Presidenti i zgjedhur amerikan, Donald Trump, do të emërojë Elon Muskun në një rol që synon të krijojë një qeveri më efikase, duke i dhënë edhe më shumë ndikim njeriut më të pasur në botë, i cili dhuroi miliona dollarë për të ndihmuar Trumpin që të fitonte zgjedhjet presidenciale.

Musk dhe ish-kandidati republikan për president, Vivek Ramaswamy, do të drejtojnë së bashku një Departament të sapokrijuar për Efikasitetin e Qeverisë, entitet, që sipas Trumpit, do të operojë jashtë ekzekutivit amerikan.

Përmes një deklarate, Trump tha se Musk dhe Ramaswamy, “do t’i mundësojnë administratës sime që të zhdukë burokracinë qeveritare, që të zvogëlojë numrin e rregulloreve të tepërta, që të shkurtojë shpenzimet e kota dhe që të ristrukturojë agjencitë federale”.

Trump tha se ky departament i ri do të realizojë ëndrrat e kamotshme të republikanëve dhe do të ofrojë “këshilla dhe udhëzime nga jashtë Qeverisë”, duke sinjalizuar se rolet e Muskut dhe Ramaswamyt mund të jenë joformale dhe nuk do të ketë nevojë për miratimin e Senatit për emërimin e tyre. Një gjë e tillë do t’i mundësonte Muskut që të mbeste në krye të kompanisë së tij për makina elektrike, Tesla, të platformës sociale X, dhe të kompanisë së raketave, SpaceX.

Departamenti i ri do të punojë me Shtëpinë e Bardhë dhe Zyrën për Menaxhim dhe Buxhet për të “udhëhequr reformat në shkallë të gjerë dhe për të krijuar një qasje të formës sipërmarrëse” ndaj Qeverisë që nuk është parë më parë, tha Trump.

Puna e këtij departamenti, sipas Trumpit, do të përfundonte më 4 korrik 2026, në 250-vjetorin e nënshkrimit të deklaratës së pavarësisë së SHBA-së.

Musk, i listuar si personi më i pasur në botë nga revista Forbes, veçse pritej të përfitonte nga fitorja e Trumpit, pasi sipërmarrësi miliarder pritet të ushtrojë ndikim të jashtëzakonshëm për të ndihmuar kompanitë e tij dhe për të siguruar trajtim më të favorshëm nga Qeveria.

Musk ka dhënë miliona dollarë për të mbështetur fushatën e Trumpit për zgjedhjet presidenciale dhe të dy kanë pasur edhe dalje publike.

Trump i ka lidhur përpjekjet për efikasitet me Projektin Manatan, ndërmarrja e SHBA-së për krijimin e bombës bërthamore që ndihmoi në përfundimin e Luftës së Dytë Botërore, teksa Musk premtoi se do të ketë transparencë.

“Të gjitha veprimet e Departamentit për Efikasitet të Qeverisë do të publikohen online me transparencë maksimale”, tha Musk në X, duke i kërkuar publikut që të japë këshilla.

“Ne po ashtu do të merremi me shpenzimet mëdha të dollarëve të taksave tuaja. Do të jetë jashtëzakonisht tragjike dhe jashtëzakonisht argëtuese”, tha Musk.

Në tetor, gjatë një tubimi të Trumpit, Musk kishte deklaruar se buxheti federal mund të ulet “për të paktën” 2 trilionë dollarë. Sipas Zyrës së Buxhetit në Kongres, shpenzimet diskrecionale, përshirë shpenzimet e mbrojtjes, vlerësohet se janë 1.9 trilion dollarë nga 6.75 trilionë dollarë sa janë shpenzimet e përgjithshme federale për vitin fiskal 2024.

“Paratë tuaja po shpërdorohen dhe Departamenti për Efikasitet të Qeverisë do ta rregullojë këtë problem”, tha Musk gjatë tubimit.

Ndërkaq, Ramaswamy është themelues i një kompanie farmaceutike. Ai kishte garuar kundër Trumpit për nominimin e republikanëve, por kur u tërhoq nga gara, ai mbështeti ish-presidentin Trump.

Në një libër të publikuar më 2021, Ramaswamy ka kritikuar vendimet e disa kompanive të mëdha që bazojnë strategjinë e tyre të biznesit rreth drejtësisë sociale dhe shqetësimeve për ndryshimet klimatike.

Ramaswamy tha se ky emërim nënkupton se ai do të tërhiqet nga synimi për t’u emëruar anëtar i Senatit në Ohajo./REL/

Njësitë e Koresë së Veriut kanë filluar të luftojnë përkrah njësive ruse, tha një zëdhënës i Departamentit të Shtetit gjatë një konference për shtypin të martën.

“Mbi 10,000 ushtarë të Koresë së Veriut janë dërguar në Rusinë lindore dhe shumica e tyre janë zhvendosur në rajonin e largët perëndimor të Kurskut, ku kanë filluar të angazhohen në operacione luftarake me forcat ruse”, u tha gazetarëve zëdhënësi Vedant Patel.

Një ditë më parë, Presidenti ukrainas Volodymyr Zelenskyy tha se trupat ukrainase po përballeshin me 50,000 trupa, përfshirë 11,000 trupa të Koresë së Veriut të dislokuara nga Rusia në rajonin e saj të Kurskut, megjithëse Moska nuk e konfirmon apo mohon përfshirjen e tyre.

Sekretari amerikan i Mbrojtjes, Lloyd Austin bisedoi të martën me homologun e tij ukrainas Rustem Umerov “për të diskutuar dinamikën e fushëbetejës dhe për të ofruar një përditësim mbi ndihmën amerikane të sigurisë” për vendin e Evropës Lindore, sipas sekretarit të shtypit të Pentagonit, gjeneralmajor Pat Ryder.

Zoti Ryder tha se “sekretari rikonfirmoi angazhimin e Presidentit Biden për të rritur ndihmën e sigurisë për Ukrainën”.

Pentagoni informoi gjithashtu për sasinë e fondeve që mbeten në dispozicion për ndihmën ushtarake për Ukrainën. Kanë mbetur rreth 7.1 miliardë dollarë nën fondin që autorizohet nga presidenti, ku përfshihen 4.3 miliardë dollarë të miratuara nga Kongresi në prill, plus 2.8 miliardë dollarë që u bënë të disponueshme pas përllogaritjeve të reja.

Për më tepër, ka edhe rreth 2.2 miliardë dollarë në dispozicion nën programin e Iniciativës për Asistencën e Sigurisë në Ukrainë. Gjenerali Ryder theksoi sërish se Shtetet e Bashkuara do të nxitojnë me ndihmën për Ukrainën dhe do të përdorin të gjitha fondet në dispozicion.

Gjenerali Ryder tha se dy drejtuesit e mbrojtjes folën gjithashtu për pasojat nga përfshirja e mijëra trupave të Koresë së Veriut, që tani vlerësohen të jenë kryesisht në rajonin perëndimor të Kurskut. Ndërkohë, një sulm ajror rus në qytetin e lindjes së Presidentit ukrainas Zelenskyy vrau një nënë dhe tre fëmijët e saj dhe la 14 të tjerë të plagosur, thanë zyrtarët të martën.

Ministri i Brendshëm Igor Klymenko tha se operacionet e kërkim-shpëtimit kanë përfunduar pasi një ndërtesë banimi në Kryvyi Rih u godit një ditë më parë. Prokuroria e Përgjithshme tha se janë vrarë një grua 32-vjeçare dhe fëmijë të moshave 10 vjeç, 2 vjeç dhe 2 muajsh.

Një përleshje mes të burgosurish në Burgun Litoral në Guayaquil të Ekuadorit është kthyer në një ngjarje tragjike, duke shkaktuar të paktën 15 viktima dhe 14 të plagosur. Konflikti, i cili ka përfshirë grupe rivale brenda këtij institucioni të mbipopulluar, u shndërrua në një masakër e cila ka tronditur vendin dhe komunitetin ndërkombëtar.

Drejtoria e burgjeve në Ekuador ka konfirmuar bilancin e rëndë të viktimave dhe ka kërkuar ndihmën e autoriteteve për të hetuar shkaqet dhe pasojat e kësaj përplasjeje të dhunshme. Sipas autoriteteve, konflikti shpërtheu papritmas mes anëtarëve të bandave rivale, të cilat prej kohësh kanë kthyer burgun në një zonë lufte për kontrollin e aktivitetit kriminal, duke përfshirë trafikun e drogës.

Burgu Litoral, i cili është institucioni më i madh penal në Ekuador dhe strehon rreth 6,800 të burgosur, përballet shpesh me përleshje të ashpra mes të dënuarve. Shumica e tyre janë anëtarë të grupeve kriminale të lidhura me trafikun ndërkombëtar të drogës, duke bërë që burgu të kthehet në një pikë të nxehtë të dhunës dhe luftës për dominim territorial. Në muajt e fundit, ngjarje të ngjashme kanë ndodhur në disa nga burgjet kryesore të Ekuadorit, duke e shtyrë qeverinë të marrë masa për të kontrolluar dhunën.

Viteve të fundit, Ekuadori është shndërruar në një qendër të rëndësishme për trafikun e drogës në Amerikën Latine dhe një nga vendet më të dhunshme në botë. Situata e rënduar në burgje është një pasqyrim i përkeqësimit të sigurisë në të gjithë vendin, i cili po përballet me rritje të krimit të organizuar dhe dhunës në rrugë.

Autoritetet janë duke ndërmarrë masa shtesë për të siguruar burgun dhe për të shmangur një përshkallëzim të mëtejshëm të situatës, ndërsa pritet që hetimet të hedhin dritë mbi përgjegjësit dhe mënyrën se si u zhvillua kjo masakër brenda një prej institucioneve më të sigurta të vendit./UBTNews/

Kriptovaluta më e njohur, Bitcoin, gati e ka mbërritur vlerën e 90 mijë dollarëve të martën, duke thyer çdo rekord e duke përjetuar rritje të madhe që kur Donald Trump fitoi zgjedhjet në Shtetet e Bashkuara të Amerikës.

Pritjet janë që administrata e Trumpit të jetë më mikpritëse për botën e kriptovalutave.

Valuta ka përjetuar rritje prej më shumë se 25 për qind që nga dita e zgjedhjeve – 5 nëntori.

Tani ajo ka vlerë prej rreth 89 mijë dollarësh.

Investitorët janë duke derdhur paratë në kompanitë dhe aksionet që konsiderohen “miq” të Trumpit, përfshirë kompaninë e veturave elektrike “Tesla” të Elon Muskut, që e mbështeti publikisht presidentin.