Pas një periudhe të gjatë mungese, Johnny Depp po rikthehet në ekranin e madh me projektin e tij më të madh që prej largimit nga Hollywoodi pas gjyqeve të bujshme me ish-bashkëshorten Amber Heard.

Sipas The Hollywood Reporter, kompania Paramount Pictures, tani nën drejtimin e David Ellison, është në negociatat përfundimtare për realizimin e versionit të ri të klasikës së Charles Dickens, A Christmas Carol.

Filmi do të titullohet “Ebenezer: A Christmas Carol” dhe pritet të shfaqet në kinema më 13 nëntor 2026.

Regjinë do ta bëjë Ti West, i njohur për filmat horror X, Pearl dhe MaXXXine, ndërsa në kast do të jetë edhe aktorja Andrea Riseborough.

Skenarin e ka shkruar Nathaniel Halpern, dhe prodhimin e udhëheq Emma Watts, ish-drejtuese e studios Paramount.

Studioja e përshkruan projektin si “një histori tronditëse me fantazma, e vendosur në Londrën e Dickensit, që ndjek udhëtimin mbinatyror të një burri për t’u përballur me të kaluarën, të tashmen dhe të ardhmen e tij, në kërkim të një shansi të dytë”.

Depp do të luajë rolin e Ebenezer Scrooge, një zgjedhje simbolike që reflekton rikthimin e tij pas një periudhe të vështirë personale dhe profesionale.

Dikur një nga yjet më të mëdhenj të kinemasë me role në Pirates of the Caribbean, Alice in Wonderland dhe Charlie and the Chocolate Factory, Depp u largua nga Hollywoodi pas skandaleve dhe gjyqeve publike.

Më 2020 ai u shkarkua nga seria Fantastic Beasts e “Warner Bros.” dhe më vonë u përqendrua në projekte evropiane, përfshirë filmin Jeanne du Barry.

Në Festivalin e Kanës më 2023, aktori deklaroi: “Nuk ndihem i bojkotuar nga Hollywoodi — thjesht nuk mendoj më për të.”

Filmi “Ebenezer” vjen pas projektit të tij tjetër, thrillerit Day Drinker të prodhuar nga Lionsgate, që pritet të dalë gjithashtu në vitin 2026.

Sipas raportimeve, paketa “Depp–West” u konsiderua “tërheqëse për t’u refuzuar”, duke shënuar rikthimin e plotë të Depp në Hollywood. /A.Z/UBT News/

Këngëtarja Lizzo po përballet me një padi për shkelje të të drejtave të autorit, pasi akuzohet se kopjoi një këngë të një artisti tjetër për të krijuar një nga këngët e saj të fundit virale.

Këngëtarja 37-vjeçare kishte postuar në gusht një fragment të shkurtër të këngës së saj ende pa titull, që tërhoqi vëmendjen e fansave.

Fragmenti përmendte edhe reklamën e Sydney Sweeney për American Eagle, e cila kishte shkaktuar polemika për promovimin e një mesazhi të kontestuar.

Sipas padisë të siguruar nga TMZ, GRC Trust ka ndërmarrë veprime ligjore kundër Lizzo-s dhe shtëpisë së saj diskografike, Atlantic Records, duke pretenduar se këngëtarja përdori dhe kopjoi pjesë të këngës së viteve 1970 “Win or Lose (We Tried)”, për të cilën ata zotërojnë të drejtat e autorit.

Një përfaqësues i Lizzo-s i tha TMZ-së: “U habitëm që GRC Trust ngriti këtë padi. Për të qenë të qartë, kënga nuk është publikuar ose monetizuar, dhe nuk ka pasur vendim në lidhje me publikimin e saj komercial.”

Padia shton se palët tentuan të arrijnë një marrëveshje, por dështuan, dhe GRC Trust po kërkon dëmshpërblim dhe një urdhër ndalimi për përdorimin e mëtejshëm të këngës.

Kjo nuk është hera e parë që Lizzo përballet me akuza të tilla. Në vitin 2019, tre producentë e paditën për këngën “Truth Hurts”, duke pretenduar se ajo ishte bazuar në këngën “Healthy”, të cilën ata e kishin shkruar së bashku me Lizzo-n në vitin 2017. /A.Z/UBT News/

Roger Goodell, komisioneri i Ligës Kombëtare të Futbollit Amerikan (NFL), ka reaguar ndaj kritikave që kanë shoqëruar njoftimin se Bad Bunny do të performojë gjatë pushimit të pjesës së parë të finales së Super Bowl-it.

Pavarësisht reagimeve të ndryshme, Goodell theksoi se nuk ka në plan të ndryshojë vendimin për zgjedhjen e artistit.

“Nuk jam i sigurt nëse kemi zgjedhur ndonjëherë një artist pa pasur kritika apo reagime nga publiku. Është sfidë kur ke qindra miliona shikues. Por ne duam të ofrojmë argëtim të lartë dhe Bad Bunny është një nga artistët më të njohur dhe me ndikim në botë,” tha Goodell.

Performanca e Bad Bunny-t është veçanërisht e pritur, duke pasur parasysh mungesën e koncerteve të tij në SHBA gjatë viteve të fundit, një vendim i artistit si protestë ndaj politikave antiemigrantore të administratës Trump.

Ai kishte frikë se koncertet mund të shërbenin si mjet për autoritetet për të identifikuar emigrantë ilegalë, duke rrezikuar sigurinë e fansave.

Performanca në Super Bowl, e transmetuar drejtpërdrejt në televizion, ofron mundësinë që adhuruesit ta shijojnë artistin pa u ekspozuar ndaj ndonjë rreziku.

Kjo zgjedhje tregon edhe angazhimin e NFL-së për të sjellë artistë me ndikim global, që tërheqin audiencë të gjërë dhe shtojnë vlerën e eventit më të madh sportiv në SHBA. /A.Z/UBT News/