Dhjetorin e vitit që lamë pas një vajzë 17-vjeçare në Durrës humbi jetën, pasi u diagnostikua me meningjit. Ndërsa një 14-vjeçar është në spital me të njëjtën diagnozë. Prindërit e nxënësve të shkollës, thonë se kanë frikë për shëndetin e fëmijëve.

“Kërkojmë dizinfektimin e shkollës kaq. Ndjehemi të rrezikuar sepse fëmija e merr dhe e sjell në shtëpi. Marrim vesh që një vaksinë kushtoka 400 mijë lekë”, tha një prind.

“Fëmijët ndër vete kanë frikë. Djali më thotë që ka frikë të shkojë në shkollë”, shtoi një tjetër.

Nga ana tjetër, në vendin tonë nuk bëhen vaksina për meningjit. Në DRAP Durrës, punonjësi Urim Shehu thotë se prindërit nuk po i çojnë fëmijët në shkollë nga frika, por sipas tij nuk ka vend për panik.

“Ne jemi vënë në dijeni nga ana e shkollës për një mungesë të madhe të nxënësve gjatë procesit mësimor për shkak të rastit të meningjitit, i cili ka shkaktuar problematikë dhe shqetësim të madh tek prindërit dhe fëmijët. Për këtë arsye shumë prindër nuk i kanë çuar fëmijët e tyre në shkollë. Institucionet e shëndetit publik janë paraqitur në ambientet e shkollës dhe kanë konstatuar që situata nuk është alarmante. Sipas tyre është një rast i izoluar. Nuk kemi marrë një udhëzim që do të mbyllet shkolla. Sa i përket dezinfektimit të shkollës ky është një protokoll që ndiqet nga institucionet e shëndetit publik dhe nuk është një përgjegjësi direkte e Drejtorisë Rajonale të Arsimit Parauniversitar Durrës”, tha Urim Shehu.

Eugena Tomini, drejtore e ISHP-së shpjegon se në 5 vitet e fundit ka pasur vetëm 7 raste të dyshuara dhe vetëm 2 të konfirmuara me meningjit, gjë që nuk krijon kushte për alarm. Për sa i përket vaksinimit, Tomini thotë se po punohet, që deri në vitin 2030 të futet edhe meningjiti në protokoll.

Meningjiti – Infeksion inflamator që shkakton ënjtje të lëngut, membranave rreth trurit e palcës kurrizore që njihen si meninge. Më të zakonshmet simptoma përfshijnë dhimbje koke, ethe e ngurtësi në qafë, që shkaktohen nga inflamacioni.

Infeksionet virale janë fajtori kryesor, por shkaktohet dhe nga bakteret, parazitët apo kërpudhat. Edhe pse disa raste përmirësohen pa trajtim brenda disa javësh, meningjiti mund të jetë fatal. Prandaj, shpesh kërkohet trajtim i menjëhershëm me antibiotikë.  Trajtimi i hershëm, veçanërisht në rastet me origjinë bakteriale, mund të parandalojë komplikime serioze.