Kryetari i Partisë Demokratike të Kosovës, Memli Krasniqi, ka deklaruar se Lëvizja Vetëvendosje po e zvarritë procesin e seancës konstituive me qëllim të zhvillimit të pazareve politike.

Pas ndërprerjes së seancës, e cila do të vazhdojë më 19 prill, Krasniqi theksoi se Lëvizja Vetëvendosje po përpiqet të fitojë kohë për të siguruar numrat e nevojshëm për formimin e institucioneve.

“Këta nuk kanë shumicë parlamentare dhe, pasi nuk e kanë, po përpiqen të blejnë kohë për të bërë pazaret e tyre,” tha ai.

Kryetari i Lidhjes Demokratike të Kosovës, Lumir Abdixhiku, ka reaguar pas ndërprerjes së seancës konstituive të Kuvendit, duke e cilësuar vendimin e kryesuesit Avni Dehari si të pabazuar dhe në kundërshtim me Rregulloren e Kuvendit.

Sipas tij, në sallë kishte kuorum të mjaftueshëm për të kaluar në pikën e parë të rendit të ditës – miratimin e Raportit për Verifikimin e Mandateve – dhe nuk kishte arsye që seanca të ndërpritej.

“Kryesuesi, që rastis të jetë më i vjetri në moshë dhe nga partia e parë, veproi në kundërshtim me Rregulloren dhe praktikën kushtetuese. Pa të drejtë ndërpreu seancën, ndonëse ishin plotësuar kushtet për votim,” u shpreh Abdixhiku.

Ai e cilësoi këtë si një praktikë bllokuese që dëmton institucionin më të lartë të vendit dhe një veprim me pasoja të rënda politike.

Konstituimi i Kuvendit të Kosovës ka dështuar sërish. Kryesuesi i seancës, Avni Dehari, njoftoi se gjatë takimit me përfaqësuesit e partive nuk u arrit konsensus, ndërsa disa prej tyre e kanë braktisur takimin.

Ai bëri të ditur se seanca e radhës do të mbahet të shtunën, më 19 prill, në orën 12:00.

“Pati përfaqësues që e braktisën takimin. Nuk pati konsensus. Seanca do të vazhdojë brenda 48 orëve, në orën 12:00, 19 prill, me shpresë që deri atëherë të ketë pajtueshmëri”, u shpreh Dehari.

Mospajtime në takimin konsultativ të partive politike se si të veprohet në situatën e krijuar në Kuvend.

Albulena Haxhiu nga Lëvizja Vetëvendosje tha se janë të habitshme qëndrimet e partive politike.

“Siç e kuptuat kryesuesi i seancës , para se të fillonte me rendin e ditës i foi në konsultim subjektet politike. Në këtë drejtim ne ishim në një takim konsultativ dhe është e habitshme që të dëgjosh qëndrimet e partive politike. LDK tha që kryesuesi nuk ka të drejtë të ftojë në takim konsultativ. Duke qenë qe diskutimi në seancë konstituive është i ndaluar është ftuar aty që të diakutohet. Ne ishim të pranishëm në këtë takim. AAK tha që të vazhdojmë aty ku kemi mbetur. Nuk mund të vazhdojmë të betohemi, ka vendim që nuk i verifikon mandatet e deputetëve. Befasia e radhës është PDK që kërkoi të japim dorëheqje. Nuk e di çka po presin, të dalim në shesh, ne këtë e kemi bërë”, tha Haxhiu.