Në valën e edicioneve të suksesshme të “Global Fest”, ka përfunduar zyrtarisht edhe Akademia Verore e Aktrimit në UBT. Ky edicion mblodhi studentë dhe të apasionuar pas artit skenik, duke u ofruar atyre një platformë unike të trajnimit intensiv dhe ndërveprimit të drejtpërdrejtë me profesionistë të industrisë së teatrit dhe televizionit.

Si në çdo akademi tjetër verore të organizuar këtë vit nga UBT, ku theksi kryesor u vë mbi praktikën dhe inovacionin, edhe kjo e aktrimit solli një program të pasur e dinamik. I ftuari special i këtij edicioni ishte aktori i mirënjohur Edlir Gashi, i angazhuar në shumë shfaqje teatrore si dhe në disa prej serialeve më të ndjekura vendore.

Gjatë ligjëratave dhe punëtorive të tij, Gashi trajtoi temën qendrore: “Movement, space, and ensemble work” (Lëvizja, hapësira dhe puna në ansambël). Ai zgjodhi të ndajë me studentët eksperiencat e tij të gjata mbi skenën dhe para kamerave, duke u zbërthyer atyre sfidat reale të profesionit të aktorit.

Përtej ligjërimit teorik, akademia u karakterizua nga një ndërveprim i vazhdueshëm artistik. Aktori Gashi i inkuadroi studentët në ushtrime të ndryshme praktike dhe lojëra artistike koncentrimi, të cilat ndihmojnë në lirimin e trupit, zotërimin e hapësirës skenike dhe rritjen e vëmendjes gjatë performancës në grup.

Studentët patën mundësinë të kalojnë nëpër sesione intensive të reflektimeve mbi teknikën e lëvizjes dhe koordinimit, duke i përmbyllur punimet me një prezantim të përbashkët ku testuan të gjitha njohuritë e fituara.

Me përfundimin e kësaj akademie, UBT dëshmoi edhe një herë përkushtimin për t’u ofruar studentëve jo vetëm mësimdhënie akademike, por edhe mundësinë për të prekur nga afër industrinë përmes bashkëpunimit me emra të dëshmuar të skenës kosovare.

Ka përfunduar me sukses Akademia Verore e Mekatronikës në UBT, ku përgjatë ditëve të saj studentët patën mundësinë të bëhen pjesë e një maratone intensive idesh, e konceptuar si një garë sfiduese dhe inovative në fushën e teknologjisë dhe inxhinierisë së dronëve. Ky aktivitet synoi të nxiste kreativitetin, mendimin kritik, punën në ekip dhe zbatimin e njohurive teorike në zgjidhje praktike.

Pjesëmarrësit u ndanë në tetë grupe të ndryshme, ku secili ekip pati për detyrë të zgjidhte njërën nga tri kategoritë e mundshme të dronëve për të zhvilluar një dizajn krejtësisht të ri dhe inovativ. Përveç konceptimit të modelit, studentët bënë krahasimin e ideve të tyre me modelet ekzistuese në treg dhe realizuan një analizë të detajuar “trade-off”, duke vlerësuar me saktësi përparësitë, kufizimet dhe kompromiset teknike të projektit.

Gjatë kësaj gare, studentët e mekatronikës analizuan faktorë kyç si efikasiteti, funksionaliteti, qëndrueshmëria dhe performanca e dizajnit për përdorime të ndryshme në industri. Çdo grup prezantoi idetë e veta me përkushtim të lartë, duke treguar një nivel të jashtëzakonshëm të përgatitjes akademike dhe profesionale.

Pas vlerësimit rigoroz të projekteve nga juria, fitues i këtij edicioni u shpall Modeli “Eagle X”. Ky dizajn u dallua mbi të tjerët për konceptin e tij unik inovativ, analizën e mirëstrukturuar teknike dhe qasjen shumë praktike ndaj sfidave inxhinierike të prezantuara.

UBT falënderoi të gjithë studentët pjesëmarrës për energjinë, përkushtimin dhe frymën e lartë të bashkëpunimit që treguan gjatë gjithë ditëve të Akademisë Verore, duke e bërë këtë aktivitet një platformë të vërtetë frymëzimi për gjeneratat e reja.

Dy mjete të pashpërthyera janë gjetur të mërkurën në bodrumin e një shtëpie në rrugën “Ahmet Krasniqi” në Prishtinë.

Sipas raportit të Policisë së Kosovës, një qytetare ka hasur në mjetet e dyshuara – dy granata dore – teksa po pastronte hapësirat e bodrumit dhe ka njoftuar menjëherë autoritetet.

Pas pranimit të informatës, njësitë përkatëse policore kanë dalë në vendngjarje për të siguruar perimetrin dhe për të garantuar sigurinë e banorëve të zonës. Në vendin e ngjarjes ka ndërhyrë edhe njësiti i specializuar për deminim (EOD), i cili ka bërë tërheqjen e kontrolluar dhe të sigurt të granatave.

Operacioni ka përfunduar me sukses dhe pa asnjë incident. Autoritetet apelojnë te qytetarët që në raste të ngjashme të mos i prekin mjetet e dyshuara dhe të njoftojnë menjëherë linjat emergjente të Policisë. /E.A/

Një rast i kanosjes dhe armëmbajtjes pa leje është regjistruar mesditën e së mërkurës në fshatin Milloshevë të Obiliqit, ku Policia e Kosovës ka vënë në pranga një person.

Sipas raportit 24-orësh të Policisë, viktima ka raportuar se është kanosur nga i dyshuari, i cili gjatë incidentit i ka ekspozuar një armë zjarri të llojit pistoletë.

Policia ka reaguar menjëherë duke arrestuar të dyshuarin. Gjatë kontrollit, atij i është gjetur dhe konfiskuar pistoleta me 9 copë fishekë, një leje e armës për shenjëtari, si dhe një libër për evidentimin e lëvizjes. Pas intervistimit, me vendim të prokurorit kujdestar, i dyshuari është dërguar në mbajtje për procedime të mëtejshme ligjore. /E.A/