Prof. Jeta Kiseri Kubati, nga Fakulteti i Stomatologjisë në UBT, ka përfaqësuar me dinjitet institucionin në njërin nga ngjarjet më prestigjioze në fushën e ortodoncisë – Kongresin Evropian të Ortodoncisë (EOS), që po mbahet këtë javë në qytetin historik të Krakowit, Poloni.

Në këtë kongres, i cili mbledh çdo vit profesionistët, akademikët dhe studiuesit më të njohur të fushës nga e gjithë Evropa dhe më gjerë, Prof. Kiseri Kubati prezantoi dy punime shkencore të rëndësishme që kanë në fokus trajtimet ortodontike dhe praktikën klinike bashkëkohore.

Punimi i parë, me titull:

“Cost-minimisation analysis of vacuum-formed retainers versus bonded lingual braided rectangular and multistranded round wire retainers in the mandible over a two-year period”, është rezultat i një bashkëpunimi ndërkombëtar, dhe sjell një analizë të thelluar ekonomike dhe klinike të metodave të ndryshme për ruajtjen e rezultateve ortodontike pas trajtimit.

Punimi i dytë, i realizuar në bashkëpunim me Fakultetin e Stomatologjisë të Maqedonisë së Veriut, ka për titull:

“Comparison of retention practice of orthodontists in two neighboring countries on Balkans – Kosova and North Macedonia”. Ky studim krahason praktikën e ruajtjes ortodontike në dy vende fqinje të Ballkanit, duke identifikuar ngjashmëritë dhe dallimet në qasjet profesionale, si dhe potencialin për harmonizim të mëtejshëm të standardeve klinike në rajon.

Pjesëmarrja e Prof. Kiseri Kubati në këtë kongres prestigjioz përfaqëson një sukses të madh jo vetëm për UBT-në, por edhe për avancimin e shkencës stomatologjike në Kosovë, duke dëshmuar angazhimin e palëkundur të institucionit për kërkimin shkencor, bashkëpunimin ndërkombëtar dhe edukimin e bazuar në praktikat më të mira globale.

Në kuadër të bashkëpunimeve akademike dhe angazhimit për ofrimin e njohurive me rëndësi globale, në UBT u mbajt një ligjëratë tematike me Dr. Elmi Berishën, President i Federatës Panshqiptare VATRA në ShBA dhe një figurë e njohur në fushën e politikës dhe sigurisë ndërkombëtare.

Ligjërata ishte e dedikuar për studentët e programit Studime të Sigurisë në UBT dhe u fokusua në sfidat aktuale të sigurisë globale, me theks të veçantë në rolin e politikës amerikane në adresimin e tyre. Dr. Berisha ndau një analizë të thelluar mbi zhvillimet në skenën ndërkombëtare, përfshirë rivalitetin mes fuqive të mëdha, kërcënimet bërthamore, sigurinë kibernetike dhe transformimin e arkitekturës globale të sigurisë.

Pjesë e rëndësishme e diskutimit ishte ndikimi i lobit shqiptaro-amerikan në avancimin e kauzës shqiptare, si dhe rëndësia e aleancës së palëkundur mes Kosovës dhe Shteteve të Bashkuara të Amerikës. Studentët patën mundësi të shtrojnë pyetje dhe të zhvillojnë një dialog të drejtpërdrejtë me Dr. Berishën, duke marrë përgjigje të argumentuara dhe perspektiva të vlefshme mbi çështje kyçe të sigurisë dhe politikës ndërkombëtare.

Në kuadër të Projektit Evropian SHAPE, si pjesë e WP5, u organizua seminari i parë me titull “Grupmoshat – Të rritur të shëndetshëm, rritja dhe zhvillimi, plakja dhe të moshuarit.” Ligjërues në këtë seminar ishin profesorët Robert Csapo dhe Barbara Wessner nga Universiteti i Vjenës, Austri.

Profesori Robert Csapo në prezantimin e tij ofroi një pasqyrë të gjerë lidhur me trendet e aktivitetit fizik, fitnesit dhe lidhjen me shëndetin tek fëmijët. Gjithashtu, në ligjëratën e tij, prof. Csapo sugjeroi praktika të mira dhe alternativa për rritjen e nivelit të aktivitetit fizik tek fëmijët.

Prezantimi i profesoreshës Barbara Wessner u përqendrua në rolin e ushtrimeve në plakjen e shëndetshme. Ajo filloi duke ofruar një perspektivë mbi jetëgjatësinë në vendet e Bashkimit Europian dhe Ballkan, dhe pastaj foli për ndryshimet fiziologjike që ndodhin gjatë plakjes si dhe rëndësinë e ushtrimeve për personat e moshuar.

Seminari u mbyll me diskutime të frytshme nga pjesëmarrësit, të cilët ishin të pranishëm fizikisht dhe online, duke nxjerrë përfundime që do të kontribuojnë në përmirësimin e situatës në shtetet pjesëmarrëse të rajonit në projektin SHAPE.

Në kuadër të lëndëve Marketing, Menaxhimi i Projekteve dhe Projekt, studentët e vitit të parë dhe të tretë të Fakultetit të Menaxhimit, Biznesit dhe Ekonomisë (MBE) të UBT-së, të udhëhequr nga profesoresha Gonxhe Beqiri dhe profesoresha Ermira Shehu, realizuan një vizitë studimore në kompaninë e njohur vendore Viva Fresh Store, konkretisht në zyret kryesore dhe qendrën logjistike të saj në Lipjan.

Kjo vizitë përbën një ndërthurje të rëndësishme të teorisë me praktikën, duke u ofruar studentëve një përvojë unike për t’u njohur nga afër me strukturën organizative, proceset e brendshme të menaxhimit dhe qasjet e avancuara të marketingut që kanë kontribuar në suksesin e kësaj ndërmarrjeje lider në sektorin e shitjes me pakicë në Kosovë.

Gjatë vizitës, studentët patën nderin të takohen me themeluesin dhe CEO-n e kompanisë, z. Xhevdet Rexhepi, si dhe me përfaqësues të departamenteve kyçe si ai i Burimeve Njerëzore, Marketingut dhe Logjistikës. Në një atmosferë të hapur dhe interaktive, studentëve iu prezantuan aspektet praktike të funksionimit të kompanisë, sfidat me të cilat është përballur që nga themelimi, dhe strategjitë që janë ndjekur për të ndërtuar një brand të qëndrueshëm dhe të besueshëm.

Përgatitje për tregun e punës dhe lidhja me industrinë

Një pjesë e veçantë e vizitës iu kushtua temave të punësimit dhe praktikës profesionale për studentët e UBT-së. Përfaqësues të departamentit të Burimeve Njerëzore ndanë me studentët informacione të rëndësishme mbi procedurat e rekrutimit, aftësitë dhe kompetencat që kërkohen nga kandidatët, si dhe mundësitë që ofrohen për përfshirje në akademitë e trajnimit të organizuara nga kompania.

Studentët treguan interes të lartë, duke parashtruar pyetje rreth vizionit strategjik të Viva Fresh Store, aplikimit të inovacionit dhe digjitalizimit në proceset e përditshme, zhvillimit profesional të stafit dhe angazhimit të kompanisë në përgjegjësi sociale.

Zhvillimi i kompetencave profesionale përmes përvojës në terren

Vizita përfundoi me një tur në ambientet operative të qendrës logjistike të Viva Fresh Store, ku studentët patën mundësinë të shohin nga afër funksionimin praktik të logjistikës moderne, proceset e menaxhimit të stokut, sistemet e furnizimit dhe ofrimin e shërbimit ndaj klientit – duke i lidhur drejtpërdrejt konceptet akademike me përvojën reale të menaxhimit të një ndërmarrjeje komplekse.

UBT, përmes aktiviteteve të tilla, afirmon qasjen e tij praktike ndaj mësimdhënies dhe përgatitjes së studentëve për tregun real të punës. Fakulteti MBE mbetet i përkushtuar për të ofruar jo vetëm dije teorike të avancuar, por edhe përvoja reale që nxisin të menduarit kritik, analizën e tregut dhe ndërtimin e kapaciteteve të lidershipit.