Kryeministri kinez Li Qiang u tha drejtuesve globalë në Pekin se Kina është e përgatitur për “tronditje të papritura” dhe i bëri thirrje atyre të kundërshtojnë proteksionizmin dhe të mbrojnë globalizimin.

Në Forumin e Zhvillimit të Kinës, ku morën pjesë CEO nga Apple, FedEx dhe Pfizer, Li paralajmëroi se “shkëputja dhe prishja e zinxhirëve të furnizimit do të thellonin krizat” dhe premtoi më shumë qasje në treg për investitorët e huaj.

Takimi u zhvillua mes tensioneve tregtare SHBA-Kinë, me Trump që ka vendosur tarifa shtesë 20% ndaj importeve kineze, ndërsa Pekini ka kundërpërgjigjur me masa të ngjashme. Li u takua edhe me senatorin amerikan Steve Daines, duke e quajtur bashkëpunimin SHBA-Kinë një “fitore për të dyja palët”.

Në forum u diskutuan sfidat tregtare dhe nevoja për fleksibilitet në zinxhirët e furnizimit. Drejtues të kompanive si IKEA dhe Boston Consulting Group theksuan rëndësinë e tregtisë së hapur dhe përshtatjes ndaj ndryshimeve teknologjike dhe gjeopolitike. Li theksoi se Kina do të mbetet një fuqi përgjegjëse dhe mbështetëse e globalizimit.

Dhjetëra mijëra njerëz protestuan në Stamboll dhe në qytete të tjera nëpër Turqi për natën e pestë radhazi të dielën, pasi rivali kryesor politik i presidentit të vendit, Recep Tayyip Erdogan, Ekrem Imamoglu u arrestua formalisht dhe u akuza për korrupsion.

Polica ka përdorur gaz lotsjellës, plumba gome dhe topa uji kundër protestuesve, të cilët po valëvitnin flamuj turq dhe po mbanin në duar pankarta pro-opozitës. Thuhet gjithashtu se ka pasur përleshje mes policëve dhe protestuesve.

Imamoglu, kryetar i Stambollit, pritej të zgjidhej gjatë një votimi më 23 mars si kandidat i Partisë Republikane Popullore (CHP) për zgjedhjet e ardhshme presidenciale në Turqi, të planifikuara për vitin 2028.
Por, Imamoglu dhe dhjetëra të tjerë, përfshirë politikanë, gazetarë dhe sipërmarrës u ndaluan më 19 mars si pjesë e një hetimi kundër korrupsionit.

Kryetari i njohur i Stambollit u arrestua formalisht më 23 mars dhe u akuza për “themelimin dhe menaxhimin e një organizate kriminale, marrjen e ryshfetit, përvetësimin” dhe vepra të tjera penale.

Imamoglu – i cili është anëtar i CHP-së, partisë kryesore opozitare kundër aleancës qeverisëse të Erdoganit – ka mohuar akuzat kundër tij, duke i përshkruar ato si “akuza dhe shpifje të paimagjinueshme”.

“Nuk do të përulem kurrë”, shkroi Imamoglu në X para se të arrestohej.

Arrestimi i Imamoglut shihet si akt i motivuar politikisht për ta larguar atë nga gara presidenciale. Megjithatë, qeveria këmbëngul se gjykatat e vendit janë institucione të pavarura.

Bashkëshortja e Imamoglut, Dilek Kaya Imamoglu, iu drejtua protestuesve pranë bashkisë së Stambollit në mbrëmjen e së dielës, duke u thënë se “padrejtësia” që ka përjetuar bashkëshorti i saj ka “prekur çdo ndërgjegje”.

Arrestimi i Imamoglut dhe të tjerëve ka përshkallëzuar më tej tensionet politike dhe ka nxitur protesta në mbarë Turqinë, me demonstrues që janë mbledhur në të paktën 55 provinca për të shprehur mbështetjen e tyre për të.
Ministri i Brendshëm i Turqisë, Ali Yerlikaya, shkroi në rrjetet sociale se mbi 340 persona u arrestuan gjatë protestave në qytetet kryesore.

“Nuk do të ketë tolerancë për ata që kërkojnë ta prishin rendin shoqëror, ta kërcënojnë paqen dhe sigurinë e popullit dhe mbjellin kaos e provokime”, tha ai, duke përmendur qytetet, mes të cilëve Stambolli, Ankaraja, Izmiri, Adana, Antalia, Çanakale, Eskishehiri, Konia dhe Edrene.

Megjithatë, kryetari i Bashkisë së Ankarasë, Mansur Yavas, i cili është gjithashtu anëtar i CHP-së, u tha gazetarëve të dielën se burgosja e kolegut të tij është turp për sistemin gjyqësor.

Kryetari i CHP-së, Ozgur Ozel, e dënoi arrestimin e Imamoglut si “përpjekje për grusht shteti kundër presidentit tonë të ardhshëm”.
Disa vende evropiane kanë shprehur shqetësim për zhvillimet në Stamboll, duke thënë se kanë frikë për pasojat ndaj demokracisë pas këtij veprimi.

“Arrestimi i kryebashkiakut është thellësisht shqetësues”, tha presidentja e Komisionit Evropian, Ursula von der Leyen.

“Turqia duhet t’i respektojë vlerat demokratike, veçanërisht të drejtat e zyrtarëve të zgjedhur”, shtoi ajo.

Imamoglu kryeson ndaj Erdoganit në disa sondazhe. Erdogani e ka arritur kufirin e dy mandateve si president, pasi më parë ka shërbyer si kryeministër i vendit.

Nëse ai kërkon të garojë përsëri, siç pritet, duhet ose të shpallë zgjedhje të parakohshme ose ta ndryshojë Kushtetutën./REL/

Numri i të vrarëve në Gaza ka kaluar shifrën e 50 mijë që nga nisja e luftës mes Izraelit dhe Hamasit më 7 tetor 2023, ka njoftuar Ministria e Shëndetësisë në territor.

Vetëm në 24 orët e fundit janë regjistruar 41 viktima të reja, duke e çuar totalin në 50,021. Sipas OKB-së, shumica e viktimave janë gra dhe fëmijë, ndërsa mijëra të tjerë besohet se janë ende nën rrënoja.

Izraeli ka vënë në dyshim shifrat e raportuara, duke pretenduar se përfshijnë edhe vdekje natyrore dhe se Hamasi përdor civilët si “mburoja njerëzore”.

Megjithatë, Kombet e Bashkuara dhe Departamenti Amerikan i Shtetit i konsiderojnë të besueshme raportimet nga Ministria e Shëndetësisë në Gaza.

Luftimet u intensifikuan pas përfundimit të armëpushimit dy-mujor, me Izraelin që ka nisur sulme të reja ajrore dhe operacione tokësore.

Kryeministri Benjamin Netanyahu ka deklaruar se kjo është “vetëm fillimi”, ndërsa ministri i Mbrojtjes, Israel Katz, ka urdhëruar ushtrinë të marrë më shumë zona në Gaza dhe të krijojë “zona sigurie” për mbrojtjen e komuniteteve izraelite.

Situata humanitare mbetet alarmante, me mbi 2 milionë palestinezë të zhvendosur dhe një sistem shëndetësor në kolaps. Ndihmat humanitare vazhdojnë të jenë të bllokuara, duke çuar në përkeqësimin e krizës dhe rrezikun e një urie masive.

Negociatat për një armëpushim të ri kanë ngecur, me Hamasin që kërkon zbatimin e marrëveshjes së janarit, e cila përfshinte tërheqjen e plotë të Izraelit nga Gaza. Izraeli, nga ana tjetër, ka rifilluar sulmet, duke akuzuar Hamasin për refuzimin e dy propozimeve të ndërmjetësuara nga SHBA.