Muzeu i prodhuesit të njohur francez të qelqit luksoz Lalique, në verilindje të Francës, është grabitur nga persona të maskuar, të cilët kanë vjedhur bizhuteri kristali me vlerë rreth 4 milionë euro.

Sipas raportimeve, autorët hynë me forcë në muze, thyen gjashtë vitrina ekspozimi dhe u larguan me 20 bizhuteri kristali. Pas incidentit, muzeu do të qëndrojë i mbyllur për disa ditë, derisa të përfundojnë vlerësimet e dëmeve dhe të forcohen masat e sigurisë.

Në një deklaratë të publikuar në rrjetin social X, drejtuesit e muzeut konfirmuan se xhandarmëria ndërhyri menjëherë në vendin e ngjarjes, ndërsa hetimet për identifikimin e autorëve janë duke vazhduar.

Kryetari i bashkisë së Wingen-sur-Moder, Christian Dorschner, tha se grabitësit dukeshin të mirëinformuar, pasi iu drejtuan menjëherë koleksionit të bizhuterive. Sipas tij, sistemi i alarmit funksionoi normalisht, por kompania private e sigurisë nuk e njoftoi menjëherë policinë.

Autoritetet po analizojnë pamjet e kamerave të sigurisë, ndërsa hetimi është marrë përsipër nga njësia e hetimeve kriminale e xhandarmërisë së Bas-Rhin.

Mediat franceze raportojnë se muzeu ishte vendosur nën mbikëqyrje të shtuar pas grabitjes së bujshme në Muzeun e Luvrit në tetor 2025, ku u vodhën bizhuteri dhe objekte të çmuara me vlerë rreth 102 milionë dollarë./A.K/

DJ-i dhe producenti turk Mahmut Orhan ka performuar për herë të parë në Prishtinë, duke dhuruar një natë plot energji dhe atmosferë elektrizuese për publikun kosovar.

Koncerti, i mbajtur më 4 korrik, mblodhi një numër të madh adhuruesish të muzikës elektronike, të cilët krijuan atmosferë të zjarrtë që nga minutat e para të performancës.

I njohur për ndërthurjen e ritmeve elektronike me elemente melodike, Orhan interpretoi disa nga hitet e tij më të njohura, duke e mbajtur publikun në këmbë gjatë gjithë mbrëmjes.

Një nga momentet më të veçanta ishte kur ai përfshiu në setin e tij këngën “Si ai” të artistes kosovare Tayna. Ky veprim u prit me entuziazëm të madh nga të pranishmit, të cilët kënduan dhe festuan njëzëri, duke e kthyer atë në një nga kulmet e natës.

Reagimi i publikut ishte i jashtëzakonshëm gjatë gjithë koncertit, ndërsa debutimi i Mahmut Orhan në Kosovë u mbyll me duartrokitje të gjata, duke e shndërruar mbrëmjen në një nga ngjarjet më të veçanta muzikore të kësaj vere në Prishtinë./A.K/

Taylor Swift dhe Travis Kelce raportohet se i kanë dhënë fund beqarisë në një ceremoni private, disa ditë përpara festës madhështore që pritet të mbahet në Madison Square Garden në New York.

Sipas Page Six, superylli i muzikës dhe lojtari i Kansas City Chiefs kanë shkëmbyer betimet martesore në praninë e një rrethi shumë të ngushtë familjarësh dhe miqsh, ndërsa festa zyrtare me mbi 1,000 të ftuar do të zhvillohet të premten, pas një darke provë me rreth 100 të ftuar.

“Ata janë tashmë të martuar”, ka deklaruar një burim i afërt me çiftin, ndërsa burime nga industria muzikore në Nashville pretendojnë se Swift dhe Kelce janë kurorëzuar edhe ligjërisht.

Megjithatë, deri më tani nuk ka konfirmim zyrtar. Sipas Page Six, në Zyrën e Gjendjes Civile në Manhattan nuk rezulton të jetë lëshuar ndonjë licencë martese në emrin e Taylor Swift, ndërsa licencat e martesës në shtetin e New York-ut nuk janë publike.

Raportimet sugjerojnë se ceremonia private mund të jetë zhvilluar në Tennessee, shteti ku Taylor Swift u shpërngul në adoleshencë për të ndjekur karrierën muzikore.

Spekulimet u shtuan edhe më shumë pasi, sipas New York Post, avioni privat i këngëtares bëri ndalesa në disa qytete ku jetojnë familjarët më të afërt të çiftit, përfshirë Philadelphia, Tampa dhe Nashville, pak para se të mbërrinte në New York.

Ndërkohë, sipas raportimeve të mëhershme, çifti kishte dhuruar 26 milionë dollarë për bamirësi përpara festimeve të dasmës. Deri tani, as Taylor Swift dhe as Travis Kelce nuk kanë reaguar ndaj zërave për martesën./A.K/

Mbretëresha e muzikës pop, Madonna, është rikthyer me albumin e ri “Confessions II”, një vazhdim i drejtpërdrejtë i albumit të saj të suksesshëm “Confessions on a Dance Floor” të vitit 2005.

Në kopertinën e albumit, fytyra e artistes mbulohet nga një vello vjollcë, ndërsa në hyrje të projektit ajo shprehet: “Ndonjëherë më pëlqen të fshihem në hije. Të krijoj një personazh të ri, një identitet tjetër. Mund të jem kush të dua.”

Pas një beteje serioze me sepsën që i rrezikoi jetën, Madonna rikthehet në atmosferën e klubeve të natës, duke sjellë një album që feston lirinë, vallëzimin dhe arratisjen përmes muzikës. Në tekstet e këngëve, ajo kritikon gjithashtu një brez që, sipas saj, po zëvendëson përjetimet reale me kohën e kaluar në TikTok.

Albumi është realizuar sërish në bashkëpunim me producentin britanik Stuart Price, i cili kishte punuar edhe në projektin origjinal të vitit 2005. Sipas Madonnës, synimi i tyre ishte që albumi i ri të ishte po aq i mirë ose edhe më i mirë se paraardhësi.

Kritikët vlerësojnë se, megjithëse “Confessions II” nuk e tejkalon plotësisht albumin origjinal, ai i afrohet nivelit të tij, veçanërisht në pjesën e parë, e cila dominohet nga ritme energjike dance dhe atmosfera tipike e muzikës së klubeve.

Një nga momentet më të vlerësuara të albumit është kënga “Danceteria”, ku Madonna rikthehet në fillimet e karrierës së saj, duke i kushtuar një homazh klubit ku hodhi hapat e parë drejt suksesit dhe kujton njerëzit që e ndihmuan të siguronte kontratën e saj të parë diskografike./A.K/