Lajmet

Rektori i UBT-së, Hajrizi: Krijimi i Fakultetit të Inxhinierisë së Energjisë në UBT, një hap i rëndësishëm për zhvillimin e sektorit energjetik të Kosovës

Published

on

Gjatë simpoziumit të II-të të CIGRE për Tranzicionin e Energjisë, Rektori i UBT-së, Edmond Hajrizi, ka theksuar rëndësinë që ka sektori i energjisë për zhvillimin e qëndrueshëm të Kosovës dhe përgatitjen e brezave të ardhshëm për sfidat e tranzicionit energjetik. Ai ka njoftuar gjithashtu se kur për herë të parë UBT ka krijuar Fakultetin e Inxhinierisë së Energjisë, ka bërë një hap të rëndësishëm në përpjekjet për të zhvilluar kuadro të kualifikuara që kontribuojnë në modernizimin dhe transformimin e sektorit energjetik të Kosovës.

Hajrizi ka theksuar se, duke marrë parasysh rolin kyç që ka energjia elektrike për zhvillimin ekonomik dhe shoqëror të Kosovës, UBT ka bërë një hap të rëndësishëm për të adresuar nevojën për specialistë të fushës.

Fakulteti i Inxhinierisë së Energjisë në UBT është i pari i llojit të tij në Kosovë dhe synon të përgatisë inxhinierë të kualifikuar për të kontribuar në zhvillimin e sektorit energjetik dhe për të mbështetur tranzicionin energjetik.

“Duke marrë parasysh që tranzicioni energjetik nënkupton një transformim të sistemit energjetik nga një ekzistues në një tjetër, kjo kërkon një qasje sistemore të gjenerimit, të ruajtjes, të përdorimit dhe të shpërndarjes. Në UBT e kemi futur strategjikisht energjinë, duke marrë parasysh si sektor me rëndësi për Kosovën në pjesën prioritare tonë dhe i qasemi nga këndvështrime të ndryshme. Qysh në fillim kemi themeluar për herë të parë Fakultetin e Inxhinierisë së Energjisë, për t’i dhënë peshë dhe për ta shty mesazhin që energjia është dhe do të jetë diçka shumë e rëndësishme, që është e nevojshme dhe duhet ta mbrojmë. Kemi filluar me programin bachelor dhe kemi vazhduar me programin master në pjesën e energjisë së ripërtërishme dhe tregut të energjisë, tani e kemi kthyer në konceptin e ri,” ka thënë ai.

Rektori Hajrizi shtoi se UBT ka përqendruar prioritetet e saj në sektorin e energjisë, duke e konsideruar atë si një nga sektorët më të rëndësishëm për zhvillimin e Kosovës. Ai theksoi se krijimi i Fakultetit të Inxhinierisë së Energjisë ka si qëllim të përgatisë kuadro të aftë dhe të kualifikuar që mund të kontribuojnë në realizimin e strategjive afatgjata të tranzicionit energjetik.

Kjo iniciativë është pjesë e një qasjeje më të gjerë strategjike që ka për qëllim të sigurojë një bazë të qëndrueshme arsimore dhe profesionale për sektorin energjetik në Kosovë. Hajrizi shpjegoi se UBT ka krijuar një kurrikulum të avancuar që ofron programe studimi në nivelin bachelor dhe master për fushat si energji e rinovueshme, menaxhim i energjisë, dhe tregu i energjisë.

Angazhimi i UBT-së për zhvillimin e sektorit të energjisë

Rektori Hajrizi ka përmendur gjithashtu se përmes krijimit të Fakultetit të Inxhinierisë së Energjisë, UBT dëshiron të ofrojë një kontribut të drejtpërdrejtë në zhvillimin e politikave energjetike dhe në mbështetje të agjendës kombëtare për të arritur qëllimet e tranzicionit energjetik. Sipas tij, edukimi dhe formimi i specialistëve të rinj në këtë fushë është thelbësor për të garantuar që Kosova të jetë e aftë të përballojë sfidat që do të sjellë kalimi në burime të rinovueshme dhe teknologji të reja energjetike.

Përmes këtyre nismave, UBT ka vendosur një gur themeli për një të ardhme energjetike të qëndrueshme për Kosovën. Fakulteti i Inxhinierisë së Energjisë jo vetëm që do të sigurojë profesionistë të kualifikuar për të adresuar sfidat e tranzicionit energjetik, por gjithashtu do të luajë një rol të rëndësishëm në promovimin e kërkimeve dhe zhvillimit të teknologjive të reja, që janë jetike për përmirësimin e sistemeve energjetike në vend./UBTNews/D.E./

Lajmet

QKUK përfundon verifikimin e pronësisë, paralajmëron rrënimin e objekteve pa leje në oborr

Published

on

By

Qendra Klinike Universitare e Kosovës (QKUK) ka përfunduar verifikimin e pronësisë së oborrit të saj dhe ka paralajmëruar se së shpejti do të nisë lirimin e hapësirave të uzurpuara prej shumë vitesh, duke rrënuar objektet e ndërtuara pa leje.

Ky hap vjen pas punës së një komisioni të posaçëm të formuar në mars të këtij viti, i cili në bashkëpunim me Drejtorinë e Kadastrit të Komunës së Prishtinës, përmes ortofotove dhe planeve kadastrale, ka vërtetuar gjendjen pronësore. “Sipas të dhënave kadastrale, brenda oborrit të QKUK-së nuk figuron asnjë pronë private”, thuhet në njoftimin zyrtar të këtij institucioni.

Para marrjes së vendimit për ndërhyrje, institucioni u ka dërguar dy njoftime zyrtare shfrytëzuesve të lokaleve afariste dhe kioskave që veprojnë brenda këtij perimetri, duke kërkuar dëshmi mbi bazën ligjore të shfrytëzimit të hapësirave.

Megjithatë, nga QKUK-ja bëhet e ditur se asnjëri prej shfrytëzuesve nuk ka paraqitur certifikatë pronësie apo dëshmi se objekti është në proces legalizimi, ndërsa dokumentet e dorëzuara kanë rezultuar të jenë kontrata të skaduara dhe aktvendime të paregjistruara në kadastër.

Procesi i lirimit të këtyre hapësirave ka marrë mbështetje edhe në terren nga Inspektorati i Ministrisë së Mjedisit, Planifikimit Hapësinor dhe Infrastrukturës (MMPHI), i cili gjatë inspektimeve të ditëve të fundit i ka vërtetuar të njëjtat gjetje.

“Me konfirmimet kadastrale dhe rekomandimet zyrtare si nga Inspektorati Komunal, ashtu edhe nga ai i MMPHI-së, menaxhmenti i QKUK-së tashmë ka në dorë të gjitha instrumentet ligjore dhe do t’i përdorë për t’ua kthyer pacientëve e qytetarëve pronën publike”, ka theksuar ky institucion. /E.A/

Continue Reading

Lajmet

KEDS: Rikthehet energjia elektrike për rreth 80 për qind të konsumatorëve të prekur nga erërat e forta

Published

on

By

Kompania Kosovare për Distribuim me Energji Elektrike (KEDS) ka njoftuar se, përkundër erërave të fuqishme që shkaktuan dëmtime në rrjetin shpërndarës, furnizimi me energji elektrike është normalizuar për rreth 80 për qind të konsumatorëve të prekur brenda tri orëve të para pas qetësimit të motit.

Ndër zonat më të prekura nga moti i ligë kanë qenë Prishtina, Gjakova, Dragashi, Prizreni, Suhareka, Kamenica, Gjilani, Kaçaniku, Lipjani, Shtimja, Drenasi, Obiliqi, Fushë Kosova, Podujeva dhe Ferizaj.

Sipas KEDS-it, paralelisht me rikthimin e energjisë për shumicën e konsumatorëve, janë lokalizuar defektet në shtylla dhe përçues në pothuajse të gjitha pikat e rrjetit ku janë evidentuar dëmtime.

Ekipet në terren po vazhdojnë punën intensive për sanimin e plotë të problemeve dhe rikthimin e rregullt të furnizimit për të gjithë konsumatorët./E.A/

Continue Reading

Lajmet

Nga 18 vjet burgim për Ilir dhe Rrahim Abdullahun për vrasjen e policit Triumf Riza

Published

on

By

Gjykata Themelore në Prishtinë ka shpallur të premten aktgjykimin dënues ndaj Ilir dhe Rrahim Abdullahut, duke i dënuar me nga 18 vjet burgim secilin për vrasjen e zyrtarit policor, Triumf Riza. Kryetari i trupit gjykues, Avni Syla, bëri të ditur se gjykata i shpalli të akuzuarit fajtorë për kryerjen në bashkëkryerje të veprës penale “Vrasje e rëndë”, bazuar në aktakuzën e Prokurorisë Speciale.

Sipas vendimit të gjykatës, Ilir Abdullahut i është vazhduar masa e paraburgimit deri në plotfuqishmërinë e aktgjykimit, ndërsa e njëjta masë e paraburgimit i është caktuar edhe Rrahim Abdullahut. Gjatë seancës së shpalljes së vendimit, në sallë ishte i pranishëm vetëm i akuzuari Ilir Abdullahu i shoqëruar nga avokati i tij, Ramë Dreshaj, ndërsa Rrahim Abdullahu mungoi dhe u përfaqësua nga avokatja Agnesa Salihu. Në seancë mungoi po ashtu edhe prokurorja e rastit, Arbëresha Shala.

Zyrtari policor Triumf Riza u vra më 30 gusht të vitit 2007 në lagjen “Dardania” në Prishtinë. /Ekonomia Online/

Continue Reading

Lajmet

AKB: Nga 7.16 miliardë euro remitanca në pesë vjet e gjysmë

Published

on

By

Aleanca Kosovare e Bizneseve (AKB) ka shprehur shqetësimin për mënyrën se si po shfrytëzohet kapitali i diasporës në vend, duke vlerësuar se dërgesat e mërgimtarëve po mbeten kryesisht të orientuara drejt shpenzimeve të përditshme dhe sektorit të ndërtimit, në vend se të kanalizohen në zhvillimin e industrisë dhe prodhimit vendor.

Sipas një vlerësimi të kësaj organizate, gjatë periudhës nga viti 2021 deri në qershor të vitit 2026, Kosova ka pranuar gjithsej rreth 7.16 miliardë euro remitanca, prej të cilave rreth 80 për qind ose afro 5.73 miliardë euro janë shpenzuar në konsum, patundshmëri dhe ndërtim. Ndërkohë, vetëm 2 për qind e këtij kapitali, që përkthehet në rreth 143 milionë euro, është investuar në biznes, industri dhe prodhim, kurse 18 për qind e mbetur ka shkuar në destinime të tjera.

Të dhënat e prezantuara nga AKB-ja tregojnë një trend të vazhdueshëm të rritjes së dërgesave të diasporës ndër vite, duke filluar nga 1.15 miliardë euro në vitin 2021, 1.22 miliardë euro në vitin 2022, 1.33 miliardë euro në vitin 2023 dhe 1.35 miliardë euro në vitin 2024.

Kjo rritje ka vazhduar edhe në vitin 2025, kur remitancat arritën në 1.4 miliardë euro, ndërsa vetëm në gjashtëmujorin e parë të vitit 2026 në vend kanë hyrë rreth 690.7 milionë euro. Pavarësisht këtij potenciali të lartë financiar, AKB-ja vlerëson se këto mjete nuk po arrijnë të shndërrohen në motor të zhvillimit ekonomik përmes hapjes së fabrikave të reja apo rritjes së eksporteve.

Për ta ndryshuar këtë gjendje, AKB-ja i ka bërë thirrje Qeverisë së Kosovës që të hartojë një strategji të posaçme për orientimin e kapitalit të mërgatës drejt sektorëve prodhues, teknologjisë dhe eksportit.

Kryetari i kësaj organizate, Agim Shahini, ka kërkuar nga institucionet që të krijojnë një klimë më të favorshme investuese përmes garantimit të sigurisë juridike, ofrimit të lehtësirave fiskale dhe zbatimit të politikave konkrete mbështetëse, duke theksuar se vendi ka nevojë për investime që gjenerojnë fabrika dhe vende të reja pune, e jo vetëm mjete për konsum. /E.A/

 

 

 

Continue Reading

Të kërkuara