“Djalit në kuti” më në fund është identifikuar.

Policia të enjten identifikoi një djalë i cili kishte vdekur në një kuti në Filadelfia 65 vjet më parë si 4-vjeçari, Joseph Augustus Zarelli, viktimë e asaj që policia thotë se është një nga vrasjet më të vjetra, të pazbardhura të qytetit.

Identifikimi, i bërë përmes analizës së ADN-së, përfaqëson një përparim të hetuesve për rastin, i cili daton në fund të shkurtit 1957, kur fëmija u zbulua i mbështjellë me një batanije brenda një kutije kartoni, duke shfaqur dëshmi të traumës, tha Komisionerja e Policisë së Filadelfias, Danielle Outlaw.

Rasti tërhoqi një interes “të jashtëzakonshëm” publik, u tha Outlaw gazetarëve. Por askush nuk doli kurrë të pretendonte Joseph si fëmijën e tyre dhe identiteti i tij mbeti një mister pavarësisht përpjekjeve të shumta për ta identifikuar atë gjatë viteve.

Kjo ndryshoi këtë javë kur policia njoftoi se e kishte identifikuar me sukses fëmijën përmes punës detektive dhe me ndihmën e gjenealogëve gjenetikë – një fushë që vitet e fundit ka çuar në zbulime të shumta.

“Për gjashtëdhjetë e pesë vjet, historia e fëmijës së panjohur të Amerikës ka përndjekur këtë komunitet, Departamentin e Policisë së Filadelfias, kombin tonë dhe botën”, tha Outlaw.

Zyrtarët shpresojnë se teknikat e përdorura për të identifikuar Joseph pas kaq shumë vitesh do t’i ndihmojnë ata në raste të tjera të së kaluarës dhe ato në të ardhmen; zbulimi “sjell shpresë se nuk do të ketë më kurrë një viktimë të paidentifikuar të vrasjes në qytetin e Filadelfias”, tha Outlaw.

Megjithatë, ndërsa zyrtarët këtë javë po festojnë identifikimin e Joseph, hetimi se kush ishte përgjegjës për vdekjen e tij vazhdon.

“Ne kemi dyshimet tona se kush mund të jetë përgjegjës, por do të ishte e papërgjegjshme nga ana ime t’i ndaj këto dyshime pasi ky mbetet një hetim penal aktiv dhe i vazhdueshëm” tha kapiteni Jason Smith i njësisë së vrasjeve të Policisë së Filadelfias.

“Ne nuk mund të bëjmë një arrestim”, tha Smith. “Ne kurrë nuk mund të bëjmë një identifikim (të vrasësit). Por ne do të bëjmë çmos për të provuar”.

Policia nuk pranoi të identifikonte prindërit e fëmijës, por treguan se të dy ishin të vdekur. Megjithatë, Joseph ka vëllezër e motra që jetojnë ende.

Ndërkohë, Vidocq Society, një klub për zgjidhjen e krimeve në Filadelfia që ka qenë ndër kampionët e rastit ndër vite, po përgatitet të vendosë më në fund një emër mbi varrin e fëmijës.

“Joseph Augustus Zarelli nuk do të jetë më ai djalë në kuti” tha Bill Fletcher i Shoqatës Vidocq të enjten, “dhe nuk do të jetë më i panjohur”./UBTNews/