Lajmet

PSD: Kurti në Ohër mashtroi dhe konfirmoi se është dorëzuar

Ata kanë mbajtur një aksion simbolik në urën e madhe në lagjen Lakrishtë.

Publikuar

Anëtarët e Partisë Socialdemokrate kanë mbajtur një aksion simbolik në urën e madhe në lagjen Lakrishtë, përmes të cilit kanë kundërshtuar dakordimin e arritur në Ohër nga kryeministri Albin Kurti dhe presidenti serb, Aleksander Vuçiq.

PSD në urë vendosi pankartën me figurën e kryeministrit të Kosovë, Albin Kurti me hundë të zgjatur si “pinokio” dhe mbishkrimin “Kundër marrëveshjes, kundër mashtrimit”.

Ndërsa, po ashtu nga ky subjekt politik jo parlamentar janë ftuar qytetarët e Kosovës që të marrin pjesë në protestën e organizuar më 25 mars prej orës 14:00 për të kundërshtuar këtë marrëveshje.

Sekretari i PSD-së, Nol Nushi tha se hunda e gjatë e paraqitur në këtë pankartë e kryeministrit Kurti tregon rrugën e mashtrimit në raport me dialogun me Serbinë.

Ai tha se marrëveshja e dakorduar në Ohër konfirmoi se Kurti është dorëzuar.

“Është thirrje për protestën e 25 marsit që fillon në orën 14:00 tek sheshi ‘Zahir Pajaziti’, hunda e gjatë e kryeministrit Kurti është rruga e tij e gjatë e mashtrimit e popullizmit dhe gënjeshtrave të tij në raport me dialogun me Serbinë. I gjithë pushteti i tij sa ishte në opozitë ishte dialogu me Serbinë, kundërshtimi i dialogut, protestat më të mëdha kanë qenë të organizuar prej tij kundër Zajednicës kurse çka po ndodh sot është pranim i të gjitha marrëveshjeve që ka kundërshtuar dhe pranim i formimit të Zajdenicës… Marrëveshja e Ohrit na e konfirmoi se Kurti është dorëzuar protesta e së shtunës e 25 marsit në orën 14:00 është kundër kësaj marrëveshje të dëmshme por edhe kundër mashtrimit”, u shpreh ai.

Nushi ka ftuar qytetarët e Kosovës që t’u bashkangjiten në protestën e së shtunës për të kundërshtuar marrëveshjen e dakorduar mes palës serbe dhe kosovare, e cila nuk është nënshkruar.

Ai u shpreh se presin që pjesëmarrës në këtë protestë të jenë edhe anëtarë të LVV-së të cilat janë mashtruar.

“I ftojmë gjithë ata që janë kundër marrëveshjes edhe ata që kanë dilema a duhet me pranua marrëveshjen apo jo por që janë kundër mashtrimit e zotëri Kurti të dalim bashkërisht ta kundërshtojmë këtë sjellje arrogante të këtij pushteti… të protestojmë së bashku edhe kundër marrëveshjes edhe kundër mashtrimit hundëgjatit kryeministrit Kurti… pres që pjesë e protestës të jenë më së shumti anëtarë të Lëvizjes Vetëvendosjes sepse ata janë më të mashtruarit. Ata e kanë votuar udhëheqësin e tyre për t’i ndal këto konsensione ndaj Serbisë dhe po del se kryeministri Kurti u deshtë me i fitua 50% pikërisht ato marrëveshje që i ka kundërshtuar”, theksoi ai.

E të shtunën më 18 mars në Ohër të Maqedonisë së Veriut u takuan pala kosovare dhe ajo serbe me ndërmjetësimin e BE-së dhe SHBA-ve në kuadër të dialogut Kosovë-Serbi.

Palët u pajtuan për zbatimin e ankesit të marrëveshjes sipas planit evropian. Por, kjo marrëveshje përveç dakordimit nuk është nënshkruar pas refuzimit të presidentit serb, Aleksandër Vuçiq.

Lajmet

“Kur jemi bashkë, arrijmë shumë”: Bogujevci falënderon edhe opozitën për suksesin në KiE

Ajo ka falënderuar opozitën për kontributin në votimin e suksesshëm në Asamblenë Parlamentare të Këshillit të Evropës.

Publikuar

nga

Nënkryetarja e Kuvendit nga Lëvizja Vetëvendosje, Saranda Bogujevci ka falënderuar opozitën për kontributin në votimin e suksesshëm në Asamblenë Parlamentare të Këshillit të Evropës.

Në seancën e sotme të Kuvendit të Kosovës, Bogujevci ka thënë se kjo tregon që kur janë ekip, arrijnë shumë.

“Kjo është një arritje e madhe dhe historike për vendin tonë dhe demokracinë. Kjo është fitore e Republikës e themeluar mbi vlera demokratike ku respektohen të drejtat e njeriut dhe sundimi i ligjit. Ky është rezultat i punës dhe angazhimit të punës së delegacionit të Kuvendit të Kosovës, të cilët kanë punuar pa ndalë dhe me përkushtim me qëllime të përbashkëta. Ky sukses i Kosovës tregon më së miri se kur jemi bashkë mund të arrijmë shumë. Kemi qenë ekip dhe ashtu njihemi në asamble. Ky votim është një fitore e madhe për Kosovën. Ka mbete pjesa finale unë jam shumë optimiste në vendim që do të merret unë kam besim te plote por duhet shumë punë”, ka thënë ajo.

Vazhdo të lexosh

Lajmet

Miratohen projektligjet për tekste shkollore dhe për performancën energjetike të ndërtesave

Deputeti Hyseni kërkoi që të votohen këto projektligje.

Publikuar

nga

Pa vota nga opozita, Komisioni për Integrime Evropiane miratoi Projektligjin për tekste shkollore dhe Projektligjin për performancën energjetike të ndërtesave.

Pavarësisht kërkesës së deputetit Driton Hyseni, nuk u votuan projektligjet nga opozita. Deputeti Hyseni bëri një lutje drejtuar opozitës për t’i votuar këto projektligje.

“Të votojnë për këto projektligje sepse e dërgojmë besimin e qytetarëve në nivele që ata presin”, tha ai.

Deputetja nga PDK, Blerta Deliu, tha se vendi duhet t’i hap rrugët për zgjedhje dhe nuk ka diçka që duhet të votojnë. Ajo përmendi raportin e DASh-it dhe Freedom House, ku flitet për korrupsion nga Qeveria.

“Kësaj qeverie i ka humbur kuptimi, goditja e dy raporteve të DASh-it dhe Freedom House, tregojnë se kjo qeveri ka probleme me gjyqësorin, cenim në institucione të drejtësisë. Ka zyrtarë që kanë qenë të zënë në fushata te shteti fqinjë. Konsideroj se vendi duhet të hap rrugë për zgjedhje të reja, nuk kemi çfarë të votojmë”, tha ajo.

Deputeti Hyseni, duke replikuar, tha se nuk e sheh të arsyeshme për t’iu referuar raporteve ndërkombëtare e të mos votohen projektligjet që janë më shërbim të qytetarëve.

“Qeveria ka marrë hapa konkret dhe serioz në luftimin e korrupsionit. Nuk e shoh të arsyeshme të referoheni në ato raporte, projektligjet që janë të rëndësishme për qytetarët duhet t’i votojmë. Kjo qeveri ka marrë hapa serioz. Nuk mund të jemi peng i raporteve ndërkombëtare që të mos votohen projektligjet që janë më shërbim të qytetarëve. Ne e kemi privilegj t’i votojmë”, tha ai.

Ndërsa deputetja nga AAK, Time Kadrijaj tha se ky komision nuk mund të kërkojë përkrahjen e opozitës kur nuk i merr seriozisht mbajtjet e mbledhjeve të Komisioneve.

“Nuk po e merrni me seriozitet shqyrtimin e projektligjeve, po shihet këtu. Nuk mund të kërkoni votë dhe përkrahjen e opozitës kur keni mungesë të seriozitetit”, tha Kadrijaj.

Ndërsa, Projektligjet u votuan nga pozita me gjashtë vota për, por në mungesë të opozitës.

Vazhdo të lexosh

Lajmet

​PDK kërkon debat parlamentar për raportin e DASh-it, nuk përkrahet nga LVV

Tahiri i PDK-së tha se të gjeturat janë shqetësuese.

Publikuar

nga

Partia Demokratike e Kosovës ka kërkuar debat parlamentar lidhur me të gjeturat e raportit të Departamentit Amerikan të Shtetit. Shefi i grupit parlamentar të kësaj partie, Abelard Tahiri tha se të gjeturat janë shqetësuese për Qeverinë e Kosovës. Ai kërkoi që rendi i ditës të plotësohet me mocion për debat parlamentar, teksa ftoi deputetët që ta përkrahin një gjë të tillë. Me këtë janë pajtuar edhe partitë tjera opozitare, por jo edhe partia në pushtet, Lëvizja Vetëvendosje. Për këtë mocion kanë votuar 26 deputetë për, 40 kundër dhe një ka abstenuar.

Tahiri kërkoi që ky debat parlamentar të fillojë pas pyetjeve parlamentare dhe deklarimeve jashtë rendit të ditës. Ai ka kërkuar që të plotësohet rendi i ditës me mocion për debat parlamentar

“Kërkojmë që të plotësohet ky rend i ditës me një debat parlamentar në lidhje me të gjeturat e raportit të DASh-it. Ashtu siç e keni parë, siç jeni njoftuar para tri ditëve, Departamenti Amerikan i Shtetit ka prezantuar një raport i cili ka të gjetura mjaft shqetësuese për Qeverinë e Kosovës dhe për institucionet e Republikës së Kosovës. Pra, një përshkrim ku tashmë kemi një korrupsion serioz në kuadër të Qeverisë së Kosovës, ku përshkruhet numri i saktë i ministrave të cilët janë të përfshirë në afera korruptive. Pra, tashmë duke ju referuar atij raporti nga 15 ministra, pesë prej tyre janë nën hetime dhe dy zëvendësministra. 1/3 e kësaj qeverie është nën hetime nga Prokuroria e Shtetit. Nuk po e themi ne, por po e thotë Departamenti Amerikan i Shtetit”, u shpreh ai.

Më tej, Tahiri tha se ky raport i publikuar më parë flet edhe për dhunën ndaj gazetarëve dhe ndaj grave. Shefja e grupit parlamentar të Lëvizjes Vetëvendosje, Mimoza Kusari-Lila theksoi se ky raport ka disa lëshime të vogla. Ajo propozoi që të caktohet një seancë e veçantë për ta diskutuar këtë raport.

“Ka disa lëshime të vogla në raporte statistikore, në veçanti me prezencën e numrit të grave në qeveri. Përmend që Qeveria e Kosovës ka vetëm një zëvendëskryeministre, Qeveria e Kosovës ka dy zëvendëskryeministre dhe gjashtë ministre e jo pesë. Gjithashtu ky Kuvend dhe mazhoranca e këtij Kuvendi ka grupin më të madh të grave ndonjëherë përfshirë këtu të gjitha të zgjedhura pa kuotë. Do të thotë raporti ka gjetje shumë interesante, që ja vlen të bëhen edhe krahasime me ato raporte që janë publikuar më herët dhe aty mund të vërehet progresi ose dështimi. Jo mbi vënien e fokusit të një paragrafi, deklaratë ose një emër që mendohet. Prandaj, duke e ditur kompleksitetin, rëndësinë dhe peshën e këtij raporti ne si grup parlamentar propozojmë që të caktohet një seancë të veçantë ku të gjithë do të jemi të përgatitur që të diskutojmë”, shtoi ajo.

Ndërkaq shefi i grupit parlamentar të Lidhjes Demokratike të Kosovës, Arben Gashi tha se sot Kuvendi duhet të diskutojë për të gjeturat në raportin e DASh-it.

“Ne duhet të flasim sot për censurën dhe kufizimet e mediave, raporti thotë ‘Autoritetet kufizuan lirinë e shprehjes dhe aksesin në informacionin në mënyrë të drejtë, duke censuruar mediat, duke bllokuar faqet e internetit, duke kufizuar qasjen në informacion’. Presioni dhe ndërhyrjet politike, ndërhyrjet politike në drejtësi dhe në veprimtarinë e gjyqësorit kanë rritur frikën dhe ndikimin mbi gjykatësit dhe prokurorët. Mungesa e transparencës dhe llogaridhënies në procese gjyqësore dhe në procese qeverisëse ka degraduar kualitetin qeverisës dhe përfaqësimin”, u shpreh ai.

Edhe shefi i grupit parlamentar të Aleancës për Ardhmërinë e Kosovës, Besnik Tahiri, është pajtuar që të mbahet debat parlamentar.

“Në historinë e qeverisjes në Kosovë, asnjëherë vendi ynë dhe qeveria nuk ka marrë një klasifikim kaq të rëndë, kaq serioz, kaq keq në raport me gjendjen e vendit tonë. Për të kuptuar se sa keq është dhe sa e rëndësishme është që ky parlament të diskutojë këtë raport, ju lutem hapeni vetëm faqen e parë. Në faqe të parë ky raport flet në radhë të parë për një korrupsion serioz në qeveri, as nuk thotë në qeverisje, as më gjerë, thotë ‘korrupsion serioz në qeveri’. Thotë kështu ‘Kosova ka probleme serioze me pavarësinë e institucioneve të drejtësisë’”,përfundoi Tahiri.

Sipas tij, ky raport është letërnjoftim i Qeverisë Kurti dhe se kjo çështje është e rëndësishme që të diskutohet në Kuvend.

Vazhdo të lexosh

Lajmet

​Vapa përvëluese mbyll shkollat për 33 milionë fëmijë në Bangladesh

Shkollat dhe kolegjet do të mbyllen të paktën deri më 27 prill.

Publikuar

nga

Vapa e nxehtë ka detyruar 33 milionë fëmijë të mos shkojnë në shkolla në Bangladesh, pasi temperaturat në disa pjesë të vendit u rritën mbi 42°C (108 F).

Shkollat dhe kolegjet do të mbyllen të paktën deri më 27 prill. Ky është viti i dytë me radhë që autoritetet duhet të ndërmarrin një veprim të tillë për shkak të motit ekstrem.

Ky vendim pason mbylljen e shkollave në Filipine dhe Indi, pasi një valë e vazhdueshme e të nxehtit përfshin Azinë.

“Fëmijët në Bangladesh janë ndër më të varfërit në botë dhe mbylljet e shkollave të lidhura me nxehtësinë duhet të shkaktojnë shqetësim për të gjithë ne”, tha Shumon Sengupta, drejtor i Save the Children’s Bangladesh.

Bangladeshi i ulët është një nga vendet më të cenueshme ndaj ndikimeve të krizës klimatike.

Sipas Panelit Ndërqeveritar për Ndryshimet Klimatike, një rritje prej 30 deri në 45 cm e nivelit të detit mund të zhvendosë më shumë se 35 milionë njerëz nga rrethet bregdetare – rreth një e katërta e popullsisë totale të vendit.

Të mërkurën, mijëra myslimanë në vend u mblodhën në xhami dhe fusha rurale për t’u lutur për shi./BBC/

Vazhdo të lexosh

Të kërkuara