Lajmet

Rekord i numrit të policëve të arrestuar dhe suspenduar më 2022

Të njëjtit janë hetuar dhe është marrë masa për vepra penale korruptive.

Published

on

Vitin e kaluar është shënuar numër rekord i arrestimeve dhe suspendimeve të policëve të Kosovës. Të njëjtit janë hetuar dhe është marrë masa për vepra penale korruptive. Vetëm gjatë vitit 2022, janë arrestuar mbi 100 policë, janë proceduar mbi 100 kallëzime penale dhe janë suspenduar 156 prej tyre.

Në intervistën për KosovaPress, kryeshefi ekzekutiv i Inspektoratit Policor, Kushtrim Hodaj flet për operacionet e njohura “Pika 1” dhe “Pika 2”, e po ashtu edhe për rastin e vrasjes së Hamide Magashit, ku u pasua me suspendime në stacionin policor në Lipjan.

Hodaj thotë se numri i ankesave për zyrtarët policorë është i lartë, raste të cila kanë të bëjnë me punën e tyre.

“Kemi pranuar mbi 1600 ankesa, është një shifër relativisht e lartë e numrit të ankesave që tashmë për vite me radhë adresohet edhe në drejtim të punës së policisë. Dhe këto ankesa janë trajtuar, janë trajtuar disa prej tyre që kanë elemente penale, janë trajtuar dhe hetuar penalisht nga hetuesit tanë. Disa prej tyre që janë vlerësuar që kanë elemente të shkeljeve administrative apo disiplinore janë kthyer në polici për trajtim administrativ”, tregon Hodaj.

Sipas tij, vitin e kaluar është numri më i lartë i të arrestuarve dhe të suspenduarve për raste të korrupsionit dhe keqpërdorim të detyrës zyrtare.

“Kemi pasur një ritëm të shtuar të punës dhe të fokusit në rastet e krimeve ekonomike apo raste të korrupsionit dhe të keqpërdorimit të detyrës zyrtare. Mund të themi lirisht që është viti që ka numrin më të lartë të të arrestuarve dhe të suspenduarve, e që kryesisht lidhet me veprat penale korruptive. E përmend këtu rastin e pikave të njohur si ‘Pika 1’ dhe ‘Pika 2’, që ka qenë një operacion i madh i luftës anti-korrupsion i zhvilluar jo vetëm në Kosovë. Ka qenë një rast që e kemi hetuar bashkë edhe me ndihmën e institucioneve të tjera në Kosovë, mirëpo edhe me bashkëpunim ndërkombëtar, në këtë rast me Republikën e Shqipërisë. Janë diku 76 zyrtarë policorë të arrestuar vetëm në këto dy raste. Totali i zyrtarëve të arrestuar ka arritur në 107, që është shifra më e lartë që ka ndodhur ndonjëherë në një vit pune të Inspektoratit Policor të Kosovës”, shton Hodaj.

Duke u ndalur te operacionet e njohura si “Pika 1” dhe “Pika 2”, Hodaj thotë se zyrtarët policorë dyshohet se kanë marrë ryshfetit në këmbim të lejimit të kalimit ilegal të njerëzve dhe mallrave.

“Këtu kanë qenë dyshime që qytetarë, kontrabandistë, njerëz të dyshuar kanë kaluar kufirin në mungesë të dokumentacionit, apo kanë kaluar gjëra ilegale në kufi dhe në këmbim të kësaj, kanë dhënë ryshfet për zyrtarët policorë në ato pika. Ne kemi pasur dyshime dhe në përdorimin e masave të fshehta kemi arritur të dokumentojmë qindra e qindra raste korruptive të zyrtarëve policorë dhe si rezultat i argumentimit të dyshimeve, ne në bashkëpunim me dhe me urdhër të Prokurorisë Speciale, kemi realizuar operacione ku kemi arrestuar këta zyrtarë dhe kemi konfiskuar provat të nevojshme për procedurë penale. Këta janë suspenduar, është dërguar kallëzimi penal në Prokurorinë Speciale. Prokuroria Speciale është duke punuar, është ndoshta pothuajse në përfundim të hetimeve për ngritjen e aktakuzës për pjesën më të madhe të tyre. Dhe këta mbesin të suspenduar derisa të qartësohet përgjegjësia e tyre penale”, shton Hodaj.

Më tej, kryeshefi ekzekutiv i IPK-së deklaron se gjatë vitit 2022 janë suspenduar mbi 150 zyrtarë policorë e po ashtu janë proceduar mbi 100 kallëzime penale.

“Si rezultat i hetimeve të tjera penale dhe kallëzimeve penale që janë ngritur në prokurori është rekomanduar suspendimi te drejtori i përgjithshëm të policisë për 156 zyrtarë që suspendohen për efekte, apo për nevoja të hetimeve që kemi zhvilluar ne. Edhe kjo shifër është ndër më të lartat që ka ndodhur ndonjëherë, si rezultat i rasteve edhe të kufirit që ka qenë rasti më masiv. Janë proceduar mbi 100 kallëzime penale apo raporte të veçanta në prokurori përkatëse të shtetit për këto dhe raste të tjera. Gjithashtu, kemi pasur një dinamikë të re dhe numër të madh inspektimeve, ku kemi inspektuar fushat e ndryshme të menaxhimit policor. Kemi realizuar pesë inspektime që kanë qenë të planifikuara me planin vjetor të inspektimeve, gjithashtu kemi realizuar edhe shtatë inspektime të jashtëzakonshme cilat kanë ndodhur për shkak të ngjarjeve që kanë ndodhur gjatë vitit”, njofton Hodaj.

Ai flet edhe për rastin e 35-vjeçares, Hamide Magashi, e cila gjatë muajit nëntor u vra nga ish-bashkëshorti i saj. Hodaj thekson se ka dyshime të bazuara që disa prej raporteve janë plotësuar pas rastit tragjik.

“Kemi krijuar një grup të veçantë hetimor dhe inspektues, të cilët kanë verifikuar veprimet që janë ndërmarrë prej momentit të paraqitjes së rastit e deri në ditën kritike kur e ndjera është vrarë. Ne kemi gjetur, apo kemi dyshimet tona të bazuara, që disa prej raporteve janë plotësuar pas ndodhjes së rastit tragjik. Dhe kjo për ne ka qenë shqetësuese dhe kjo ka qenë arsyeje që zyrtarët përgjegjës, duke përfshirë edhe komandantin e policisë, është rekomanduar suspendimi për ta. Hetimet janë në zhvillim e sipër dhe për përgjegjësinë përfundimtare të tyre apo të zyrtarëve të tjerë që mund të dalin përgjegjës në këtë rast, sigurisht që do t’i japim në një moment tjetër për shkak se jemi në proces të hetimit”, thekson Hodaj.

Hodaj poashtu bëri të ditur se për rastin e dhunimit të 11-vjecares janë intervistuar të gjithë personat e përfshirë dhe kanë dorëzuar raportin në prokurori.

Lajmet

Kurti pyetet për ngërçin institucional, flet për projektin e banimit në Podujevë

Published

on

By

Kryeministri në detyrë, Albin Kurti, u pyet të martën rreth ngërçit institucional dhe mundësive për zgjidhje pas bllokadës drejt konstituimit të Kuvendit të Kosovës. Por në vend të një përgjigjeje për situatën politike, ai zgjodhi të flasë për projektin e banimit social në Podujevë, ku mori pjesë në ceremoninë e vendosjes së gurthemelit për ndërtimin e objekteve të reja.

Kurti dëgjoi me vëmendje pyetjet e gazetarit, por shmangu komentet për zhvillimet në Prishtinë.

“Vetëm 13 komuna kanë aplikuar për banim të përballueshëm dhe social… për ato çështjet e tjera, në Prishtinë. E këtu jemi për banim”, u shpreh ai, duke e kthyer vëmendjen te projekti i ndërmarrë në Podujevë.

Continue Reading

Lajmet

Mbi Bondsteel fluturojnë avionë ushtarakë nga tri shtete partnere

Published

on

By

Trupa të aviacionit ushtarak nga Shtetet e Bashkuara të Amerikës, Zvicra dhe Hungaria kryen të martën fluturime të përbashkëta mbi kampin Bondsteel, në kuadër të misionit paqeruajtës në Kosovë.

KFOR-i njoftoi përmes një postimi në Facebook se fluturimi u realizua me caktim të Komandës Rajonale dhe përfshiu avionë të ndryshëm ushtarakë të vendeve pjesëmarrëse: SHBA me UH-60 Blackhawk, Hungaria me H-145M dhe Zvicra me AS-532 Cougar.

Në njoftim thuhet se këto aktivitete janë pjesë e angazhimit të vazhdueshëm për ruajtjen e sigurisë dhe stabilitetit në rajon.

“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë, si dhe për të garantuar lirinë e lëvizjes, në çdo kohë dhe në mënyrë të paanshme,” thuhet në deklaratë.

KFOR-i thekson se mbetet i përkushtuar për bashkëpunim të ngushtë me Policinë e Kosovës dhe misionin e EULEX-it në funksion të sigurisë dhe rendit publik.

Continue Reading

Lajmet

Kosova ndalon përkohësisht importin e mishit të pulës nga Brazili për shkak të gripit të shpendëve

Published

on

By

Agjencia e Ushqimit dhe Veterinarisë (AUV) ka njoftuar se nga data 20 maj 2025, ndalohet përkohësisht importi i mishit të pulës dhe produkteve të shpendëve që vijnë nga Brazili. Kjo masë vjen si pasojë e shpërthimit të gripit të shpendëve (H5N1), i konfirmuar më 16 maj në një fermë komerciale në shtetin Rio Grande të Brazilit.

Sipas AUV-së, qëllimi kryesor i këtij ndalimi është mbrojtja e shëndetit publik në Kosovë dhe parandalimi i përhapjes së gripit të shpendëve në territorin tonë. Gripi i shpendëve është një sëmundje virale shumë ngjitëse për shpendët dhe në raste të rralla mund të kalojë edhe tek njerëzit. Megjithatë, deri më tani nuk ka dëshmi që konsumimi i mishit apo vezëve të shpendëve shkakton infeksion tek njerëzit.

Vendimi i AUV-së është në përputhje me masat e ngjashme të marra nga Bashkimi Evropian, Kina dhe vende të tjera, të cilat gjithashtu kanë pezulluar importin e produkteve të pulës nga Brazili pas shpërthimit të gripit.

Ndalimi i importit do të vazhdojë të jetë në fuqi deri në një njoftim të ri, në varësi të zhvillimeve epidemiologjike në Brazil dhe analizave të mëtejshme të rrezikut nga Agjencia e Ushqimit dhe Veterinarisë.

Continue Reading

Lajmet

Policia arreston të dyshuarin për sulm seksual në Gjilan

Published

on

By

Një person është arrestuar të hënën në Gjilan nën dyshimin për përfshirje në një rast të sulmit seksual ndaj një gruaje.

Sipas raportit 24-orësh të Policisë së Kosovës, viktima ishte e paraqitur më parë si person i zhdukur. Ngjarja është raportuar të ketë ndodhur më 12 maj, rreth orës 07:40.

Me vendim të prokurorit, i dyshuari është dërguar në mbajtje, ndërsa rasti është duke u trajtuar nga organet kompetente.

Continue Reading

Të kërkuara