Grupi terrorist ISIS ka marrë përgjegjësinë për një sulm vetëvrasës që ndodhi të martën para një banke në qytetin verior të Kunduzit në Afganistan, ku pesë persona u vranë dhe shtatë të tjerë u plagosën. Sulmi, sipas ISIS, kishte si shënjestër punonjësit talebanë që ishin mbledhur për të marrë pagat e tyre.

Ky incident ka ndodhur në një periudhë kur dhuna ka rënë në Afganistan që nga rikthimi i talebanëve në pushtet më 2021, por grupi ISIS vazhdon të jetë një kërcënim i vazhdueshëm për sigurinë. Sipas krahut të propagandës së ISIS, një sulmues vetëvrasës shpërtheu jelekun e tij ndërsa anëtarët e milicisë talebane ishin duke u mblidhur për pagat.

Në sulm u vranë pesë persona, përfshirë nëpunës civilë, dhe shtatë të tjerë u plagosën. Kjo ngjarje ndodhi një vit pas një sulmi të ngjashëm në qytetin e Kandaharit, që është një nga qendrat më të rëndësishme shpirtërore për lëvizjen talebane.

Ndërkohë, qeveria talebane e ka shpallur sigurinë si prioritet kryesor që nga kthimi në pushtet, dhe ka ndërmarrë goditje ndaj ISIS-it për të zbutur aktivitetet e këtij grupi. Megjithatë, ISIS mbetet aktiv dhe vazhdon të kërcënojë talebanët, diplomatët dhe vizitorët ndërkombëtarë.

Në dhjetor të vitit 2024, ISIS mori përgjegjësinë për një sulm tjetër vetëvrasës, që la të vdekur ministrin taleban të refugjatëve, Khalil Ur-Rahman Haqqani, në Kabul./UBTNews/

Byroja Federale e Hetimeve tha të martën se ka zbuluar 2400 dosje të reja që lidhen me vrasjen e Presidentit John F. Kennedy, ndërsa agjencitë federale punojnë për të përmbushur urdhrin ekzekutiv të Presidentit Donald Trump muajin e kaluar për të publikuar mijëra të dhëna. FBI-ja tha se po punon për transferimin e të dhënave tek Administrata Kombëtare e Arkivave dhe Regjistrimeve për t’u përfshirë në procesin e deklasifikimit.

Në vitin 1992, Kongresi kishte urdhëruar që të gjitha dosjet e mbetura sekrete në lidhje me hetimin për vrasjen e ish Presidentit Kennedy duhet të hapeshin plotësisht për publikun përmes Arkivave Kombëtare pas 25 vjetësh, më 26 tetor 2017, me përjashtim të atyre që presidenti autorizoi të mbaheshin ende sekret.

FBI-ja nuk tha se çfarë të dhënash përmbajnë dosjet e zbuluara. Në vitin 2020, Byroja Federale e Hetimeve hapi një qendër për dokumentacionin, duke filluar përpjekjet shumëvjeçare për grumbullimin dhe inventarin elektronik të çështjeve të mbyllura nga zyrat e saj në të gjithë vendin.

Agjencia tha se një inventar më gjithëpërfshirës i të dhënave dhe teknologjia e përparuar mundësuan gjetjen e dokumenteve në fjalë.

Jefferson Morley, nënkryetar i Fondacionit Mary Ferrell, një depo për dosjet që kanë lidhje me vrasjen e Presidentit Kennedy, e vlerësoi zbulimin e dokumenteve nga FBI-ja.

“Kjo tregon se FBI është serioze për të qenë transparente”, tha zoti Morley, i cili është gjithashtu redaktor i blogut “JFK Facts”. Ai shtoi se ky veprim shërben si shembull që edhe agjencitë e tjera të ofrojnë dosjet që nuk janë dorëzuar ende pranë Arkivave Kombëtare.

Urdhri i Presidentit Trump muajin e kaluar udhëzon drejtorin e zbulimit kombëtar dhe prokuroren e përgjithshme që të hartojnë një plan për të publikuar të dhënat sekrete që kanë lidhje me atentatin ndaj Presidentit Kennedy.

Një zëdhënës i Zyrës së Drejtorit të Zbulimit Kombëtar tha plani për publikimin e të dhënave ishte dorëzuar në bazë të urdhrit, por nuk dha detaje apo afate kohore për publikimin e dokumenteve.

Gjatë mandatit të parë, Presidenti Trump tha se do të lejonte publikimin e të gjitha dokumenteve të mbetura, por siç duket për arsye të sigurisë kombëtare disa dosje nuk u publikuan. Ndërsa disa dosje vazhduan të publikoheshin gjatë administratës së Presidentit Biden, disa nuk e kaluan pragun.

Vrasja e Presidentit Kennedy nxiti teori konspirative për dekada me radhë. Presidenti Kennedy u qëllua për vdekje në qendër të qytetit të Dallas-it nga atentatori 24-vjeçar Lee Harvey Oswald. Dy ditë pas vrasjes së presidentit, Jack Ruby, pronar i një klubi nate, qëlloi të vdekje atentatorin Lee Harvey Oswald ndërsa ky i fundit po transferohej drejt burgut.

Komisioni Warren, i ngritur nga Presidenti i atëhershëm Lyndon B. Johnson për të hetuar atentatin ndaj presidentit, arriti në përfundimin se Lee Harvey Oswald veproi i vetëm dhe se nuk kishte prova për komplot. Por ky përfundim nuk i dha fund një serie teorish të ndryshme gjatë dekadave.

Dosjet e publikuara gjatë viteve të fundit kanë ofruar detaje mbi mënyrën se si funksiononin shërbimet e zbulimit në atë kohë, dhe përfshijnë kabllograme dhe memorandume të CIA-s që diskutojnë vizitat e Oswald-it në ambasadat sovjetike dhe kubane gjatë një udhëtimi në kryeqytetin e Meksikës vetëm disa javë para atentatit. Ish marinsi amerikan kishte dezertuar më parë duke u vendosur në Bashkimin Sovjetik përpara se të kthehej në Teksas pranë familjes.

Urdhri ekzekutiv që Presidenti Trump nënshkroi muajin e kaluar synon gjithashtu të publikojë dosje sekrete në lidhje me vrasjen e senatorit Robert F. Kennedy, vëllait të presidentit të ndjerë dhe udhëheqësit të drejtave civile Martin Luther King Jr.

Presidenti Trump ka emëruar nipin e Presidentit Kennedy, Robert F. Kennedy Jr., për postin e Sekretarit të Shëndetësisë në administratën e tij të re. Zoti Kennedy, babai i të cilit, Robert F. Kennedy, u vra në vitin 1968 ndërsa kërkonte emërimin si kandidat demokrat për president, është shprehur se nuk është i bindur se një person i armatosur ishte përgjegjësi i vetëm për vrasjen e xhaxhait të tij, Presidentit Kennedy, në vitin 1963.