Unioni Demokristian (CDU) i qendrës së djathtë dhe udhëheqësi i saj Friedrich Merz ishin fituesit e mëdhenj të zgjedhjeve federale gjermane të dielën me 28% të votave, konfirmuan rezultatet e përkohshme.

Ndërkohë, Alternativa për Gjermaninë (AfD) ishte e dyta me 20%, duke dyfishuar pjesën e saj të votave nga zgjedhjet e fundit në Gjermani në vitin 2021.

Këto rezultuan të ishin rezultati më i mirë për një parti të ekstremit të djathtë në vend që nga Lufta e Dytë Botërore, shkruajnë mediat e huaja, përcjell Telegrafi.

Dhe Alice Weidel dhe Tino Chrupalla, liderë të AfD-së, janë deklaruar për shtypin në Berlin.

E pyetur nëse ishte kontaktuar nga Elon Musk pas rezultatit të fortë zgjedhor të AfD-së, ajo tha: “Sot në mëngjes, kur ndeza telefonin, pashë se kisha marrë telefonata dhe mesazhe nga SHBA, përfshirë edhe nga Elon Musk me urime personale”.

”… Ne jemi fuqia në Gjermani që njihet ndërkombëtarisht. Ne jemi në kontakt me të gjitha palët dhe kjo përfshin administratën e (Donald) Trump”.

Chrupalla më pas hyri për të shtuar i emocionuar se edhe ai kishte marrë një numër të madh mesazhesh urimi, duke përfshirë “dy lojtarë të kombëtares gjermane, dy ish-lojtarë të Bayern Munichut”.

Kush saktësisht, nuk tha ai, por tani me siguri mediat në Gjermani do të jenë në kërkim për identifikimin e tyre.

Kancelari i ardhshëm gjerman Friedrich Merz do të ftojë kryeministrin izraelit Benjamin Netanyahu për një vizitë zyrtare në Gjermani.

Zyra e Netanyahut, përmes një deklarate, e quajti ftesën “kundërshtim të hapur të vendimit skandaloz të Gjykatës Ndërkombëtare Penale (GJNP) për etiketimin e kryeministrit si kriminel lufte“.

GJNP lëshoi ​​urdhërarreste nëntorin e kaluar për Netanyahun dhe ish-ministrin izraelit të Mbrojtjes, Yoav Gallant për krime lufte dhe krime kundër njerëzimit në Gaza, ku më shumë se 48.300 palestinezë u vranë në sulmet brutale izraelite që nga tetori 2023.

Sulmet u ndalën në bazë të marrëveshjes së armëpushimit dhe shkëmbimit të të burgosurve që u arrit muajin e kaluar.

Sipas deklaratës, kryeministri izraelit ka uruar Merzin për fitoren e tij në zgjedhjet parlamentare që u mbajtën dje në Gjermani.

Unioni Demokristian (CDU/CSU) i Merzit fitoi 28.6 për qind të votave, sipas rezultateve zyrtare preliminare. Partia Social Demokrate (SPD) e kancelarit Olaf Scholz u përball me një humbje historike në zgjedhje, duke marrë 16.3 për qind të vota, që është përqindja më e ulët e votave për partinë e qendrës së majtë që nga viti 1949.

Disa shtëpi janë përfshirë nga zjarri për shkak të sulmeve që ushtria izraelite ka kryer në qendrën e qytetit Rafah në jug të Rripit të Gazës, pavarësisht marrëveshjes së armëpushimit.

Sipas informacioneve të marra nga dëshmitarët, ushtria izraelite hapi zjarr intensiv ndaj shtëpive pranë kryqëzimit Awda në qendër të qytetit Rafah me tanket dhe mjetet ajrore pa pilot (dronë) të pozicionuara në Korridorin Filadelfi, brezi kufitar midis Egjiptit dhe Gazës. Si pasojë e sulmeve disa shtëpi kanë marrë flakë.

Ushtarët izraelitë gjithashtu hapën zjarr edhe ndaj palestinezëve në pjesët lindore të qytetit. Nuk u dha asnjë informacion nëse ka pasur të vrarë apo të plagosur në të dy sulmet. Marrëveshja e armëpushimit dhe shkëmbimit të pengjeve e arritur mes Hamasit dhe Izraelit hyri në fuqi të dielën, më 19 janar.

Shefi i zyrës për media të qeverisë në Gaza, Salama Marouf në një deklaratë më 21 shkurt tha se Izraeli ka vrarë 100 palestinezë dhe ka plagosur më shumë se 820 të tjerë në periudhën për më shumë se një muaj që nga hyrja në fuqi e marrëveshjes së armëpushimit.

Ai shtoi se ushtria izraelite kreu më shumë se 350 shkelje dhe se më e rëndësishmja prej tyre ishte pengimi i dispozitave të protokollit humanitar.

Në sulmet e Izraelit në Rripin e Gazës nga 7 tetori 2023 deri në marrëveshjen e armëpushimit, kanë humbur jetën 48.338 palestinezë, përfshirë rreth 17.881 fëmijë dhe 12.316 gra ndërsa janë plagosur 111.753 njerëz.

Nën rrënoja ende ka mijëra të vdekur ndërsa është shkatërruar edhe infrastruktura civile duke synuar spitalet dhe institucionet arsimore ku janë strehuar njerëzit.

BE miratoi paketën e saj të 16-të të sanksioneve kundër Rusisë, duke vënë në shënjestër sektorët kryesorë të ekonomisë ruse dhe individët e përfshirë në luftën e saj kundër Ukrainës.

Sanksionet e reja u miratuan sot, në ditën kur lufta në Ukrainë hyri në vitin e saj të katërt, ndërsa zyrtarët e BE-së theksuan nevojën për të dobësuar aftësinë e Moskës për të vazhduar fushatën e saj ushtarake.

Pakoja e fundit përfshin masa kufizuese ekonomike dhe individuale, që prekin flotën nën hije të Rusisë, rrjetet financiare dhe kompleksin ushtarako-industrial.

“Për tre vjet tani, Rusia ka bombarduar pamëshirshëm Ukrainën, duke u përpjekur të vjedhë tokë që nuk është e tyre“, tha shefja e politikës së jashtme të BE-së, Kaja Kallas, duke shtuar:

“Çdo paketë sanksionesh ia privon Kremlinit fondet për të zhvilluar luftë“.

Këshilli i BE-së vendosi sanksione ndaj 83 individëve dhe subjekteve përgjegjëse për minimin e integritetit territorial të Ukrainës, ndërsa zgjeroi gjithashtu kriteret për të shënjestruar ata që operojnë flotën nën hije të Rusisë, që përbëhet nga anije të përdorura për t’iu shmangur sanksioneve ndaj eksporteve të naftës, sipas një deklarate të këshillit.

Gjithsej 153 anije tani janë të kufizuara sipas masave të BE-së.

Për herë të parë, BE vendosi një ndalim transaksionesh për institucionet e huaja financiare që përdorin sistemin e mesazheve financiare të Rusisë, SPFS, duke zgjeruar gjithashtu kufizimet ndaj 13 bankave kryesore rajonale.

Përveç kësaj, 53 subjekte u shtuan në listën e atyre që furnizojnë kompleksin ushtarako-industrial të Rusisë.

Sanksionet përfshijnë gjithashtu kufizime të reja tregtare mbi teknologjinë e dronëve, kimikatet dhe softuerin kritik për zhvillimin e armëve të Rusisë. Kufizime të mëtejshme u vendosën në eksportet e materialeve industriale dhe importet e aluminit rus, një burim i rëndësishëm të ardhurash për Moskën.

Tetë mediave ruse të akuzuara për përhapjen e propagandës së Kremlinit iu hoqën licencat e transmetimit të BE-së, ndërkohë që u vendosën kufizime të reja në portet ruse, rrjetet e transportit dhe aviacionin.

Paketa shtrin gjithashtu sanksione të energjisë, duke kufizuar softuerin e përdorur për kërkimin e naftës dhe gazit dhe duke ndaluar ruajtjen e përkohshme të naftës së papërpunuar ruse në BE.

Liderët e BE-së riafirmuan angazhimin e tyre për të mbështetur Ukrainën “për aq kohë sa duhet”. Kallas theksoi rëndësinë e sanksioneve në përpjekjet e vazhdueshme për t’i dhënë fund luftës.