14 vjet burg.

Familja dhe mbështetësit e tij thanë se zoti Fogel kishte me vete marijuana mjekësore kur u arrestua. Në dhjetor, administrata e Presidentit Joe Biden deklaroi se ai ishte arrestuar pa të drejtë.

Michael Waltz, këshilltari i Presidentit Trump për sigurinë kombëtare, tha se Shtetet e Bashkuara dhe Rusia “negociuan një shkëmbim” për të siguruar lirimin e zotit Fogel. Ai nuk ka se çfarë shkëmbimi kishte ofruar pala amerikane. Në të kaluarën, negociatat kanë përfshirë lirimin reciprok të rusëve nga Shtetet e Bashkuara dhe vendet aleate.

Presidenti republikan, Donald Trump, ka premtuar gjetjen e një rruge për t’i dhënë fund konfliktit. Zoti Trump gjithashtu ka folur për marrëdhënie të mira me Presidentin Putin, i cili dha urdhër për pushtimin e Ukrainës në vitin 2022.

Muajin e kaluar, Presidenti Trump tha se administrata e tij po zhvillonte biseda serioze me Rusinë lidhur me luftën. Të afërmit e zotit Fogel thanë se ishin “tejet mirënjohës dhe të lehtësuar” që ai po kthehej në shtëpi.

“Kjo ka qenë periudha më e errët dhe më e dhimbshme e jetës sonë. Por sot ky kapitull përfundon. Për herë të parë në vite, familja jonë mund të shikojë me shpresë drejt së ardhmes”, tha familja e tij. Moska nuk komentoi në lidhje me lirimin e zotit Fogel.

Shtetet e Bashkuara dhe vende të tjera kryen një shkëmbim të madh të burgosurish në muajin gusht. Në këtë shkëmbim, mes të tjerësh, u liruan gazetari amerikan Evan Gershkovich dhe biznesmeni Paul Whelan.

Sidoqoftë, marrëveshja la shumë amerikanë të tjerë të burgosur në Rusi, përfshirë zotin Fogel. Mes tyre edhe amerikano-rusja Ksenia Khavana e cila u dënua me 12 vjet burg dy javë pas shkëmbimit. Ajo u akuzua për tradhti pas një donacioni prej 52 dollarësh për një shoqatë bamirësie që ndihmon Ukrainën. Shtëpia e Bardhë nën Presidentin Biden e quajti dënimin “asgjë më pak se mizori hakmarrëse”.

Tetorin e kaluar, Rusia dënoi amerikanin Robert Gilman me më shumë se 7 vjet burg, për gjoja dhunë ndaj policisë ruse, ndërsa amerikani Stephen Hubbard u dënua me burg në një gjyq me dyer të mbyllura për gjoja se kishte luftuar si mercenar në Ukrainë.

Ndërsa lufta në Ukrainë po i afrohet fundit të vitit të tretë, nuk ka të dhëna mbi planin e Presidentit Trump për t’i dhënë fund konfliktit. Ai ka thënë se Moska dhe Kievi duhet të bëjnë lëshime ndërsa ka lënë të kuptohet se Ukraina do të duhet të pranojë humbjen e të paktën një pjese të territorit.

Lirimi i zotit Fogel dhe njoftimi i Presidentit Trump se do të dërgojë Sekretarin e Thesarit Scott Bessent në Kiev për bisedime me udhëheqësit ukrainas mund të jetë një sinjal se planet mund të kenë filluar të marrin formë.

Zëvendëspresidenti JD Vance, Sekretari i Shtetit Marco Rubio dhe i dërguari special i Presidentit Trump për Rusinë dhe Ukrainën, Gjenerali në pension Keith Kellogg, do të udhëtojnë në fund të kësaj jave për të marrë pjesë në Konferencën e Sigurisë në Mynih, ku situata në Ukrainë do të jetë një nga temat kryesore të diskutimeve.

Zoti Kellogg i tha agjencisë së lajmeve Associated Press të hënën se pala amerikane do të bisedonte me zyrtarët evropianë lidhur me synimet e Presidentit Donald Trump dhe do të vlerësonin interesat e tyre.

“Ne do të shpalosim pritshmëritë tona për aleatët. Dhe kur të kthehemi do t’i paraqesim presidentit alternativat, kështu që ai e di më mirë se si do të veprojë kur të përfshihet drejtpërdrejt në procesin e paqes”, tha zoti Kellogg.

Live

Inteligjenca amerikane zbulon plane të Iranit për sulme ndaj zyrtarëve të administratës Trump në Washington

Published

on

By

Informacionet e reja të inteligjencës amerikane tregojnë se Irani po harton plane për të shënjestruar zyrtarë të lartë të administratës së presidentit Donald Trump, përmes shpërthimit të një të ashtuquajture “bombe të pistë” ose një arme kimike në Washington DC, kanë bërë të ditur për CNN shtatë zyrtarë amerikanë.

Burime në dijeni të këtyre të dhënave i kanë përshkruar planet iraniane, të paktën në këtë fazë, si përpjekje për të krijuar alternativa veprimi dhe jo si shenjë se një sulm është i pashmangshëm. Megjithatë, dy prej burimeve theksuan se planet e zbuluara janë mjaft konkrete dhe përfshijnë lokacione e objektiva të caktuara, duke nxitur një sërë përgatitjesh emergjente dhe takimesh parandaluese nga autoritetet amerikane gjatë javës së kaluar.

Zëdhënësja e Shtëpisë së Bardhë, Lauren Bis, deklaroi se SHBA-ja po monitoron çdo rrezik të mundshëm, duke shtuar se aktualisht “nuk ka kërcënime të besueshme ndaj territorit amerikan”. Nga ana tjetër, zyrtarët amerikanë e shohin këtë planifikim aktiv të Teheranit brenda territorit të SHBA-së si një shenjë alarmante të gatishmërisë së Iranit për të përshkallëzuar situatën, nën presionin e sulmeve të vazhdueshme ushtarake amerikane dhe bllokadës ekonomike ndëshkuese.

Ndonëse nuk ka prova se Teherani ka vendosur t’i vërë në zbatim këto plane — dhe sipas njërit prej burimeve mbetet ende e paqartë nëse Irani ka personelin e nevojshëm në terren për t’i realizuar — kërcënimet kanë sjellë masa të shtuara sigurie. Si pasojë, Shërbimi Sekret amerikan e zhvendosi javën e kaluar sekretarin e Thesarit, Scott Bessent, në një objekt banimi ushtarak.

Këto zbulime vijnë në një moment kur bisedimet diplomatike për përfundimin e konfliktit po vazhdojnë me vështirësi, ndërsa presidenti Trump deklaroi javën e kaluar se lufta do të përfundonte “shumë shpejt”. Planet e Iranit për të goditur zyrtarë aktualë dhe ish-zyrtarë amerikanë, përfshirë edhe komplotin e zbuluar në vitin 2024 për vrasjen e Trumpit, kanë ekzistuar që nga mandati i tij i parë, por deri më tani ishin përqendruar kryesisht në shënjestrimin e tyre jashtë territorit amerikan.

 

Continue Reading

Botë

Arrestohet një 31-vjeçar shqiptar në Gjermani, kishte shtatë pseudonime dhe dhjetë kërkesa policore

Published

on

Policia Federale Gjermane ka arrestuar një 31-vjeçar shqiptar në Aachen, nën dyshimin se kishte tentuar të vidhte produkte farmaceutike në një farmaci, së bashku me një 29-vjeçare nga Bullgaria.

Gjatë verifikimeve në stacionin policor, autoritetet zbuluan se shqiptari ishte i njohur për policinë me shtatë pseudonime, ndërsa ndaj tij ishin regjistruar dhjetë kërkesa për përcaktimin e vendndodhjes, të iniciuara nga Prokuroria Publike e Bremenit.

Sipas njoftimit të Policisë Federale, ngjarja ndodhi të dielën, rreth orës 11:00, në një farmaci në stacionin kryesor të trenit në Aachen. Dy personat dyshohet se kishin tentuar të merrnin produkte farmaceutike në vlerë prej rreth 28 eurosh.

Gruaja ishte ndaluar në vendin e ngjarjes, ndërsa burri ishte larguar para mbërritjes së policisë. Ai u gjet më vonë në një garazh parkimi aty pranë, ku u përpoq të largohej pasi vërejti zyrtarët. Mallrat e dyshuara të vjedhura u gjetën në dysheme pranë tij.

Gjatë shoqërimit në stacion, 31-vjeçari kundërshtoi policët dhe përdori forcë fizike ndaj tyre, por zyrtarët arritën ta neutralizonin dhe ta prangosnin.

Sipas policisë, dhjetë kërkesat për përcaktimin e vendndodhjes së tij lidhen me dyshime për vepra të ndryshme penale, përfshirë vjedhje, grabitje, kërcënime, sulme të rënda dhe sulm seksual.

Po ashtu, verifikimet zbuluan se shqiptari ishte dëbuar nga Gjermania në vitin 2023 dhe ndaj tij ishte vendosur ndalim pesëvjeçar për hyrje dhe qëndrim në këtë shtet.

Gjatë kontrollit fizik, në çantën e belit të tij u gjet edhe një thikë, lehtësisht e arritshme. Për këtë arsye, ndaj tij u shtua edhe dyshimi për vjedhje me armë.

Pas konsultimit me prokurorin, 31-vjeçari u dërgua në paraburgim në Aachen, me qëllim të paraqitjes para gjykatës për caktimin e masës së paraburgimit.

Ndërkaq, 29-vjeçarja nga Bullgaria u lirua pasi ndaj saj u ngrit kallëzim penal./A.K/

Continue Reading

lajme

Mbyllet ura e Krimesë pas goditjes ukrainase, Rusia bombardon urat e Kievit

Published

on

By

Një urë kyçe që lidh Krimenë e pushtuar me Rusinë është mbyllur pas raportimeve se një sulm ukrainas i ka shkaktuar dëme të mëdha, gjatë një nate ku të dyja vendet ndërluftuese shënjestruan kalime strategjike.

Ish-këshilltari i presidentit ukrainas Volodymyr Zelensky, Anton Gerashchenko, publikoi pamje dhe video që pretendojnë se tregojnë shembjen në ujë të një pjese të urës së Krimesë — e njohur edhe si Ura e Kerçit — ku shihet një hark mbështetës dhe një segment rrugor i dalë mbi sipërfaqen e ujit. Këto pamje ende nuk janë verifikuar në mënyrë të pavarur, ndërsa guvernatori i Krimesë i emëruar nga Moska, Sergei Aksyonov, konfirmoi në Telegram pezullimin e qarkullimit mbi urë. Mediat shtetërore ruse raportuan se të martën pritet një takim për të diskutuar situatën.

Nga ana tjetër, kryetari i bashkisë së Kievit, Vitali Klitschko, bëri të ditur se urat Veriore dhe Jugore — rrugë të rëndësishme mbi lumin Dnipro — janë mbyllur pas sulmeve me raketa balistike ruse. Shpërthime të fuqishme u dëgjuan në Kiev pak para mesnatës së të martës, duke shkaktuar dëme në infrastrukturën kritike, ndërprerje të ngrohjes dhe ujit, si dhe dëmtimin e disa linjave mbitokësore të metrosë. Me tetë ura kryesore që lidhin pjesën perëndimore dhe lindore të kryeqytetit për rreth tre milionë banorë, këto sulme pritet të shkaktojnë kaos të madh në trafik. Ndërkohë, tre persona të tjerë mbetën të plagosur nga një sulm raketor rus në rajonin e Cherkasyt.

Sulmet ruse erdhën një ditë pasi Ukraina nisi përpjekjen e saj të fundit për të nxjerrë jashtë funksionit urën e Krimesë, e cila u ndërtua nga Rusia pas aneksimit të gadishullit në vitin 2014 dhe u inaugurua personalisht nga presidenti Vladimir Putin në vitin 2018. Nga sulmi i natës së të dielës, autoritetet ruse raportuan për dy persona të vrarë. Ndërsa Ukraina po përpiqet të rrisë koston ekonomike të luftës duke goditur rafineritë e naftës, sulmi ndaj kësaj ure synon të rrisë koston politike për Putinin.

Kjo valë e re sulmesh të ndërsjella vjen në prag të takimit të së enjtes në Shenzhen të Kinës mes liderëve të Kinës, SHBA-së dhe Rusisë, dhe pas bisedimeve të së hënës mes zyrtarëve amerikanë, ukrainas dhe evropianë për të lehtësuar një “angazhim të drejtpërdrejtë” mes Rusisë dhe Evropës për t’i dhënë fund luftës.

Pas takimit të së hënës, i dërguari amerikan Jared Kushner, dhëndri i presidentit Donald Trump, deklaroi se SHBA-ja është e përkushtuar t’i ofrojë Ukrainës garanci të forta dhe të besueshme sigurie, si dhe një rrugë drejt anëtarësimit në BE, duke shtuar se NATO mbetet shtyllë kritike e sigurisë evropiane. Presidenti Zelensky e cilësoi takimin si “të vështirë”, duke theksuar nevojën për më shumë mbështetje në mbrojtjen ajrore kundër raketave balistike ruse, për të cilat tha se po furnizohen nga Koreja e Veriut, si dhe kërkoi përfshirjen e vendeve evropiane në çdo bisedim paqeje. /BBC/

Continue Reading

Lajmet

Trafiku ajror në SHBA nis rikthimin në normalitet pas kaosit të fundjavës; Trump e demokratët përplasen për fajin

Published

on

By

Udhëtimi ajror në Shtetet e Bashkuara ka shënuar shenja të rikthimit gradual në normalitet të hënën, pas disaditëshit me ndërprerje të mëdha të trafikut që lanë mijëra pasagjerë të bllokuar dhe shkaktuan anulimin e mijëra fluturimeve anembanë vendit.

Sipas faqes së monitorimit të fluturimeve FlightAware, situata në orët e para të së hënës është përmirësuar ndjeshëm, duke u regjistruar më pak se 300 fluturime të anuluara dhe rreth 1.000 të vonuara – një rënie e madhe krahasuar me rreth 2.300 anulimet dhe mbi 10.000 vonesat e së dielës.

Kompanitë kryesore ajrore amerikane kanë konfirmuar stabilizimin e operacioneve:

American Airlines njoftoi se është e përgatitur të operojë me orar kryesisht normal, duke theksuar se nuk parashikon anulime të tjera të gjera pas kësaj ngjarjeje që preku të gjithë industrinë.

Delta Air Lines deklaroi se shumica e fluturimeve po zhvillohen normalisht, ndonëse paralajmëroi se disa pasagjerë mund të përballen ende me vonesa të izoluara.

Southwest Airlines dhe Alaska Airlines raportuan gjithashtu se janë rikthyer në orar të plotë dhe se operacionet janë rikuperuar në pjesën më të madhe.

Kriza nisi të premten, kur Administrata Federale e Aviacionit (FAA) urdhëroi ndalimin e fluturimeve në të gjithë vendin për më shumë se katër orë, për shkak të një defekti në komunikim që preku sistemet e kontrollit të trafikut ajror. Edhe pse urdhri u hoq po atë mbrëmje, efektet zinxhir zgjatën gjatë gjithë fundjavës. Zyrtarët kanë fajësuar punimet e mirëmbajtjes për zëvendësimin e kabllove të vjetra prej bakri me fibra optike, por shkaku i saktë mbetet ende nën hetim.

Ndërprerja e trafikut ajror ka nxitur edhe debate politike në Uashington. Presidenti Donald Trump, pas heshtjes gjatë fundjavës, reagoi të dielën në platformën Truth Social, duke kritikuar gjendjen e sistemeve të kontrollit ajror dhe duke fajësuar administratën e kaluar, si dhe mungesën e fondeve nga Kongresi.

“Administrata Biden ishte një katastrofë për FAA-në. Gjithçka që prekën shkoi keq. U shpenzuan shumë para në mënyrë të pamenduar, duke e bërë një sistem të vjetër dhe të dëmtuar edhe më keq se sa ishte kur ata morën drejtimin”, shkroi Trump.

Nga ana tjetër, sekretari i Transportit, Sean P. Duffy, në një intervistë për CNN deklaroi se merr përgjegjësinë për sistemin e trashëguar, por përsëriti thirrjen për miliarda dollarë financime shtesë për modernizimin e infrastrukturës së vjetruar, duke kërkuar që të lihet mënjanë partizanizmi politik. Ndërkohë, senatori demokrat nga Maryland, Chris Van Hollen, akuzoi administratën Trump se po përpiqet t’ia kalojë përgjegjësinë Kongresit, ndonëse fondet për përmirësimin e sistemit të aviacionit janë miratuar tashmë.

 

Continue Reading

Të kërkuara