Kryetarja e Kuvendit, Albulena Haxhiu, ka njoftuar se sot në orën 19:00 do të mbahet një seancë e jashtëzakonshme ku do të vendoset për udhëheqjen e komisioneve parlamentare, ndarjen buxhetore për muajin mars dhe miratimin e një rezolute në mbështetje të ish-krerëve të UÇK-së që po gjykohen në Hagë.

Sipas marrëveshjes, Vetëvendosje do të kryesojë nëntë  komisione, PDK tri, LDK dy, ndërsa Lista Serbe dhe Grupi Multietnik nga një.

Haxhiu theksoi se pavarësisht dallimeve politike, pret që të gjitha grupet parlamentare të jenë të unifikuara në mbështetje të luftës së drejtë të UÇK-së.

“Dhe çështja tjetër do të lidhet me rezolutën që ndërlidhet me procesin e padrejtë që po zhvillohet në Hagë ndaj ish-krerëve TË Ushtrisë Çlirimtare të Kosovës, sipas diskutimeve në KRYESINË E Kuvendit ka vullnet nga grupet parlamentare të marrë mbështetjen e Kuvendit të Republikës së Kosovës. Do të ketë paraprakisht një takim të përfaqësuesve të grupeve parlamentare. Por besoj që pavarësisht dallimeve që mund ët kemi për çështje të ndryshme, kur bëhet fjalë për luftën e drejt të UCK dhe në raport me proceset e padrejta që po ndodhin në Hagë duhet të jemi të unifikuar duhet të jemi bashkë”, tha ajo.

Kuvendi i Shqipërisë, ka miratuar një deklaratë përmes së cilës kërkon shpalljen të pafajshëm të drejtuesve të UÇK-së, transmeton KosovaPress.

Përmes deklaratës, e cila bëri bashkë pozitën dhe opozitën në Shqipëri, deputetët shqiptarë shprehin shqetësimin e thellë për kërkesën përfundimtare të Prokurorisë Speciale të Dhomave të Specializuara në Hagë për dënimin e drejtuesve të Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi.

Parlamenti shqiptar rithekson se UÇK ishte një lëvizje legjitime çlirimtare që luftoi për të drejtat themelore të njeriut, për liri, dinjitet dhe vetëvendosje të popullit të Kosovës, në përputhje me parimet e së drejtës ndërkombëtare dhe Kartës së Kombeve të Bashkuara.

Kuvendi i Shqipërisë përmes kësaj deklarate shpreh si në vijim:

1.Mbështetjen e plotë dhe të pakushtëzuar për drejtuesit e Ushtrisë Çlirimtare të Kosovës, të cilët ishin dhe mbeten përfaqësues të aspiratave të drejta të popullit të Kosovës për liri dhe vetëvendosje. Lufta e tyre ishte luftë e drejtë, e mbështetur në parimet universale të të drejtave të njeriut.

2. Kërkesën drejtuar Dhomave të Specializuara në Hagë, komunitetit ndërkombëtar dhe institucioneve të drejtësisë ndërkombëtare që të deklarojnë pafajësinë e Hashim Thaçit, Jakup Krasniqit, Kadri Veselit dhe Rexhep Selimit përmes një procesi të drejtë dhe të paanshëm, që respekton dhe nuk cenon dinjitetin e luftës çlirimtare të popullit të Kosovës, duke mos lejuar që instrumentet e drejtësisë të shndërrohen në mjete për rishkrimin e historisë apo për barazimin e viktimës me agresorin.

3. Kujtimin ndaj bashkësisë ndërkombëtare se lufta e UÇK-së u zhvillua në kushtet kur regjimi i Millosheviçit po kryente spastrim etnik, krime sistematike kundër njerëzimit dhe akte genocidiale ndaj popullatës civile të Kosovës, dhe se ndërhyrja e NATO-s në vitin 1999 konfirmoi legjitimitetin e asaj lufte dhe natyrën kriminale të regjimit të Millosheviçit.

4. Vlerësimin e lartë për dëshmitarët ndërkombëtarë të mbrojtjes, si Wesley Clark e James Rubin, të cilët konfirmuan të drejtën e popullit të Kosovës dhe udhëheqësve të tyre për liri.

5. Solidaritetin e plotë me popullin e Kosovës dhe me familjet e drejtuesve të UÇK-së, duke ritheksuar se kombi shqiptar qëndron i bashkuar në mbrojtjen e të vërtetës historike dhe të dinjitetit të luftës për liri.

6. Angazhimin për të ndërmarrë çdo hap të nevojshëm diplomatik dhe politik në forume ndërkombëtare për të siguruar që e vërteta historike mbi luftën çlirimtare të Kosovës të mos cenohet dhe që drejtësia të ushtrohet në mënyrë të drejtë.

Kuvendi i Republikës së Shqipërisë u bën thirrje institucioneve të shtetit Shqiptar, institucioneve të Republikës së Kosovës dhe diasporës shqiptare që të qëndrojnë të bashkuar në mbrojtjen e së vërtetës, dinjitetit dhe drejtësisë për popullin e Kosovës dhe për drejtuesit e luftës së tyre çlirimtare, Hashim Thaçi, Jakup Krasniqi, Kadri Veseli dhe Rexhep Selimi.

Kuvendi i Republikës së Shqipërisë u rekomandon qeverive të Republikës së Shqipërisë dhe të Republikës së Kosovës të bashkëpunojnë dhe koordinojnë për denoncimin ndërkombëtar të krimeve serbe.

Kjo deklaratë pasqyron vullnetin unanim të Kuvendit të Republikës së Shqipërisë dhe i transmetohet Dhomave të Specializuara në Hagë, Këshillit të Sigurimit të OKB-së, Parlamentit Evropian, Asambleve Parlamentare të NATO-s, OSBE-së dhe Këshillit të Evropës, si dhe të gjitha qeverive mike dhe partnere. /Kosovapress/

Një ditë pas votimit të ekzekutivit të ri, Ambasada e Shteteve të Bashkuara të Amerikës në Kosovë ka reaguar përmes një njoftimi në Facebook, duke shprehur gatishmërinë për bashkëpunim të ngushtë me institucionet e sapoformuara.

Përmes një komunikate, SHBA-ja e ka cilësuar formimin e Kuvendit dhe Qeverisë si një hap të rëndësishëm për vendin.

“Ambasada e SHBA-së mirëpret formimin e Kuvendit dhe Qeverisë së Kosovës. Ne mezi presim të punojmë me qeverinë e re për të çuar përpara prioritetet e përbashkëta, duke përfshirë paqen rajonale, stabilitetin dhe prosperitetin e ndërsjellë ekonomik,” thuhet në reagimin e tyre

Komisioni Qendror i Zgjedhjeve ka miratuar sot (12.02.2026) rekomandimin për 18 kandidatët e radhës, të cilët do të zënë vendet e ministrave të rinj të Qeverisë së Kosovës. Ky vendim vjen pas kërkesës zyrtare të Presidentes së Republikës, Vjosa Osmani, e cila pas votimit të Qeverisë së re, i është drejtuar KQZ-së për të rekomanduar emrat që do të zëvendësojnë deputetët që kanë kaluar në kabinetin e Qeverisë së re.

Sipas rezultateve të zgjedhjeve të 28 dhjetorit 2025, shumica e këtyre zëvendësimeve i takojnë Lëvizjes Vetëvendosje, e cila ka dërguar një numër të madh të deputetëve në kabinetin qeveritar. Për të plotësuar grupin prej 57 deputetësh, në Kuvend do të betohen: Egzon Azemi (në vend të Albin Kurtit), Fahrush Rexhepi (në vend të Glauk Konjufcës), Luan Aliu (në vend të Donika Gërvallës), si dhe Bajram Mavriqi (në vend të Hekuran Muratit).

Lista pasohet me emrat e tjerë që do të plotësojnë radhët e mazhorancës: Driton Hyseni (në vend të Xhelal Sveçlës), Enver Dugolli (në vend të Hajrulla Çekut), Avdullah Klinaku (në vend të Saranda Bogujevcit), Ejup Ahmeti (në vend të Arben Vitisë), Mytaher Haskuka (në vend të Armend Mujës) dhe Bylbyl Sokoli (në vend të Fitore Pacollit).

Gjithashtu, pjesë e legjislaturës së re do të jenë edhe Mimoza Shala, Arijeta Rexhepi, Ilir Qeriqi, Shqipe Isufi, Afërdita Hajrizi dhe Agon Batusha, të cilët zëvendësojnë ministrat e tjerë nga lista e LVV-së. Nga radhët e komuniteteve, KQZ ka rekomanduar Fridon Lalën dhe Lazar Radulović për të plotësuar ulëset e mbetura pas emërimeve në ekzekutiv.

Këta 18 kandidatë pritet të ftohen shumë shpejt në Kuvend për të dhënë betimin solemn, duke i kthyer kështu legjislativit numrin e plotë prej 120 deputetësh dhe duke zyrtarizuar përbërjen e re pas formimit të Qeverisë “Kurti 3”.