Deklaratat e presidentit serb, Aleksandar Vuçiq, se Kosova është pjesë e Serbisë, dhe të ministres së tij, Snezhana Paunoviq, për spastrimin etnik të Kosovës, u dënuan ashpër nga ministri i Jashtëm i Shqipërisë, Ferit Hoxha.

Në një konferencë nga Tirana me homologun e Kroacisë, shefi i diplomacisë shqiptare u ndal te kjo çështje.

“Theksuam rëndësinë e veçantë të dialogut ndërmjet Kosovës dhe Serbisë. Ky proces nuk mund të ndërtohet mbi revizionizmin historik, mohimin e fakteve, lartësimin e kriminelëve të luftës apo përmes retorikave nacionaliste, përçarëse dhe deklaratave të papranueshme që relativizojnë, justifikojnë ose u japin jehonë krimeve të luftës dhe politikave të dënuara si nga drejtësia ndërkombëtare, ashtu edhe nga ndërgjegjja njerëzore”.

Hoxha iu përgjigj drejtpërdrejt deklaratave të Vuçiqit për marrëveshjen ushtarake mes Tiranës, Zagrebit dhe Prishtinës.

“Çdo angazhim i yni, koordinim dypalësh, tripalësh apo më shumë nuk duhet të shqetësojë askënd e as të përdoret nga askush, në rajon apo jashtë tij, për të justifikuar militarizimin e vendit e shoqërisë e aq më pak për t’i fryrë zjarreve të rrezikshme të luftërave dhe për të rikthyer thirrjet arkaike për fitore e përkatësi territoriale. Asnjë përpjekje për të ringjallur ndasitë e së kaluarës, për të ushqyer tensione apo për të penguar proceset e pajtimit dhe bashkëpunimit nuk do të mund ta tërheqë zvarrë rajonin dhe as të cenojë të ardhmen tonë të përbashkët evropiane”.

Marrëveshja trepalëshe e sulmuar shumë nga Serbia u komentua dhe nga ministri i Jashtëm kroat, Gordan Grliq-Radman, i cili foli për thellim të bashkëpunimit rajonal, por edhe mes dy vendeve mike./TCH/A.K/

Është zbardhur dëshmia e Rozalinda Plakës, ish-të fejuarës së Refit Buzit, i cili tre ditë më parë vrau prindërit e saj, ndërsa më pas mori peng për disa orë ish-partneren, përpara se t’i jepte fund jetës.

Anila Hoxha, Rozalinda ka rrëfyer për marrëdhënien e saj me Buzin, arsyet e ndarjes dhe momentet e frikshme të ngjarjes së rëndë.

“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar. Arsyeja ka qenë sepse ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua.”

Rozalinda ka deklaruar se prindërit e saj ishin në dijeni të problemeve në këtë marrëdhënie dhe se nuk kishin qenë dakord për lidhjen që në fillim.

“Këto gjëra i dinin edhe prindërit e mi, të cilët nuk kanë qenë dakord për këtë lidhje që në fillim.”

Në lidhje me momentin e sulmit në banesë, Rozalinda ka rrëfyer se ishte duke fjetur kur dëgjoi një zhurmë të fortë, që e ngjau me një krismë arme.

“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur.”

Sipas dëshmisë së saj, në korridor ajo ka parë Refit Buzin me armë në dorë dhe babain e saj të shtrirë në tokë.

“Kur dola kam parë shtetasin Refit Buzi në korridor, me një armë të gjatë si ato të gjahut në dorë, si dhe kam parë babain tim Kosta Plaka të shtrirë përmbys te hyrja e dhomës, i mbuluar me gjak.”

Kryeministri i Mbretërisë së Bashkuar, Andy Burnham, ka deklaruar se Britania do të jetë “me Ukrainën 100%”, gjatë takimit me presidentin ukrainas Volodymyr Zelensky, i cili u bë vizitori i parë ndërkombëtar në Downing Street pas hyrjes së tij në detyrë.

Burnham tha se vizita e Zelenskyt kishte për qëllim të dërgonte një mesazh të qartë për mbështetjen e vazhdueshme të Mbretërisë së Bashkuar ndaj Ukrainës.

“Volodymyr, dua që ju të dini se ne ju mbështesim. Mund të mbështeteni tek unë dhe tek ne. Mund të mbështeteni te Mbretëria e Bashkuar për aq kohë sa të duhet”, tha Burnham gjatë një takimi në bazën detare në Portsmouth.

Ndërkohë, Zelensky e cilësoi marrëdhënien mes Ukrainës dhe Britanisë si “më të fortë se kurrë”.

Gjatë takimit, Burnham njoftoi edhe ndarjen e teknologjisë së sistemit të ri britanik të luftës elektronike “Stone Cloak”, i cili do t’i mundësojë Ukrainës prodhimin e pajisjeve në shkallë të gjerë për mbrojtje ndaj dronëve.

Sipas autoriteteve britanike, kjo teknologji do të ndihmojë në goditjen e objektivave dhe në shpëtimin e jetëve të ukrainasve.

Dy liderët u takuan gjithashtu me mbi 200 ushtarë ukrainas që kanë marrë pjesë në një stërvitje detare në Mbretërinë e Bashkuar, pjesë e programit “Sea Breeze”, që synon forcimin e aftësive luftarake dhe masave kundër minave në Detin e Zi.

Burnham theksoi se Britania do të vazhdojë të mbështesë Ukrainën për arritjen e një armëpushimi të plotë dhe rifillimin e negociatave, duke insistuar se Ukraina duhet të jetë pjesë e çdo procesi paqësor.

Mbretëria e Bashkuar ka angazhuar rreth 25 miliardë paund për mbështetjen e përpjekjeve të Ukrainës që nga nisja e luftës me Rusinë./A.K/

Drejtori i Drejtorisë së Bujqësisë në Komunën e Rahovecit, Behar Thaqi, ka bërë të ditur se reshjet e dendura të shiut dhe erërat e forta kanë shkaktuar dëme të mëdha në bujqësi dhe infrastrukturë, duke kërkuar ndërhyrjen e Qeverisë së Kosovës për mbështetje ndaj fermerëve.

Sipas Thaqit, dëmet më të mëdha janë evidentuar në kulturat bujqësore, veçanërisht te specat, pjepri dhe shalqiri.

“Dëmet janë të konsiderueshme, sidomos në sektorin e bujqësisë. Kemi dëme në kulturat e specave, pjeprit dhe shalqirit”, ka deklaruar ai.

Ai tha se vetëm erërat e forta të 27 korrikut kanë shkaktuar dëme rreth 100 mijë euro, ndërsa vërshimet e muajit janar, sipas komisionit vlerësues, kanë shkaktuar dëme prej rreth 167 mijë eurosh.

Thaqi bëri të ditur se edhe reshjet e fundit kanë dëmtuar infrastrukturën rrugore me mbi 50 mijë euro, ndërsa dëmet e reja te fermerët nga vërshimet vlerësohen mbi 100 mijë euro.

Ai theksoi se institucionet komunale kanë kompetencë vetëm për evidentimin e dëmeve, ndërsa kompensimi i tyre i takon nivelit qendror.

“Qeveria duhet të mendojë seriozisht dhe t’i ndihmojë fermerët dhe bujqit”, u shpreh Thaqi.

Sipas tij, dëmtimet në rrugë kanë ardhur si pasojë e sasisë së jashtëzakonshme të reshjeve, duke theksuar se nuk beson se shkaku lidhet me cilësinë e punimeve./A.K/