Një nga skenat më të ndjera të Kupës së Ligës u regjistrua gjatë fitores dramatike të Inter Miami ndaj Atlas FC, ku Lionel Messi dhe sulmuesi uruguaian Matías Cóccaro u përfshinë në një shkëmbim emocional në fushë, që përfundoi me një përqafim dhe shkëmbim fanellash.

Në një intervistë pas ndeshjes, Cóccaro sqaroi se tensioni që u pa në fushë ishte rezultat i intensitetit të lojës.

“Kur shënuam golin e barazimit, entuziazmi im nuk i pëlqeu Messit. Kur ata shënuan, ai festoi para meje. Por më pas u përqafuam dhe ai madje më kërkoi falje. Më tha që do të më dërgojë fanellën e tij, një gjest që tregon madhështinë e tij,” tha ai.

Cóccaro nuk kurseu fjalët e mira për yllin argjentinas:

“Ai është më i madhi në histori. Me të, unë thjesht hesht… me askënd tjetër. Dhe Suárez? Ai është idhulli im,” u shpreh ai.

Sulmuesi i Atlas shtoi se Messi kuptoi se gjithçka ishte pjesë e përkushtimit për skuadrën dhe nuk kishte asgjë personale.

Messi pati një tjetër paraqitje të shkëlqyer, duke dhuruar dy asistime, krijuar tri raste të mëdha dhe kontribuar në mënyrë të drejtpërdrejtë në golin vendimtar në minutën e fundit.

Për Atlasin, humbja e vendos skuadrën në një pozitë të vështirë për kualifikim, megjithëse ata kanë ende dy ndeshje për të ndryshuar situatën – ndaj Orlando City dhe Atlanta United.

Presidenti i Federatës së Futbollit të Kosovës, Agim Ademi, ka përgëzuar FC Ballkanin për kualifikimin në rrethin e tretë të Ligës së Konferencës, pas suksesit kundër FC Floriana-s nga Malta. Pas fitores 4:2 në ndeshjen e parë dhe barazimit 1:1 në takimin e kthimit në udhëtim, portokallezinjtë nga Suhareka vazhdojnë rrugëtimin e tyre në arenën ndërkombëtare.

“Urime FC Ballkani kualifikimi në rrethin e tretë të Ligës së Konferencës! Portokallezinjtë nga Suhareka vazhdojnë me suksese në arenën evropiane,” ka shkruar Ademi në reagimin e tij.

Ai ka theksuar se skuadra ka dëshmuar stabilitet dhe ambicie në garat evropiane, duke e cilësuar fazën e grupeve jo më si një ëndërr, por si një objektiv real.

“Ky është një tjetër hap i madh drejt ëndrrës për një tjetër fazë grupesh, që tashmë nuk është më utopi, por një objektiv real për këtë skuadër me karakter, cilësi dhe përvojë,” ka shtuar Ademi.

Presidenti i FFK-së ka uruar lojtarët, stafin teknik, drejtuesit e klubit dhe tifozët e zjarrtë të Ballkanit, ndërsa ka shprehur besimin se suksesi do të vazhdojë edhe në përballjen e radhës ndaj Shamrock Rovers nga Irlanda.

“Ju priftë e mbara, Kosova është krenare me ju,” përfundon urimi i kreut të futbollit kosovar.

Skuadra nga kryeqyteti nuk e ka siguruar raundin e tretë të kualifikimeve për në Ligën e Konferencës. Ndeshja në kohën e rregullt dhe pas vazhdimeve dy herë nga pesëmbëdhjetë minuta kundër Larne nga Irlanda Veriore përfundoi me rezultatin 1:1.

Golin e epërsisë për Prishtinën në stadiumin “Fadil Vokrri” e shënoi Gjelbrim Taipi në minutën e dhjetë të pjesës së parë.

Leotrim Kryeziu kishte një rast të mirë për të thelluar epërsinë në minutën e 42-të, por portieri mysafir Rohan Ferguson nuk lejoi të befasohej.

Ekipi mysafir erdhi deri te barazimi me golin e Dan Bent në minutën e 56-të, pas një reagimi të vonuar të mbrojtjes vendëse.

Në ekzekutimin e penalltive ekipi nga Irlanda Veriore ishte më e saktë duke fituar me rezultatin 5:4. Ndeshja e parë para një jave në Ballymena Showgrounds të Irlandës Veriore kishte përfunduar pa gola – 0:0.

Kujtojmë, Prishtina u eliminua nga Liga Evropa pas humbjes nga Sheriff Tiraspol me rezultat të përgjithshëm 2:5 (0:4-2:1).

Anëtarë të delegacionit të klubit të futbollit Novi Pazari janë sulmuar të mërkurën mbrëma nga huliganë polakë në qytetin Bialystok.

Novi Pazari po qëndron në Poloni për ndeshjen e kthimit me Jagiellonian, që i takon raundit të dytë kualifikues të Ligës së Konferencës.

Ndeshjen në Novi Pazar, qytetin në afërsi të kufirit me Kosovën, e fitoi Jagiellonia me rezultatin 2:1. Novi Pazari për herë të parë po garon në Evropë, si i treti në kampionatin e Serbisë në futboll.

Anëtarë të delegacionit të madh të Novi Pazarit, ku përfshihen edhe sponsorë e miq të klubit, janë sulmuas rrugës për në hotel, pasi darkuan në një restoran në këtë qytet polak. Rreth 15 huliganë vendosën maskat dhe u nisën drejt anëtarëve të Novi Pazarit, kur ata dolën nga restorani. Anëtarët e klubit u detyruan të kthehen në restoranin ku darkuan dhe telefonuan policinë, është bërë e ditur të enjten përmes një komunikate.

Policia është vonuar rreth 30 minuta, rreth 30 huliganë të maskuar kanë sulmuar sërish delegacionin e Novi Pazarit, derisa anëtarët e tij po shkonin drejt veturave me të cilat duhej të udhëtonin për në hotel.

“Vetëm falë qetësisë nga të pranishmit dhe reagimit profesional të policisë në atë moment, u shmangën incidentet më serioze”, shkruan në komunikatën e Novi Pazarit.

Në shenjë revolte Novi Pazari ka njoftuar se nuk do të marr pjesë në drektën e përbashkët me drejtuesit e klubit polak.

Huliganët e Jagiellonias janë të njohur edhe për qëndrimet pro-serbe, përkatësisht anti-shqiptare dhe anti-Kosovë. Ata kanë bërë thirrje “Kosova është zemra e Serbisë” në ndeshjen e parë në Novi Pazar. Kjo thirrje e tyre është përcjellë me fishkëllima nga tifozët boshnjakë.

Kishte edhe përleshje mes tifozëve në ndeshjen e parë dhe UEFA të mërkurën i dënoi të dy klubet. Tifozët e Novi Pazarit kanë hequr dorë nga udhëtimi në Poloni për shkak të kushteve të shumta që ua vënë autoritetet polake.