Rektori i UBT-së, Prof. Dr. Edmond Hajrizi, realizoi një vizitë zyrtare në Texas me ftesë të Sam Houston State University (SHSU), në kuadër të bashkëpunimit ndërmjet dy institucioneve dhe angazhimit të përbashkët për avancimin e bashkëpunimit akademik dhe kërkimor.

Gjatë vizitës, Rektori Hajrizi zhvilloi një sërë takimesh me drejtues akademikë, institucione kërkimore dhe personalitete të komunitetit shqiptar në SHBA, ku u diskutuan mundësitë për zgjerimin e shkëmbimeve studimore, projekteve të përbashkëta dhe iniciativave strategjike në fusha me interes të përbashkët.

Në delegacion morën pjesë edhe përfaqësues nga universitete partnere të rajonit: Rektori, Prof. Dr. Jusuf Zejneli, dhe Kryetari i Senatit të UT, Prof. Dr. Kenan Ferati, si dhe përfaqësues të Universitetit të Tiranës. Pjesëmarrja e tyre shtoi edhe më shumë peshën e dimensionit ndër-universitar rajonal, duke e bërë vizitën një hap të rëndësishëm drejt konsolidimit të urave të reja të bashkëpunimit.

Vizitat në infrastrukturën e Universitetit ishin një tjetër pjesë e rëndësishme e programit, ku Rektori Hajrizi vizitoi Fakultetin e Biznesit, të Infermierisë, të Mjekësisë dhe një numër njësish të tjera akademike të SHSU-së. Këto vizita shërbyen për të parë nga afër standardet e larta akademike dhe laboratorike të institucionit, duke identifikuar mundësi konkrete për bashkëpunim dhe shkëmbime profesionale.

Gjatë qëndrimit, Rektori Hajrizi zhvilloi një takim të rëndësishëm me Major Gjeneral David P. Glaser, të cilin UBT e ka nderuar me çmimin më të lartë institucional. Në këtë takim u diskutua për mundësitë e bashkëpunimeve të mëtejshme në fushat e sigurisë, lidershipit dhe edukimit profesional, si dhe përfshirja e ekspertëve nga të dy institucionet në projekte të përbashkëta trajnimi dhe hulumtimi.

Po ashtu, u mbajt takimi me Dekanen e Fakultetit të Administrimit të Biznesit, Dr. Sharmistha (Shar) Self, e cila ishte organizatorja kryesore e vizitës, së bashku me Alban Fetahun – ish-student i SHSU-së dhe nismëtar i këtij partneriteti të rëndësishëm.

Rektori u prit gjithashtu nga dekanët e fakulteteve të Kriminologjisë, Shkencave, Teknologjisë Inxhinierike, Shkencave të Shëndetit dhe Shkencave Humane, me të cilët u shkëmbyen ide mbi programet akademike dhe mundësitë për projekte të përbashkëta kërkimore.

Një moment i veçantë i vizitës ishte takimi me Presidenten e SHSU-së, Dr. Alisa White, dhe Provost-in, Dr. Sumanth Yenduri, ku u diskutua thellimi i bashkëpunimit institucional, zhvillimi i programeve të përbashkëta studimore dhe krijimi i mundësive konkrete për studentët e UBT-së. Në të gjitha takimet, Rektori Hajrizi prezantoi programet akademike të UBT-së dhe potencialin për zgjerim të bashkëpunimit në fusha të ndryshme, duke u dakorduar që së shpejti të nisin projekte të përbashkëta konkrete.

Në të dy rastet, Rektori Hajrizi prezantoi iniciativën për krijimin e qendrës për studime amerikane në UBT dhe të studimeve shqiptare në Texas, e cila u prit shumë mirë nga të gjithë.

Programi përfshiu edhe vizita në institucione të rëndësishme edukative dhe shkolla të zonës së Houston-it, si dhe një vizitë në NASA Headquarters dhe muzeun e tyre, ku u diskutua për mundësinë e përfshirjes së studentëve të UBT-së në aktivitete dhe programe edukative ndërkombëtare.

Një nga aktivitetet më të rëndësishme të vizitës ishte pjesëmarrja në eventin akademik dhe kulturor të SHSU-së, “Bridge-Building Event: Strengthening Partnerships with the Albanian Community”, ku u diskutua për perspektivat e reja të bashkëpunimit afatgjatë dhe për angazhimin e mëtejshëm me komunitetin shqiptar në SHBA.

Në këtë event morën pjesë përfaqësues të komunitetit shqiptaro-amerikan nga Houston dhe Dallas, si dhe Ambasadori i Kosovës në Shtetet e Bashkuara të Amerikës, z. Ilir Dugolli, të cilët e mirëpritën me shumë entuziazëm iniciativën e bashkëpunimit dhe shprehën gatishmërinë për të mbështetur studentët shqiptarë me bursa dhe mundësi të tjera akademike.

Falë kësaj qasjeje bashkëpunuese, studentët e UBT-së potencialisht do të kenë mundësinë të përfitojnë bursa në studime në Sam Houston State University, si dhe të marrin pjesë në programe të përbashkëta studimore dhe kërkimore.

Më 2 dhjetor në mbrëmje, Rektori Hajrizi ishte i ftuar të marrë pjesë në ceremoninë e ndezjes së dritave të qytetit Crown në Texas, të organizuar nga Kryetari dhe Zv. Kryetari i qytetit. Për këtë ngjarje, u zgjodh z. Joe Haliti, anëtar i komunitetit shqiptaro-amerikan dhe kontribues i jashtëzakonshëm në jetën e komunitetit, i cili këtë vit u shpall “Personaliteti i Vitit” në rajon. Në këtë ceremoni, Rektori Hajrizi mbajti një fjalim gjatë darkës, ku morën pjesë përfaqësues të institucioneve të rrethit, komunitetit shqiptar, përfaqësues të universiteteve shqiptare dhe të Sam Houston State University, duke forcuar edhe më shumë lidhjet midis komunitetit dhe institucioneve akademike.

Kjo vizitë nënvizon përkushtimin e UBT-së për të forcuar rrjetin e partneriteteve ndërkombëtare dhe për të krijuar mundësi të reja për zhvillimin akademik, shkencor dhe profesional të studentëve dhe stafit të universitetit.

Policia Kufitare Kakavijë, nëpërmjet qendrës së përbashkët të shkëmbimit të informacionit Kakavijë, është njoftuar se sonte nga ora 18:00-21:00 (me orën greke), aksi rrugor Kakavijë–Janinë, në kryqëzimin Kallpaq, do të jetë i bllokuar për shkak të protestës që do të zhvillojnë fermerët grekë.

Do të lejohen të qarkullojnë vetëm automjetet që do të kenë emergjenca shëndetësore.

Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete, në orare të tjera të ditës.

Duke sfiduar një paralajmërim qeveritar, fermerët në Greqinë veriore bllokuan trafikun në pikat kufitare të mërkurën në një protestë përshkallëzuese për vonesat në pagesat e subvencioneve të mbështetura nga Bashkimi Evropian.

Vonesat vijnë pas zbulimeve të kërkesave mashtruese të përhapura për fondet e BE-së.

Fermerët grekë gjithashtu dolën në rrugë gjatë fundjavës, duke bllokuar rrugët në disa zona. Protestat e fermerëve janë të zakonshme në Greqi, por trazirat e fundit shpërthyen për shkak të vonesave në pagesat e subvencioneve pas zbulimeve të kërkesave mashtruese për fondet e BE-së.

Skandali shkaktoi dorëheqjen në qershor të pesë zyrtarëve të lartë qeveritarë dhe mbylljen graduale të një agjencie shtetërore që merrej me subvencionet bujqësore.

Dhjetëra njerëz janë arrestuar në të gjithë Greqinë në javët e fundit për dyshimin e paraqitjes së kërkesave të rreme, në përgjigje të një hetimi të udhëhequr nga Zyra e Prokurorit Publik Evropian. Organi i pavarur i BE-së që merret me krimin financiar tha në fund të tetorit se hetimi ishte i lidhur me një skemë sistematike mashtrimi me subvencione në shkallë të gjerë dhe aktivitete pastrimi parash./S.K/KP/

Shqipëria po hedh hapin e radhës drejt modernizimit financiar me nismën kombëtare “Cashless Albania 2030”, që synon të rrisë ndjeshëm përdorimin e pagesave digjitale nga qytetarët dhe bizneset.

Programi parashikon ndërtimin e një infrastrukture të avancuar, të sigurt dhe funksionale, ku terminalet POS, platformat online, pagesat me QR dhe transfertat e menjëhershme të bëhen pjesë e përditshmërisë.

Në tryezën e prezantimit të programit, Ministrja e Ekonomisë, Delina Ibrahimaj, theksoi se objektivi kryesor është rritja e përdorimit të pagesave elektronike dhe reduktimi i informalitetit në ekonomi.

Sipas saj, është e domosdoshme koordinimi i të gjitha iniciativave ekzistuese dhe bashkimi i aktorëve publikë e privatë për të arritur objektivat e përbashkëta.

“Ka iniciativa të ndryshme të cilat është e nevojshme t’i kokrrizojmë dhe t’i bashkojmë forcat për arritjen e objektivit. Qëllimi i programit është rritja e përdorimit të pagesave, reduktimi i informalitetit, përmirësimi i edukimit financiar dhe krijimin e një infrastrukture efikase elektronike, ku të gjithë aktorët të punojnë sëbashku, duke përmendur këtu terminalet, platformën qeveritare të pagesave apo QR kodin e përbashkët që duhet të na unifikojë të gjithëve. Ne duhet të kemi një komunikim të të dhënave zyrtare që ta ndihmojnë procesin e politikbërjes”, theksoi ajo.

Ministrja Ibrahimaj nënvizoi disa prej synimeve kryesore të “Cashless Albania 2030”.

“Rritja e përdorimit të pagesave elektronike në të gjithë vendin; Reduktimi i informalitetit dhe rritja e transparencës; Përmirësimi i edukimit financiar për qytetarët dhe bizneset; Krijimi i një infrastrukture efikase elektronike, me terminale POS dhe platforma të unifikuara; 60% e pagesave të jenë digjitale deri në vitin 2030; 100% e institucioneve publike të pranojnë pagesa elektronike“.

Ajo bëri të ditur se janë hartuar 12 masa konkrete, ndër të cilat përfshihet edhe krijimi i Këshillit për Pagesat Digjitale, një strukturë koordinuese që do të formalizohet me urdhër të Kryeministrit dhe që do të mbikëqyrë zbatimin e programit. Ministrja bëri të ditur se Këshilli për Pagesat Digjitale pritet të ngrihet zyrtarisht brenda muajit dhjetor, ndërsa mbledhja e parë synohet të zhvillohet më 19 dhjetor. Nga janari 2026, pritet të nisë implementimi i disa prej masave të para.

“Është një këshillë që do të formalizohet me një urdhër kryeministri, por që ka kompetenca të limituara dhe bëhet me qëllim të zbatimit të këtij projekti të përbashkët. Brenda muajit dhjetor dum të ngremë zyrtarisht Këshillin për Pagesat Digjitale dhe duam të propozojmë që mbledhja e parë e Këshillit të jetë në datën 19 dhe nga janari i 2026, presim fillimin e implementimit të disa prej masave”, tha Ibrahimaj.

Në këtë tryezë, Ministri i Financave, Petrit Malaj, theksoi se hapat e parë drejt reduktimit të parasë fizike tashmë kanë nisur, në përputhje me prioritetet e qeverisë dhe Paketën Fiskale që pritet të miratohet.

“Kemi filluar dhe jemi në linjë me prioritetet e vendosura nga qeveria, me Paketën Fiskale që po kalon. Janë ndërmarrë hapat e parë për reduktimin e cash. Është një objektiv i qeverisë që deri në vitin 2030 të eliminojmë cash, në mënyrë që të bëjmë një formalizim më të madh të ekonomisë shqiptare”, u shpreh Malaj./S.K/KP/

Fondacioni “UBT Jim Xhema” ka shpallur konkursin për ndarjen e bursave të studimeve për nivelin Bachelor dhe Master në UBT. Ky konkurs vjen në përputhje me dispozitat ligjore dhe statutin e fondacionit, duke synuar të ofrojë mundësi konkrete për zhvillim akademik dhe profesional për studentët e shkëlqyer në Republikën e Kosovës dhe më gjerë.

Konkursi synon të mbështesë studentët e dalluar, të cilët kanë treguar rezultate të larta akademike dhe potencial për të kontribuar në zhvillimin e qëndrueshëm shkencor dhe kërkimor. Përmes bursave të ofruara, Fondacioni synon të fuqizojë kapacitetet e gjeneratës së re dhe të krijojë mundësi reale për zhvillim profesional në drejtimet bashkëkohore që ofron UBT.

Kriteret e aplikimit

Kandidatët për studime Bachelor duhet të bashkëngjitin:

• Dëshmi nga shkollimi i mesëm me notë mesatare së paku 4.5;
• Dokument që vërteton vlerësimin në vendet e para në gara të fushës së edukimit;
• Ekstraktin e lindjes;
• CV-në personale.

Kandidatët për studime Master duhet të bashkëngjitin:

• Diplomën e fakultetit (origjinale ose kopje të noterizuar) me notë mesatare jo më pak se 9.0;
• CV-në;
• Ekstraktin e lindjes;
• Dy rekomandime nga ekspertë të njohur të fushës.

Në të dy nivelet, komisioni përzgjedhës rezervon të drejtën të kërkojë dokumente shtesë për verifikim dhe plotësim të rastit.

Aplikimi realizohet vetëm online përmes linkut të dedikuar: LINKU I APLIKIMIT ONLINE

Kandidatët duhet të dorëzojnë të gjitha dokumentet e kërkuara — aplikacionet jo të plota nuk do të merren në shqyrtim.

Pas përfundimit të procesit të vlerësimit, lista e studentëve përfitues do të publikohet në uebfaqen zyrtare të Fondacionit “UBT Jim Xhema”.

Konkursi është i hapur nga 04 dhjetor 2025 deri më 15 dhjetor 2025, në ora 24:00.

Pas shpalljes së rezultateve, kandidatët që nuk janë përzgjedhur kanë të drejtë ankese brenda afatit prej 7 ditësh. Ankesat dorëzohen në arkivin e Fondacionit dhe shqyrtohen nga komisioni përkatës.

Ky konkurs paraqet një mundësi të jashtëzakonshme për të rinjtë ambiciozë që synojnë të avancojnë arsimimin e tyre në një institucion të akredituar, modern dhe të orientuar drejt inovacionit. Fondacioni “UBT Jim Xhema” vazhdon misionin e tij për mbështetjen e talenteve të reja dhe krijimin e kushteve për zhvillim akademik cilësor në Kosovë dhe rajon.