Me ftesë të tij, kryeministri i Republikës së Kosovës, Albin Kurti, bashkë me zëvendëskryeministrin e parë, Besnik Bislimi, priti ambasadorët, të ngarkuarit me punë, shefat e misioneve diplomatike dhe zëvendësambasadorët e akredituar në Kosovë.

Sipas një komunikate të Qeverisë, në këtë takim të gjerë e të përbashkët, ai i informoi ata për ecurinë e bisedimeve të shtunën në Ohër të Maqedonisë së Veriut, dhe për rezultatin e arritur aty me rastin e dakordimit publik për aneksin e zbatimit të Marrëveshjes Bazë.

“Në tekst të Aneksit të dakorduar në Ohër thuhet që Kosova dhe Serbia angazhohen plotësisht për t’i respektuar të gjitha nenet e Marrëveshjes dhe Aneksit, dhe për t’i zbatuar të gjitha detyrimet e tyre përkatëse – që rrjedhin nga Marrëveshja dhe Aneksi – në mënyrë të përshtatshme dhe në mirëbesim. Aty po ashtu thuhet se Kosova dhe Serbia pajtohen që të gjitha nenet të zbatohen në mënyrë të pavarur nga njëra-tjetra”, thuhet në komunikatën e Qeverisë.

Kryeministri Kurti theksoi se delegacioni i Republikës së Kosovës kanë qenë maksimalisht të përkushtuar dhe konstruktiv, por edhe kreativ me oferta e propozime që u refuzuan nga pala tjetër, e cila, sikurse në Bruksel me 27 shkurt, përsëri refuzon të nënshkruajë.

“Rruga për procedimin e aplikimit të Kosovës për anëtarësim në Këshillin e Evropës dhe në Bashkimin Evropian është e hapur. Sa i përket anëtarësimit në Këshillin e Evropës, Kosova tashmë ka numrin e nevojshëm të votave të shteteve anëtare, ndërkohë që departamenti ligjor i Këshillit ka konfirmuar se nuk ka asnjë pengesë juridike për anëtarësimin e plotë të Republikës së Kosovës në këtë organizatë të rëndësishme”, tha ai.

104 miliardë dollarë, pra 97 miliardë euro, janë dëmet e shkaktuara në Turqi nga tërmeti katastrofik që shkaktoi vdekjen e më shumë se 50 mijë njerëzve, tha Recep Tayyip Erdogan.

“Pavarësisht situatës së tij ekonomike, është e pamundur për çdo vend të luftojë vetëm një fatkeqësi të kësaj shkalle”, tha presidenti turk, duke folur në Konferencën e Donatorëve Turqi – Siri.

“Ne nuk do ta harrojmë kurrë solidaritetin e treguar në këto ditë të vështira nga të gjithë miqtë tanë, BE së bashku me instrumentet termike, shtetet anëtare, vendet kandidate, OKB dhe organizata të tjera ndërkombëtare”, tha ai.

Megjithatë, ai ka bërë të qartë se ka ende shumë për të bërë.

“Kontributet do të na ndihmojnë në përpjekjet tona për tu shëruar nga tërmetet dhe për të fshirë gjurmët e fatkeqësisë. Kjo sepse lufta jonë e vërtetë fillon tani”, tha ai.

Sipas presidentit turk, synimi është ndërtimi i strukturave të sigurta me cilësi të lartë për të plotësuar nevojat e banimit brenda zonës sizmike.

Shefja e Komisionit, Ursula von der Leyen njoftoi se krahu ekzekutiv i BE-së do të japë 1 miliard euro për të ndihmuar në rindërtimin e Turqisë.

Një gazetar francez dhe një punonjës amerikan i ndihmave që ishin rrëmbyer nga xhihadistët në Sahel janë liruar, sipas një gazetari të AFP.

Përkthyesi i pavarur francez Olivier Dubois dhe punonjësi amerikan i ndihmës, Jeffery Woodke dolën nga një aeroplan që u ul në një aeroport në Niamey, kryeqyteti i Nigerit.

Dubois, 48 vjeç, ishte rrëmbyer në Mali në vitin 2021, ndërsa Woodke u zhduk në Niger në 2016.

“Ndihem i lodhur, por jam mirë”, tha Dubois, i buzëqeshur, por dukshëm i tronditur.

“Është e mrekullueshme për mua të jem këtu, të jem i lirë”, tha ai, duke folur para një grupi të vogël gazetarësh.

“Dua t’i bëj homazhe Nigerit për aftësitë e tij në këtë mision delikat dhe t’i bëj homazhe Francës, të gjithë atyre që më kanë ndihmuar të jem këtu sot”.

Ministri i Brendshëm i Nigerit, Hamadou Souley, i cili ishte në aeroport, tha se “pengjet u kapën shëndoshë e mirë nga autoritetet nigeriane përpara se t’u dorëzoheshin autoriteteve franceze dhe amerikane”./UBTNews/

Partia Socialdemokrate u ka bërë thirrje qytetarëve që të bashkohen në protestën e së shtunës. Kjo parti ka shprehur kundërshtinë ndaj asociacionit, duke deklaruar se kryeministri Albin Kurti po e pranon duke e quajtur “vetmenaxhim”. Aktivistë të PSD-së kanë ngjyrosur rrugët e disa objekte me mbishkrimin “Albin Zajednica”.

Nënkryetari i PSD-së, Zgjim Hyseni tha se Kurti e ka quajtur asociacionin “zajednicë” për të ikur nga e vërteta.

“Emrin “Zajednicë” asociacionit ia ka lënë vet Albin Kurti. Është ai që e ka pagëzuar asociacionin me Zajednicë. Ne të gjithë kemi qenë kundër asociacionit për shkak se asociacioni në vetvetë ka qenë i dëmshëm, për shkak se paraqet ndarje etnike. Mirëpo, Kurtit nuk i ka mjaftuar kjo, ai ka pasur nevojë për një fjalë serbe, në mënyrë që kështu të krijojë një lidhje të shkurtër edhe me i sulmua politikanët e të përfitojë pushtet për vete. Pra, kur ai e ka kundërshtuar asociacionin edhe e ka quajtur zajednicë, nuk i ka bërë shumë përshtypje sa i dëmshëm është asociacioni. Po si mund të përdoret ky për të sulmuar kundërshtarët politik”, ka thënë Hyseni.

Ai shtoi se shefi i ekzekutivit po e zbaton këtë marrëveshje, ani pse tenton ta paketojë ndryshe.

“Dikur kur iu ka nevojitur për ta bërë jashtëzakonisht dëmshëm asociacionin e ka quajtur zajednicë. Sot që po i duhet për tu fshehur, asociacioni po e quan ‘vetmenaxhim’. Mirëpo, si herën e parë, si herën e dytë kemi të bëjmë me një projekt jashtëzakonisht të dëmshëm, të cilin Kurti po e zbaton. Tash që po e zbaton ka vendosur t’ia ndërrojë emrin. Ata që dikur e ka quajtur Zajednicë, tash po e quan vetmenaxhim. Në fakt kemi të bëjmë me të njëjtin projekt të dëmshëm, veçse tash është njeri tjetër që ka për ta zbatuar. Duke qenë se është njeri tjetër që do ta zbatojë, po donë edhe ta paketojë pak më ndryshe”, ka shtuar ai.

Nënkryetari i PSD-së pas aksionit simbolik ka bërë thirrje për protestën e së shtunës.