Policia në kryeqytetin e Argjentinës, Buenos Aires, hodhi gaz lotsjellës dhe topa uji për të shpërndarë protestuesit jashtë Kongresit, përpara se të jepnin miratimin për reformat e shkurtimit të buxhetit në Senatin e vendit të mërkurën.

Demonstruesit të cilët thonë se masat do të dëmtojnë miliona argjentinas hodhën bomba me benzinë ​​dhe gurë. Një numër njerëzish u raportuan të plagosur, me mediat lokale që e përshkruan skenën si një “fushë beteje”.

Paketa e reformës, e propozuar nga presidenti i krahut të djathtë, Javier Milei për të ringjallur ekonominë, përfshin shpalljen e gjendjes së jashtëzakonshme ekonomike, uljen e pensioneve dhe zvogëlimin e të drejtave të punës. Masat kundërshtohen nga partitë politike të majta, sindikatat dhe organizatat shoqërore.

Por mocioni, i cili fillimisht u barazua 36-36 në Senat, u miratua paraprakisht të mërkurën pasi kreu i dhomës, Zëvendëspresidentja Victoria Villarruel, prishi barazimin. Projektligji me 328 artikuj tani do të shqyrtohet pikë për pikë përpara se të pritet miratimi i plotë.

Përpara miratimit të projektligjit në Senat, protestuesit brohorisnin: “Vendi nuk është në shitje, vendi mbrohet”, “si mundet një kryetar shteti ta urrejë shtetin?” Përleshjet shpërthyen kur protestuesit u përpoqën të shkonin drejt Kongresit përmes gardheve, duke hedhur gurë mbi policinë.

Më shumë se 30 zjarrfikës zbarkuan të enjten në mëngjes në Erbil të Kurdistanit për të shuar një zjarr masiv që përfshiu rafinerinë lokale të naftës.

Forcat civile të mbrojtjes thanë se një shpërthim i papritur në cisternën e naftës brenda rafinerisë stimuloi përhapjen e flakëve me shpejtësi në ambientet përreth. Incidenti ndodhi në zonën e Al-Kuverit.

“Isha afër rafinerisë kur dëgjova zhurmën e fortë të shpërthimit,” tha një dëshmitar i plagosur, ndërsa shumë persona të tjerë në orarin e punës paraqitën probleme të frymëmarrjes.

Zona ku u përhapën flakët shërben për nxjerrjen dhe rafinimin e naftës. Ndërtimi i tyre kompleks bëri që operacionet e shuarjes të zgjasin disa orë. Në muajin tetor një zjarr përfshiu edhe fabrikën e asfaltit në qytezën e Arbatit, duke i marrë jetën një punëtori. Ndërsa të dielën, në një fshat në jug të Sulajmanit vrau rreth 300 bagëti.

Sipas të dhënave nga Policia Rajonale e Kurdistanit, në vitin 2022 në vend u raportuan 7.546 incidente me zjarrin./UBTNews/

Shtetet e Bashkuara vendosen në listën e sanksioneve 300 subjekte të reja biznesi, përfshirë një kompani ruse me bazë në Beograd.

Sipas faqes së Departamentit të Thesarit të SHBA-së, në listë është edhe kompania “BASSIRE GROUP DOO”.

Kompania është themeluar në shkurt të vitit 2023 dhe është e angazhuar në tregtinë me shumicë të kompjuterëve, pajisjeve kompjuterike dhe softuerëve.

Drejtori dhe pronari i kompanisë është shtetasi rus, Nikolai Levin.

Në shpjegimin e Thesarit thuhet se qëllimi i sanksioneve është t’i mohojnë Rusisë qasjen në produktet dhe shërbimet e nevojshme për të ruajtur prodhimin ushtarak për luftën në Ukrainë.

Ndër subjektet e sanksionuara janë kompani nga Kina, Emiratet e Bashkuara Arabe dhe Turqia.

Më shumë se 4000 subjekte dhe individë rusë janë nën sanksionet amerikane, me qëllim që të ndalin fluksin e parave dhe armëve drejt Rusisë.

Sanksionet u njoftuan përpara mbërritjes së presidentit amerikan, Joe Biden në Itali për një takim të liderëve të G7.

Vendet e G7-ës, Kanadaja, Franca, Gjermania, Italia, Japonia, Britania e Madhe dhe Shtetet e Bashkuara, do të bisedojnë për mënyrën se si t’i përdorin përfitimet nga asetet e ngrira ruse në Perëndim, për ta ndihmuar Kievin financiarisht. /UBTnews/

Shërbimi sekret kombëtar gjerman ka raportuar një rritje të vazhdueshme të numrit të ekstremistëve të krahut të djathtë në vend, ndërsa Gjermania përballet me pasojat e zgjedhjeve evropiane, ku partia e ekstremit të djathtë, Alternativa për Gjermaninë (AfD), fitoi vendin e dytë.

“Ne po shohim një rritje të re në numrin e ekstremistëve të dhunshëm të krahut të djathtë”, deklaroi Thomas Haldenwang, kreu i shërbimit sekret kombëtar.

Agjencia e tij planifikon të paraqesë raportin e saj vjetor për vitin 2023 javën e ardhshme. Rritja e regjistruar në vitin 2022, prej rreth 14,5%, që përbën rreth 38,800 persona, është kryesisht për shkak të faktit se për herë të parë disa anëtarë të Alternativës për Gjermaninë (AfD) janë monitoruar si një grup i njohur ekstremist i djathtë.

Sipas shërbimeve, rreth 10,200 anëtarë të partisë dhe krahut rinor të saj mund të klasifikohen si ekstremistë të krahut të djathtë. Haldenwang theksoi se rritja e fundit e ekstremizmit të krahut të djathtë mund të gjurmohet në disa lëvizje të veçanta dhe tendencat ekstremiste brenda partisë AfD kanë qenë në rritje që nga marsi 2021, kur shërbimet e klasifikuan AfD-në si një grup të dyshuar ekstremist./UBTNews/