Studentja e nivelit master në programin Arkitekturë dhe Planifikim Hapësinor në UBT, Sihana Metrama pas suksesit të arritur përgjatë studimeve në nivelin bachelor është punësuar në cilësinë e arkitektes në studion e arkitekturës, ndërtimit dhe dizajnit të enterierit “Maden Group”.

Mbështetja dhe angazhimi i profesorëve, infrastruktura moderne e UBT-së, si dhe kurrikula e veçantë e programit Arkitekturë dhe Planifikim Hapësinor, sipas studentes Sihana Metrama, kanë qenë ndër pikat kryesore të formimit të saj si arkitekte.

“Rrugëtimi i përbashkët me studentët e tjerë të të njëjtit program, si dhe ndikimi dhe mbështetja e profesorëve të kualifikuar përgjatë studimeve të mia akademike, më kanë ndihmuar në zgjerimin e njohurive përmes bashkëpunimit konstruktiv, teknikave dhe përvojës së tyre shumëvjeçare”, ka thënë Metrama.

Sihana ka vlerësuar se ka përfituar shumë nga eksperiencat e ndryshme përgjatë studimeve bachelor, sikurse vizitat studimore, punëtoritë në kuadër të lëndëve praktike, ligjëratat tematike nga profesorë ndërkombëtarë, si dhe pjesëmarrja në konferenca e forume të ndryshme rreth fushës së arkitekturës.

“Përveç ngritjes akademike, UBT më ka ofruar eksperienca nga më të ndryshmet, të cilat i kanë karakterizuar studimet e mia akademike dhe i kanë bëre ato të rëndësishme për rrugëtimin tim si arkitekte”, është shprehur ajo.

Studentët e vitit të tretë të Fakultetit Shkenca të Ushqimit dhe Bioteknologjisë në UBT, të shoqëruar nga profesori Mufail Salihaj, kanë zhvilluar një vizitë studimore në Terminalin Doganor.

Në kuadër të kësaj vizite, studentët kanë pasur mundësi të shohin nga afër procedurat e kontrollit të cilësisë dhe sigurisë së ushqimit në Terminalin Doganor, si dhe të njihen me angazhimin dhe punën e stafit.

Kjo vizitë, në kuadër të lëndëve praktike në Fakultetin Shkenca të Ushqimit dhe Bioteknologji në UBT, i ka ndihmuar studentët që të përfitojnë dhe përforcojnë njohuritë e tyre rreth fushës.

Në Parkun Shkencor Inovativ të UBT-së në Lipjan, Fakulteti Inxhinieri Ndërtimore (Ndërtimtari) dhe Infrastrukturë zhvilloi një debat konstruktiv rreth rëndësisë së trajtimit institucional dhe profesional të vërshimeve dhe përmbytjeve në nivel vendi.

Debatin e hapi dekani i Fakultetit Inxhinieri Ndërtimore (Ndërtimtari) dhe Infrastrukturë në UBT, Muhamet Ahmeti, i cili i falënderoi të pranishmit për angazhimin dhe përkushtimin e tyre për të dhënë ide dhe mendime rreth faktorëve dhe pasojave që sjellin vërshimet.

Profesori Hazir Çadraku përgjatë diskutimit të tij në kuadër të këtij debati përmendi disa faktorë që kontribuojnë në shfaqjen e vërshimeve dhe përmbytjeve, siç janë: klima, ndryshimet klimatike, ndërtimi gjeologjik, gjeometria e ujëmbledhësit lumor-ujor, përdorimi i tokës dhe morfologjia e luginave lumore.

Ndër të tjera, profesori Skender Bublaku në kuadër të diskutimit dhe prezantimit të tij për të gjeturat e shkaqeve dhe pasojave që vijnë nga vërshimet, theksoi nevojën e analizës së faktorëve natyrorë dhe efekteve të mundshme të ndryshimeve klimatike, instalimit të stacioneve monitoruese të reshjeve dhe rrjedhjeve, përgatitjes së hartave të rrezikut nga përmbytjet, krijimit të digave rrjedhëse për kontrollin e përmbytjeve, si dhe të pellgjeve për mbrojtje nga përmbytjet.

Në këtë debat mori pjesë edhe drejtorja e Drejtorisë për Mbrojtje dhe Shpëtim në Komunën e Rahovecit, Besmire Bytyçi, si dhe profesorë dhe studentë të shumtë të UBT-së, ku përmes pyetjeve dhe interaktivitetit të tyre u nxorën përfundime konkrete rreth parandalimit të vërshimeve dhe përmbytjeve në nivel vendi.

Në Parkun Shkencor Inovativ të UBT-së në Lipjan, qëndroi për vizitë Drejtori i Bankës Botërore për Kosovë dhe Maqedoni të Veriut, Massimiliano Paolucci, me ç’rast u zhvillua një diskutim i hapur rreth strategjisë së Bankës Botërore për Kosovën për periudhën 2023-2027.

Në këtë diskutim në panel mori pjesë edhe rektori i UBT-së, Prof. Dr. Edmond Hajrizi, i cili falënderoi Drejtorin e Bankës Botërore për Kosovë dhe Maqedoni të Veriut, Massimiliano Paolucci, për prezantimin e tij dhe vizitën në UBT, njëherit e njoftoi atë rreth të arriturave të UBT-së dhe vizionit për të krijuar hapësira të reja për të rinjtë në fushën e arsimit, shkencës dhe teknologjisë, si dhe për hapjen e sa më shumë vendeve të reja të punës.

Drejtori i Bankës Botërore për Kosovë dhe Maqedoni të Veriut, Massimiliano Paolucci foli rreth strategjisë së Bankës Botërore për Kosovën për periudhën 2023-2027, duke prezantuar para të pranishmëve kornizën e re të partneritetit të vendit (Country Partnership Framework (CPF)) për Kosovën, si dhe trendet kryesore të zhvillimit në vend.

Sipas Paolucci-t, në Kosovë është bërë progres i konsiderueshëm në tejkalimin e trashëgimisë së luftës, progres i qëndrueshëm ekonomik që nga pavarësia, teksa si trende të tjera të zhvillimit konsiderohen rimëkëmbja ekonomike pas COVID-19, kalimi gradual nga një marrëse e remitancave nga diaspora në një furnizuese të shërbimit për diasporën e saj kryesisht me bazë në Bashkimin Evropian, si dhe progresi i konsiderueshëm në rritjen e pjesëmarrjes dhe përfaqësimit politik të grave.

Paolucci njashtu theksoi se për të arritur progres të qëndrueshëm në reduktimin e varfërisë dhe prosperitetin e përbashkët, Kosova duhet të kalojë në një model të rritjes konkurruese që përmirëson bilancin tregtar dhe krijon më shumë vende pune.

Massimiliano Paolucci është shtetas italian me më shumë se njëzet vjet përvojë pune në zhvillimin ekonomik, teksa në një kohë ishte përfaqësues special i Grupit të Bankës Botërore në institucionet Evropiane, NATO, Mbretërinë e Belgjikës dhe Dukatin e Madh të Luksemburgut, një post që ai e ka mbajtur që nga 1 nëntori 2013.